بلوچ اسٹوڈنٹس ایکشن کمیٹی تُربت ہنکین ءِ ہنکینی لس دیوان برجم دارگ بوتگ۔

بلوچ اسٹوڈنٹس ایکشن کمیٹی

بلوچ اسٹوڈنٹس ایکشن کمیٹی تُربت ہنکین ءِ ہنکینی لس دیوان برجم دارگ بوتگ۔ سعد بلوچ ہنکینی کارمستر ءُ امیر بلوچ کارگشاد گچین کنگ بوتگ اَنت۔

بلوچ اسٹوڈنٹس ایکشن کمیٹی تُربت ہنکین ءِ ہنکینی لس دیوان ہنکینی کارمستر نسرین بلوچ ءِ سروکی ءَ برجم دارگ بوتگ۔ دیوان ءِ تہ ءَ مہمان بنجاہی ھالرسانی کارگشاد فہد بلوچ بوتگ۔ دیوان ءَ بنجاہی سرکیولر، ہنکینی اھوال ءُ جائزہ، نگدی نشست، گل کاری، ہندی ءُ میان اُستمانی سیاسی جاورھال ءِ سرھالاں ہوار آؤکیں گامگیج ءِ سرھال ہوار بوتگ اَنت کہ آئی ءِ تہ ءَ گوستگیں ہنکینی کابینہ ھلاس کنگ ءُ پہ نوکیں ہنکینی کابینہ ءِ واستہ سنگت گچین کنگ بوتگ اَنت۔

دیوان ءَ بنجاہی سرکیولر وانگ بوتگ کہ آئی ءِ سر ءَ سنگتانی جُست ءُ باوست ءَ پد ہنکینی اھوال ءُ جائزہ وانگ بوتگ۔ ہنکین ءِ کلیں سنگتاں گوں دلجمی ءَ بہر زُرتگ ءُ باوست کتگ۔ دیمترا سنگتاں نگدی بہر ءَ وتی وتی نبشتہ کُتگیں نگدی ڈرافٹ ونتگ اَنت ءُ وتی نگد ایر کتگ اَنت۔ سنگتاں نگدی بہر ءَ نگد کنگ ءَ پیسر نگد ءُ نگد کنگ ءِ ارزشت ءِ سر ءَ تران کتگ ءُ گشتگ کہ نگد ھما ساچستی عمل اِنت اود ءَ ھمک مردم نہ تہنا وتی نزوری، کوتاہی ءُ ردیاں پہمیت یاکہ چہ آواں آشنا بیت بلکیں آوانی گرگ ءُ توجیل سازی ءَ وت ءَ علمی ءُ عملی رنگ ءَ تیار کت کنت۔ اے انسانی نفسیات ءِ بہرے کہ آ وتی زند ءِ گوازینگ ءِ تہ ءَ جتائیں پڑاں سیادی دارگ ءِ جہد کنت ءُ جتائیں پڑاں ردی کنت، ءُ ردی ھما مردم کنت کہ عمل ءِ تہ ءَ بہ بیت، آ مردم کہ عمل ءِ تہ ءَ مہ بیت چہ آئی نیمگ ءَ ردی ءُ نزوری اوں نہ بیت انت۔ پمیشکہ اے راستی یے کہ انسان مدام چہ وتی ردی ءُ نزوریاں دربارت۔ بلے ھمیشانی تہ ءَ سیاسی سنگتے اے ردیاں کنگ ءُ پدا ایشانی پہمگ ءَ ہوار ایشانی ھوالہ ءَ نوکیت ءِ شوھازگ ءُ سازگ ءَ جہد ءُ کوشست کنت۔ گڑا نگد کنوک ھم تہنا نزوریاں مہ گش ایت بلکیں آوانی گر ءُ چیل کنگ ءِ ھاتر ءَ وتی ھیالاں ھم ایر بہ کنت۔ سنگتاں گشتگ کہ مارا ھما شئے وتی اندر ءَ جاھ دئیگی ایں کہ آ مارا مئے ردیاں تہنا ٹک ءُ پیش مہ کنت، بلکیں دیمتر ءَ مئے ھمے یکیں ردیاں دوبر نہ کنگ ءِ وسیلہ بہ بیت۔

سنگتاں نگد کناں ءَ گشتگ کہ مروچی بلوچ سیاست ءِ سر ءَ نگدی چمشانکے دئیگ ءَ پیسر ءَ مارا بلوچ ءِ راجمانی پتر پہمگ لوٹیت، چیاکہ ما ھمے راجمان ءَ گوں بندوکیں سیاسی باسک ایں ءُ گوں ھمے چاگرد ءِ سیاسی پروگرام ءُ لوٹاں بندوک ایں۔ مئے ھمک ھما عمل کہ مئے نزوری ءُ کوتاہیانی سبب جوڑ بوگ ءَ اَنت آ مئے چاگردی تک ءَ ودی بوتگیں نفسیاتی شئے اَنت۔ نگد مئے سر ءَ پمیشکہ بیت انت کہ ما چاگرد ءَ چوں چارگ ءُ سرپد بوگ ءَ ایں، چیاکہ سیاسی کارست چہ چاگرد ءَ ھیل کنگ ءَ پیسر چاگرد ءَ سرپد بوگ ءِ کوشست کنت ءُ چاگرد ءَ سرپد کنت۔ ھر ھما سیاسی عمل کہ چاگردی سلکاری، نزوری ءُ ھما غیرسیاسی ماحول ءَ داشت مہ کنت گڑا آ سیاسی چاگردے بوت نہ کنت، اگاں آ سیاسی چاگردے نہ انت گڑا اود ءَ سیاسی عمل بوگ تہنا وابے بیت ءُ پشت کپیت۔ پمیشکہ مارا سیاسی ورنا ءُ سیاسی گل ءِ باسکے ءِ بستار ءَ اے نزوری چہ چاگردی چست ءُ ایراں بگر داں وتی کسان کسانیں پیسلہ ءُ پروگرام ءَ بیا سرپد بوگی اَنت ءُ ایشانی دارگ ءُ توجیل کنگ ءَ وتی مستریں بہرشتے دئیگی ایں۔ داں ما بلوچ راجمان ءَ یک بودناکیں چاگردے ودی کنگ ءَ پَشت مہ کپ ایں۔کلیں سنگتانی گوں دلجمی ءَ نگد کنگ ءَ پد اے سرھال بند کنگ بوتگ۔

دیمتری سرھال گل کاری بوتگ کہ سنگتاں گل کاری ءِ ھوالہ ءَ وتی وتی نبشتہ کتگیں ڈرافٹ ونتگ ءُ گل ءُ ہنکین ءِ نوکتریں کار ءُ پروگرامانی ھوالہ ءَ وتی شوکیں شُور ءُ سلاہ داتگ اَنت۔ سنگتاں تربت ہنکین ءِ دیمروئی ءَ ہوار کیچ ءِ ایندگہ جاھاں سیاسی چاگردے جوڑ کنگ ءَ وتی شور ءُ سلاہ ایر کتگ اَنت۔ گل ءِ نوکیں پروگرامانی واستہ سنگتانی دلجمیں باوست ءَ پد ساڑی ایں بنجاہی سنگت ءَ تران کتگ۔
بنجاہی سنگت ءَ تران کناں ءَ گشتگ کہ مروچی ہنکین ءِ اے مزنیں دیوان کہ لس مجلس ءِ نام ءَ زانگ بیت اے وتی تہ ءَ ہنکین ءِ نزوریانی پہمگ، شُور ءُ سَلاہانی ایر کنگ ءُ گل ءِ کار ءُ پروگراماں گامے دیم ءَ برگ ءِ واستہ مستریں ءُ ارزشت داریں دیوان اِنت۔ یک بنجاہی سنگتے ءِ بستار ءَ مارا وشّی بیت اِنت کہ مئے سنگت شوکیں ءُ گوں کمیٹڈیں کردے ءَ وتی گل ءِ کاراں دیم ءَ بران اَنت۔ کیچ ءِ وڑیں ہندے ءَ کہ مہلوک جتائیں چاگردی نادراہی، سیلکاری، نشہ، بے وانندگی، بے جوہری، مورل کرپشن ءُ کوچرائیانی آماچ اَنت اودا لہتیں ورنایانی پہ شعور، پگر، زانت ءُ علم ءَ کار کنگ وت ستا کرزیں عملے۔ اے مئے سنگتانی زانت ءُ سرپدی انت کہ پہ بلوچ راجمان ءَ راجمانی دیمروئی ءَ مدام ساڑی اَنت ءُ کارکنگ ءَ اَنت۔ مروچی بلوچ چاگرد ءِ تہ ءَ یک ہنچین نادراہی یے ءَ جاہ کتگ کہ سرجمیں مہلوک ءَ گوں وت ءَ پتایان اِنت، آ بے جوہری ءُ دم برگ انت۔ ھمک مردم ءَ گندئے داں سما بیت کہ ایش انچش دم برتگ کہ چہ وتی چاگرد ءَ دُور تچان انت۔ وانگی ادارہ ھاس اسکول ءُ کالج نہ بوگ ءِ برابر ءَ اَنت، ھمد ءَ مزن شاہدربرجاہ بس ھما وھد گوازینگ ءِ لائن ءَ اوشتوک انت، وانگ تہنا پہ یک چکّاس یاکہ ٹیسٹے ءَ بوگ ءَ انت، مچانکی پگر اتکگ گوں زاتی نپ ءَ بندوک اِنت۔ اے وڑیں چاگردے ءِ تہ ءَ زند گوازینگ گران بیت، بلے اگاں سیاسی عمل ءُ سیاسی تربیت ءُ پروگرام نہ بوت گڑا چاگرد ماں مرگ ءِ ھرجاں بُوان بیت، ءُ وھدے کئیت کہ اِد ءَ علمی، پگری ءُ شعوری ھوالہ ءَ مارا مردم دست نہ کپیت۔ پمیشکہ مئے کرد تہنا گوں یک سرکلے ءَ بندوک مہ بیت ما وتی چاگرد ءَ پد جنان ءَ اود ءَ یک زانشتی ماحولے جوڑ کنگ ءَ وت ءَ جاڑیگ بہ کن ایں۔ داں کیچ ءَ انچیں کارست جوڑ بہ بیت کہ آ پہ وتی چاگرد ءَ وتی بود ءُ لائکی ءِ کچ ءَ کردے پیلو کنگ ءَ تیار بوت بہ کن انت۔ آ چہ علم، زانت، پگر ءُ شعور ءَ ہنچش سر ریچ بہ بنت کہ راجمان ءِ تہ ءَ آوانی کرد مھلوک ءِ دیم ءِ سھرا بہ بیت، گڑا ما گشت کنیں کہ ما یک سیاسی ءُ زانشتی عملے کنگ ءَ ایں کہ اود ءَ مردم چہ چاگردی نادراہی ءُ سیلکاریاں ءَ دُور بوان ءَ راجی ءُ چاگردی کارست بوگ ءِ نیمگ ءَ روان اَنت۔ مارا وتی ھمے کرد نہ تہنا درجنگی ایں بلکیں گوں شوکیں ترزاں ءُ گوں شیواری ءَ پیلو کنگی ایں، چیاکہ اے مئے سیاسی ءُ راجی زمہ واری اِنت۔ کلیں سنگتانی گپ ءُ باوست ءَ پد اے سرھال بند کنگ بوتگ۔

گڈی سرھال آؤکیں گامگیج اَت، آؤکیں گامگیج ءِ تہ ءَ گوستگیں ہنکینی کابینہ ھلاس کنگ بوتگ ءُ پہ آوکیں کابینہ ءَ سنگت گچین کنگ بوتگ اَنت، آہانی تہ ءَ ہنکینی کابینہ ءِ جار جتگ کہ آئی ءِ تہ ءَ کارمستر سعد بلوچ، کمک کارمستر سُدیس بلوچ، کارگشاد امیر بلوچ، کمک کارگشاد فیصل بلوچ ءُ اھوالکاری کارگشاد سعد بلوچ ہوار اَنت۔ کابینہ ءِ جار جنگ ءَ پد بنجاہی سنگت ءَ نوکیں کابینہ سوگند داتگ ءُ دیوان چہ نوکیں ہنکینی کارمستر ءِ رزا ءَ بند کنگ بوتگ۔

بنجاہی جارکش: بلوچ اسٹوڈنٹس ایکشن کمیٹی