بلوچ اسٹوڈنٹس ایکشن کمیٹی کراچی ہنکین ءِ ہنکینی لس دیوان برجم دارگ بوتگ۔
بلوچ اسٹوڈنٹس ایکشن کمیٹی کراچی ہنکین ءِ ہنکینی لس دیوان برجم دارگ بوتگ۔ شمس بلوچ کارمستر ءُ اکمل بلوچ کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی کراچی ہنکین ءِ لس دیوان کارمستر شمس بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بُنجاہی کُمک کارگُشاد تنویر بلوچ، بُنجاہی ھالرسانی کارگُشاد فہد بلوچ ءُ بُنجاہی پتر ءِ باسک نادر بلوچ بوتگ اَنت۔
دیوان ءَ بُنجاہی سرکیولر، گوستگیں ہنکینی اھوال، نگدی بھر، گلکاری ءُ ھندی ءُ میاں اُستمانی سیاسی جاورھال ءِ بُنگپانی سرءَ دلجمیں باوست ءَ پد آوکیں گامگیج ءَ گوستگیں ہنکینی کابینہ ھلاس کنگ ءُ پہ نوکیں کابینہ ءَ سنگت گچین کنگ بوتگ اَنت۔
سنگتاں جتائیں بنگپانی سر ءَ گپ ءُ باوست کت، ءُ نگدی بہر ءَ تران کنان ءَ گُشت، سیاسی ادارہ ءُ گلانی تہ ءَ اگاں یک چیزے کہ آ سرجمیں ادارہ ءَ مُھکم داریت، آ اداراتی لیکہ اِنت۔ بزاں ادارہ ءِ ڈسپلین گوں ہمے لیکہ ءَ بندوک اِنت کہ آئی ءِ بنیات ءَ سرجمیں ادارہ جُنزیت۔ انچوشکہ بلوچ نودربر سیاست ءُ سیاسی گردانک ءَ بہ چکاسیں گُڑا سما بیت کہ مئے گردانک ءَ اداراتی ڈسپلین، بزاں لیکہ ءِ گشینتگیں بنیات ءَ جُنزگ، نزور اِنت۔ بازیں وھد ءُ جاوراں پہ زانت یا نازانتی ءَ بازیں انچیں روشت ءُ عمل گندگ بنت کہ آ ھچ پیم ءَ مئے لیکہ ءِ بنیات ءَ گشینتگیں ڈسپلین ءَ سیادی نہ دار اَنت۔ آ ہمے گشینتگیں رھبند ءِ رِدءَ سیاسی پروگرام ءِ پابندی بہ بیت، وتی ڈُبہ ءِ کارانی گوں دلجمی ءَ کنگ بہ بیت یاکہ وانگ ءُ ایندگہ چست ءُ ایر بہ بنت، کُل وڈے نہ وڈے ءَ پشت کپگ ءَ اَنت۔
انچوشکہ ما ڈسپلین ءِ بابت ءَ ھبر ءَ ایں گُڑا آئی ءِ یک مستریں بھرے زمہ واری ءِ نفسیات اِنت۔ بزاں ہمُک بلوچ ورنا ءُ ھاس وانندگیں تبک وت ءَ چاگردی چست ءُ ایر ءُ سیاسی پروگرام ءِ زمہ وار سرپد بہ بیت ءُ آئی ءِ تہ ءَ وتی بہرشت ءَ بہ دنت۔ بلے چوش گُوشگ رد نہ بیت کہ بلوچ راجمان ءَ زمہ واری ءِ نفسیات نزور اِنت ءُ آئی ءِ نزوری ءِ سبب ءَ بازیں ورنا ءُ سنگتے مُچانکی ڈُبہ ءَ زُرت نہ کنت۔ چوشکہ راجمانی دیمروئی تہنا چیزے عملاں گوں بندوک نہ بیت، ہمے واستہ بلوچ نودربراں لوٹیت کہ آ وتی اندر ءَ زمہ واری ءِ مارشت ءَ ودی کنگ ءَ ھوار وت ءَ راجی ءُ مُچانکی لیکہ ءِ پابند بہ کن اَنت۔
سیاسی ادارہانی تہ ءَ یک شئے یے کہ آ سنگت ءُ باسکاں گیش مُھکم ءُ توانا کنت، آ اداراتی جوابدہی اِنت۔ اداراتی پیسلہ ءُ پروگرامانی پہ وھد سرجمی ءَ بہ گر داں ہمُک روچی ایں چست ءُ ایر کُل جوابدہی ءِ برورد ءَ پہ وھد سرجم بوت کن اَنت۔ بلوچ راجمان ءَ نندوک ءُ سیاسی نپراں پہ اژدری اِنت کہ آ وتی کش ءُ گور ءَ تُرندیں جوابدہی ءِ رواج ءِ ودی بہ کن اَنت داں ما وتی چپ ءُ چاگرد ءَ نزور ءُ تاوانباریں روشت ءُ عملاں داشت بہ کنیں۔
گلکاری ءِ تہ ءَ سنگتاں وتی ھیالاں ایر کنان ءَ گُشت، مرچیگیں وھد ءَ بلوچ نودربر کہ یک نیمگے چہ زر ءُ مالی جیڑہ ءُ تنگدستی ءِ سبب ءَ وانگ ءَ دُور اَنت ءُ دومی نیمگ ءَ اگاں کسے پہ وانگ ءَ کالج ءُ شاہ دربرجاہاں سر بیت، آ جُتائیں پندل ءُ گُپتمانانی وسیلہ ءَ چہ راجی سنچ ءُ سما ءَ دُور دارگ بیت۔ باید وَ ہمیش اِنت کہ بلوچ ءِ ہمُک وانندگیں تبک پہ راجی دیمروئی ءَ وتی کِرد ءَ پیلو بہ کنت، بلے ہمے پندلانی سبب ءَ آ تہنا داں وتی زات ءَ مھدود اَنت۔ اے جاوراں کہ بازیں نودربرے چہ وانگجاہاں دُور اَنت گُڑا نودربر ادارہ ءِ بستار ءَ مارا لوٹیت کہ ما آھاں وانگ ءِ نیمگ ءَ آرگ ءَ پہ وتی کِرد ءَ پیلو بہ کنیں، دانکیں بلوچ پدریچ چہ الم ءُ زانت ءِ جُہلیں زِرا آژنا بہ بیت۔
استیں دور ءِ ھساب ءَ مئے گورا ٹیکنیکل ءُ جدیدیت ءِ باوست سک دیر اِنت کہ اتکگ بلے نی مارا لوٹیت کہ ما ہمے ٹیکنیکل کاراں عملی دروشم ءَ در بہ بریں۔ نہ تہنا در بہ بریں بلکیں آھاں پہ وتی لوٹاں کارمرز بہ کنیں۔ سیاسی سنگتے ءِ بستار ءَ مارا تاکتوریں علمے ءِ واھند بوگی اِنت، دانکیں ما وتی باندات ءِ پیسلہ ءَ شیواری ءَ گوں کُت بہ کنیں۔ اشاں ابید ہرچیزے کہ وانیں چہ آھاں پہ وت الم چیزے بہ کشیں ءُ عمل ءِ بہر بہ کنیں۔ پرچاکہ داں ہما وھد ءَ مئے وانگ سیتمند نہ بیت، وھدے ما وتی ونتگیناں عمل ءِ بہر کُت مہ کنیں۔
کُلیں سرھالانی سرءَ گوں دلجمی ءَ گپ ءُ تران ءَ پد گُڈی بُنگپ ءِ تہ ءَ گوستگیں کابینہ ھلاس کنگ بوت ءُ پہ نوکیں کابینہ ءَ سنگت گچین کنگ بوت اَنت۔ گچین بوتگیں سنگتانی تہ ءَ شمس بلوچ ہنکینی کارمستر، جہانزیب بلوچ کُمک کارمستر، اکمل بلوچ کارگُشاد، شاھدہ بلوچ کُمک کارگُشاد ءُ مزیر بلوچ ھالرسانی کارگُشاد گچین کنگ بوت اَنت۔ دیوان ءِ گُڈسرءَ بُنجاہی سنگت ءَ نوک گچین بوتگیں سنگت سوگند دات ءُ دیوان ءِ آسری ءِ جار جنگ بوت۔
بنجاہی جارکش: بلوچ اسٹوڈنٹس ایکشن کمیٹی
