بلوچ اسٹوڈنٹس ایکشن کمیٹی اوتل ھنکین ءِ نیمگءَ چہ یک گرینڈ زانشتی دیوانے ھنکینی کارمستر سرور بلوچ ءِ سروکی ءٙ برجم دارگ بیتگ۔ دیوانءِ ھاسیں مہمان بنجاہی کماش سنگت شبیر بلوچ بیتگ۔
دیوان ءِ سرھال
The Culture of Knowladge for the National Consciousness
دیوان ءِ ترانکار: بنجاہی کماش سنگت شبیر بلوچ
دیوان ءِ تہ ءٙ سنگت تران کنان ءٙ گُشت کہ اے سرھال چیئرمین ماوزے تنگ ءِ کتاب (سلیکٹڈ ورکس آف ماوزے تنگ)ءَ چہ زیرگ بیتگ۔ اے کتاب ءِ یازدہ بھرانت۔ اے دیوان سئے بھر ءِ تہ ءٙ بیت انت، اولی بھر ءٙ ما علم ءُ عمل ءِ سرءَ باوست کنیں۔ علم ءُ عمل ءِ میان ءٙ باوست ءٙ چہ پیش مارا زانگی انت کہ علم کجام ھم جاور ءِ مادی پیداوار گوں بندوک انت ۔ یعنی کہ کجام ھم بنی آدم علم دربرگ لوٹیت گڑا آ آھی ءِ واستہ المی انت کہ آ وتی چاگرد ءِ مادی جاوراں سرپد بہ بیت۔ چیا کہ علم ءِ بنکی شے عمل ءَ گوں بندوک انت، دگنیا ءِ زانتکار اے گپ ءِ منوگر انت کہ علم کدی ھم عمل ءَ چہ گستا کنگ نہ بیت ءُ علمءِ لیکہ ہما وھد ءٙ مھکم بیت کہ دومی نیمگ ءٙ عمل ھم ھوار بہ بیت ۔علم ءِ مستریں کار اش انت کہ لس مھلوک ءِ احساس ءٙ آھی ءِ پگر ءِ تہ ءٙ سر بہ کنت ءُ ھمے پگر آھی ءِ سرشونی وت کنت اِنت۔
کجام ھم مردمے اگا گشیت کہ من وتی چاگردی جاور ءٙ مٹ کنگ لوٹاں گڑا آھی ءِ واستہ المی انت کہ آ عملی جھدءَ گوں بندوک بہ بیت۔ یک نیمگےءٙ چیئرمین ماؤ احساسی علم ءِ گپ ءٙ جنت ءُ گشت کہ احساسی علم اش انت کہ ماں چیزاں چارگ ءٙ ایں ءُ مارگ ءٙ ایں ءُ اے تہنا مئے احساس ءٙ مھکم کنگ ءٙ انت، اشیءِ یک شری ئے اِش انت کہ اے تہنا جیڑہ ءٙ شون دنت ءُ بلے ھچ کُرت نہ کنت۔ دومی نیمگ ءٙ عقلی علم اِنت کہ انسان ءِ کجام ھم شے ءِ بابت ءٙ وتی زھن ءِ تہ ءٙ لہتیں تصوارت جوڈ کنت ءُ اے تصورات لہتیں انفارمیشن یکجاہ کن اَنت۔ اے سرپدیانی چارگ ءُ ٹپاسگ ءٙ پد انسان عقلی علم ءٙ سر بیت، انسان مدام مارشتانی علم ءَ چہ درکپیت ءُ عقلی علم ءٙ سر بیت انت۔
سنگت ءٙ دیمترءَ تران کنان ءٙ گُشت کہ سرھال ءِ دومی بھر (ریفارم اِن اسٹڈی) انت کہ اشی تہ ءٙ یک سیاسی مردمے ءِ وانگ ءُ زانگ ءِ سرءَ باوست کنگ بیت۔ یک سیاسی باسکے ءَ سیاسی جاورانی بنیات ءٙ وتی وانگ ءُ زانگ ءِ تہ ءٙ مٹی ءُ بدلی آرگی اِنت دانکہ آھیءِ لیکہی وانگ مھکم تر بہ بیت اِنت۔ اشیءِ تہ ءٙ دگہ چیزیں ھم گیشینگ بیت کہ ماں لیکہی بنیات ءٙ وتی جھد ءٙ چوں گشین ایں۔ ھما ورنا کہ وانگی ادارہاں گوں بندوک انت آ تہنا وتی کورسءَ گوں بندوک انت ءُ عملی جھد ءِ بھر نہ انت گڈا آھانی کیفیت ھچ بر شر نہ بیت چیا کہ تنہا چار کتابانی وانگ ءُ زانگ مستریں شری نہ انت بلکیں اشی ءِ ھواری ءَ لیکہی بنیات ءٙ علم ءٙ ھوار عمل المی اِنت کہ ہردوئیں ھوار بنت ءُ دنیاءِ تہ ءَ مٹی ءُ بدلی ءُ گہتری آرگ بیت کنت۔ پہ درور یک مردمے تہنا لبزانک ءِ سرءٙ گرفت بہ داریت ءُ دگنیا ءِ لبزانک ءٙ بوانیت بلے آ عمل ءِ بھر مہ بیت گڑا آھیءِ عمل تہنا کتابی علم بوت کن انت۔ چیئرمین گشیت کہ ما وتی مردماں سلاہ دئیگ لوٹیں کہ ھما مردم جھد ءِ بھر نہ انت گڑا آ جھد ءِ بھر بہ بنت ءُ ھما مردم کہ جھد ءِ بھر انت بلئے وانگ ءٙ نہ انت گڑا آ الم بوان انت۔ اشیءَ ابید دو شے مارا دیمروئی دیم ءٙ اڑاند ودی کنت۔ یکے کتابی علم ءُ دومی عقیدہ پرستی۔ سیاست ءِ تہ ءٙ عقیدہ پرستی ءِ بزانت چماں بند کنگ ءُ بیسہ دارگ۔ ماؤ گشیت کہ ما لس مھلوک ءِ کرءَ مدام ٹوھیں چیز سرپد بیتگ ایں۔ پہ درور بلوچستان ءِ کوچگاں کوھانی تہ ءٙ شوانگ ھم شھدربرجاہ ءِ ھمے استاداں ءُ نودربراں چہ گیشتر وتی دور ربیدگ ءٙ پہ زانتءُ عمل کنگ اِنت۔
دیمتر ءَ سنگتءَ دیوان ءِ تہ ءٙ تران کنان ءٙ گُشت کہ سرھال ءِ سیمی بھر ” تضاد” انت ۔ دگنیا ءِ چوشیں چیز نیست انت کہ آھی ءِ تہ ءٙ تضاد مہ بیت انت ۔ دگنیا ءِ تہ ءٙ ھمک شئے ءِ رُدگ ءُ دیمءَ آیگ ( نشونما) آھیءِ تہی جیڑہ ءُ جنجالاں گوں بندوک اِنت۔ ھمک تضاد لس مھلوک ءِ زھن ءٙ نوکیں سوال ءُ ھیال ءٙ دیم ءٙ کاریت۔ تضاد ءِ تہ ءٙ یک شئے بوھگ دومی شئے ءٙ وت زندگ داریت۔ پہ درور زرواری نظام ءِ تہ ءٙ اگا ماں مزور ءٙ بہ کش ایں گڑا سرمایہ داری ءُ مزور ءِ تضاد ءِ جند پشت نہ کپیت ۔
چیئرمین گُشیت کہ دگنیا ءِ پرارزشداریں تضاد رہشون ءِ پیسلہ انت۔ رہشون یک پیسلہ ئے کنت گڑا یک تضادے بندات بیت انت۔ پہ درور ماؤءِ یک پیسلہ انت کہ ماراں زورآوریں ءِ ھلاپ ءٙ جھد کنگی انت گڈا ہمے جہد ءَ کہ نوکیں چیزے جوڈ کنگی اِنت ادءَ بازیں تضادے سر چست کنت۔ چیزانی وانگ، زانگ ءُ پھمگ ءِ ھواری ءٙ تضاد ءِ جندءِ سرءَ گرفتے الم بہ بیت۔
دیوان ءِ تہ ءٙ جست ءُ پسو ءِ سیشن ءَ پد ھنکینی کارگشاد ءٙ ھنکینی کارمستر ءِ اجازت ءٙ چہ دیوان ءِ ھلاسی ءِ جار جت ءُ دیوان آسر بیت۔
