بلوچ اسٹوڈنٹس ایکشن کمیٹی خاران ہنکین ءِ نیمگ یک ہیلکاری دیوانے ہنکینی آرگنائزر عدنان بلوچ ءِ سروکی ءَ برجم دارگ بوت۔
دیوان ءِمہمان ءِ ھاس بنجاہی کماش شبیر بلوچ ءُ بنجاہی ھالرسانی کارگشاد ازیر بلوچ بیتگ اَنت۔
دیوان ءِ سرھال: نیشن اینڈ نیشنلزم، بلوچ نیشنلزم
تران کنوک: بنجاہی کماش شبیر بلوچ ءُ بنجاہی ھالرسانی کارگشاد ازیر بلوچ بیتگ اَنت۔
اے دیوان دو بھر ءَ اَت، اَولی بھر ءَ سنگت ازیر بلوچ ءَ راجدوستی ءِ درگت ءَ جتا جتائیں زانتکارانی لیکہ پیش کُرت اَنت کہ آھانی لیکہ راج ءَ چونیں بزانتے دینت۔
سنگتءَ تران کنان ءَ گوْشت کہ جتائیں زانتکار ءُ رہشوناں وتی زمینی راستیانی ھساب ءَ وتی راج ءِ بزانت گشینتگ۔ چوشکہ ارنیسٹ رینین گوْشیت کہ راج یک روھانی شئے ءُ مارشتانی بنیات ءَ مھلوک ءِ یکجاھی اِنت۔ آ گوشیت کہ یک راجے ءِ گوْست ءُ ہستے بیت، گوْست ءِ تہ ءَ آہی ءِ یات بنت کہ ہما راج ءِ جنگ، نند ءُ نیاد ءُ زند ءِ ایدگہ پِڈ ءِ کار ھوار اَنت ءُ آہی ءِ یاتانی تہ ءَ بامردانی مزنیں کردے کہ راج اِش جوډ کنگ ءَ وتی کرد پیلو کتگ۔ دومی ھست اِنت کہ یک راجے چوں وتءَ ہست ءَ گشینیت ءُ یک ءُ دومی ءَ گوں نزیک بیت۔ بزاں ما چوش گوࣿشت کنیں کہ یک راجے گْوست ءِ یاتانی وسیلہ ءَ روھانی بنیات ءَ وتءَ دیمءَ کاریت ءُ مہکم کنت۔
دیمتر ءَ سنگت ءَ تران کُرت کہ اسٹالن ءِ گوشگ اَنت کہ راجے ءِ بنگیجی بنداتی لوٹ راجمان اِنت۔ راج مردمانی راجمان گوشگ بیت۔ راج سَلّہیں مردمانی راجمان اِنت۔ اے راجمان چہ نسل ءُ قبائلی جیڑہاں پلگار اِنت۔ اسٹالن چار دیگہ شئے آنی سر ءَ زور دنت کہ آھانی پُکار پہ راج ءِ جوڑ بوگ ءَ است اَنت۔ آ شئے ایش اَنت لس زبان(Common Language) لس زمین (Common Land) مالی سیادی (Economic Relations) ءُ تب ھواری (Psychological Make-Up) راجمان ءِ مردمانی نیام ءَ یک لس زبانے بہ بیت چہ ایشی ءَ راجمان ءِ تہ ءِ مردم وت ءَ یکے دومی ءَ گوں یک کُرت کن اَنت۔ اگاں اے مردمانی نیام ءَ لس زبانے نہ بوت گُڑا ایشانی نیام ءَ لس زمینے بہ بیت۔ اے مردمانی سیادی چہ ھمے یکیں زمین ءَ بہ بیت۔ اے زمین ءِ سر ءِ نندوکیں مردمانی زند ءِ نیام ءَ مالی سیادی ءُ بندوکی ھم راج ءِ جوڑبوگ ءِ لوٹے بوت کنت۔
ھمے وَڑا سنگت ءَ Max Weber ءِ لیکہ ءِ تران کُرت ءُ گوْشت کہ پہ راج ءِ جوڑ بوگ ءُ گِندگ ءَ بازیں شئے یے دیم ءَ کئیت اِنت چوشکہ زبان، مذہب، نسل، دودمان، مال، ءُ استان۔ بلئے راج ءِ بزانت چہ زبان، مذہب، نسل، دودمان ءُ مالءَ نہ اِنت ءُ نئیکہ استان اِنت۔ بگندئے لبز “راج” ءِ سیادی گوں سیاست ءَ اِنت۔ راج یک مارشتی راجمانے۔ آ وتی ھاتر ءَ پہ وت یک تبے جوڑ کنت۔ میکس ویبر ءِ ھساب ءَ راج مارشت ءِ بنھشت ءِ سر ءَ مالی بُنزہ (Economic Origin) ءِ سان (influence) نیست اِنت۔ راج ءِ بزانت ءِ لبز ءُ ھیال چہ آ مردم ءَ زورگ نہ بیت کہ آ گوں راجے ءَ بندوک اَنت۔ راج ءِ بزانت پہ ھما مردماں زورگ بیت کہ آ راجی مارشتانی یکجاھی ءَ دارگ ءُ درامدیں تاکتانی دیم ءَ دارگ ءَ اَنت۔ اے پیم ءَ راج ءِ ھیال ءِ وتی کدر (Values) است اَنت۔
سنگتءَ گُڈسرءَ گوْشت کہ یک راجے وتءَ وت بزانت بہ دنت چوشکہ کونر نامیں زانتکارے ہم گࣿوشیت۔ دیگہ راج یا تاگتءَ ترا راج ءِ بزانت مہ دنت بلکیں تو وتءَ وت بزانتے بہ دئے ءُ وتی راج ءَ وت بہ گشین ایت۔
دیمتر ءَ بلوچ راج ءِ سرءَ سنگت ءَ تران کُت ءُ بلوچ ءِ راج ءَ گوں بندوکیں سرجمیں تک ءُ پھنات گوْشت اَنت، آئی ءَ درائینت کہ بلوچ راج چہ گوْست ءَ جوڈ بیتگیں راجے کہ آ روھانی دروشم ءَ یک ءُ دومی ءَ بندوک اِنت۔ بلوچ ءَ وتی جتائیں زمین ءُ پجارے ہست کہ آہی ءَ راجے بیگ ءِ درور اَنت۔ بلوچ ءِ ڈیھ مدام دریں تاگتانی ایردست بیتگ پمیشکا آہی ءَ وتی پاداں اوشتگ ءِ موھ نہ رستگ بلے بلوچ داں روچءِ مرچی وتی راجی جوڈشت ءِ ہاترءَ جھد کنگءَ اِنت۔ بلوچ ءَ وتی راجی بزانت گشینتگ کہ آ زمین ءُ دوداں گوں بندوک اِنت۔ اے دمگ ءِ تہ ءَ بلوچ ءِ گشیتگیں زمینے ءُپجارے ہست کہ چہ ایدگہ راج ءُ مھلوک ءَ جتا اِنت۔ بلوچ ءَ وتی راجدوستی وت گشینتگ ءُ آہی ءِ مہکم ءُ سرجم کنگءَ پہ جھدءَ اِنت۔
دیوان ءِ تہ ءَ بلوچ راج دوستی ءِ سرءَ سرجمیں تک ءُ پھناتانی سرءَ دلجمی ءَ گوں گپ ءُ تران ءَ پد دیمتر ءَ جستی بھر ءِ تہ ءَ دیوان ءَ نشتگیں ورنایاں جُست کت ءُ پسوانی دیگ ءَ پد دیوان آسر کنگ بوت۔
