بلوچ اسٹوڈنٹس ایکشن کمیٹی اُوتھل ھنکین ءِ ھنکینی لس دیوان برجم دارگ بوتگ، ظفر بلوچ ھنکینی کارمستر ءُ سہُیل بلوچ ھنکینی کارگُشاد گچین کنگ بیتگ اَنت۔
بلوچ اسٹوڈنٹس ایکشن کمیٹی اُوتھل ھنکین ءِ ھنکینی لس دیوان ھنکین ءِ گوستگیں کارمستر سرورداد بلوچ ءِ پاگواجہی برجم دارگ بیتگ۔ دیوان ءَ ھاسیں مھمان بنجاہی کمیٹیءِ باسک بالاچ بلوچ ءُ گچینی مھمان بُنجاہی کمیٹی ءِ باسک وقار بلوچ ساڑی بیتگ اَنت۔
دیوان ءَ بنجاہی سرکیولر، ھنکین ءِ گوستگیں اھوال، شرگداری، گل کاری، ھندی ءُ میان استمانی سیاسی جاورھالانی سر ءَ تران ءَ پد آوکیںں گامگیج ءَ گوستگیں کابینہ ھلاس کنگ بوت ءُ نوکیں ھنکینی کابینہ گچین کنگ بوت۔
دیوان ءَ سنگتاں تران کنان ءَ گُشت کہ سیاست ہما عملءِ نام اِنت کہ وھدءِ ہمرائی ءَ انسانی ھیال ءَ گشین ایتیُ گیش توانا ءُ مہکم کنت۔ بلوچ نودربر ءُ بساک ءِ باسک یے ءِ بستار ءَ مئےسرءَ اژدری اِنت کہ ما وتی تہءَ نگدی باوست ءِ ماھولے جوڈ بکن ایں، وتی کار ءُ پروگرام ءُ وتی جندءِ روشتاں نگدی کالب ءَ چارگ ءُ ٹپاسگ ءِ جہد بکن ایں پرچاکہ کہ اے وھد ءَ کہ بلوچ راج ہماسختی و سوریانی آماچ اِنت گڈاایشانی گِش ءُ گیوار ءُ دیمپانی واستہ آشوبی رویشت ءُ عمل وتی تہ ءَ جاہ دیگی اَنت ءُ مدام وت ءَشّرءَ چہ شَرتر کنگ ءِ گنجائش پیداگ بہ کنیں۔ ما یک منظمیں ءُ سختیں ڈسپلینءِ پابند ایں بلے ہنکین ءِ باسکانی تہءَ یک ھرابیں روشت ئے ءَ ردوم زُرتگ کہ باز وھد ءَ باسک وتی جندءِ ادارہ( بساک) ءِ کاراں گو دومی ادارہاں( شہ دربرجاہ) بندوک کن اَنت انچش کہ اگاں شہ دربرجاہ پچ اِنت گڈا وتءَ بساک ءِ باسک یا سیاسی ورکر سرپد بنت بلے ھردیں ادارہ بند بیت گڈا سنگتانی تہا سنجیدگی کم بیت ءُ سیاست ءَ ہم موکل سرپد بنت۔ ہمے پیم کارانی چِکّ ءُ تاوان نہ بیتگ ءُ اشیءَ چہ ہنکین ءِ کار نِزور ترّیتگ اَنت۔ گلءِ باسک ءُ بلوچ راجدوستی ءِ لیکہءِ منوگری ءِ بستارءَ ہستیں جاورانی رِدءَ ہرچ باسکءَ گلءِ کار گوں مستقل مزاجی ءَ دیم ءَ برگی اَنت۔
دیمترءَ سنگتاں تران کنان ءَ گشت کہ سیاسی ورکرے ءِ بستارءَ مئے تہءَ اینچو سیاسی جرت بہ بیت کہ ما وتی نزوری ءُ سوبمندی ھردوئینانی سرءَ گپ جت بہ کنیں، اے دورانیہ ءَ ھنکین ءَ وتی گل کاری ءُ بی ایل سی ءِ کارانی تہءَ شوکیں وڈے ءَ دیمروئی کتگ، ھنکین ءِ اے دورانیہ ءَ دو نوکیں بنزہانی جوڈ کنگ ءُ ھند ءِ ورنایاں نودربر سیاست ءِ بھر کنگ ءُ بی ایل سی ءُ لبزانکی دیوانانی وسیلہ ءَ بیلہ ءِ لس مہلوک ءَ گوں نزیک بیگ ھنکین ءِ سوبمندیاں چہ یکے۔ بیلہ ءِ جاہ منندیں مھلوک مزنیں مدتے ءَ چہ دروگیں پندلانی آماچ اِنت کہ اِدءِ مھلوک ءَ زبان ءِ بستار ءَ چہ بلوچ راج ءِ سِندگ ءُ ایدگہ پندل ہوار اَنت بلے اے گام کہ چہ ادارہ ءِ نمگ ءَ زیرگ بوتگ اَنت ءُ مئے امیتیں اِنت کہ روچے نہ روچے اے وتگڑیں ھیال الّم پروش ور اَنت۔
گُڈسر ءَ سنگتاں گُشت کہ اُوتھلءِ بلوچ نودربرانی وانگی کچ ءَ سیاسی بودشت ودی کنگ ءِ ھاترءَ ھنکین بلوچ لٹریسی کیمپئین ءِ وسیلہ ءَ چہ اسکول، کالج، ھند ءُ دمگانی وانگجاہانی جیڑھانی بابت ءَ گامگیج زیرگ بیت۔ ایشیءَ ھوار بیلہ ءِ جتائیں دمگ ءُ میتگاں کتابی مراگاہ،گوْنڈ گونڈیں وانگی ءُزانشتی مراگاہ ءُ مھم جنزینگ بیت ءُ بلوچی، براہوئی ءُ لاسی زباناں کلاس ءَ ھوار میتگانی تہءَ پہ گونڈواں گام کلاس ہم اڈ دیگ بنت۔
درستیں بُنگپانی سرءَ گوں دلجمی ءَ تران ءَ پد گُڈی بنگپ آؤکیں گامگیج ءِ تہ ءَ گوستگیں کابینہ ھلاس کنگ بیتگ ءُ نوکیں کابینہ گچین کنگ بیتگ۔ نوکیں کابینہ ءَ ظفر بلوچ ھنکینی کارمستر، احسان بلوچ کُمک کارمستر، سہُیل بلوچ کارگشاد، نذیر بلوچ کُمک کارگشاد ءُ شمع بلوچ ھالرسانی کارگُشاد گچین کنگ بیتگ اَنت۔
بنجاھی سنگتاں نوک گچین بیتگیں کابینہ سوگند دات اَنت ءُ گچین بیتگیں زمہ واراں پیمان کُت کہ آ وتی زمہ واریاں جوانیں رنگے ءَ جُنزین اَنت۔
بنجاہی جارکش بلوچ اسٹوڈنٹس ایکشن کمیٹی
