بلوچ اسٹوڈنٹس ایکشن کمیٹی شال ھنکین ءِ ھنکینی لس دیوان برجم دارگ بوتگ۔
ماہکان بلوچ ھنکینی کارمستر ءُ سُفیان بلوچ ھنکینی کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی شال ھنکین ءِ ھنکینی لس دیوان ھنکینی کارمستر شئےمرید بلوچ ءِ سروکی ءَ برجم دارگ بوتگ۔ دیوان ءِ مہمانِ ھاس بُنجاہی مزن کارگشاد اظہر بلوچ ءُ گچینی مہمان بنجاہی کمیٹی ءِ باسک پیرجان بلوچ ءُ آمر بلوچ بوتگ انت۔دیوان ءَ بُنجاہی سرکیولر، ھنکینی اھوال، نگدکاری، گل کاری، میان اُستمانی ءُ ھندی سْیاسی جاورہال ءِ بنگپانی سرا گوں دلجمی ءَ گپ ءُ تران ءَ پد آؤکیں گامگیج ءَ گْوَستگیں کابینہ ھلاس کنگ بوتگ ءُ نوکین کابینہ گچین کنگ بوتگ۔
دیوان ءَ سنگتاں تران کنان ءَ گشتگ کہ شال بلوچ سْیاست ءِ بُنجاہ زانگ بیت شال ءِ سیاسی مہکمی بلوچ سْیاست ءِ مہکمی ءِ مانزمان بیت۔یک دمگے ءِ سیاسی ھوالہ ءَ توانا بوگ سرجمیں بلوچ سْیاست ءَ سانمندکُت کنت۔بساک یک نودربر گلے ءِ بستار ءَ شال ءِ ھمک وانگی ادارہ ءِ تھا ساڈی انت ھنکین ءِ بُنزہ است اَنت، بلے مارا شال ءَ گیش گل کاری ءِ زلورت است انت تاکہ ما وتی ھمک بنزہ ءِ باسکاں انچیں ڈسکشن ءُ سیاسی کتاب، وانگ ءُ نبشتہ ءُ پروگرامانی بہر بکن ایں تاکہ ھمے ورناھانی ھمینکس تربیت بوت بہ کن کہ گل ءِ مھکمی بلوچ جہد ءِ توانائی ءُ وتی جند ءِ سرا ھمینکس کار کُت بکناں تا آؤکیں وھد ءَ بلوچ راجدوستی ءِ جہد ءَ کِردے پیلو کُت بکن انت۔
دیمترا سنگتاں گشت کہ شال ءِ تہا بلوچ سْیاست ءَ نزور کنگ ءِ ھاترا اے دورانیہ ءَ سک باز پندل سازگ بوھگ ءَ انت، شال تہا مارا گندگ ءَ کئیت کہ نودربر سْیاست ءِ نزور کنگ ءِ واستہ شال ءِ وانگی ادارانی تہا دانستہ بنیاد ءَ انتظامیہ ءِ جیڑہ جوڈکنگ بوھگ ءَ انت ھاس انوں بلوچستان یونیورسٹی ءَ مارا گندگ پیداک انت کہ اے جیڑہ کہ جنزگ ءَ انت اے انچوش پہ دیم بوھگ ءَ نہ انت بلکہ اے سرجمے دانستہ عمل کہ یونیورسٹی ءِ انچوش ءِ حالات ءِ جوڈ بکن دانکہ بلوچ ورناھانی وانگ ءُ زانگ ءِ عمل سانمند بہ بیت، اے عمل سرجم ءَ بلوچ سْیاست ءُ بلوچ نودربر سْیاست ءِ نزور کنگ ءِ واستہ بوھگ ءَ انت نو مارا بہ ھیسیت نودربر گل اے سرجم ایں عمل زانگ لوٹ انت ءُ ایشانی ھلاپ ءَ گامگیج ءِ زورگ لوٹ ایت۔
دیوان ءَ سنگتاں شال ءَ آؤکیں بلوچ ورناھانی وانگی ءُ زانگی سپر ءِ بابت ءَ تْران کُت کہ مزنیں کچے ءَ بلوچ ورنا شال ءَ کاینت ءُ سالانی سال لائبریری آں کپتگ انت ءُ میڈیکل ءُ کمیشن نام ءَ تیاری کنگ ءَ انت اے روشت باز تاوان بار انت۔ میڈیکل ءُ دومی پڈاں وانگ ھراب نہ انت بلے ھمے ٹرینڈ ءُ روشت بلوچ ورناھانی ساچستی بودناکی ءَ ھلاس کنان انت، ورنا چہ زمینی راستی ءَ دور بوان انت ءُ علم ءُ زانت ءَ تھنا نوکر بوگ ءُ زندگی ءِ مانا ءُ بزانت ءَ تھنا یک سیٹ ءُ اھدگے ءَ بندگ ءَ انت۔ اے روشت جوڈ کنگ بوتگ انت تاکہ بلوچ ورنا زمینی راستی ءُ وانگ ءِ بزانت ءُ ساچست ءَ چہ دور دارگ بہ بنت، ورنا چہ بلوچ سیاست ءُ بلوچ راج ءِ راجی لوٹاں نا آژناگ بہ بنت۔
دیوان ءِ کُلیں بنگپانی سرا گوں دلجمی ءَ باوست ءَ پد آؤکیں گامگیج ءَ ھنکینی کابینہ ھلاس کنگ بوت ءُ نوکیں کابینہ گچین کنگ بوتگ۔ نوک گچین بوتگیں ھنکینی کابینہ ءَ ماہکان بلوچ کارمستر، ممتاز بلوچ کمک کارمستر، سُفیان بلوچ کارگشاد، حداداد بلوچ کمک کارگشاد ءُ رحمت بلوچ ھالرسانی کارگشاد گچین کنگ بوتگ انت۔ دیوان ءِ گڈسر ءَ سنگتاں وتی تنظیمی زمہ داریانی سرجم کنگ ءِ پیمان کُت ءُ دیوان آسر بوت
بلوچ اسٹوڈنٹس ایکشن کمیٹی
