بلوچ اسٹوڈنٹس ایکشن کمیٹی مستونگ ہنکین نا کنڈان اسہ ہیلکاری دیوان ئس آرگنائزر میر احمد بلوچ نا کماشی ٹی اڈ تننگا۔ دیوان نا مہمان بنجائی کمیٹی نا باسک عامر بلوچ ئسک۔
دیوان نا سرحال:- سیاست و بلوچ خوانندہ سیاست
ہیت کروک:- سنگت فہد بلوچ
فہد بلوچ دیوان نا بناء ءِ سیاست نا تعارف آن کریسہ پارے کہ ہر ہمو کاریم کہ اسہ بندغ ئسے نا ایلوڑتون تعلق آن ودی مروکا رشتہ سیاست پاننگ۔ انتئے کہ بندغ بقول ارسطو بندغ چاگڑدی ساہدار ئسے اودے تینا خڑکنا ہر ارٹمیکو بندغ تون بکار ئس مروئے۔ سنگت پارے کہ ہراتم بندغ آک تیار مسر کہ اوفک اجتمائی دروشم ئٹ ہر ویل ءِ تورر ہموتم سیاست بناء مسک۔
سنگت پارے کہ اینو ہر بندغ وڑ نا وڑ ئسے ئٹ جاہ نا جاہ ئس سیاست کننگ ءِ، بھاز جوانی تیکن سیاسی عمل نا بشخ ہراٹی چنکا چنکا ویل بزانکہ چاگڑدی ردی تا برخلاف آن ہلیس بھلا ویل بزانکہ راجی جہد آتیٹی تینا جہد ءِ کننگ ءُ۔
سنگت تینا ہیت ءِ مون آ دریسہ پاری کہ دا اندا سیاست ءِ ہرا ننے ننا لیکہہ (کہ بلوچ راجدوستی ءِ) نا بنیات آ اوار کرینے و اسہ سیوتی ئسے ٹی ہیسنے۔ سیاست فردی دروشم ئٹ ہم مننگ کیک و اجتماعی دروشم ئٹ، گواچنی ئٹ ہندا فرد آکو کہ اجتماع ءِ جوڑ کیرہ ہرا اسہ خاص ءُ مسخت و بست و بند ئسے کن کوشست ءِ برجاء تخیرہ۔
سنگت مون آ ہیت کریسہ پارے کہ سیاست نا بکار انداخس المی ءِ دنکہ بندغ نا جسم ئکن دھیر و ارغ، اگہ کسس دافیآن بیدس زند ءِ چلّیفنگ کیک گڑا او بے سیاست آن ہم زندہ مننگ کیک اگہ کننگ کپک گڑا سیاست اسہ بنداوی بکار ئسے، ہراڑان مُر مننگ ممکن مروف۔
سنگت خوانندہ سیاست نا زی آ ہیت کریسہ پارے کہ خوانندہ تبک ہمو تبک اے ہرا مدام جست ئٹی ءِ و داکان بیدس اوڑتون گم و گار کننگ کن دنو گڑاس اف، اندا خاطران پاننگک کہ خوانندہ تبک بھاز مون آ سلوک آ تبک ءِ کہ گڑاتے مٹ کننگ نا خواست ءِ تورک۔ گڑا اوڑکن سیاسی عمل اسہ زرورت ئس مریک ہراڑان اود تینا چاگڑد ءِ اسہ جوانو عمل ئسے نا کنڈا دننگ نا کوشست ءِ کیک۔ دنکہ بنگالی خوانندہ غاک ئسر ہرا تینا آجوئی نا سوب جوڑ مسر و تینا راجی رہشون تے تینا فکر ئنا بنیات آ تینا نیمہ غا بننگ کن مجبور کریر۔
سنگت بلوچ خوانندہ سیاست نا زی آ ہیت کریسہ پارے کہ نن مستونگ نا ڈیہہ آ تولوک اُن بلوچ خوانندہ سیاست نا زی آ ہیت کننگن داڑے عبدالعزیز کرد و سنگت ثناء نا وڑو بلوچ خوانندہ سیاسی بندغ ودی مسنے ہرافک تینا وخت ئنا کوزہ کروکا تا برخلاف آ اسہ سلپروکو توار ئسے نا وڑ ئٹ مون آ مسنو کہ اینو ئسکان نمیران ءُ۔ سنگت پارے اگہ اوفک اینو بھاز جوانی ئٹ چائنگرہ گڑا اسہ سوب دادے کہ اوفک عمل نا بشخ مسنو ارٹمیکو بھلا سوب دا کہ اوفک گل (تنظیم ) آتا باسک مسنو، و تنظیم آتا پابند مسنو۔ راجی سیاست کن بلکن آ ہر عملی سیاست کن گل آتا کڑدار مریک۔
سنگت تینا ہیت ءِ ایسری نا کنڈا ہتیسہ پارے کہ بلوچ خوانندہ سیاست کہ بی ایس او نا بنیات آ چائنگک ہرا ارا خوانندہ گل، ورنا وانندہ گل شال و بلوچ اسٹوڈنٹس ایجوکیشنل آرگنائیزیشن کراچی نا زم مننگ آن ودی مریک۔ بلوچ اسٹوڈنٹس آرگنائیزیشن اسہ بے مٹ ءُ وڑ ئسے ئٹ بلوچ نا خوانندئی حق آتیتون اوار ایلو راجی ویل آتا ایسری کن عملی دروشم ئٹ کاریم کیک و اینو نن خوانندہ سیاست نا بشخ ان ہمو رہشون و گل آتا تروکا فکر و لیکہہ ءِ۔
سنگت نا ہیت آن پد اسہ سوال جواب نا سیشن ئس مس ہراٹی سرکل آ ساڑی سنگتاک تینا سوج آتے تخار فہد بلوچ سنگت آتا ورندی ءِ است جمی ئٹ تس اوکان پد سرکل ہنکینی آرگنائزر نا موکل ہٹ ائسر کننگا۔
