بلوچستان کتاب کاروان ءِ دو روچی کتاب میڑہ بولان میڈیکل کالج ءَ برجم دارگ بیتگ۔
بلوچ اسٹوڈنٹس ایکشن کمیٹی شال، بی ایم سی بنزہ ءِ نیمگ ءَ نوک آوکیں نودربرانی ھاتر ءَ دو روچی کتاب میڑہ یے “بلوچستان کتاب کاروان“ ءِ نام ءَ برجم دارگ بیتگ۔ کتاب میڑہ ءَ سیاست، بن دپتر، بلوچ سیاست، بلوچ راجدپتر، ادب، فلسفہ ءُ سائنس ءَ ہوار جتا جتائیں سرہالانی سر ءَ کتاب ایر کنگ بیتگ۔ گل ءِ نیمگ ءَ چاپ ءُ شِنگ بیتگیں کتاب نوْشت، گام، ماتی زبان ءِ کتابُک ہم ایر کنگ بیتگ اَنت۔
دو روچی کتاب میڑہ کہ 26ءُ 27 اپریل ءَ برجم دارگ بیتگ، اے کتاب میڑہ ءِ تہ ءَ نودربراں، نوک آوکیں نودربراں، استاد ءُ پروفیسراں ہوار کشءُ گوْرءِ بازیں نودربراں بھر زرتگ ءُ وتی دوستیگیں کتاب اِش پہ وانگ ءَ زُرتگ۔
کتاب میڑہ ءِ برجم دارگ ءِ مول ءُ مراد نوک آوکیں سنگتانی تہ ءَ کتابی چاگرد ءِ ودی کنگ بوتگ داں سنگت چہ علم ءُ زانت ءَ آژنا بیگ ءَ ہوار آیانی گورءَ نوک نوکیں گپ ءُ باوست پچ بہ بنت ءُ نوکیں ہیال ءُ لیکہاں گوں بلوچ نودربر سیاست ءِ بھر بہ بنت۔ بلوچ اسٹوڈنٹس ایکشن کمیٹی ءِ مدامی جہد ہمیش اِنت کہ بلوچ نودربرانی تہ ءَ کتابی چاگردے ودی بہ کنت داں نودربر وتی وتی گوست ءُ ہست ءَ ھوار دنیا ءِ کُلیں چست ءُ ایراں سرپد بہ بنت، ہمے سوْب اِنت کہ گل ءَ جتا جتائں دمگاں بلوچستان کتاب کاروان ءِ نام ءَ کتاب میڑہ برجم داشتگ ءُ دارگ ءِ جہد ءَ کنگ اِنت۔
