بلوچ اسٹوڈنٹس ایکشن کمیٹی نصیرآباد ھنکین ءِ ھنکینی لس دیوان برجم دارگ بوتگ۔
وسیم بلوچ ھنکینی کارمستر ءُ علی بلوچ ھنکینی کارگُشاد گچین کنگ بوتگ اَنت۔
بلوچ نودربر سیاست ءِ نصیر آباد ءِ ھند ءُ دمگاں سر بیگ مرچگیں بلوچ راجدوستیں لیکہ ءِ سوبمندیاں ہوار اِنت۔
چیرمین شبیر بلوچ
بلوچ اسٹوڈنٹس ایکشن کمیٹی نصیرآباد ھنکین ءِ ھنکینی لس دیوان ھنکینی کارمستر وسیم بلوچ ءِ سروکی برجم دارگ بوتگ۔ دیوان ءِ ہاسیں مہمان بُنجاھی کماش شبیر بلوچ ءُ گچینی مہمان بُنجاھی کُمک کارگشاد مھمد بلوچ بوتگ اَنت۔ دیوان ءِ جتائیں ایجنڈہ بُنجاھی سرکیولر، ھنکینی کارگشادی اہوال، شرگداری بہر، گَل کاری ءُ سیاسی جاورھال ءِ سرءَ دلجمی ءَ باوست ءَ پد آؤکیں گامگیج ءِ سرھال ءَ ھنکینءِ پیسری کابینہ ھلاس کنگ بوتگ ءُ نوکیں کابینہ گچین کنگ بوتگ۔
دیوان ءَ جتائیں بُنگپانی سرا باوست کنان ءَ بُنجاھی کماش ءَ گُشت کہ نصیرآباد ءِ ہند ءُ دمگاں بلوچ راجدوستی ءَ گوں بندوکیں بلوچ نودربر سیاست ءِ سر بوگ پہ بلوچ راجدوستیں لیکہ ءُ بلوچ سیاست ءِ وشبھتی اِنت۔ مارا اے گپ ءِ سرا پہر ایں کہ مرچی بساک ءِ سیاست ھما ھند ءُ جاہاں روگ ءَ اِنت کہ اودءَ بلوچ راجدوستی ءِ بنیاد ءَ دلجمیں کارے نہ بیتگ، بلے اے مئے بد بہتی اِنت ءُ نزوری انت کہ سال گوستگ اَنت ما اے ھند ءُ دمگاں سر بوت نہ کتگ ءُ بلوچ سیاست سر کُت نہ کتگ۔ مروچی مارا اے دمگاں بے کساس بلوچ ہلاپیں ڈسکورس گندگ ءَ کاینت کہ آیاں روتگ جتگ ءُ بلوچ مھلوک چہ پجار ءُ زبان ءَ گستا کتگ۔ اے سرزمین ءَ ھمینکس دری آبادکاری بوگ ءَ اِنت کہ آیاں بلوچ چاگرد سانمند کتگ، مارکیٹ ءُ وانگی ادارہاں دری زباناں جاہ کتگ ءُ ھمے سوب اِنت مھلوک چہ بلوچیت ءُ بلوچ دوداں گستا بوان اَنت۔ مروچی بلوچ سیاست ءِ لوٹ ھمیش اِنت کہ مارا اے ھند ءُ دمگاں دلجمیں کارے کنگ لوٹ ایت ءُ مھلوک بلوچ راجدوستی ءِ سیاست ءَ گوں ھوار گیجگ لوٹ ایت۔
دیوان ءَ دیم ءَ بران ءَ بُنجاھی کُمک کار گشاد ءَ گُشت کہ، ما ھمے سرپد باں کہ بلوچ راجدوستی ءِ بنیاد ءَ بلوچ نودربرانی سیاسی ءُ پگری تربیت بلوچ جہد ءَ ممہکمیں کیڈرے ءُ جہدکارے دات کُت کنت۔ اے دمگاں بلوچ راجدوستی ءِ لیکہ ءِ سر نہ بوگ پہ ما مزنیں تاوانے، اے پد منتگیں وانگی نظام ءُ نودربراں چہ بلوچ سیاست ءَ دور دارگ ورناھاں چہ شعور ءُ ساچستکاری ءَ گِستا کنان اِنت ءُ ھند ءُ دمگ ءِ مردماں چہ وتی پجار ءُ ڈیھ ءُ زبان ءِ وارسی ءَ سنِدان اِنت ءُ اے نظام یک کرپٹ ءُ نابودیں جنریشن ئِے ودی کنگ ءَ اِنت۔ مارا اے نیمگءَ نودربر سیاست گیش مھکم کنگی اِنت، سیاسی ءُ شعوری تربیت ھرچ علاقہ ءُ وانگجاھاں سرکنگی اِنت ءُ سرجمیں بلوچستان ءِ کُنڈاں وانگی، شعوری ءُ سیاسی باوست ءِ ماھولے ودی کنگی اِنت دانکہ ھرچ بلوچ ورنا گوں سیاسی عمل ءُ پروگراماں وتی وتی علاقہ آں سانمند کُت بہ کن اَنت ءُ بلوچ راجدوستیءِ لیکہ ءَ گیش مہکم بہ کن اَنت۔ بساک ھاس ھما دمگاں سر کنگی اِنت کہ آ علاقہ چہ بلوچ سیاست ءَ سستگ اَنت، پرچاکہ وھدے بلوچستان ءِ ھرچ ھند ءَ روجدوستی ءِ لیکہ ءِ سر نہ بوتگ گڑا راجوستی ءِ سیاست سرجم نہ اِنت، مارا بلوچ ورناھانی یکمشتی ءِ سرا گیش زور دیگی اِنت۔
دیوان ءِ گڈی بُنگپ آؤکیں گامگیج ءَ گوستگیں ھنکینی کابینہ ھلاس کنگ بوت ءُ نوکیں کابینہ گچین کنگ بوت۔ نوک گچین بوتگیں کابینہ ءَ وسیم بلوچ ھنکینی کارمستر، عدنان بلوچ کُمک کارمسر، علی بلوچ کار گُشاد، نصیب بلوچ کُمک کارگُشاد ءُ شیرا بلوچ ھالرسانی کارگُشاد کچین بیگءَ پد سوگندی بہر بیتگ ءُ پدا دیوان ھلاس کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
