بلوچ اسٹوڈنٹس ایکشن کمیٹی خاران ھنکین ءِ ھنکینی لس دیوان برجم دارگ بوتگ۔
عدنان بلوچ ھنکینی کارمستر ءُ شاہد ھمل کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی خاران ھنکین ءِ ھنکینی لس دیوان عدنان بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان گل ءِ بنجاہی کمیٹی ءِ باسک سنگت پیرجان بلوچ ءُ سلیم بلوچ بوتگ اَنت۔
دیوان ءِ تہ ءَ بنجاہی سرکیولر، ھنکینی گوستگیں اھوال، شرگداری، گل کاری، ھندی ءُ میان استمانی سیاسی جاورہال، ءِ بنگپ ھوار بوتگ اَنت۔ دیوان سرجمیں بنگپانی سر ءَ دلجمی ءَ گپ ءُ تران ءَ پد گڈی بنگپ آؤکیں گامگیج ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوتگ۔
بنجاہی سنگتاں تران کنان ءَ گشتگ کہ ھاران ہما ھَند اِنت کہ گوستگیں باز وہد اِنت کہ بلوچ نودربر سیاست ءِ چست ءُ اِیر نہ بیتگ اَنت یا نزور بیتگ اَنت، ہمے سیاسی چِست ءُ اِیرانی نہ بیگ ءِ سبب ءَ ھاران ءِ مہلوک ءُ بلوچ ورنا بلوچ سیاست ءَ چہ گِستا بیتگ اَنت۔ بلے گل اے ھند ءُ دمگاں سیاسی عمل ءِ نہ بیگ بلوچ سیاست ءِ نزوری سرپد بوتگ ءُ گل استیں وہد ءَ سرجمیں بلوچستان ءِ ھوالہ ءَ دلگوش اِنت ہمے پیم سنگتانی مزنیں جہدے ءَ پد گل ھاران ءِ تہ ءَ وتی ھنکین ءِ جوڈ کنگ ءَ سوبمند بوتگ ءُ مرچی سنگت جوانیں سیاسی ماھولے ءِ ودینگ ءَ جہد ءَ اَنت۔
دیمترا سنگتاں تران کنان ءَ گشتگ کہ ھاران ھنکین ءِ سنگتانی جہد ءِ برورد ءَ ھنکین ءَ اے میان ءَ سک باز دیمروئی کتگ ءُ ھاران ءِ سنگت مرچی سیاسی عمل ءِ ارزشت ءَ نہ تہنا شریں رنگے ءَ سرپد بیگ ءَ اَنت بلکیں گل ءِ تہ ءَ جوانیں رنگے ءَ بھر زیرگ ءَ اَنت۔ اے میان ءَ ہرچ سوبمندی رستگ ایشاں چہ دلجم بوگی نہ اِنت بلکیں وتی کار ءُ پروگرام گِشتر مہکم کنگی اَنت ءُ گیش ءَ چہ گیش مارا وتی گل ءِ تہءَ نودربرانی ھوار کنگ ءِ جہد برجاہ دارگی اِنت ءُ ھاران ءِ تہ ءَ نودربر جتا جتاہیں وتگڑیں ڈسکورسانی بھر مہ بنت بلکیں بلوچ سیاست ءَ گوں ھمگرنچ بہ بنت ءُ سیاسی عمل ءِ بھر بہ بنت۔ بلوچ نودبرریے ءِ گور ءَ مرچی آئی ءِ جِند ءِ راجی ادارہ ہست اَنت گڑا آیاں وتی راجی ادارہانی ارزشت پہمگی اِنت ءُ آہانی بھر بیگی اِنت دانکہ آ زانت ءُ زانشت ءِ کندیل ءَ چہ وتی سسا ءَ روژنا بہ کن اَنت ءُ وتی راج ءَ پہ شہمیں کارستے جوڈ بہ بنت۔
درستیں بنگپانی سر ءَ دلجمی ءَ گپ ءُ تران ءَ پددیوان ءِ گڈی بنگپ آؤکیں گامگیج ءِ تہ ءَ گوستگیں ھنکینی کابینہ ھلاس کنگ بوت ءُ پہ نوکیں کابینہ ءِ ھاتر ءَ سنگت گچین کنگ بوت اَنت۔ نوک گچین بیتگیں کابینہ ءَ عدنان بلوچ کارمستر، اقبال بلوچ کمک کارمستر، شاہدھمل کارگشاد، اُسامہ کمک کارگشاد، اشفاق ھالرسانی کارگشاد گچین کنگ بوت اَنت۔ دیوان ءِ گڈ سر ءَ نوک گچین بیتگیں سنگتاں گل ءِ سوگند دیگ ءَ پد دیوان ءِ ھلاسی ءِ جار جنگ بوت۔
بنجاہی جارکش- بلوچ اسٹوڈنٹس ایکشن کمیٹی
