بلوچ اسٹوڈنٹس ایکشن کمیٹی ملیر ہنکین ءِ ہنکینی لس دیوان برجم دارگ بیتگ۔ گلاب بلو چ ہنکینی کارمستر ءُ مویز بلوچ ہنکینی کارگشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ملیر ہنکین ءِ ہنکینی لس دیوان ہنکینی کارمستر شاہ تاج بلوچ ءِ سروکی ءَ برجم دارگ بیتگ۔ دیوان ءِ ہاسیں مہمان بنجاہی ہالرسانی کارگُشاد سنگت اُزیر بلوچ،بنجاہی کمیٹی ءِ باسک سنگت فہد بلوچ بیتگ اَنت۔ دیوان ءَبنجاہی سرکیولر، ھنکینی اہوال، نگد کاری، گَل کاری، ھَندی ءُ میاں استمانی سیاسی جاورہال ءُ آوکیں گامگیج ءِ بنگپانی سر ءَ گپ ءُ تران بیتگ۔
دیوان ءِ اولی بُنگپ ءَبنجاہی سنگتاں سرکیولر دیوانءِ دیم ءَ پیش کُت کہ آئی ءِ تہ ءَ بنجاہی دیوان ءِ سرجمیں اہوال ، تران ءُ فیصلہ ہوار اِت اَنت،دومی بن گپ ءَ ھنکینی گوستگیں اہوال وانگ بیت اَنت کہ آئی ءِ تہ ءَ ھنکین ءِ گوستگیں کتگیں کار ءُ عمل ہوار اِت اَنت۔ سرجمیں اہوال یک یک ءَ چارگ ءُ ٹپاسگ ءَ پد دیوان دیم ءِ بن گپ ءَ برگ بیت۔
سنگتاں نگدکاری بھر ءَ گپ جنان ءَ گشت کہ پہ یک سیاسی ءُ دیمروی دوستیں گل ئے ءَ جوانتریں بہر آئیءِ وتی کتگیں کار، پیسلہ ءُ پالیسیانی سر ءَ کار کنگ ءَ ہوار آہانی سر ءَ سرءَ نگد کنگ، کاراں ٹپاسگ ءُ چارگ اِنت۔ ھمے کاراں کہ تو نگد کنے ھمے نزوریاں کہ تو ٹپاسے گڑا دیمترءَ تو زانت کنے یاکہ تو مارت کنےکہ کجام کار یاکہ پیسلہ منی گل ءِ کارانی واستہ منی کارانی دیمروی ءِ واستہ جوانتر نہ اِنت ءُایش دیمءَ منءَ گرگ ءُ دارگی اِنت۔ نگد ءِتہءَ جوانتریں نگد وت نگدی اِنت بزانکہ وتی جند ءِ سرءَوتی سیاسی رُدوم ءُ وانگ ءُ کار یاکہ ایندگہ بوتگیں نزوریانی سرءَ نگد کنگ۔ و تءَ وت جست ءُ جوابدہ کنگ ءِ نام وتنگدی گشگ بیت۔ مارا وتی تہءَ ھمے عمل گیشتر مہکم کنگی اِنت، گلانی تہءَ ھمے چیز کہ بیت گڑا گل وتی سنگتانی سیاسی رُدوم ءَ گہتر کرت کنت۔
گل کاری ءِ تہءَ سنگتاں کرتگیں نگد انی ھوالہ ءَ وتی جوانتریں شور ءُ سلاہ دیوان ءَایر کرت اَنتءُ ایندگہ نوکیں کار ءُ پروگرامانی سرءَ گپ ءُ باوست کنان ءَ ملیر ہنکین ءِ کاراں گیش شرتر ءُ جوانتر کنگ ءُنوک نوکیں کار ءُ پروگرام کنگ ءِ سرءَ گپ کرت ءُ وتی تجویز جوانیں ءُ دلجمیں رنگے ءَ ایر کرت اَنت۔ دیوان ءَساڑی ایں بنجاہی سنگتاں گپ کُت ءُ گشت کہ ما مدام تنظیم کاری تہءَ تنظیم ءِ واستہ نوک نوکیں کار، پالیسی ءُ پروگرامانی سر ءَ ھبر کنیں کہ ھمے نوکیں آئیڈیاز ءُسلاہ مدام گل ءَ یک گامے دیم ءَ برگ ءِ واستہ وسیلہ جوڈ بنت۔ ملیرءِ وڑیں جاہے ءَ بلوچ ءَ را بازیں دروشمے ءَ پشت ءَ دور بیتگ کہ آ سیاسی، معاشی، وانگی ،زبان ءُ دود ربیدگی یاکہ مروچیگیں وھد ءِ لُٹ پُلیں پروجیکٹس ءُ ایندگہ ھوالہ ءَ بہ بنت، ایش کل جوانیں وڑے ءَ سرپد بوگی اَنت ءُ چاگرد باسما کنگی اِنت۔ اے جیڑہانی سر ءَ مارا ھساس ءُ شیوار بیگی اِنت ءُ گوں کمٹمنٹ ءُ ھمت ءَ بلوچ دژمنیں پندلانی دیم ءَ اوشتگی اِنت۔
ما ملیرءِ وڑیں جاہے ءَ بلوچ نودربر سیاست کنگ ءَ ایں گڑا مئے واستہ گل ءَ ھمے ھند ءُ دمگاں سر کنگ ءُ بلوچ ورنا ءُ نودربراں ہوار کنگ ءِ نوک نوکیں پالیسیاں ہوار پروگرام بہ زوریں دانکہ اے سانمندیں رنگے ءَ مردمانی کرءَ سر کنگ بہ بنت۔ مئے تہءَ کار کنگ ءِ جزبگ مدام ہست انت بلے ما ھمے جزبگ ءَ عملی دروشم ءَ دیمءَ برگ ءِ راہ ءُ راہبند اں چہ ناآشنا بیں، مارا مدام ھمے جزبگاں یک نوکیں دروشمے یاکہ جوانتر ءُ اثرمندیں پروگرامے دیگی انت دانکہ مئے ھمراھی ءَ مئے کش ءُ گُور ءِ مھلوک ءَ ھم وتی نیمگ ءَ آرگ ءِ وسیلہ بوت بکن اِنت۔ مارا ہستیں وہد ءِ تیزگامیں رواج زانگ لوٹ اَنت کہ چوں دنیا، سیاسی، معاشی، ٹکنالوجی ءُ سائنسی ہوالہ ءَ گُشادی ءَ گوں دیم ءَ جنزان اِنت۔ اے وڈیں تیز گامیں سپر ءَ مار ااگاں وتءَ منزل ءَ سر کنگی اِنت گڑا وتی ہمک عمل ءُ کرتن گیش مہکم ءُ شرتر ءُ جوانتر کنگ لوٹ اَنت اگاں نہ ما دنیا ءِ تیزگامیں رواجانی دیم ءَ گار بیں۔
دیوانءِ سرجمیں بنگپانی سر ءَ گپ ءُ تران ءَ پد گڈی بنگپ آوکیں گامگیج اَت، اے بھر ءِ تہءَ پہ ہنکین ءَ گیشیں کار ءُ کاراں شرتر کنگ ءَ جتائیں فیصلہ زیرگ بیت۔ فیصلہانی زیرگ ءِ ہواری ءَ ہنکین ءِ گوستگیں کابینہ ہلاس کنگ بیت ءُ نوکیں کابینہ ءِ واستہ گلاب بلوچ ہنکینی کارمستر،شاہ تاج بلوچ کمک کارمستر، مویزبلوچ کارگُشاد، مھمد شاہ بلوچ کمک کارگشاد ءُ سلمان بلوچ ہالرسانی کارگشاد گچین کنگ بیتگ اَنت۔
دیوان ءِ آسر ءَ نوکیں کابینہ گوں سنگتاں سوگند دیگ بیتگ اَنت ءُ دیوان ہلاس کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
