بساک کراچی ہنکین ءِ میاں اُستمانی ماتی زبانانی روچ ءِ درگت ءَ دیوان
بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ میاں اُستمانی ماتی زبانانی روچ ءِ درگت ءَ دیوانے برجم دارگ بُوتگ۔
رمس 21 فروری 2025 بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ میاں اُستمانی ماتی زبانانی روچ ءِ درگت ءَ یک زانشتی دیوانے ھنکینی کارمستر بھرام بلوچ ءِ سروکی ءَ برجم دارگ بوت۔ دیوان جُتائیں بھرانی تہءَ اَت کہ آئی ءِ تہءَ پٹ ءُ پولی تاک وانگ ،تران، پینل ڈسکیشن ءُ شئیر ءُ شائری ہوار بوتگ اَنت۔
دیوان ءِ اولی بھر پٹ ءُ پولی تاک اَت کہ آئیءِ تران کار بساک کے یو بُنزہ ءِ ھالرسانی کارگشاد شاہدہ بلوچ اَت۔
پٹ ءُ پولی تاک ءِ سرا باوست کنان ءَ سنگت ءَ گُوَشت کہ زبان یک راجے ءِ ارواہ زانگ بیت اِنت، اے ھاترا کہ راجی جوڈشت ءِ پراسِس ءِ تہءَ زبان مزنیں کِردے پیلو کنت اِنت۔ زبان نہ تھنا یک راجے ءِ گوں یک ءُ دومی ءَ گپ ءُ رہوت دارگ ءِ وسیلہ اِنت ، زبان یک راجے ءِ ساچست ءُ مارگ ءِ مستریں بنُبھراں چہ یکے زانگ بیت اِنت۔ بیست ءُ یک فروری ءِ روچ ھمُک راج ءِ ھاترا ارزشت داریت، اے ھاترا کہ 21 فروری 1952 ڈھاکہ یونیورسٹی ءَ بنگالی نودربر پہ بنگالی زبان ءِ راجی زبان کنگ ءِ ھاترا زھرشانی کن اَنت ءُ پاکستان ءِ سیکیورٹی فورسز ھمے زھرشانی ءَ تیرگواری کن اَنت، تیرگواری ءِ سبب ءَ چہ بازیں ورناہ کُشگ بیت ءُ بازیں ورناہ ٹپّیگ بیت۔
سنگت ءَ دیمترا تران کنان ءُ گُوَشت کہ اے ورناھانی شہادت پہ وتی ماتی زبان ءِ ھاترءَ بیتگ ھمے درگت ءَ میاں اُستمانی ادارگاں 21 فروری ماتی زبانانی روچ نامینتگ ءُ ھمُک سال میاں اُستمانی جہت ءَ اے روچ ءِ سرءَ مراگش اڈ دیگ بنت اِنت۔
دیوان ءِ دیمتری بھر تران اَت کہ آئی سرھال زبان ءُ زبان ءِ ارزشت اَت ءُ ترانکار ھنکینی کُمک کارمستر جابر بلوچ اَت۔
سنگت ءَ دیوان ءَ تران کنان ءَ گوُشت کہ زبان راجے ءِ ہستی ءِ تہءَ ھما بُنبہر زانگ بیت اِنت کہ راج ءِ گوں یک ءُ دومی ءَ گپ ءُ رہوت ءَ ھوار تب ءُ ھم ھیال بُوھگ ءِ سِکین ءَ دنت اِنت۔ چُشکہ مرچیگی زمانگ ءِ دُگنیا ءِ تہءَ بازیں زبان اَست اَنت ءُ وجود دار اَنت بلے سکّ کم زبان اَنت کہ میاں اُستمانی جہت ءَ وتارءَ منّارینتگ۔ مرچی یورپ ءِ تہءَ چہ انگریزی گپ کنوکاں گیشتر دگہ راج اَنت کہ وتی زبان ءَ گپ کن اَنت بلے مارا اے جیڑگی اِنت کہ اِشی سبب چے اَنت کہ انگت ھم انگریزی زبان ءَ وتارا ماں دُگنیا ءَ منّارینتگ؟مستریں سبب اِش اِنت کہ انگریزی زبان ءَ سیاسی تاکت ءِ آسراتی ءَ گوں ھوار میاں اُستمانی سطح ءَ ھمُک عمل ءِ ھاترا انگریزی کامرزگ بُوھگءَ اِنت ءُ دُگنیا ءِ مستریں تاکت وتی زبان ءِ سرءَ کار کُتگ ءُ کار ءَ اِنت۔
گُڈسرا سنگت ءَ سرپدی دات کہ شانزدہمی کرن ءَ یورپ سرجمیں دُگنیا ءَ ایردست کنان وتارا سر کنت اِنت ءُ انچُش ما کُل سرپدیں کہ زوراک ءِ اولی کار ایردست ءِ پجّار ءِ ھلاس کنگ اِنت، ھمے رنگ ءَ یورپ ءَ سرجمیں دُگنیا ءَ راج ایردست کُتگ اَنت، زبان لگتمال کُتگ ءُ وتی زبان ایردست ءِ سرا مُشتگ۔ ھمے رنگ ءَ مرچی انگریزی دُگنیا ءِ مستریں زُبان جوڈ بوتگ۔ بلوچی زبان چہ وھد ءَ گوں سوت ءُ شئیر ءَ زندگ داشتگ بلے داں بیستُمی کرن ءِ نبشتہ کنگ کم گِندگ ءَ اتکگ۔ مرچیگیں وھد ءَ ایوکا زبان نبشتہی دروشم ءَ دیمروئی دیگی نہ اِنت بہ گِندے کہ مرچیگیں وھد ءَ زبان ءِ ڈجیٹل کنگ اژدری عملے زانگ بیت اِنت۔
مئے دیوان ءِ چارُمی بہر پینل ڈسکشن اَت کہ ایشی تہءَ مئے پینلسٹ کراچی مزن شاھدربرجاہ فارسی ڈپارٹمنٹ ءِ سرمستر پروفیسر رمضان بامری بلوچ ءُ بلوچ اسٹوڈنٹس ایکشن کمیٹی ءِ بنجاھی کمیٹی ءِ باسک سنگت فہد بلوچ اِت اَنت۔
پینلسٹاں تران کنان ءَ گُشت کہ میان استمانی زبانانی روچ پہ ایردستیں راجاں ارزشت داریں روچے زانگ بیت چیا کہ یک راج ءِ سرجمیں شئے آئیءِِ دود ءُ ربیدگ ،آئیءِ پجار زبان ءَ گوں بندوک اَنت۔ اے روچ ءِ دارگ پہ ھمک دیمترا ایردستیں راجاں المی اِنت۔ چشکہ بلوچ ءَ گوست ءَ بگر داں 21 یکمی کرن ءَ آئی وتی زبان پہاز اِتگ اگہ بلوچ لوٹیت اے جہان ءِ تہا آئی پجار گار مہ بیت گڑا آئی ءَ وتی زبان ءِ سرا کار کنگ لوٹیت۔ زبان ءِ دیمروئی واستہ مستریں المی شئے مرچیگیں ڈیجیٹل وسیلہانی کامرزگ اِنت ءُ دومی ترا یک ادارہ ءِ بہ بیت کہ آ وتی زبان ءِ دیمروئی واستہ کار بہ کنت۔ ھمُک بلوچ ءَ لوٹیت کہ آ ھر پڑءَ وتی زبان سرا کار بہ کنت۔
گڈسرءَ سنگت ءَ تران کنان ءَ گشت کہ مرچی یک نودربر گلے ءِ بستار ءَ بساک ءَ وتی کچ ءُ کِساس ءَ بلوچ ءَ ماتی زبان براہوئی ءُ بلوچی زبانانی سرءَ کسانیں جہد ءِ کنگ ءَ اِنت، پہ درور وتی لٹریچراناں بلوچی ءُ براھوی زبان ءَ نبشتہ کنگ بہ بیت، گام تاک پہ زھگاں بہ بیت یاکہ ماتی زبانانی سرا بلوچی ءُ براھوی ءَ کتابُک نبشتہ کنگ بہ بیت گُڈا ھمے ڈول ءَ بساک وتی راج ءِ زبانانی زندگ دارگ ءِ ھاترا جُھدے کنگ ءَ اِنت۔
دیوان ءِ گُڈّی بھر شئیرءُ شائری اَت کہ آئی ءِ تہ ءَ سنگتاں وتی شئیر ونت اَنت ءُ گُڈسرءَ دیوان کارمستر ءِ رزا ءَ چہ ھلاس کنگ بوت۔
