بلوچ اسٹوڈنٹس ایکشن کمیٹی ھب ہنکین ءِ ہنکینی لس دیوان برجم دارگ بیتگ۔ دودا بلوچ کارمستر ءُ ساجد بلوچ کارگشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ھب ہنکین ءِ ہنکینی لس دیوان ہنکین ءِ گوستگیں کارمستر سنگت ناز بلوچ ءِ سروکی ءَ برجم دارگ بوتگ۔ دیوانءِ مھمان بنجاہی مزن کارگشاد اظہر بلوچ ءُ بنجاہی کمیٹی ءِ سنگت فہد بلوچ ساڈی بوتگ اَنت۔ دیوان ءَ جتائیں سرہالانی سرا گپ ءُ باوست کنگ بیتگ کہ آوانی تہ ءَ بنجائی سرکیولر، ہنکینی گوستگیں اھوال، نگدکاری نشست، گل کاری، ہندی ءُ میان اُستمانی سیاسی جاورہال ءُ آوکیں گامیگیج ہوار بوتگ انت۔
اولی ایجنڈا بنجاہی سرکیولر بوتگ کہ بنجاہی سنگت ءَ دیوان ءِ دیمءَ چارمی بنجائی کمیٹی ءِ دیوان ءِ اہوال ءُ باوست ونتگ اَنت ءُ گل ءِ نیمگ ءَ زُرتگیں پیسلہ ھم دیوان ءِ دیمءَ ایر کرتگ اَنت۔ دیمتری سرہال ہنکینی گوستگیں اہوال بوتگ کہ آوانی تہ ءَ ہنکینی کمیٹیانی اہوالاں گوں ہوار ہیلکاری دیوان، دورہ ءُ مراگش، بی ایل سی ءُ بلوچستان کتاب کاروان ءُ لٹریچر ءِ اہوال ہوار بوتگ اَنت۔
دیمتری سرہال نگدکاری نشست بوتگ کہ دیوان ءَ ساڈی ایں سنگتاں وتی وتی نگد گوں دلجمی ءَ ایر کرتگ۔ سنگتاں گپ کنان ءَ گشتگ کہ ما اے گپ ءَ زانیں کہ نگد مدام اداراہ ءِ کاراں جوان ءُ گہتر کنت، پمیشکہ دیمروی دوستیں گل وتی کار ءُ پروگرامانی سرءَ مدام نگدی چمشانک دئینت دانکہ ھمے کرتگیں کار ءُ ایندگہ پروگرام دیمترءَ جوانیءِ نیمگ ءَ روان بہ بنت۔ ما کہ یک دیمروی دوستیں گلے ءَ گوں بندوک ایں گڑا ما وتی ھمک کسان ءُ مزنیں کار ءُ پالیسیاں چارگ ءُ ٹپاسگ ءِ جھدے کنیں۔ گل وتی تہ ءَ دیمروی کنان اِنت بلے ھب ءِ وڈیں جاہے ءَ گیش فعال بوگ ءُ کار ءُ پروگرام کنگ ءِ گنجائس ھست کہ کنگی اَنت، بلے اے ھوالہ ءَ ہنکین ءَ لہتیں نزوری پیشداشتگ کہ ایش دیمترءَ گِر ءُ دار کنگی اَنت، دانکہ گل ھب ءِ تہ ءَ گیش ءِ چہ گیش فعال بہ بیت۔
دیوان ءِ دیمتری سرہال گل کاری اَت کہ دیوان ءَ ساڈی ایں سنگتاں ھب ہنکین ءِ دیمتری کار ءُ بازیں پروگرامانی سرءَ گپ ءُ باوست کُرت ءُ اے درگت ءَ وتی جتائیں شور ءُ سلاہ دیوان ءِ دیمءَ ایر کرتگ اَنت۔ سنگتاں گشتگ چشکہ ھب ہنچیں جاہے کہ اد ءَ مزنیں اداراہ نیست بلے اد ءَ مزنیں آباتی ئے ھست کہ ایشانی واستہ مارا جتائیں پروگرامءُپالیسی دیمءَ آرگی اِنت۔ ھب ءَ وت ءَ لس نودربر ءُ ورنا یانی کرا کالج ءُ اسکول آں رؤگ ءُ سر کنگی انت، ایشاں گیش وھد دئیگی انت۔
دیوان ءَ ساڈی ایں بنجاہی سنگتاں گپ کنان ءَ گشتگ کہ ھب وڈیں جاہے ءَ کہ اِدءَ آباتی ءِ سکیں ہورءُتوری ئے ھست اِنت بلے ہنکین ءِ وتی تہ ءَ دیمروئی کنگ، تنظیمی سنگتانی گوں گل ءَ مخلصی ءُ کمیٹڈ بوگ ءُ گل ءِ کار ءُ پروگراماں گوں سنجیدہ بوگ ءَ پدر کنت۔ گل ءِ کار ءُ آئی ءِ ھمک پروگرام گوں بلوچ سیاست ءُ بلوچ ڈیھءِ انیگیں لوٹاں گوں بندوک اَنت۔ گل ءِ ھمک سنگت بلوچ سیاست ءِ ھنیگیں لوٹاں سرپد بوان ءَ سیاست ءِ مٹی ءُ بدلیاں چہ آژنا بہ بنت، دانکہ بلوچ سیاست ءُ جھد ءِ پڑءَ وتی بود ءُ لائکیاں کارمرز کرت بہ کن انت۔ بلوچ ڈیھ ءَ سیاست بیھ ھم یکیں وڈءَ نہ بیتگ گڑا سیاسی سنگت ھمے سیاسی پیچ ءُ تابانی ھوالہ ءَ سرپدی بدار اَنت۔ بلوچ ڈیھ ءَ مدام جیڑہ، جنجالی، ءُ زورانسری گار ءُ بیگواہی ءَ بہ گر داں بلوچ چُک چینی ءَ بیا مدام جنجالانی آماچ اِنت، بلے اے وڈیں جاورہالانی تہ ءَ من ءُ تو نودربر سیاسی باسکے ءِ بستار ءَ کجا اوشتوک ایں اے مارا زانگ لوٹیت، ءُ یک سیاسی ورنائے ءَ مروچیگیں وھد ءِ لوٹانی ھساب ءَ وتی کرد درگیجگی اِنت کہ منی کرد ہنیگیں وھدءَ چی اَنت۔ یک سیاسی ورنائے ءَ وتی کرد ھمے عمل ءِ تہ ءَ آرگی ءُ ہوار کنگی اِنت دانکہ ما یک راجے ءِ بستار ءَ یک جاہے ءَ سر بوت بکن ایں۔ اے وھد ءَ مارا وتءَ ءُ وتی دومی ہمرائیں سنگت ءُ ورنایاں باصلاحیت ءُ باشعور ایں ورنا ءُ کیڈر جوڈ کنگی اِنت دانکہ ما ھمے راجی لوٹاں گوں ہوار بوت بکن ایں ءُ بلوچ سیاست ءِ جتائیں ہند ءُ پڑاں کار کرت بکن ایں۔
گڈسرءَ آوکیں گامگیج ءَ گوستگیں ہنکینی کابینہ ھلاس کنگ بوت ءٗ نوکیں ہنکینی کابینہ ءِ ٹہینگ بوت، نوکیں کابینہ ءِ تہ ءَ دودا بلوچ کارمستر، صنوبر بلوچ کمک کارمستر، ساجد بلوچ کارگشاد، لیاقت بلوچ کمک کارگشاد، ءُ پرویز بلوچ ہالرسانی کارگشاد گچین کنگ بوتگ اَنت۔ بنجاہی سنگت ءَ نوکیں ہنکینی کابینہ سوگند داتگ ءُ دیوان ھلاس کنگ بوتگ۔
بنجاہی جارکش بلوچ اسٹوڈنٹس ایکشن کمیٹی
