بلوچ اسٹوڈنٹس ایکشن کمیٹی ھیدرآباد ھنکین ءِ ھنکینی لس مجلس برجم دارگ بوت۔
زبیر بلوچ ھنکینی کارمستر ءُ اُزیر بلوچ ہنکینی کار گُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ھیدآباد ھنکین ءِ ھنکینی لس مجلس دیوان ھنکینی کارمستر مزمل بلوچ ءِ سروکی ءَ برجم دارگ بوتگ۔ دیوان ءِ مہمان ءِ ھاس بُنجاھی کُمک کارگُشاد مھمد بلوچ بوتگ۔ دیوان ءِ ایجنڈا بُنجاھی سرکیولر، ھنکینی رپورٹ، تنقیدی نشست، تنظیمی امور ءُ عالمی و علاقائی سیاسی صورتحال ءِ سرھالانی سرا دلجمی ءَ گوں گپ ءُ تران ءَ پد دیوان ءِ گُڑّی ایجنڈا آئندہ لائحہ عمل ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوتگ۔
دیوان ءَ بُنجاھی سنگت ءَ تْران کُتگ ءُ گُشتگ کہ بلوچ ورنا زاتی واھشت ءُ جیڑہ، علاقائی تب، زبان، قبائلی ءُ مذہبی پرک ءُ پیراں چہ بُرز راجی سوچ ءُ نظریہ ءِ بنیات ءَ سیاسی ءُ تنظیمی ڈسپلن ءِ تہءَ منظم بہ بنت ءُ نودربرانی سیاسی ءُ پگری تربیت ءُ راجی جوڈشت ءُ دیمروی ءِ ھاتر ءَ جہدوجہد بہ کن اَنت۔
دیمترا سنگت ءَ تْران کنان ءَ گُشت کہ ھیدرآباد ءِ تہا بلوچ نودربراں گوست ءَ ھم تنظیم کاری کُتگ ، بلوچ ورنا یکجاہ کتگ اَنت ءُ آہانی سیاسی تربیت کُتگ ءُ استیں وھد ءَ ھم بلوچ ورنا بساک ءِتلو( پلیٹ فارم )ءِ تہا یکجاہ اَنت ءُ وتی کچ ءُ کساس ءِ ھساب ءَ بلوچ ورناہانی سیاسی تربیت ءَ کنگ ءَ اَنت۔ بگندے استیں وھد ءَ تنظیم ھیدرآباد ءِ تہا اینکس مھکم نہ انت بلے مئے سنگت ءُ ورنا اگاں ستک ءُ دل ءُ مھنت ءَ گوں کار بہ کن اَنت ءُ وتی جہد ءَ چہ پد کِنزمہ بنت گڑا الم اد ءَ سیاست مہکم بیت۔ اگاں ھمے سوچ ءُ پگر ءِ بنیاد ءَ تنظیم کاری کنگ بہ بیت ءُ بلوچ ورناہانی تربیت ءِ کمٹمنٹ بہ بیت ، دگنیا ءِ ھرچ کُجام جاہ ءَ اگاں بلوچ ورنا ساڑی بہ بنت گڑا اودا الم بلوچ نیشنلزم ءِ سیاست بیت ءُ ورناہانی پہ بلوچ راجی جُنز ءِ ھاترا تربیت بیت کنت۔ ھیدرآباد ءِ وانگجاہانی تہ ءَ مارا بلوچستان ءِ جتائیں ھند ءُ دمگانی بلوچ ورنا دست کپ اَنت، کہ ادا گیش نودربر ھما بلوچ دمگاں چہ سیادی دار اَنت کہ آ جغرافیہ ءِ ھوالہ ءَ چہ بلوچستان ءَ سِندگ ءُ سندھ ءَ ھوار کنگ بوتگ اَنت۔ چوشکہ جیکب آباد، کشمودر ءُ ایدگہ دمگ، ھرچ ھما بلوچ دمگ کہ پہ زور سندھ ءَ ھوار کنگ بوتگ اَنت یاکہ ھما بلوچ کہ سندھ ءَ جہمنند بوتگ اَنت گڑا ھما ورناہانی تہءَ سندھی راجدوستی ءِ سان است ءُ کم کم ءَ اے مھلوک چہ بلوچ دور بوان اَنت۔ لھتیں وت ءَ سندھی بلوچ گشگ ءَ اِنت ءُ لھتیں دگہ نام ءِ سر ءَ وتی پجار گارکتگ، ھمے رنگ ءَ اے دمگاں بلوچپجاری گپچل ( آئیڈینٹٹی کرائسسز )ءِ آماچ اِنت۔ تنظیم ھمے جہد کنگ ءَ انت کہ اے دمگ ءِ ورناہانی تربیت ءَ انچیں کردارے ادا بہ کنت ءُ اے ورناہاں چہ پجاری گپچل ( آئیڈینٹٹی کرائسسز )بہ کش ایت ءُ راجی دائرہ ءِ تہءَ بیاریت ءُ اے دمگانی تہا بلوچ راجدوستیءِ سوچ ءَ مھکم بکنت۔ اے جہد ءَ ما یک کسانیں گامے جتگ بلے انگت باز کار پشت کپتگ۔ مرچی اگاں بساک ءِ وڈیں ادارہ یے ءَ اے ورناہانی تربیت کتگ یا کنگ ءَ انت گڑا آئی ءِ سان ءُ اآسرال مارا گندگ کئیت، مرچی اگاں کشمور ءُ جیکب آباد ءُ ایدگہ جاہاں کسے مئے چم ءَ است گڑا آ ھمے ورنا اَنت کہ تنظیم ءَ آوانی تربیت کُتگ ءُ ہمے ورانایانی تہ ءَ اے سکت ہست کہ اد ءَ بلوچ راجدوستی ءَ مہکم بہ کن اَنت۔
دیوان ءِ کُلیں بہرانی سرا دلجمیں گپ ءُ تران ءَ پد گڈی ایجنڈہ آوکیں گامگیج ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوت۔ نوک گچین بوتگیں کابینہ ءَ زبیر بلوچ ھنکینی کارمستر، اعظم بلوچ کُمک کارمستر، ازیر بلوچ کارگشاد، مجتبا بلوچ کُمک کارگشاد ءُ آصف بلوچ ھالرسانی کارگُشاد گچین کنگ بوتگ اَنت ءُ سوگند زورگ ءَ پد دیوان ھلاس کنگ بوتگ۔
بنجاہی جار کش: بلوچ اسٹوڈنٹس ایکشن کمیٹی
