بلوچ اسٹوڈنٹس ایکشن کمیٹی لورالائی ھنکین ءِ ھنکینی لس دیوان برجم دارگ بوتگ۔
عدنان بلوچ ھنکینی کارمستر ءُ اکرم بلوچ ھنکینی کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی لورالائی ھنکین ءِ ھنکینی لس دیوان ھنکینی گوستگیں کارمستر محبوب بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بُنجاھی کمیٹی ءِ باسک وقار بلوچ ءُبالاچ بلوچ بوتگ اَنت۔ دیوان ءِ بُنگپ بُنجاھی سرکیولر، ھنکینی رپورٹ، شرگداری، تنظیمی امور ءُ ھندیءُ میان استمانی سیاسی صورتحال ءِ سرھالانی سرءَ دلجمی ءَ گوں گپ ءُ تران ءَ پد دیوان ءِ گُڈی بنگپ آوکیں گامگیجءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوتگ۔
دیوانءَ بنجاہی سنگتاں تران کنانءَ گُشت کہ مرچی بلوچ راج یا ھاس ورناہانی دیم ءَ مستریں چیدگ ادارتی بنیات ءِ سر ءَ تپاکی ءُ ھمتپاکی ءِ برجم دارگ ءُ جہد اِنت۔ مارا ھما سوچ ءَ یلہ کنگی اِنت کہ مردم ءَ را آئی ءِ پیشہ، بستار یا قبائلی بنیاد ءَ بھر ءُ بانگ کنت۔ اے جُست کہ کئے ڈاکٹر اِنت، کئے انجینئر اِنت، کئے گریب ءُ کئے سیرین اِنت، کئے براہوئی،کئے بلوچیءُکئے کھیترانی زباناں گپ کنت۔اے درست زوراورین ءِ دپ ءَ داتگیں گپ اَنت کہ سداں سال مئے زہن اِش زمزیلاں گوں بستگ اَنت۔ نوک آبادیاتی نظام نہ ایوک ءَ زمینانی سرءَ قبضہ کنت بلکیں ذہنانی سرءَ ہم حکمرانی کنت۔ اے انسانی پگری جوڈشت( ڈھانچہ) ءَ مسخ کنت، انسانی نفس ءَ چو وروکءَ وارت ءُ دور کنت ءُ راجاں تبکانی تہ ءَ بھر ءُ بانگ کنت۔ نوں اے گپ پدر بوتگ کہ نوک آباتی نظام ءَ مئے وانگی ادارہ پہ روزگار ءِ ھاترءَ ایوک ءَ تربیت ءِ جاہ جوڑ کتگ اَنت ءُ وانگ ءَ را پہ یک نوکری ئے ءِ جاہ ءُ مقام ءِ رسگ ءِ وسیلہ ئے جوڈ کتگ۔ بلوچ نودربراں اے بلوچ دُژمنیں پندلانی دیم ءَاوشتگی اِنت ءُ وانگ ءُ زانگ پہ دربرگ،ہیل کنگ، وتی بودانی درنگازی ءُ پہ چاگرد ءِ گہتری ءِ ہاتر ءَ کارمرز کنگی اِنت۔ دگرانی نوکر بیگ ءِ جاہ ءَ وت واھُند ءُ واجہ بیگ ءِ سر ءَ زور دیگی اِنت۔
دیمترءَ سنگتاں تران کنانءَ گُشت کہ مرچی زلورت ہمش اِنت کہ بلوچ نودربر وت ءَ نہ تہنا پوہ بہ بنت بلکیں ہستیں وہد ءِحساسیت ءُ نازُرکیاں بہ زان اَنت ءُ زاتی نپ ءُ پائدگاں چہ در راجی مچانکی نپ ءُ سیتانی ہاترءَ گامے بہ جن اَنت ، پرچاکہ مئے درستانی باندات گوں راجی مُچانکی نپ ءُ سیتاں بندوک اِنت، داں وہدے راجی سیت پہازگ نہ بنت ، زاتی ءُ نپری آزاتی ءُ نپانی پہازگ تہناوتی جند ءَ رد دیگ ءِ یک دروگیں ٹاپارے۔ پمیشکا مئے کُلیں سیاسی تبک ءِ زمہ واری اِنت کہ بلوچ چاگرد ءَ راجی مُچانکی نپانی نیمگ ءَ بیار ایت۔ بساک ءِ ورنا ءُ سنگت پگری ءُ سیاسی جُنز ءِ رنگ ءَ بلوچ نودربراں راجی ادارتی پڑ اں گیش ءَ چہ گیش منظم بہ کن اَنت۔بساک ایوک ءَ وانگی جیڑہانی توجیل کنگ ءِ ادارہ ءُ پلیٹ فارم نہ اِنت بلکیں راجی سِنچ، سیاسی گھگیری ءِ سوچ، دود ءُ ربیدگ ءِ زندگ دارگ ءَ ہوار ہمک شئے کہ گوں بلوچ راج ءَگوں بندوک اِنت آئی ءِ ہاتر ءَ جہد کنگ ءُ نودربر سیاسی سنگر ءَ بلوچ ورنایانی ترجمان اِنت۔
دیمی بہرءَ پہ ھنکینءَ لہتے فیصلہ زیرگ بیتگ کہ لورالائیءِ وانگی ادارہانی تہءَ گوں مھکمیءُ ترندیءَ گل کاری کنگ بیت۔ وتی ماتی زباناں پہ جہدءَ بلوچی ءُ براہوئی کلاس اڈ دیگ بنت۔ نوک داخلہ زرتگیں بلوچ نودربرانی واستہ وش آتکی دیوان ءُ نودربرانی شعوریءُ پگری ہیلکاری ءَ پہ مروشیگیں بلوچ ءِ جاور ءُ دنیاءِ سیاسی جاوراں چماں کنگ ءُ نوکیں سرہال ءُ دروشماں ہیلکاری دیوان اڈ دیگ بنت۔ بلوچستان کتاب کاروانءِ وسیلہ ءَ لورالائی ءِ جتائیں وانگی ادارہانی تہ ءَ اڈ دیگ بنت۔
دیوان ءِ کُلیں بہرانی سرءَ دلجمیں گپ ءُ تران ءَ پد گڈی بنگپ آوکیں گامگیج ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوت۔ نوک گچین بوتگیں کابینہ ءَ عدنان بلوچ ھنکینی کارمستر، پرویز بلوچ کُمک کارمستر، اکرم بلوچ کارگشاد، آسودی بلوچ کُمک کارگشاد ءُ ضیا بلوچ ھالرسانی کارگُشاد گچین کنگ بوتگ اَنت ۔ دیوان ءِ سنگتاں سوگند دیگ ءَ پد دیوان ھلاس کنگ بوتگ۔
بنجاہی جارکش: بلوچ اسٹوڈنٹس ایکشن کمیٹی
