بلوچ اسٹوڈنٹس ایکشن کمیٹی اوتھل ھنکین ءِ ھنکینی لس مجلس برجم دارگ بوتگ۔
جُنید بلوچ ھنکینی کارمستر ءُ تنویر بلوچ ھنکینی کارگُشاد گچین کنگ بوتگ اَنت۔
“جتائیں جیڑہ ءُ جنجال ءُ اڈانداں ابید نگیگیں جاورانی تہءَ سیاسی سپر ءَ برجاہ داروکیں جہدکار، راستیں سیاسی ءُ شعوری جہدکار زانگ بنت۔”
کماش شبیر بلوچ
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی اوتھل ھنکین ءِ ھنکینی لس مجلس ھنکینی کارمستر احسان بلوچ ءِ سروکی ءَ برجم دارگ بوت۔ دیوان ءِ مہمان ءھاس بُنجاھی کماش شبیر بلوچ ءُ بُنجاھی کُمک کارگُشاد مھمد بلوچ بوتگ اَنت۔ دیوان ءِ بُنگپ بُنجاھی سرکیولر، ھنکینی اھوال، تنقیدی نشست، گل کاری ءُ ھندی ءُ میان اُستمانی سیاسی جاورھال ءِ سرءَدلجمی ءَ گپ ءُ تران ءَ پد دیوان ءِ گُڈّی بُنگپ آؤکیں گامگیج ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوتگ۔
دیوان ءَ جتائیں سرہالانی سرءَ گپ کنان ءَ بُنجاھی سنگتاں گشت کہ بلوچ ورنا استان ءِ جوڈ کتگیں گپتمان ءُ بیانیہ ءَ سرپد بہ بنت ءُ استیں جاورھالانی سرءَ ہورتچاری بہ کن اَنت ءُ شعوری بنیاتءَ بلوچ جہد ءِ بہر بہ بنت ءُ وتی راجی زمہ واریاں پیلو بہ کن اَنت۔ چوشکہ ما ءُ شُما شری ءَ سرپدیں کہ ھُمک دور ءُ باریگ ءَ تُری آ چونیں زوراورے بہ بیت آئی ءِ مستریں پندلاں چہ یکے تُرس ءِ ودینگ ءُ ایردست ءِ دل ءُ دماگ ءَ جاہ دیگ اِنت ءُ پدا ھمے تُرس ءِ ساھگ ءِ چیر ءَ ایردست ءَ چہ گھگیری ءَ دور دارگ ءُ ایردست ءِ گُلامی ءَ منگ ءَ پہ جاڈیگ کنگ اِنت۔ مرچی بلوچستان ءَ انچیں جاورے ودیگ بوتگ، یک نیمگے بلوچ ورنا سدانی کچّ ءَ استان ءِ ادارگانی دست ءَ زورانسری آوار جنگ بوگ ءَ اَنت ءُ دومی نیمگ ءَ پنجاہ پنجاہ بیگواھیں مردمانی ژانگولیں لاش دور دیگ بوگ ءَ اَنت۔ سئیمی نیمگ ءَ بلوچ ورنا وانگجاہانی تہءَ جتائیں دروشماں تنگ کنگ بوگ ءَ اَنت آہانی پروفائیلنگ، گِساں فون کنگ ءُ تُرس ءُ بیھار دیگ بوگ ءَ اِنت۔ اے درست استان ءِ ھمے پالیسی ءِ بہر اَنت کہ آئی ءِ بنیات ءَ یک تُرسے ودیگ بوگ ءَ اِنت، بلے مارا بلوچ ورنا چرے تُرس ءَ چہ کشگی اَنت ءُ شعوری بنیاد ءَ آہانی تربیت کنگی اِنت دانکہ ترس آماچ مہ بنت ءُ بے تواری ءَ گوں اے زوراکیاں منگ ءَ جاڈیگ مہ بنت۔ شعور چہ تُرس ءَ مستر ءُ بالا تر اِنت، آئی ءِ مستریں درور ھمیش اِنت کہ استان ءِ سرجمیں پندلاں ابید ھم بلوچ ورنا وتی سیاسی سپر ءَ برجاہ داران ءَ دیم ء جنزان اَنت، وتی وانگ ءُ تربیتی کاراں جنزینگ ءَ اَنت گڑا اے شعور اِنت، اگاں بلوچ ورنا شعوری بنیات ءَ اے جہد ءَانچو مہکمی ءَ ھوار بہ بنت گڑا ھچ وڈیں تُرس ءُ بیہار آہاں داشت نہ کنت۔ تُرس ءُ بیہار، جیڑہ ءُ جنجال، واری ءُ تکلیپی ءَ ابید ھچ وڈیں کُربانی دیگ ءَ چک ءُپد نہ بوگ ءُ جہد کنگ ھکیگیں شعور ءِ برورداِنت۔
دیمترءَ سنگتاں تران کنان ءَ گشت کہ بلوچستان ءِ وانگجاہانی موکلانی انچیں ربیتے جوڈ اِنت کہ اگاں دو ماہ ءَ وانگجاہ پچ بنت گڑا دگہ سئے ماہ ءَ بند اَنت۔ ادءَ ناں ایوک ءَ نودربرانی اکیڈمک وانگ سانمند اِنت بلکیں آہانی سیاسی تربیت ءِ کار ھم اوشت آماچ بوگ ءَ اِنت۔ بلے مئے گل ءِ باسک ایوک ءَ وتی وانگجاہ ءِ توک ءَ گلءِ باسک نہ اَنت بلکیں آ ھر کُجا بہ بنت گل ءِ باسک ءُ زمہ وار اَنت۔ سنگت موکلانی میان ءَ وتی ھند ءُ دمگاں رونت ھم گل ءِ ذمہ وار اَنت ءُ گل ءِ پروگرام ءُ کارانی سرءَ آہاں کاربند بوگی اِنت۔ اے میان ءَ ھمک سنگت وتی کتاب وانگ ءِ روشت ءَ برجاہ داران ءَ وتی ھند ءُ دمگانی تہءَ گل ءِ گیشتر فعال کنگ ءَ ھوار گل ءِ ایدگہ کار ءُ پروگرامانی دیم ءَ برگ ءِ ھاتر ءَ جہد بہ کن اَنت۔ مئے باسکاں سرکاری موکلانی رواج پروش دیگی اِنت ءُ اے روشت کہ “وانگجاہ بند اَنت گڑا گل ءِ کار ءُ پروگرامانی ھوالہ ءَ ھم مئے موکل اِنت” چشیں ربیت پروش دیگی اَنت ءُ اے دابیں روشت زورگی اِنت کہ “ما ھر کُجا رویں اے راجی زمہ واری مئے کوپگان اِنت” ءُ مارا ھر ھند ءُ دمگاں جتائیں رنگ ءَ وتی راجی زمہ واری پیلو کنگی اَنت۔
دیون ءِ جتائیں بُنگپانی سرءَ دلجمیں تْران ءَ پد گُڈّی بُنگپ آؤکیں گامگیج ءَ گوستگیں ھنکینی کابینہ ھلاس کنگ ءُ نوکیں کابینہ گچین کنگ بوت۔ نوک گچین بوتگیں کابینہ ءَ جُنید بلوچ ھنکینی کارمستر، بلوچ خان کُمک کارمستر، تنویر بلوچ کارگُشاد، شفقت بلوچ کُمک کارگُشاد ءُ وسیم بلوچ ھنکینی ھالرسانی کارگُشاد گچین کنگ بوت اَنت۔ گُڈسرءَ سنگتانی سوگند زورگ ءَ پد دیوان آسر کنگ بوت۔
بنجاہی جارکش: بلوچ اسٹوڈنٹس ایکشن کمیٹی
