بلوچ اسٹوڈنٹس ایکشن کمیٹی خاران ہنکین نا لس مجلس اڈ تننگا
اقبال بلوچ کارمستر و عدنان بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خاران ہنکین نا ہنکینی لس مجلس ہنکینی کارمستر عدنان بلوچ نا کماشی ٹی اڈ تننگا، دیوان نا مہمان بنجائی کمیٹی نا باسک علی بلوچ و فہد بلوچ ئسر۔ دیوان ئٹ بنجائی سرکیولر، ہنکینی احوال، نغدکاری، گل کاری، ہندی و جہانی سیاسی حالیت آک و بروکا گام گیج نا ٹِک آتا زی آ است جمی ئٹ ہیت و گپ مس۔
دیوان نا اولیکو ٹِک بنجائی سرکیولر ئس، بنجائی سنگت مجلس نا مون آ بنجائی سرکیولر ءِ خوانا اوڑتون اوار بنجائی دیوان ئٹ ارفنگوک آ فیصلہ غاتے ہم مجلس نا مون آ تخا۔ ارٹمیکو ٹِک ہنکینی احوال ئس، ہرادے ہنکینی سنگت مجلس نا مون آ تخا، ہراٹی ہنکینی کاریم تیتون اوار ہنکین نا کمیٹی تا احوال آک ہم اوار ئسر۔
دیوان ءِ مون آ دریسہ سنگت آک کل ٹِک آتا زی آ اُست جمی ئٹ ہیت و گپ کریر۔ دیوان ئٹ ساڑی بنجائی سنگت آک ہیت کریسہ پاریر کہ خاران وڑو جاغہ ئسے ٹی گل ئنا گڑاس وخت ئٹ فعال مننگ تینٹ دا ورنا تا سیاسی چاہنداری، مخلصی و خوانندہ تا سیاسی بیداری ءِ پاش کیک کہ اوفک مدام اسہ مٹ و بدلی ئسے کن تینا کوشست ءِ کننگ ءُ۔ داڑے تولوک آ سنگت آتے خننگ آن پد اسہ خوشی اس مریک کہ ننے داڑے دنو سنگت ارے ہرا راجی سیاسی خواست آتے سرپد مریسہ مخلصی ئٹ کاریم کننگ کن سلوک ءُ۔ بھاز وخت آ نن اندا سرپد مرینہ کہ ننا سیاسی کاریم تا کچ بھلن اف، ولے دن اف ننے تینا سیاسی کاریم تے مخلصی ئٹ مون آ دریسہ پوسکنو ڈسکشن ودی کننگ نا کوشست کروئی ءِ۔ سنگت آک ہیت کریسہ پاریر کہ اسہ سیاسی سنگت اس تینا تنظیم ءِ ہموتم مہکم کننگ کیک ہراتم کہ اود کل آن گیشتر تینا گل و اونا پروگرام ءِ مون آ دننگ کن تینا تیوہ غا وخت ءِ ایتے۔
سنگت آک ہیت کریسہ پاریر کہ خاران ئٹ دنو بھلو سیاسی ایکٹووٹی اف ولے اندا گواچنی آ سیاست نا مون ءِ توننگ کن وڑ وڑو چم کننگ مننگ ءِ، دنکہ بھاز آ گروپ آک داڑے جوڈ کننگانو ہرافک اندا کوشست ءِ کننگ ءُ کہ امر اوفک ننا سیاست نا مون آ بریسہ ننے خاران آن کشر، ولے داڑے اسہ گڑاس ننا سیاست ءِ پین ہموخس مہکم و فعال کننگ کیک، او ننا سیاسی بیداری، چاہنداری، پروگرام و ڈسکشن آک ءُ، ہرافک ننے تینا گل و نظریہ ءِ اسہ اسہ خوانندہ ءِ سر کننگ کن کمک کرور۔ اندا کاریمک و پروگرام آک ننے تینا راجی سیاست ءِ سرپد مننگ و اونا خواست آتے سرپد مریسہ ہمو وڑو پروگرام ہتنگ نا و اڈ تننگ کن تیار کرور۔
کل آ ٹِک آتا زی آ ہیت کننگ آن پد گڈیکو ٹِک بروکا گامگیج ئس، ہراٹی خاران ہنکین نا مسکوہی ہنکینی کابینہ ایسر کننگا و پوسکنا ہنکینی کابینہ گچین کننگا۔ پوسکن گچین مروکا کابینہ ٹی اقبال بلوچ ہنکینی کارمستر، اشفاق ھمبل بلوچ کمک کارمستر، عدنان کارگشاد، مہیم بلوچ کمک کارگشاد، فہد بلوچ حوالکاری کارگشاد گچین کننگار۔ بنجائی سنگت پوسکن گچین مروکا ہنکینی کابینہ ءِ سوغند تس و اوکان پد مجلس ایسر کننگا۔
بنجاہی جارکش :بلوچ اسٹوڈنٹس ایکشن کمیٹی
