چہ بلوچ اسٹوڈنٹس ایکشن کمیٹی ءِ نیمگ ءَ اکبر بارکزئی ءِ یات ءَ لیاری ءَ دیوانے برجم دارگ بیتگ۔
بلوچ اسٹوڈنٹس ایکشن کمیٹی
رمس 10 مئی 2025 ءَ بلوچ اسٹوڈنٹس ایکشن کمیٹی لیاری بُنزہ ءِ نیمگ ءَ چہ اکبر بارکزئی ءِ یات ءَ یک دیوانے برجم دارگ بوتگ۔ دیوان جُتائیں بھرانی تہ ءَ برجم دارگ بوت کہ اِشانی تہ ءَ گُشتانک، پینل ڈسکیشن ءُ شئیر ءُ شائری ءِ بھر ھوار بوتگ اَنت۔
دیوان وتی اولی بھر چہ گُشتانکی بھر ءَ بندات کنگ بوت۔ گُشتانک ءِ سرھال ” اکبر بارکزئی ءِ زند ءُ ازم” اَت ءُ ترانکار سید ہاشمی ریفرسن کتابجاہ ءِ کارمستر واجہ رمضان بامری اَت۔ واجہ ءَ تران کنان ءَ گُوَشت کہ اکبر بارکزئی بلوچ راج ءِ ھما کارستاں ھوار اِنت کہ آہاں بلوچ سیاست، لبزانک ءُ راجی گہگیری ءِ دیمروئی ءِ ھاترا مُدامی جُھد کُتگ۔ واجہ بارکزئی وتی سیاسی زِند ءِ تہ ءَ لیاریءِ پیمیں جاہے ءَ گوں وتی سنگتاں ھوار مزنیں سیاسی بُنجلے جوڈ کنت اِنت ءُ نودربرانی سیاسی سِنچ ءُ چاگرد ءَ زانشتی ماھولے ودیگ کنگ ءِ ھاترا وتی کِرد ءَ پیلو کنت اِنت۔ واجہ ھما زمانگ ءَ وتی سیاسی توکل ءَ مُھکم ءُ برجاہ دار اِیت وھدے کہ استان ءَ مارشل لاء لگ ایت ءُ فوجی ھکومت بیت اِنت۔ اے زمانگ ءَ بلوچ سیاست نظریاتی تضادات ءُ استان ءِ سیاسی عمل ءِ سرءَ بندش جَنگ بیت اِنت، ھمے پندل ءُ اڈاندانی سبب ءَ چہ واجہ گوں لھتیں سنگتاں درانڈیھ بیت ءُ وتی سیاسی زِند ءَ درانڈیھ ءَ جُنزینان کنت۔
تران کاراں دیمترءَ گُشتانک دیان ءَ گُوَشت کہ واجہ اکبر بارکزئی ءَ لبزانک ءِ پِڑ ءَ بلوچی لبزانک ءِ ھاترا ھمینکسیں کِردے پیلو کُتگ کہ پہ بلوچ لبزانک ءَ دیمروئی یے گُشگ بہ بیت تا رَد بیت نہ کنت۔ واجہ بارکزئی ءَ بلوچ لبزانک ءِ پِڑءَ مزنیں کردے پیلو کُتگ پہ درود 1960 ءِ زمانگ ءَ جُتائیں لبزانکی تاک چاپ کُتگ ءُ لبزانکی مجلسانی چِست ءُ ایر ھم جُنزینتگ اَنت ءُ شائیری ءِ پِڑ ءَ ھم جوانیں نام ءُ مقامے جوڈ کتگے ۔
واجہ رمضان بامری ءَ وتی گُشتانک ءِ گُڈسرءَ دیوان ءَ را سرپدی دات ءُ گُوَشت کہ بلوچ ورناہ ءُ لبزانکی سنگت ھمے سما بہ کن اَنت کہ واجہ اکبر بادکزئی ءِ ڈولیں کارست بلوچ راج ءِ ہما نمیرانیں سر اَنت کہ آ پہ ورنایاں چیدگ اَنتءُ آئی ءِ کرتن پہ بلوچ جُھدکاراں سِکین اَنت کہ ورنا راجی جہد ءَ دیم ءَ برگ ءِ ہاتر ءَ مہکمی ءَ گوں جہد بہ کن اَنت۔
دیوان ءِ دیمتری بہر پینل ڈسکیشن اَت کہ آئی ءِ سرھال ” لیاری ءِ وانگی نظام ” اَت۔ پینل ڈسکیشن ءِ مہماندار کراچی ھنکین ءِ کارگشاد رحمان بلوچ اَت ءُ مہمان اوریس بلوچ ءُ واجہ زرخان بلوچ اِت اَنت۔
مہماناں دیوان ءَ تران کنان ءَ گُوَشت کہ لیاری چہ وتی بنداتی وہد ءَ بلوچ سیاست، لبزانک ءُ اِزم ءِ بُنجل بیتگ بلے مرچی جُتائیں پندلانی بُنیات ءَ انچیں جاورانی آماچ اِنت کہ وانگ ءُ زانگ ءُ چاگردی دیمروئی ءَ چہ زِبہر اِنت، لیاری ءِ مزنیں کَچّے ءَ ورناہ چہ وانگ ءَ دیر اَنت ءُ اگاں کَسّے کہ وانگ ءَ اِنت گُڈا لیاری ءِ وانگی ادارگانی تہ ءَ بُنکی آسراتیانی نہ بُوّگ ھم پہ نودربراں جُتائیں جیڑہ ودیگ کنت۔
مہمانان تران کنان ءَ گُوَشت کہ لیاری ءِ تہ ءَ استیں وھد ءَ این جی اوز کہ لیاری ءِ وانگ ءُ زانگ ءِ عمل ءَ دیمروئی ءِ نام ءَ وتی دست ءَ کنان اِنت، اے درحقیقت ءَ بلوچ چاگرد ءَ چہ بلوچیتءَ کشگ ءَ ھما ربیدگانی گیش کنگ ءِ شوربندی اِنت کہ آ سرجمی ءَ نودربراناں دری تب ءُ مئیل ءَ گوں بندوک کنگ ءِ شوربندی اِنت، پمے ھاترا مارا سما کنگی اِنت کہ ھرچ ھما ادارگ کہ درامدانی تب ءِ ودیگ کنگ ءِ جُھد ءَ اِنت بزانکہ مئے چاگرد ءِ یکمُشتی ءُ ربیدگ ءَ تاوان دیگ ءَ اِنت۔
سنگتاں گُڈسرا وتی کلوہ دات ءُ گُوَشت کہ بہ گِندئے مرچیگیں وھد ءَ مالی تنگدستی ءُ اندگہ جیڑہانی سبب ءَ چہ ورناہ وانگ ءَ چہ زِبہر کنگ بیتگ اَنت، گُڑا مارا ھمے زانگی اِنت کہ ما یک راجے ءِ بستار ءَ وتی کوپگ بیت کنیں ءُ وتی ورناہاں گوں وانگ ءَ گوں ھَمگرنچ کت کنیں وہدیکہ ما وتی راجی زمہ واریاں پیلو بہ کنیں۔ پینل تران ءِ بھر ءَ پد شئیر ءُ شائری ءِ بھر اَت کہ اِشی تہ ءَ دیوان ءَ نِندوکیں ورناہ، لیاری ءِ ادیب ءُ کماشاں وتی شئیر ونت اَنت۔
گُڈسرءَبُنزہی کارمستر شمس بلوچ ءَ تران کُت ءُ گُوَشت کہ اکبر بارکزئی ءِ یات ءَ برجم داشتگیں مراگش واجہ ءِ جُھد ءُ عملانی زندگ دارگ ءِ جُھد اِنت کہ مارا یک راجے ءِ بستار ءَ مُدام آئی ءِ ڈولیں کارست نہ تہنا زانگی انت بلکیں آہانی کرتناں چہ دربرگ ءُ گہتر عمل کنگی اِنت۔ آہانی جہدپہ ما سکینے ، ھمے سِکین ءَ گوں دیما جُنزگی ایں ، دیوان ءَ نِندوکیں ھَمُک لبزانکی گل ءِ سنگت، نودربر گلانی ورناہ ءُ ایدگہ مھلوک ءِ دیوان ءِ بہر زیرگ پہ بساک ءِ عملانی ہاترا مُھکمیں جوزگ اِنت۔
دیوان ءِ سرجمیں بھرانی سوبمندی ءَ برجم دارگ ءَ پد دیوان آسر کنگ بوت۔
