بلوچ اسٹوڈنٹس ایکشن کمیٹی پنجگور ہنکین ءِ لس دیوان برجم دارگ بیتگ۔
سلمان بلوچ ہنکینی کارمستر ءُ کامل بلوچ ہنکینی کارگشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی پنجگور ہنکین ءِ لس دیوان گوستگیں ہنکینی کارمستر آئشہ بلوچ ءِ سروکی ءَ برجم دارگ بیتگ۔ دیوان ءِ ہاسیں مہمان گل ءِ بنجاہی ہالرسانی کارگُشاد اُزیر بلوچ بیتگ۔ دیوان ءِ بنگپانی تہ ءَ بنجاہی سرکیولر، ہنکینی اہوال، نگدی نشست، گل کاری، ہندی ءُ میان استمانی سیاسی جاورہال ءُ آؤکیں گامگیج ہوار بیتگ اَنت۔
دیوان ءِ بندات چہ بنجاہی سرکیولر ءَ کنگ بوت کہ آئی ءِ تہ ءَ بنجاہی دیوان ءِ اہوال ءُ پالیسی ہوار اِت اَنت ءُ بنجاہی سنگت ءَ بنجاہی کار ءُ اہوال یک یک ءَ دیوان ءَ پیش کُت اَنت۔ دومی بنگپ ہنکینی اہوال اَت کہ آئی ءِ تہ ءَ ہنکینی کارگشاد ءَ ہنکینی اہوال دیوان ءِ دیم ءَ پیش کُت اَنت۔ اہوالانی تہ ءَ ہنکینی تربیتی کار، مراگش ءُ بلوچستان کتاب کاروان ءِ اہوال، سنگتانی وانگ ءُ ہیلکاری ءِ اہوالاں ہوار ایدگہ کسان ءُ مزنیں اہوال ہوار اِت اَنت۔
دیوان ءِ دیمی بھر نگدی نشست اَت کہ سنگتاں ہنکینی کار ءُ نزوریانی سر ءَ نگد کنان ءَ ہمک ڈولیں نزوریانی نشاندہی کنان ءَ آہانی توجیل کنگ ءَ پہ نوکیں فیصلہ ساز ایت۔
دیوان ءِ گل کاری بھر ءِ تہ ءَ بنجاہی سنگت ءَ تران کنان ءَ گوْشت کہ پنجگور بلوچ نودربر سیاست ءِ بنداتی بُنجلاں چہ یکے کہ اد ءَ بلوچ نودربر سیاست ءُ ادب ءَ رُدوم زیران ءَ بازیں سیاسی جہدکار ءُ سروک ودی کُتگ۔ اد ءِ ورنا ءُ جہدکاراں وتی مھنت ءُ راجی ھمت ءَ چہ بلوچ نودربر ءُ مہلوکی سیاست ءَ نہ تہنا زِندگ بیتگ بلکیں رُدوم زیران ءَ مہکم بیتگ۔ اے گپ ہم راستے کہ ہما جاہ ءَ راجی کار بیت اود ءَ آہانی دارگ ءَ پہ ہم وڈوڈیں پندل سازگ بیت، ہمے پیم پنجگور ہم جتائیں پندلانی وسیلہ ءَ سیاسی ہوالہ ءَ پُشت ءَ دارگ بیتگ۔ بگندے کسانیں مدتے بیت کہ پنجگور ءَ سیاسی ماہول نزور تَر اِتگ بلے اے ہنکین چو ارزانی ءَ غیر سیاسی بیت نہ کنت ءُ ناکہ ما غیر سیاسی بیگ ءَ کِلیں۔
دیمتر ءَ سنگت ءَ تران کنان ءِ درائینت کہ مرچیگیں دور ءَ کہ گندگ ءَ بلوچ ورنایانی ہلاپ ءَ مزنیں زوراکیں پندل سازگ بیگ ءَ اِنت دانکہ بلوچ ورنا وتی زانشتی ءُ سیاسی سپر ءَ چہ پُشت کِنز بہ بنت بلے اے گپ مارا زانگی اِنت کہ ہما باریگ ءَ جہد کنگ گران بہ بیت آ وہد ءُ باریگ ءَ جہد گیشتر کنگ ءُ منظم کنگی اِنت۔ مرچی بلوچ ورنایانی ہاٹیگ ءُ ھمت ءَ اے پدر کُتگ کہ مئے ورنا پُشت دیوک نہ اَنت بلکیں اوشتوک ءُ عمل کنوکیں ورنا اَنت پمیشکا مارا وت ءَ پگری ہوالہ ءَ انچو مہکم کنگی اِنت کہ آؤکیں کمی سکی ءُ سوری ءَ وہداں ورنا چو مہکمیں کوہ ءَ بہ اوشت اَنت ءُ سیاسی جہد ءَ دیم ءَ بہ بر اَنت۔ مئے ورنایانی تہ ءَ اے ہاٹیگ ءُ سکت ہست بلے وتی توکل انگت مہکم کنگی اَنت ءُ ہمک ڈولیں جاوراں پہ جاڑیگ بیگی اِنت پرچاکہ اے یک راجی جُہدے ءُ سوب راجی جہدانی بیت بلے ہما وہد ءَ کہ آئی ءَ ورنا وتی ارزشتداریں کرد ءَ پیلو بہ کن اَنت۔ ہمے پیم وتی کار ءُ عمل ءَ گیش توانا کنگ ءِ ہاترءَ زانت ءُ زانشت ءِ وسیلگ ءَ جہد برجاہ دارگی اِنت پرچاکہ مئے تہ ءَ زانت ءُ دانش بیت گڑا ما وتی راجی ءُ سیاسی جیڑہاں شرتر توجیل کُت کنیں۔
دیوان ءِ سرجمیں بنگپانی سر ءَ گپ ءُ تران ءَ پد آؤکیں گامگیج ءِ تہ ءَ گوستگیں ہنکینی کابینہ ہلاس کنگ بیتگ ءُ نوکیں ہنکین ءَ پہ سلمان بلوچ ہنکینی کارمستر، ہِرا بلوچ کمک کارمستر، کامل بلوچ کارگُشاد، ولید بلوچ کمک کارگُشاد ءُ زینب بلوچ ہالرسانی کارگُشاد گچین کنگ بیتگ اَنت۔
دیوان ءِ گُڑسر ءَ نوک گچین بیتگیں سنگتانی سوگند دیگ ءَ پد دیوان ہلاس کنگ بیتگ۔
بنجاہی جارکش: بلوچ اسٹوڈنٹس ایکشن کمیٹی
