بلوچ اسٹوڈنٹس ایکشن کمیٹی ڈی جی ھنکین ءِ نیمگ ءَ چہ یک زانشتی دیوانے ھنکینی کارمستر ءِ سروکی ءَ برجم دارگ بیتگ۔ دیوان ءِ مہمان ھاس بنجاہی کماش شبیر بلوچ ءُ بنجاہی سنگت اظہر بلوچ ءُ وقار بلوچ بیتگ اَنت۔
دیوان ءِ سرھال؛ سیاسی بیانیہ
ترانکار: بنجاہی کماش شبیر بلوچ
بنجاہی کماش ءَ وتی تران ءِ بندات گوں سئے سیاسی اوگاماں چہ کرت۔ ھنچش کہ دگنیا ءِ سیاسی تھیورسٹ گُش اَنت کہ اگاں تو کسے ءَ سیاست ءَ چہ مکن بہ کن ئے کہ سیاست ءِ پائیدگ نیست اِنت۔ گڑا اے وت یک سیاسی عملے زانگ بیت ءُ یک سیاسی بیانیہ یے ءِ دروشم ءَ گیپت بزاں یک مردمے ءِ سیاسی ھوالہ ءَ زہن سازی کنگ اِنت۔
دومی بہر ءِ تہ ءَ سنگتاں گشت کہ سیاست ءِ تہ ءَ باز رند ءَ گُشگ بیت کہ نعرہ بازی مہ کن اِت، اوگام ءُ تراناں چہ ھچ بوت نہ کنت گڑا اے ھم وتی تہ ءَ سیاسی اوگامے زانگ بیت۔
سیمی بہر ءَ سنگت ءَ گُشت کہ چشکہ مئے چاگرد گلامی ءِ سانکلاں گوں بندوک اِنت گڑا مئے چاگرد ءِ تہ ءَ جتا جتائیں سیاسی روشت جاگہ کنگ ءَ اَنت۔ ھنچش گندگ بیت کہ سیاسی اوگام ءِ تہ ءَ بازیں گروپ، ٹولی یا روشت مئے سماج ءِ تہ ءَ جاگہ کنگ ءَ اَنت کہ آ ٹولیانی مستریں مکسد اش اِنت کہ ورنایاں گیر سیاسی جوڈ کُت بہ کن اَنت۔ چونہا چشیں چیز سیاسی ربیدگ جوڈ بنت کہ آ دیمتر ءَ رواج گِراَنت۔ اشی یک درورے اش اِنت کہ 1970 ءِ دہک ءَ غوث بکش بزنجو ءَ گشتگ اَت کہ بلوچ ءِ زبان اکیڈمک زبانے نہ اِنت پمشکا اشی ءَ نسابی جاہ دئیگ نہ بیت ءُ اے زبان انگت نوکی ردوم زیران اِنت۔ بلئے مرچی پنجاہ سال ءَ پد ھم اے بیانیہ ءَ وتی تہا جاہ کُتگ بلئے مرچاں بلوچ سیاسی گلاں اے بیانیہ پروش داتگ ءُ اشی درور ڈیرو ءَ بگرداں کراچی ءَ بلوچ نودربر وتی ماتی زبان ءِ ارزشت ءَ پوہ اَنت ءُ وانگ ءَ اَنت۔ سیاسی روشت یک سیاسی گلے ءِ سرین ءِ ہڈّ اِنت۔ کجام ھم استان ، ٹولی یا گل ءِ سرین ءِ ہڈ کہ نزور بہ بیت گڑا آ دیم ءَ جنزت کُت نہ کنت۔ سیاسی روشت ، وانگ ءُ پھمگ ءَ ھوار لس مھلوک ءِ تہ ءٙ گلزمین ءَ گوں مہر ودی کنت ءُ آیاں یکمشت ءُ یکجاہ کنت۔
سنگت ءَ تران کنان ءَ گشت کہ سیاسی روشت ءِ تہ ءَ سیاسی لیکہ ءُ وانِشت ھژدری شئے اَنت۔ ھاسکر لس مھلوک وتی روشت ءِ تہ ءَ وتی لیکہ ءِ سرا پہر بہ بندیت ءُ وتی روشت ءِ تہ ءَ وانگ ءِ ھوالہ ءَ اصول پسند بہ بیت پمشکا وانگ ءَ دگنیا ءِ آشوبی جہدکار ءُ تمردیں کِرد یک پُرارزشت داریں شئے ءِ مار اَنت۔ شیروف مری وتی یک گلگدارے ءِ تہ ءَ گُشیت کہ من روچے ہشت کلاک وان اَنت بلئے ہمک بلوچ ورنا ءَ ہمروچ دو کلاک ءِ وانگ الّمی انت۔ ایجوکیشن، سلاہ ءُ لیکہ کہ یکجاہ بہ بنت گڑا سیاسی روشت مھکم بنت۔ لیکہ ءَ گوں وپاداری، گلزمین ءَ گوں مہر یک جوانیں دابے ءَ سیاسی روشت جوڈ کنت۔
سنگتاں تران کنان ءَ گشت کہ مارا سیاسی روشتانی تہ ءَ یک کارے کنگی اِنت ھنچشکہ یک زانتکارے ءِ رد ءَ لس مھلوک ءَ وتی گوستانکی شعور ءُ انسان ءِ سیاسی چست ءُ ایر یک مزنیں بُن گپ ءُ پِڑے کہ اشانی زانگ المی اِنت۔ ھمے درگت ءَ زانتکارے گشیت کہ سیاسی روشت ءُ ڈسپلن ھما وھد ءَ جوڈ بیت کنت کہ یک سیاسی ورکرے وتا ملازمانہ پگر ءَ چہ در بہ کنت ءُ وتا اگلی بنیات ءَ راجی جہد ءَ گوں ھوار بہ کنت۔ وتی سیاسی پروگرامانی تہ ءَ رٹّا بازی ءُ رٹا جنگ ءِ تب ءَ چہ در بئیت ءُ مھکم بہ بیت۔
دگنیا ءِ آشوبی زانت ءِ رد ءَ مارا زانگی اِنت کہ تنظیم ءِ ھلاپ ورزی نہ تنہا یک گلے ءِ جیڑہاں گوں بندوک اِنت بلکیں اے یک سیاسی جرمے لیکگ بیت پرچاکہ اے گل ءِ تہ ءَ بدگمانی ءُ آزات ھیالی ءُ یک گیر سیاسی ماھولے جوڈ کنگ ءِ جہد ءَ کنت۔ پمشکا پہ سیاسی ورکرے ءَ اشکتگیں گپان ءَ راستی منّگ یک نازانتی یے زانگ بیت۔پمشکا مارا ھمک چیز ءِ سرا وت پٹّ ءُ پول کنگی اِنت۔ ھمے درگت ءَ لیوشائی گش ایت کہ
Struggle by Education
Education by struggle
بزاں وانگ وت یک جہدے ءُ جہد وت مھلوک ءَ وانگ پرمائیت۔
سیاسی روشت ءِ تہ ءَ مدام اے دلیل دئیگ بیت کہ چیز میزان میزان ءَ وت ردوم زیران بنت۔ اے وتی تہ ءَ شوکیں ھیالے بلئے دگنیا ءِ تہ ءَ اے ھم ڈیبیٹ بیت کہ وھد ءِ ارزشت باز اِنت پمشکا مارا وھد ءَ چہ سکین زیرگی اِنت۔ اگاں وھد ءِ سرا چہ چیزاں سکین ءُ دربرگ نہ بوت گڑا ھمے سکین ءِ ارزشت بےمانا بیت۔ گیش ودار کنگ ھم راجی تاوانے۔ ھمنچو ما زوتاں چیزاں چہ سکین زُرت کن ایں گڑا زوت در بِہ بریں۔ آشوبی جاورھال ءِ تہ ءَ مردم چیزاں زوتاں دربرنت ءُ اے وھد ءَ مارا یک چیزے ءَ چہ تُرسگی اِنت آ ھمے گیر زمہ واری ءِ سوچ اِنت۔
پروفیشنل سیاسی ورکرے ھما وھد ءَ جوڈ بیت کنت وھدیکہ مئے مھلوک وتی وانگ ءِ تہ ءَ اگل ءُ دلیلاں گیش ءَ چہ گیش جاہ بہ دنت۔
مارا وتی اندر ءَ دروگ بندی ءُ ردآشوبی ھیال درکنگی اَنت ءُ وتی عمل مھکمیں دروشمے ءَ دیما جنزینگی اِنت۔
لینن جاھے گُشیت کہ منا مردم منی جند ءِ زات ءِ سوب ءَ دوست نہ دارنت بلکیں پارٹی ءِ مھکمیں رھبند ءُ ھیال ءِ برورد اِنت کہ مھلوک من ءَ شرپ ءُ ازّت دنت۔
سنگت ءَ سیاسی روشت ءِ تہ ءَ کُربانی ءُ ڈسپلن ءِ بابت ءَ وتی تران ءَ گُشت کہ اگا ما وتی اندر ءَ شعور ، منطق ءُ دلیل ءَ بے سوب ءُ بے بہر بوتیں گڑا مارا کُربانی ءَ چہ وتی اندر ءَ جانداریں اثر پیداک کنگی انت۔
سیاسی ورکر وضاحت دئیگ ءِ زہنیت ءَ چہ وتی تہ ءَ در بہ کن اَنت۔ وضاحت دئیگ ءَ چہ گیشتر دلیل ، منطق ءُ جہد ءَ گوں سنگینی ءَ بہ جُنزین اَنت ءُ کسان مزنیں نیموناں چہ وتا بہ کشّ اَنت۔
روم ءِ گوستانکی کسہانی رد ءٙ ” پوجی ڈسپلن راستی ءَ سیاسی ڈسپلن اِنت “۔ مارا وتی ڈسپلین ءِ تہ ءَ نظریاتی ءُ اخلاقی ھوالہ ءَ مھکم بوگی اِنت۔ مارا تہنا یک منظمیں ڈسپلینے درکار نہ انت بلکیں مارا عملی بنیات ءَ ڈسپلین ءِ تہ ءَ نظریاتی یکمشتی ءِ زلورت ھست اِنت۔
سنگتاں آرگنائزیشنل ڈسپلین ءِ بابت ءَ وتی ھیال درشان کت ءُ گُشت کہ مرکز ءِ پابند بئیگ ءِ مانا تنہا مرکزی سنگتانی پابند بئیگ نہ اِنت بلکیں بنجاہی لیکہ ءِ پابند بئیگی اِنت۔ اگاں ہمک باسک وتی رائے ءِ سرا عمل بہ کن اَنت گڑا بنجاہی تاگت شنگ ءُ شانگ بیت۔
سنگتاں وتی تران ءِ گڈ سر ءَ گُشت کہ نگد مارا سکین زیرگ ءِ وسیلہے جوڈ کنگی اِنت۔ پرچاکہ کجام ھم جُنز اگاں وتی تجربگاں چہ دربرگ ءِ جزبگ نہ داریت گڑا بزانکہ بے سوبی آئی نسیب ءَ اِنت۔
گڈی ءَ سنگتانی جست ءُ پسواں پد دیوان ءِ ھلاسی ءِ جار جنگ بوت۔
