Memocide
راجی یادداشت، زانت ءُ گھگیری شعورءِ کوش
ھمل رفیق
بنی آدم ءِ رودپتر ءِ تہءَ آئیءِ یادداشت تہنا گوست ءِ لہتیں کسہ نہ اَنت بلکیں مچانکی شعور،گھگیری،ربیدگ ءُ راجی پجار سرجمءَ انسانءِ یادداشتانی بھر اَنت۔ وھدے زوراک جتا جتائیں راجاں ایردست کنان کنت،گڈا آ تہنا زمینءَ ایردست نہ کنت۔ نوک آبادکاری زمانگءَ سامراجی تاکتاں نِہ ایوکءَ جسدی زوراکی کتگ بلکیں ایردستءِ شعورءُ ربیدگءِ ھلاس کنگءِ جھد کتگ۔ پریشیءَ آیاں یک انچیں اوزارے کارمرز کتگ کہ آ سر زاھرءَبے ترکءُ توار بلے چیراندرءَ ھترناکیں رنگے ءَ گیش سانمند بوتگ۔
مئے سرھال میموسائیڈ ایں، یا ما گشت کنیں یادداشتانی کُشگ۔ ھمے گالبند اسلءَ مُچّانکی شعور، گوست ءِ یادداشت، راجی گھگیریءُ دودمانی پجارءِگوں یک سسٹمیٹک رنگےءَ ھلاس کنگءِ نام اِنت۔
میموسائڈ تہنا گوستانکءِ پروشگ ءُ ہراب پیش کنگءِ نام نہ اِنت بلکیں یک ادارتیءُ لیکہی اُرشے کہ آئیءِ تہءَ یک ایردستیں راجے وتی گھگیری، وتی بامرد،وتی زبانءُ وتی گوستءَ چہ بیھال بہ بیت ءُدری گُپتماناں بہ منّیت۔ زبان کہ یک راجےءِ یاداشت، شعورءُ دود ءُ ربیدگی روانی ءِ چیدگ اِنت، زوراک آئیءِ جاہ ءَ وتی زبانءَ مشیت ءُ ھمے رنگءَ ایردستیں راجءِ زبان پُشت ءَ پشت کپ ایت ءُ بے اثر جوڑ بیت۔ آئی ءِ مُشتگیں وانگی رھبند ءَ زوراوری ءُ سامراجی دروشمے گوں بیتءُ گھگیری ریبدگ ساہ دنت۔
Dr. Michael J. Kelly
نبشتہ کنت
“Memocide is the systematic destruction of a people’s memory —its historical, cultural, and social identity— through the eradication of its monuments, literature, language, and institutions.”
مائیکل جے۔ کیلی اے گالبندءَ خاص پہ یورپی زوراکیں تاکتاں، بالگنز وار ءُ مڈل ایسٹ ءِ راجانی پجارءِ ھلاس کنگءِ شوربندیاں گوں ھمدپ کنت۔ آئیءِ نز ءَ اِے یک سرجمیں لیکہی، کانودی ءُ ربیدگی ترزکارے کہ ھمیشیءِ وسیلہءَ کجام ھم راجے یا دودمانے گوں وتی گوستءِ یاتاں، ءُ چہ وتی ھنڈالاں گِستا کنگ بیت ءُ آ چہ وتی ھستانکءُ گوستانکءَ چہ سندگ بیت۔
آ دیمترءَ نبشتہ کنت
“Without memory, there is no identity. And without identity, there is no resistance.”
پہ درور یک دریاھےءِ کشءَ چہ کرناں یک راجے نشتگ ءُ آئی ءِ زبان، پوشاکءُ روایت یک پیم بنت بلے وھدے چہ درءَ یک تاکتے بئیت آئیءِ زبان ءُ روایتاں چہ آئیءَ پچ بہ گیپت، آئیءَ چہ وتی گوستانگ ءَ بہ سندیت ءُ آئیءَھمے چیز ءَ بہ گشیت کہ شمئے دودمان نیزوریں، گڈا مدان مدان ءَ آ وتی پجارءَ گار کنت۔ وھدے آئیءِ زمین ءُ زبان (پجار) چہ آئیءَ پُلگ بیت گڈا آئیءِتہءَ گہگیری کنگءِ جوزگ مریت پرچہ کہ آئیءَ یات نہ بیت کہ اِے چیز یک وھدے آئیءِ وتی بوتگ انت ءُ زوراکءَ چہ آئیءَ پل اتگ اَنت۔
انچوشکہ شائر گشیت کہ
اشیءَ جست کئے بکنت کہ ھون کجانگو رتکگ انت
نام وتی کہ پیرک ءِ یات نماسگ ءَ نہ انت
اِے دروگیں گپتمان تہنا جنگءُ سیاستءِ بھر نہ بوتگ بلکیں یک پگریءُ ربیدگی شوربندی یے کہ آئیءِ وسیلہءَ راج چہ وتی گوستانکءَ سندگ بنت۔ وھدے زوراک وتءَ زانوگرءُ راھشون گُشیت، بلے اسلءَ راجانی مچانکی یادداشت، پجارءُ گھگیری گوستانک، درستاں چیر ترّینگ لوٹیت۔ بزانکہ شعوری ردءَ راجانی یادداشت، ربیدگ ءُ گوستانکی شعورءِ ھلاس کنگ دانکہ راج چہ وتی گوستءَ بے ھال بہ بیت۔
میموسائیڈ ءِ چہ دُرستاں بیمناکتریں چیز ایش اِنت کہ آ سر زاھری زوراکیءَ ابید ھم راجانی گھگیریءِ روتگان سندیت، ایشیءَ چہ پد نہ تہنا راجی وتواکی نزور بیت بلکیں مچانکی ھسابءَ ھمے ستکءُبیسہ ھلاس بیت کہ آیا یک زوراکیں راھبندیءِ بگیریءَ گھگیری کنگی ایں؟، بلکیں آیانی ستکءُ بیسہ انچو بنت کہ آیانی ھیالءَ ما گوں زوراکءَ ھچ ھساب ءَ دیم پہ دیم بوت نہ کن ایں۔
سال 1992داں 1995ءَ بوسنیاءِ تہءَ یک ھونریچیں جنگے جنز ایت، کہ آئیءِ تہ ءَ بوسنیائی مسلمانانی بگیریءَ شوربندی ءَ گوں اُرش کنگ بیت، ھمے اُرشانی مکسد تہنا زمینی قبضہ نہ بوتگ بلکیں چہ بوسینیائی سرزمینءَ مسلمانانی سرجمیں پجار ءِ ھلاس کنگ بوتگ۔
ھمے جنگءِتہءَ سرب لشکر بوسنیا1200 چہ گیش مسیت تباہ کنت کہ آیانی تہءَ لھتے 500 سالءَ ساری ایں بوتگ انت۔ ھمے کار تہنا پہ مسیتانی پروشگ نہ بوتگ بلکیں اشیءِ وسیلہءَ کرنانی کرنءِ یاداشت تباہ کنگ بوتگ اَنت۔
کتابجاہءُ وانگی ادارھانی تباہ کنگ بوتگ۔
سرجیو نیشنل لائبریری کہ آ 1890ءَ جوڈ کنگ بیت ءُ ایشی ءِ تہ ءَ دو ملین کتاب چہ گیش است بیت، سربین پہ زانت ھمے کتابجاہءَ 1992 ءَ ماندار انت۔
کیلی ءِ نز ءَ ھمے کار اناگتی ویلے نہ بوتگ اَنت بلکیں یک شعوری ترزکارے بوتگ کہ آیانی زانشتی روایت ھلاس کنگ بہ بنت۔
پدا آ نبشتہ کنت کہ
“The destruction of libraries, mosques, and educational institutions in Bosnia was not collateral— it was cultural warfare, a deliberate attempt to wipe out a people’s memory.”
میموسائیڈ مارا پلستین ءِ تہءَ اوں مزنیں کساسےءَ گوں گندگءَ کئیت اِنت۔ کیلی پلستینءِ تہءَ کارمرز کتگیں ترزکار ءَ دراج کشیں چکچینی ءِ نامءَ دنت، بزاں آ نِہ تہنا فوجی رنگءَ بلکیں ادارتی ءُ وانگی ردءَ جنزینگ بوتگ۔
میموسائڈ اسلءَ یک پگری نسل کشی یے، انٹلکیچوئل نسل کشی کہ ایشیءِ تہءَ ما کئے ایں؟ مئے گوستانک چی ایں؟ ءُ مارا چے کنگی ایں؟ ھمے پگر ءِ جند سرجمءَ ماں ھنڈالاں ولگوج کنگ بیت۔
“When you target the university, you target the archive of a nation’s soul.”
چونیا کہ ما یاداشت کشیءِ سرا باوست کنیں گڈا مارا بزگی، نادزرسی ءُ بے وسی دابیں ھیال دیمءَ کیت، بزانکہ ایردست انچو مجبور کنگ بیت کہ آ وتی زندگی کنگءِ سرجمیں ترزکارءَ ویل کنت، آ مجگی ھسابءَ نِزور کنگ بہ بیت کہ آ وتءَ کمتر، جاھلءُ نا سرپد سرپد بیت، دانشور ءُ زانتکارانی ھسابءَ ایردستءِ شھری،میان طبقہ ءُ نودربر گیش ھمے مارِشت ءِ آماچ بنت ءُ زانتکار اِے مارشتءَ وازمندگی ءُ مہتاجی واھشت گوش اَنت۔ اسلءَ ایشی ءِ ودی بوگءِ مستریں سوب اِیش اِنت کہ ایردست چہ وتی گوستانکی شعور، ربیدگ، گہگیری شعورءَ چہ سندگ بیت، آ وتءَ بیھال کنتءُ زوراکءِ روایتانی گوما نزدیکی بندات کنت اسلءَ ایردست زوراکءِ ھمے تاکتءَ گندیتءُ آ لوٹیت کہ من ھم ھمے وڈا تاکتور بہ باں بزانکہ آئیءِ مارشت انچو بنت کہ من زوراکءِ وڈا بہ بنت گڈا بزان من شراں۔
ءُ اے بزانتانی ھساب ءَ اے جینوسائیڈ بلوچ ءِ گورا اوں مزنیں کچّےءَ گندگ کئیت، مرچی بلکیں بلوچ ءِ جنگی پڑ مھکم اِنت یا کہ آ سیاسی ھساب ءَ توانا اِنت بلے اے کُل بلوچ ءِ ھساب ءَ سکّیں کسانیں چیز اَنت۔
روچ ءِ مرچی ءَ اوں بلوچ پنجاہ ھزار ءَ گیش ورنا پہ سرکاری نوکری ءُ سی ایس ایس ءُ پی سی ایس آں وتی زندمان ءِ گران کیمتیں وھد ءَ زوال کَنگ ءَ اَنت بہ زاں پہ زوراک ءِ زوراکی ءِ جواز دیگ ءَ بلوچ ءِ بازیں ورنائیں سر زیان بوھگ ءَ اَنت، بلے مئے دانشور بے توار اَنت، مئے ماس پارٹی ءُ گلانی گورا اے روشت ءِ سرا ھچ وڑیں موادے در کَپگ ءَ نہ اِنت ءُ ما بزاں نودربر اوں اینچو کت کَنگ ءَ نہ ئیں کہ اینچو انوگیں وھد ءِ جاورانی لوٹ اِنت۔
پہ درور اے انوگیں لوٹے کہ استان ءِ آؤرتگیں وانگی راھبند ءِ سرءَ بلوچ ءِ دانشور ءُ کوّاس نبشتہ بہ کن اَنت، بلوچ ءِ ماس پارٹی ءُ سیاسی گل وتی مھلوک ءَ نہ تہنا سرپد بہ کنت بلکیں نودربر گل بائدیں کہ ھمک نودربر ءَ اے بابت ءَ سرپدی دیگ ءِ ھاٹیگ ءَ بداریت ءُ اشی ءِ سر ءَ گیش ءُ شہمیں رنگے ءَ کار بہ کنت، مئے گورا اشی ءِ دارگ ءِ ہاتر ءَ کم جہد بیگ اِنت۔
اے کُل ھمے عمل ءِ بھر اَنت، چد ءُ مستریں انٹیلکچول جینوسائیڈ چے بوت کنت کہ یک نیمگے بلوچ ءِ گس ءَ آس روک اِنت، زھگ ءُ زالبول کُشگ ءُ دور دیگ بوھگ ءَ اَنت، ورنایانی زندگی ءِ گیشتریں بھر زنداناں گوزگ ءَ اِنت بلے انگت اوں مئے مردمانی گورا پورا پہ نبشتہ کَنگ ءَ سرھال نیست۔ اسل ءَ مئے مردمانی مجگ چہ آھانی روتگاں سندگ بوتگ ھمے واستہ آھانی سما ءِ رگ کمو اوں جَنَگ ءَ نہ اِنت۔
بلوچستانءِ تہءَ میموسائڈءِ عمل مزنیں کساسے ءَ مارا چہ گوستءَ گندگءَ پیداک اِنت چُشکہ برطانیہءِ نوک آبادکاری اھدءَ چہ ساری آیاں پہ بلوچانی گوستءِ مسخ کنگءِ واستہ وتی جتائیں ٹیم راھ داتگ اَنت کہ اِدءَ پٹءُ پول بکن اِتءُ بلوچءِ گوستانکءَ وتی نوک آبادکاری پائیدگانی بنیاتءَ نبشتہ بکن اِت دانکہ بلوچ وتی پٹءُ پول درکیت گڈا آ زانت مہ کنت کہ آ کئے اِنت، وھدے کہ یک راجے وتی گوستءَ بیھال کنت گڈا آئیءَ ھچ پیمیں تاکت پرمات نہ کنت کہ اِے راج گہگیری بکنت ۔
دومی ایش کہ ھر راجے وتی دود بنت آیانی وتی گہگیری گوستانکے بیت کہ اِے گوستانک جھمنندیں مردماں سکیں دانت کہ آ پاد بیا اَنت زوراکءِ دیمءَ بلے وانگجاہءُ نصابی کتابانی تہءَ بلوچاں وحشی، جاھلءُ دِیگہ انچیں بدیں نامانی گوما توار کنگ بیت، بلوچءِ ورناھے اگاں مروچی وانگجاہءَ روت گڈا آئیءَ اِے چیز ھچبر گُشگ نہ بیت کہ میر محراب خان تئی راجی بامرد اِنت بلکیں اِے نوک آبادکاری وانگی ادارھانی تہءَ ھمے چیز گُشگ بیت کہ جناح شمے راجی بامرد ءُ اقبال شمے راجی شاعر اِنت
زانتکارے گُشیت
“Colonial education was not neutral; it was designed to legitimize and support foreign rule”
ھمے کاراں چہ مارا گندگءَ کیت کہ چنکدر ھمے کار گوں بلوچاں بوگءَ اَنت، بلوچانی گوستءِ ھراب ءُ مسخ کنگ، ربیدگانی پامالی، زبانءِ گار کنگءُ گہگیری شعورءِ چیرترینگ اِے سرجمءَ ھمے شوربندیانی بھر اَنت۔
بلے راستی ایش اِنت کہ
We, the colonized, walk the earth unseen— not counted among the human.
