بلوچ اسٹوڈنٹس ایکش کمیٹی نا اولیکو بنجائی کمیٹی نا دیوان کماش اُزیر بلوچ نا کماشی ٹی اڈ تننگا۔
“گل بلوچستان ئٹ جتا ہند و علاقہ تیٹی سیاسی و لٹریری بندغ آتا یات ئٹ لٹریری فیسٹیول اڈ تننگ و بلوچ لٹریسی کیمپئین نا وسیلہ ئٹ بلوچستان نا ہند آتیٹی اسکول آتا فعال کننگ و سائنس اگزیبیشن اڈ تننگ تون اوار بلوچ ورنا تا چاہنداری، سیاسی و تکنیکی پڑ تیا راہشونی ءِ کیک۔”
“چنکو وخت اسیٹی بلوچ ورنا تا گل ئتون اوار مننگ و مخلوق نا گل ئنا زی آ باور کننگ گل ئنا فکری و جوڑشتی سوگوی نا مثیل ءِ۔ گل ئنا سنگت آک اندا یخین ءِ اسہ شرف اسیٹ تینے سوگو و باصلاحیت ءُ ورنا کریسہ راجی زمہ واری تے ایسر کیر۔”
کماش ازیر بلوچ
بلوچ اسٹوڈنٹس ایکشن کمیٹی نا اولیکو بنجائی کمیٹی نا دیوان بنجائی کماش اُزیر بلوچ نا کماشی ٹی اڈ تننگا۔ دیوان ئٹ درستی راستی نشست، گل کاری و بروکا گامگیج نا ٹِک آتا زی آ اُست جمی ئٹ گپ کننگا۔ درستی راستی نشست آن پد گل کاری نا سرحال نا زی آ گل ئنا بنجائی لس مجلس ئٹ مروکا کل ہیت آک و تروکا سلاہ تا زی آ است جمی ئٹ ہیت و گپ کننگا۔
دیوان ئٹ بنجائی کماش اُزیر بلوچ ہیت کریسہ پارے کہ دا ننا و نما خوش بختی ءِ کہ گل ئنا سنگت آک ننا زی آ دا یخین ءِ تخار و ننے تینا رہشون مننگ نا موقع ءِ تسر کہ نن بلوچ ورنا تا رہشونی ءِ کریسہ اوفتے مزل آ سر کننگ آ تینا جہد و کوشست ءِ کرون۔ ولے داڑتون اوار دا ننا و نما زی آ اسہ بھلو زمہ واری ئسے کہ نن اندا ورنا تا رہشونی ءِ کریسہ اوفتا علمی، سیاسی، فکری و تکنیکی ہیلکاری ءِ جوانو و جاندار ءُ رنگ اسیٹ نہ بیرہ برجاء تخن بلکن تینا ہر وخت ئنا بھلا و خاص آ پروگرام آتا بشخ کریسہ پام ایتن۔ گل ئنا چارمیکو بنجائی لس مجلس نا سرسہبی تون اڈ تننگ، ساڑی آ و تدوکا سنگت آتا محنت، مخلصی و گل ئنا کاریم تے سوبری ئٹ اڈ تننگ نا سوب ءِ۔ اوفتا تروکا پروگرام و فیصلہ سازی و گل ئنا ہر باسک ئنا مخلصی ئٹ کاریم تیتون اوار مننگ و اُست جم ءُ رنگ اسیٹ دافتا ایسر کننگ نا بنیات آ گل مدام تینا کاریم و پروگرام آتے اُست جم ءُ رنگ اسیٹ ایسر کیک۔
بنجائی کماش گپ کریسہ پارے کہ چنکو وخت اسیٹی بلوچ ورنا تا گل ئتون اوار مننگ و بلوچ مخلوق نا گل ئنا زی آ باور کننگ گل ئنا فکری و جوڑشتی سوگو مننگ نا مثیل ءِ۔ گل ئنا سنگت آک اندا یخین کننگ نا شرف آ تینے مہکم و باصلاحیت ءُ ورنا کریسہ راجی زمہ واری تے ایسر کیر۔ گل ئنا زمہ واری ہرفنگ پاش ئٹ گڑاس اوغدہ ءُ ولے دا بھلو راجی زمہ واری ءُ کہ ننا کوپہ غاتیا ءُ و دافتا ایسر کننگ کن نن سوغند کنگنن دا راجی زمہ واری تے ایسر کننگ نا ہمو امنائی نامہ ءِ کہ او فکری پختئی و اسہ وڑ آ سلوک آ جہد ئتون گنڈوک ءِ۔ اندا خاطران ننے تینے فکری حوالہ ئٹ سوگو و مہکم مروئی ءِ و دا چاہنداری کاروان ءِ مون آ دروئی ءِ۔ نن اسہ اندنو وخت ئسے آ راجی زمہ واری تینا کوپہ غاتیا ہرفین اُن کہ دا وخت ننے آن بھاز خواست کیک و اندا خواست آتا بنیات آ سلنگ و مون آ گام خلنگ مہکم ءُ سیاسی جہدکار ئسے نا چیدہ ءِ۔ اینو دا چائنداری کاروان بساک نا دروشم ئٹ باصلاحیت آ سنگت آتیتون کنے دوئی مسونے گڑا ای دا فکری سنگت آتیان اندا اُمیت کیوہ اوفک تینا پام ءِ تیوہ غا گل ئنا کاریم، راجی بکار، سیاسی خواست و ورنا تا سیاسی و فکری ہیلکاری ئٹ گنڈوک مرور، گڑا کنے یخین ءِ کہ ننا دا کاروان چائنداری و علمی مزل نا پارہ غا سفر کریسہ اسہ مہکم و سوگو ءُ راجی گل ئسے نا دروشم ئٹ بلوچ ورناتا مہکم ءُ توار و تلہ اس مرو۔
گل کاری نا زی آ بنجائی سنگت آک ہیت کریسہ پاریر کہ گل تینا ہر بنجائی لس مجلس آ گیشتر اہمیت تخوک و بھلن مریسہ ہر وخت آ گیشتر سوگو و مہکم مریک، دانا بھلا سوب گل ئنا تینا سنگت آتا فکری ہیلکاری، ورنا تا خواننگی و ایلو خوانندہ حق آتا رکھ، چاہنداری و ادارہ جاتی فیصلہ و پروگرام آتیتون اوار راج ئتون اواری و یخین ءِ۔ گل ہر وخت آ اندا کوشست ءِ کیک کہ ورنا تا علمی، فکری، چائنداری، سیاسی و سائنسی ہیلکاری ءِ اسہ جاندار ءُ رنگ اسیٹ مون آ دننگ کے۔ نن کہ دا جاغہ آ اینو بسونن و رسینگانن دا اسہ ابرمی داد اس اف بلکن تنظیم کاری ئٹ تینا تیوہ غا پام ءِ تننگ و ہر فیصلہ و پروگرام آتیتون مخلص مننگ نا مثیل ءِ۔ ننا سنگت آتا تنظیم آ ایمان و ورنا تا ننا زی آ یخین ننا گام خلنگ نا بھلا جوزہ غاک ءُ۔
گڈیکو ٹِک بروکا گامگیج ئس ہراٹی بنجائی لس مجلس ئٹ بروکا سنگت آتا سَلاہ تا زی آ گپ و تران آن پد جتاء آ پروگرام آتا زی آ فیصلہ ہرفنگا ہرافتیٹی بلوچستان نا جتاء آ ہند و علاقہ تیٹی بلوچ سیاسی و لٹریری بندغ آتا یات آ لٹریری فیسٹیول اڈ ترو، بلوچ ہند آتیٹی خواننگی و لٹریسی کچ ءِ ودفنگ کن بلوچ لٹریسی کیمپئین نا وسیلہ ئٹ اسکول آتا فعال کننگ و بند مروکا اسکول آتا ڈیٹا مُچ کننگ و دافتا ملفنگ کن کیمپئین چلفنگ، بلوچستان ئٹ خواننگی دود اس ودی کننگ کن جتاء وخت آتیٹ بلوچستان کتاب کاروان نا پن ئٹ کتاب اسٹال اڈ تننگ، بلوچ ورنا تے پوسکنا جہانی خواست آتیان باسماء کننگ و سائنسی پڑ آ اوفتا لائخی تے گیشتر کننگ کن سائنس ایگزیبیشن اڈ تننگ، چنا تیکن لٹریچر ودی کننگ، بلوچستان نا آثار قدیمہ و خلقی کسہ تا زی آ جتاء رنگ آتیٹ ڈاکیومینٹری جوڑ کننگ، ورنا و چنا تیکن ڈیجیٹل لٹریچر نا زی آ کاریم کننگ، بلوچ نا لمئی بولی تا زی آ لٹریچر ہتنگ کن کوشست کننگ، و 8 مارچ آ نیاڑی تا زی آ پروگرام اڈ تننگ تون اوار ایلو پروگرام آتا زی آ کاریم کننگ نا بابت جتاء ءُ فیصلہ ہرفنگا۔
کل آ ٹِک آتا زی آ اُست جمی تون تران آن پد کماش نا موکل ئٹ دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
