بلوچ اسٹوڈنٹس ایکشن کمیٹی شال ہنکین ءِ ہنکینی لس دیوان برجم دارگ بوتگ۔
ولید بلوچ ہنکینی کارمستر ءُ اظہار بلوچ کارگشاد گیچین کنگ بوتگ اَنت۔
بلوچ ورنایاں نودربر سیاست ءِ ہلاپ ءَ جتائیں پندل پروش دیگی اَنت ءُ وتی وانگی ءُ سیاسی عمل مہکم کنگی اِنت پرچاکہ بیدء نودربر سیاست ءَ ورنا گُنگ، کَر ءُ کور بنت۔
کماش ازیر بلوچ
بلوچ اسٹوڈنٹس ایکشن کمیٹی شال ہنکین ءِ ہنکینی لس دیوان ہنکین ءِ کمک کارمستر ولید بلوچ ءِ سروکی ءَ برجم دارگ بوت، دیوان ءِ مہمان بنجاہی کماش ازیر بلوچ ءُ بنجاہی کمیٹی ءِ باسک ارشد بلوچ ءُ ھانی بلوچ بوتگ اَنت۔
دیوان ءِ تہ ءَ بنجاہی سرکیولر، ھنکینی اھوال ، نگدی نشست ، گلکاری ، ھندی ءُ میانی استمانی سیاسی جاورھال ءِ بنگپانی سر ءَ گپ ءُ باوست ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں کابینہ ءِ ھاتر ءَ سنگت گیچین کنگ بوت انت۔
بنجاہی سنگت ءَ بنجاہی سرکیولر دیوان ءَ پیش کت کہ آئی ءِ تہ ءَ لس مجلس ءِ سرجمیں اہوال ہوار اِت اَنت۔ ہمے پیم ہنکینی اہوال ءِ تہ ءَ ہنکین ءَ وتی گوستگیں کارانی اہوال پیش کُت ءُ آہانی سر ءَ جائزہ زُرت۔ نگدی نشست ءِ تہ ءَ باسکاں ہنکینی نِزوری ءُ کوتاہیانی سر ءَ ڈرافٹ ونت ءُ آہانی گیشوار کنگ ءَ پہ شور ءُ سلاہ دات۔ ہمے وڈ دیوان ءِ گَلکاری بنگپ ءِ تہ ءَ باسکاں وتی گَلکاری ڈرافٹ ونت اَنت ءُ دیمی کارانی ہاتر ءَ شور ءُ سلاہ دات۔
دیوانءَ بنجاہی کماش ءَ تران کنان ءَ گوشت کہ مرچی بساک ءِ چارُمی بنجاہی لس دیوان ءِ سوبمند بوگ ءَ من شمارا کُلّاں مراد باتی دیاں پرچاکہ گل ءَ وتی سپر ءِ تہ ءَ دگہ پدیانکے سر کتگ ءُ ہمک وڈیں جاورانی تہ ءَ وتی کار ءُ پروگرام اوشت آماچ نہ کتگ اَنت۔ اے مئے سنگتانی سیاسی سنگینی اِنت کہ بساک ءَ نودربرانی زانشتی ہیلکاری ءُ ھکانی ھاتر ءَ جہد کنوکیں گل ئے ءِ بستارءَ بلوچ چاگرد ءِ تہ ءَ وتی یک جُتائیں بستار ءَ پجارے نامینتگ۔ ہمے پجار ءُ بستار اِنت کہ راج مئے ہمراہ اِنت بلے مارا وتی ہمے عمل انگت گیش ءُ منظم کنگی اَنت۔ اے وشپہمی ءَ چہ درائگی ایں کہ مئے سر ءَ مہلوک ءِ امیت ہست بلکیں راستیں گپ ایش اِنت کہ ہمے امیت ءِ رکینگ ءِ پہ چنچو جہد ءُ مھنت کنگ بیت، پمیشکا وتی وانگ ءُ عمل گیش شیواری ءَ گوں مہکم ءُ منظم کنگی اَنت۔ بلوچ ورنایاں نودربر سیاست ءِ ہلاپ ءَ جتائیں پندل پروش دیگی اَنت ءُ وتی وانگی ءُ سیاسی عمل مہکم کنگی اَنت پرچاکہ بیدء نودربر سیاست ءَ ورنا گُنگ، کَر ءُ کور بنت۔
کماشءَ گل کاری ءِ سر ءَ دیمتر ءَ تران کنان ءَ گوشت کہ بساک ءَ نودربر گلے ءِ بستار ءَ کسانیں مدتے ءِ تہ ءَ وت ءَ بلوچستان ءِ کلیں دمگاں سر کنگ ءَ سوبین کُت۔ اے مئے کلانی سوبمندی یے بلے مئے سوبمندی تہنا اد ءَ سر بوگ نہ اِنت بلکیں مارا گیش پند بُرّگی ایں، ہمود ءَ کہ سریں اود ءَ یکشلہ کار کنگی ایں ءُ ورنا زانشتی تک ءَ باسما کنگی اَنت۔ مارا وتی تہ ءَ ہما نوکیّت آرگی اَنت کہ ہستیں وھد ءِ لوٹ ءُ زلورت اَنت، مرچی دنیا اے آئی ءُ ٹیکنالوجی ءِ نیمگ ءَ گیش دلگوشی دیگ ءَ اِنت پرچاکہ مرچی دگنیا ءِ دیمروئی گوں ہمے ازباب ءُ ترزکاراں بندوک اِنت، گڑا مارا ہم لوٹیت کہ وتی زہگ ءُ ورنایاں چہ ہمے آسراتیاں پوہ بہ کنائین ایں ءُ وتی پروگرام ءُ کاراں ہمے لوٹانی ہساب ءَ بہ جنزین ایں دانکہ وتارا دگنیا ءِ گاماں گوں ہمگام کت بہ کنیں۔
سنگتاں دیمتر ءَ گیش گپ کنان ءَ گوشت کہ مرچی رسانکدر ءَ بیانیہ ءِ میڑ اِنت، اے نوکیں زمانگ ءَ ہمائی ءِ کسہ راستی گوشگ بیت کہ آ اشی ءِ سر ءَ رسانکدر ءُ ایدگہ وسیلگاں گیش کار کنت۔ مئے ورنا وتی وھد ءَ رسانکدر ءَ وھد زوالی ءَ گوں مہ گوازین اَنت بلکیں وتی راجی ءُ گلی مکسد ءُ لیکہ ءَ تالان کنگ ءَ ھمت بہ کن اَنت پرچاکہ یک ورنایے ءِ یک کِلِکے ءَ چہ مئے کسہ ہزاراں مردماں سر بیت کنت پمیشکا رسانکدر ءِ ارزشت ءِ زانگ ءُ آئی ءَ وتی ھک ءَ کارمرز کنگ اگلمندی ءُ بودناکی اِنت۔
بنجاہی سنگتاں تران کنان ءَ گوشت کہ مرچی مئے تہ ءَ ہمے کہ نگدی ماہول اِنت کہ آ مدام یکیں روانی ءَ گوں جنزاں اِنت، ما کل اے گپ ءِ سر ءَ تپاک داریں کہ گَلانی دیمروئی گوں جاندار ءُ شِہمیں نگد ءَ بندوک انت، وھدے کہ مئے نگدی نگاہ ءِ تہ ءَ گہتری اتک گڑا ما وتی ادارہ ءِ تہ ءَ مٹی آورت کن ایں پرچاکہ دگنیا ءِ ہر ہما عمل ءُ کار کہ مٹ بوتگ ءُ گہتر بوتگ گڑا آ نگد ءِ برورد اِنت۔ پمیشکا یک سیاسی گل ئے ءِ بستار ءَ باسک ءُ زمہ وار وتی تہ ءَ نگدی نگاہ ءَ گیش پراہ شاہگان بہ کن اَنت دانکہ ما وتی ادارہ ءَ مرچیگیں وھد ءِ لوٹانی ھساب ءَ جنزینت بہ کن ایں۔
دیوان ءِ تہ ءَ سیاسی جاورہالانی سر ءَ سنگتاں گوشت کہ نِزوریں راجاں پہ جاور مدام نگیگ بنت ءُ آ مدام بے وانندگی، شُد ءُ تن، کُشت ءُ کوش ءُ ایدگہ جیڑہانی آماچ بنت۔ اے جاوراں بلوچ نودربر سیاست ءِ سر ءَ جتائیں ردیں بیانیہ سازگ بیگ ءَ اِنت ءُ ورنا چہ زانشتی جہد ءَ گستہ کنائینگ بیگ ءَ اَنت کہ اشانی مکسد تہنا مئے ورنایاں چہ جیڑگ ءُ وانگ ءَ دارگ ءُ آہاں روبوٹ جوڈ کنگ اِنت پمیشکا جتائیں پندلاں گوں نودربر تُرسینگ بیگ ءَ اَنت۔ بلے مارا مدام ند ءُ کتاب وتی ہمراہ کنگی اَنت ءُ نودربرانی ھکاں پہ جہد برجاہ دارگی اِنت دانکہ مئے نودربر پُرایمنیں چاگردی ءَ ونت ءُ دربرت بہ کن اَنت۔
دیوان ءِ کُلیں بنگپانی سر ءَ دلجمی ءَ تران کنان ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں ہنکینی کابینہ گچین کنگ بوت کہ آئی ءِ تہ ءَ کارمستر ولید بلوچ، کمک کارمستر اعجاز بلوچ ، کارگشاد اظہار بلوچ ، کمک کار گشاد راشد بلوچ ءُ ھالرسانی کارگشاد ماہ دیم بلوچ گچین کنگ بوت اَنت۔ نوک گچین بوتگیں سنگت بنجاہی کماش ءَ سوگند دات اَنت ءُ دیوان ءِ آسری ءِ جار پرینگ بوت۔
بنجائی جارکش: بلوچ اسٹوڈنٹس ایکشن کمیٹی
