بلوچ اسٹوڈنٹس ایکشن کمیٹی تربت ھنکین ءِ ھنکینی لس دیوان برجم دارگ بوتگ۔
نسرین بلوچ ھنکینی کارمستر ءُ ساد بلوچ ھنکینی کارگشاد گیچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی تربت ھنکین ءِ ھنکینی لس دیوان گوستگیں ھنکینی کارمسترعبداللہ بلوچ ءِ سروکی ءَ برجم دارگ بوتگ، دیوان ءِ ھاسیں مہمان بنجاہی کمیٹی ءِ باسک نگرہ بلوچ ءُ نادر بلوچ بوتگ اَنت۔
ھنکینی لس دیوان ءِ جُتائیں بُنگپ بوتگ اَنت کہ آوانی تہ ءَبنجاہی سرکیولر، ہنکینی اہوال،نگدی کاری،گلکاری، ھندی ءُ میانی استمانی سیاسی جاورھال ءُ آؤکیں گامگیج ہوار بیتگ اَنت۔
دیوان ءِ بندات چہ کارمستر ءِ رزا ءَ گوں اولی بُنگپ بزانکہ سرکیولر ءَ کنگ بوت۔ دیوان ءَ ساڑی ایں بنجاہی سنگتاں دیوان ءِ دیمءَ گل ءِ بُنجاہی سرکیولر پیش کُت کہ آئیءِ تہ ءَ گل ءِ بُنجاہی آوکیں دو سال ءِ شوربندیانی سرءَگوں دلجمی ءَ گپ ءُ تران ءَ پد دیوان دیمتری بُنگپ بزانکہ ھنکینی اھوال ءِ نیمگ ءَ جُنزینگ بوت۔
ھنکینی اھوال ءِ بُنگپ دو بہرانی تہءَ گِشینگ بوتگ اَت۔ بندات ءَ ھنکینی کارانی سرءَجائزہ ءِ زورگ بوت ءُ دیمترءَ ھنکینی زمہ واراں وتی تجزیاتی ڈرافٹ لس دیوان ءِ دیمءَپیش کُت اَنت، گوں دلجمی ءَ ھنکین ءِ گوستگیں اھولانی سرءَ گپ ءُ تران ءَ پد دیمتری بُنگپ بزانکہ نگدکاری ءِ بُنگپ کارمستر ءِ رزا ءَ چہ بندات کنگ بوت۔
دیوان ءَ نندوکیں باسکاں وتی نگدی تران کنان ءَ گوشت کہ سیاسی نودربرے ءِ بستار ءَ مارا وتی ادارہ ءِ ھمک عمل نگدی سِنچ ءَ گوں ٹپّاسگی اَنت ءُ ھمے دروشم ءَ ادارہ ءَ را دوگام دیمءَجُنزینگ ءِ جہد برجاہ دارگی اِیں۔ ھنکین وتی وس ءُ کَچّ ءَ بہ گندے جوانیں کار ءُ عملاں گوں گیروشگ بوتگ بلے ھورتچاری ءِ نگاہ ھمے گپ ءَ پدّر کنت کہ سیاسی چِست ءُ ایرانی میان ءَ ھنکین ءِ جُتائیں کارانی تہ ءَ نزوری ہم بیتگ اَنت۔ اے میان ءَ ما انچیں نزوریانی دیمپان بوتگیں کہ مئے ھنکین سیاسی عمل، شوربندی، باسکانی سیاسی ھیلکاری ءَ گوں ھوار نودربرانی ھکّانی رکّینگ ءَ نزوری ءِ آماچ بیتگ۔ ادارہ ءِ دیمروئی ءِ ھاترءَ اردیکہ ما نگدی عمل ءَ نیک نیّتی ءُ سیاسی جُرّت ءَ گوں کارمرز بہ کنیں گُڑا الّم ءَ ھنکین وتی کسان داں مزنیں جیڑہانی ھلاسی ءِ نیمگ ءَ روان کنت ءُ پہ بلوچ ورناہاں مہکمتریں عملاں گوں دیم ءَ کئیت۔
نگدی بہر ءِ تہءَ کُلیں سنگتانی دلجمیں نگدانی کنگ ءَ پد دیوان ءِ دیمتری بہر بزانکہ گلکاری چہ کارمستر ءِ رزا ءَ بندات کنگ بوت۔ بُنگپ ءِ بنداتی بہر ءَ ھنکینی سنگتاں وتی سیاسی تجزیہ ءِ بُنیات ءَ نبشتگیں ڈرافٹ دیوان ءِ دیم ءَ ونت اَنت کہ آ گوں جُتائیں سیاسی پالیسی ءُ پہ ھنکین ءِ دیمتری کاراں جوانیں ءُ نوکیں دروشمے ءَ جُنزینگ ءِ ھاترا اَت اَنت۔
گلکاری ءِ بُنگپ ءَ دیوان ءَ ساڑی ایں بُنجاہی کمیٹی ءِ سنگتاں نودربر سیاست ءِ تیزگامی ءُ مٹّی ءُ بدلیانی سرءَ سرپدی دیان ءَ گُشت کہ بلوچ سیاست وتی بنداتی وھد ءَ بہ گِر داں روچء مروچی تیزگامیں رواجاں گوں جُنز اِتگ ءُدیم ءَ شتگ، جُتائیں لوٹ ءُ گزرانی رِد ءَ کارانی ترز ءُ داب ھم مٹّ اِتگ اَنت۔ اے ھم یک راستی یے کہ سیاسی سپر ءِ نوکتریں گامانی اوشت آماچ کنگ ءِ ھاترءَجُتائیں اڈاندانی ھم دیمپان بوتگ کہ بلوچ نودربر سیاست ءِ نزورکنگ ءِ کوشستے بوتگ ،بلے رُژنائیں پِگر ءَ گوں بندوکیں سنگتی ءِ بستار ءَ مارا کُلاں وتی سیاسی جہد ءِ جُنزینگ ءِ عمل ءَ مہکم بوّگی ایں ءُ ہمک اڈاند پروش دیگی اَنت۔مارا پوہ بوگی ایں کہ ہستیں وھد ءِ لوٹ ءُ گُزر پہ راجی نپ ءُ سیت ءَ کُجام اَنت ءُ ما سیاسی ورناہانی بستار ءَ اے لوٹ ءُ گُزرانی پیلو کنگ ءَ پہ جاڑیگیں یاکہ انگت پشت کپتگ ایں ءُ نزوریں ہیالانی آماچیں باسکیں۔ مارا وتی کچّ مہکم کنگی ایں ءُ وتی سنگت ھمینکدر بودناک کنگی اَنت کہ وتی سیاسی پیسلہانی وسیلہ ءَ راج ءَ را مزنیں پائدگے دات بہ کن اَنت۔
سیاسی مُخلصی ءِ سرءَ بُنجاہی سنگتانی پہ باسکاں کلوہ ھمیش اَت کہ ہستیں وھد ءِ زلورت، نودربرانی سیاسی تربیت ءُ چاگرد ءَ گوں وتی پالیسیاں پائدگ دیگ ءِ ہاترءَ ھمینکس کہ ما باوست کنگ ءَ اِیں، گُڑا جُرّت مندیں سیاسی کارکنے ءِ بستار ءَ وتی اندر ءَ مُخلص بُوّگی ایں۔ وھدیکہ سنگت وتی تہ ءَ مخلصی ءُ جُرّت ءِ ہاٹیگ ءَ ودّین اَنت گُڑا اے راستی یے کہ ما وتی نزوریانی گِر ءُ داری ءِ ھمراھی ءَ پہ بلوچ راجمان ءَ نوکتریں شوربندی ءُ عمل ءَ گوں دیمروئی کت کنیں۔ اے کلیں کارانی واستہ مئے سیاسی مخلصی الّمی اِنت ءُ مارا وتی تہءَ سیاسی جرت پیداک کنگی ایں۔ اگاں ما مرچی جرت بہ کنیں ءُ وتی سرجمیں نزوری ءُ کوتاہیاں گران ءَ وتی ہمک روچی عملءُ سیاسی پروگرامانی سر ءَ گوں دلگوشی بہ دیے ایں گڑا ما سیاسی پروگرامانی تہ ءَ یک نوکیں ءُ جانداریں دروشمے ءَ دیمءَگام جت کنیں۔ بلے کلیں کارانی واستہ بندات مارا چہ وت ءَ کنگی ایں داں کہ وت ءَ مٹ مہ کنیں گڑا مٹ بوگ ءِ واھشت تہنا یک واھشتے بیت۔
دیوان ءِ کُلیں بنگپانی سر ءَ گوں دلجمی ءَ تران کنگ ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں ہنکینی کابینہ گچین کنگ بوت کہ آئی ءِ تہ ءَ کارمستر نسرین بلوچ، کمک کارمستر ھدا رحم بلوچ، کارگشاد ساد بلوچ، کمک کار گشاد امیر بلوچ ءُ ھالرسانی کارگشاد ازگربلوچ گچین کنگ بوت اَنت۔
بنجاہی سنگت ءَ نوک گچین بوتگیں سنگتاں سوگند دات ءُ دیوان ءِ آسری ءِ جار پرینگ بوت۔
بنجاہی جارکش: بلوچ اسٹوڈنٹس ایکشن کمیٹی
