بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی حب ہنکین نا ہنکینی لس دیوان اڈ تننگا۔ یاصر بلوچ ہنکینی کارمستر و کمبر بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی حب ہنکین نا ہنکینی لس دیوان ہنکینی کارمستر زبیر بلوچ نا کماشی ٹی اڈ تننگا۔ دیوان نا مہمان بنجائی سنگت جعفر بلوچ و عدنان بلوچ ئسر۔ دیوان ئٹ تعارفی نشست آن گڈ بنجائی سرکیولر، ہنکینی حوال، تنقیدی نشست، گل کاری، ہندی و جہانی سیاسی حالیت نا ٹِک آتیا است جمی ئٹ تران آن پد بروکا گامگیج ئٹ مسکوہی کابینہ ایسر کننگا و پوسکنا ہنکینی کابینہ کن سنگتاک گچین کننگار۔
اولیکو ٹِک تعارفی نشست ئسک کہ ہراٹی سنگت آتا درستی راستی مس۔ ارٹمیکو ٹک بنجائی سرکیولر ئس، بنجائی سنگت دیوان ئٹی بنجائی سرکیولر ءِ خوانا ہراٹی تیوہ غا بنجائی لس مجلس نا احوال ئتون اوار بنجائی فیصلہ آتے ہم دیوان نا مون آ تخار۔ سرکیولر نا زی آ تران آن گڈ دا سرحال بند کننگا و مونی ہنکنی احوال نا ٹِک ملنگا ہنکینی رپورٹ ئٹ کارگشادی حوال، لٹریچر، ہیلکاری و ایلو حوال آتیتون اوار خواننگار۔
چارمیکو ٹِک نغدی نشست ئس ہرانا بشخ ئٹ باسک آک ہنکینی کاریم تیا است جمی ئٹ تینا تینا نغدآتے تخار۔ سنگت آک تران کریسہ پاریر کہ نغد تینٹ اسہ سیاسی ءُ عمل ئسے و نغد اسہ سیاسی گل ئسے نا روح مریک۔ سنگت پارے کہ ہراتم اسہ اداراہ یاکہ گل ئسے ٹی نغد متو تو ہچ ئس اف انتئے کہ نغد مست ئنا کاریم تے ہریسہ بروکا کاریم تیکن ردی و نزوری تا کسر تے بند کیک و گچین ءُ گام گیج آتیکن کسر ملیک۔ سنگت آک دا ہیت ئنا زی آ پام تریسہ پاریر کہ گل ئنا سنگت آتے سیاسی نغد کننگ نا اہمیت و اڑزشت آن پوہ کریسہ نغد کننگ ہیل تروئی ءِ تانکہ گل ئنا کاریم تیٹی گچینی و سوگوی ئس برے۔ ولے نغد ئٹ اسہ گڑا ئسے نا کل آن زیات خیال تخوئی ءِ کہ نغد فردی سواد آتیا صاف و مُر مریسہ بیرہ اجتماعی و گل ئنا سواد و مفاد آتے ایسر کننگ نا وسیلہ مرے تانکہ ہر ہمو نزوری کہ مسونے اودے ہلیسہ اسہ جوانو و سوگوࣿ رنگ ئسے ئٹ گل و سیاسی کاریم تے مون آ دننگ نا بھلا وسیلہ مرے۔ مونی گل کاری نا ٹِک ئنا زی آ دیوان نا سنگتاک تینا شور و سلاہ تے تسر و بروکا ہنکینی کاریم تا جوانی کن تینا سلاہ و مشورہ آتے ڈرافٹ آتا دروشم ئٹ دیوان نا مون آ تخار۔
دیوان ئٹ ساڑی بنجائی سنگتاک ہیت کریسہ پاریر کہ ہراتم نن نغد ئنا مسخت آتیا ہیت کینہ گڑا نن سرپند مرینہ کہ نغدی چاگڑد اس یا نغدی شعور ءِ چاگڑد نا بشخ جوڈ کننگ کن ادارہ اسہ المی ءُ گڑاسے، و گل کاری نا ٹِک ہمو مروکا نغد آتے اسہ پروگام ئس تننگ و دا نزورے تے ہلنگ نا ترز و طریقہ تے آ پروگرام و پالیسی ہتنگ اندا گل کاری ئٹ مریک۔ اینو ننتون بساک نا درشم ئٹ ادارہ ئس ساڑی ءِ ہرانا مسخت چاگڑد ءِ خوانیفنگ، علم و شعور و چاہنداری تون اوار سیوتی کن جہد کننگ ءِ۔ بنجائی سنگتاک مون آ ہیت کریسہ پاریر کہ اینو داڑے دا تولوک آ دیوان نا سنگت آتا دروشم ئٹ نن گل ئنا دا زمہ واری تے اسہ سرسہب ءُ دروشم ئسے ئٹ خننگن کہ دا سنگتاک مون آ ادارہ ءِ گیشتر مہکم کریسہ حب وڑو جاغہ ئسے ٹی بلوچ ورنا و خوانندہ آتے تینتون اوار کریسہ اوفتا ہیلکاری ءِ کرور۔ دا زمہ واریک بیرہ اوغدہ افس بلکہ دافتا مسخت تینا ہمو شعور ئتون انصاف کننگ نا ءِ۔ ہمو شعور ہرا کہ ننے اسہ مچی و سیوتی نا سوچ ئس تریسہ شعوری بنیات آ اسہ جاغہ ئس رسیفنگ نا وسیلہ جوڑ مرے۔
سنگتاک مونی ہئت کریسہ پاریر کہ ورناک کہ ہراتم گواچنی نا کسر آن بےسما ءُ یاکہ اوفک بیرہ تینا زند ئنا زاتی خوشی تیتون مشغول ءُ گڑا دنچا کہ دافتا دا ردکاریم و بے سمائی نا سوج ہم ننے آن کننگو، اونا سوب دادے کہ اسہ شعوری ءُ بندغ ئس تینا چاگڑد ءِ مٹ کننگ نا زمہ ءِ ارفک گڑا اونا زمہ واری مرو کہ تینا چاگڑد ئٹ ہر مروکا مٹی و بدلی ءِ توننگ یا کہ چاگڑد ءِ ہمو گندئی تیان رکھنگ ہرا چاگڑد ءِ نسخان نا پارہ غا دننگ نا وسیلہ ءُ۔ سنگتاک ایسری ئٹ حب ہنکین ءِ گیشتر فعال کننگ نا زی ہیت کریسہ پاریر کہ سنگت آتیا بھاز امیت ءِ کہ اوفک بیرہ حب آخہ بلکہ دا تیوہ غا ہند ئنا ورناتے تینا چاہنداری و شعوری کاروان ئٹ اوار کننگ تون اوار تینا لیکہ و پروگرام ءِ اوفتیا رسیفنگ و تینا کاریم تے ترند کننگ نا کوشست کرور۔
سنگت آتا اُست جمی ئٹ کل ٹِک آتا زی آ ہیت و گپ آتیان پد گڈیکو ٹِک بروکا گامگیج ئس ہراٹی مسکوہی ہنکینی کابینہ ایسر کننگا و پوسکنا ہنکینی کابینہ کن سنگتاک گچین کنگار۔ ہنکینی کابینہ ٹی ہنکینی کارمستر یاصر بلوچ، کمک کارمستر مزار بلوچ، کارگشاد کمبر بلوچ، کمک کار گشاد شیرباز بلوچ و ہنکینی حوالکار خدا بخش بلوچ گچین کننگار۔
پوسکن گچین مروکا سنگت آتے بنجائی سنگت سوغند تس و دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
