بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ملیر ہنکین ءِ ہنکینی لس دیوان برجم دارگ بوتگ۔ محمد شاہ بلوچ ہنکینی کارمستر ءُ سابرہ بلوچ کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ملیر ہنکین ءِ ہنکینی لس دیوان گوستگیں ہنکینی کارمستر گُلاب بلوچ ءِ سروکی ءَ برجم دارگ بوتگ۔ دیوان ءِ مھمان بُنجاہی کُمک کارگُشاد تنویر بلوچ، بُنجاہی ھالرسانی کارگُشاد فہد بلوچ ءُ بُنجاہی کمیٹی ءِ باسک عدنان بلوچ بوتگ اَنت۔ دیوان ءِ تہ ءَ بُنجاہی سرکیولر، ہنکینی اھوال، نگدی نشست، گلکاری، ھندی ءُ میاں استمانی سیاسی جاورھال ءِ بُنگپانی سر ءَ گپ ءُ باوست ءَ پد آوکیں گامگیج ءِ توک ءَ گوستگیں کابینہ ھلاس کنگ بوت ءُ نوکیں کابینہ ءِ ھاتر ءَ سنگت گچین کنگ بوت اَنت۔
دیوان ءِ بنداتی بُنگپ بُنجاہی سرکیولر اَت کہ بُنجاہی سنگت ءَ دیوان ءِ دیم ءَ ونت ءُ باوست کُت کہ آئی تہ ءَ گل ءِ پیسلہ ءُ پروگرام ہوار اِت انت۔ دیوان ءِ دومی بُنگپ ہنکینی اھوال اَت کہ آ دیوان ءِ دیم ءَ ایر کنگ ءَ پد باوست کنگ بوت۔
نگدی بنگپ ءِ سر ءَ سنگتاں تران کنان ءَ گُشت کہ سیاسی ادارھانی توک ءَ نگد تچوکیں آپ ءِ وڑا ہمک چیز ءَ شوداں بیت ءُ نزوریاں داراں بیت۔ پہ درور اگاں آپ بہ اوشتیت گڑا آ آپ شوُنز بندیت ءُ ھچ کار ءَ نہ ایت، ھمے پیم ءَ اگاں سیاسی ادارہ ءِ توک ءَ نگدی عمل اوشت ءِ آماچ بہ بیت گُڑا ادارہ ءِ دیمروئی ءِ عمل ھم اوشت ءِ آماچ بیت۔ دیمترا سنگتاں تران کنان ءَ گُشت کہ مُھکمیں ادارہ جاتی ڈسپلئین کارانی دیمروئی ءِ سبب بیت۔ اگاں کارانی تہ ءَ مہکمیں سنجیدگی ءُ مہکمیں سر ءُ سوج کہ سیاسی اداراجاتی ءَ مہکم ءُ منظم کت کنت، مہ بیت گڑا اودا اداراجاتی پرگرام دیمرئی ءِ جاہ ءَ اوشت ءِ آماچ بنت۔ اودا مارا دیمروئی کنگ ءِ ھچیں پروگرامے سر ءَ اُمیت دارگی نہ انت۔ نگد ھمے چیزاں مارا سرپد کناں ءَ مئے تہ ءَ سیاسی سنجیدگی، مہکمیں ڈسپلئن ءُ مارا مخلصیں سیاسی باسک کُت کنت۔ گلکای ءِ بنگپ ءِ سر ءَ سنگتاں پہ کارانی شوک کنگ ءَ جتائیں شور ءُ سلاہ ءَ ہوار وتی پروگرام نبشتانکی دروشم ءَ دیوان ءِ دیم ءَ ایر کُرت انت۔
دیوان ءِ تہ ءَ بنجائی سنگت ءَ تران کنان ءَ گُشت کہ نودربر سیاست ءِ برورد اِنت کہ ما جہانی سیاست ءُ آئی ءِ تہ ءَ نوکیت ءِ ھوالہ ءَ نا تہنا آشنا بہ ایں بلکہ ایشاں وتی سیاسی پروگرام ءُ زلورتانی بنیات ءَ پہ وت کارمرز کُت کناں۔ بساک ھما ادارہ اِنت کہ مارا ءُ شمارا راج دوستی ءِ لیکہ ءَ گوں نہ تہنا بندوک کنت بلکہ بلوچ راجی سیاست ءِ ہوالہ ءَ مئے ہیلکاری ءُ سرپدی ءَ ہوار لیکہی بنیات ءَ مارا گوں مہکمی ءَ اداراجاتی سیاست ءَ بندوک کنت۔ سنگت ءَ دیمترا گُشت، سیاسی ہیلکاری ءُ تنظیم کاری ءَ ہوار ادارہ ءِ پیسلہ ءُ پروگرام مئے سیاسی سنجیدگی ءِ چیدگ اَنت۔
سیاسی سنجیدگی وتی تہ ءَ بگندئے یک لبزے بلئے اگاں ما ایشی ءِ بزانت ءَ شوھازگ ءِ جُھد بہ کنیں گڑا مارا گندگ ءَ کئیت کہ سیاسی سنجیدگی سیاست ءِ توک ءَ سرجم ءَ یک پڑے ءُ ایش گیش وانگ ءُ سرپد بوگ لوٹیت دانکہ ما ہمک سیاسی چست ءُ ایر ءَ ھوار سیاست ءِ ہر وڑیں جہلی ءُ برزی آں سرپد بوت بہ کنیں۔ مئے سنگتاں لوٹیت کہ ملیر ءِ سیاسی جاورانی سرپدی ءَ ہوار بلوچستان ءِ سیاسی چست ءُ ایراں سرپد بہ بنت ءُ وتی سیاسی پروگراماں ھمے رنگ ءَ دیم ءَ بہ بر اَنت۔ چیاکہ ملیر ءِ نودربر سیاست، بلوچستان ءِ نودربر سیاست اِنت ءُ بلوچستان ءِ نودربر سیاست، بلوچ راج ءِ سیاست اِنت پمشکہ مئے ھمک عمل بلوچ راجی سیاست ءِ سر ءَ وتی ساناں دؤر دات کنت۔ اے راستی ءَ سرپد بواں ءَ مارا وتی وانگ، ہیلکاری، تنظیم کاری، سیاسی ڈسپلین، سیاسی سنجیدگی ءِ سر ءَ شوکیں دابے ءَ کار کنگی اِنت، دانکہ ما شوکیں ءُ کاملیں سیاسی باسک جوڈ بوت بہ کنیں۔ مروچی کہ ما ملیر ءِ دیوان ءِ تہ ءَ سنگتانی بہر زورگ ءِ کچ ءَ گندیں وشی بیت کہ ملیر ءِ بلوچ ورنا بلوچ سیاست ءُ نودربرانی حقانی پہازگ ءِ واستہ اولی سرف ءَ اوشتگ ءَ جاڑیگ انت؛ بلئے ما سرپد بئیں کہ اے عمل وتی تہ ءَ سرجم نہ انت مارا گیش ءَ چہ گیش کار کنگ ءُ بلوچ ورنا وتی دیوان، ہیلکاری ءُ ایندگہ پروگرامانی بہر کنگی انت۔
دیوان ءِ کُلیں بُنگپانی سر ءَ دلجمیں باوست ءَ پد آوکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں ہنکینی کابینہ ءِ ھاتر ءَ کارمستر محمد شاہ، کُمک کارمستر شبیب بلوچ، کارگُشاد سابرہ بلوچ، کُمک کارگُشاد ھنیپ بلوچ ءُ ھالرسانی کارگُشاد شبیر بلوچ گچین کنگ بوتگ اَنت۔ بُنجاہی سنگت ءَ نوک گچین بیتگیں زمہ واراں سوگند داتگ ءُ دیوان ھلاس کنگ بوتگ۔
بُنجاہی جارکش: بلوچ اسٹوڈنٹس ایکشن کمیٹی
