بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نال ہنکین نا ہنکینی لس دیوان اڈ تننگا۔ اسلم عامر بلوچ ہنکینی کارمستر و ساحل بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نال ہنکین نا ہنکینی لس دیوان ہنکینی کمک کارمستر سنگت ساحل بلوچ نا کماشی ٹی اڈ تننگا۔ دیوان نا مہمان بنجائی سنگت جعفر بلوچ و نادر بلوچ ئسر۔ دیوان ئٹ بنجائی سرکیولر، ہنکینی حوال، تنقیدی نشست، گل کاری، ہندی و جہانی سیاسی حالیت نا ٹِک آتیا است جمی ئٹ تران آن پد بروکا گامگیج ئٹ مسکوہی کابینہ ایسر کننگا و پوسکنا ہنکینی کابینہ کن سنگتاک گچین کننگار۔
اولیکو ٹک بنجائی سرکیولر ئسک، بنجائی سنگت دیوان ئٹ بنجائی سرکیولر ءِ خوانا ہراٹی تیوہ غا بنجائی لس مجلس نا حوال تون اوار بنجائی فیصلہ غاتے ہم دیوان نا مون آ تخا۔ سرکیولر نا زی آ تران آن گڈ دا سرحال بند کننگا۔ مسٹمیکو ٹِک ہنکینی حوال ئسک، ہنکین نا حوال خواننگا ہراٹی ہنکینی ہیلکاری دیوان، لٹریچر، گل کاری، و ایلو تنظیمی پروگرام آتیتون اوار چنکا کاریمک اوار ئسر، سنگت آتا سوج و ورندی آن پد دا ٹِک بند کننگا۔
چارمیکو ٹِک تنقیدی نشست ئس سنگتاک ہنکینی کاریم تیا است جمی ئٹ تینا نغد آتے تخار۔ سنگت آک تران کریسہ پاریر کہ تنقید تینا تہٹی تینٹ اسہ سیاسی ءُ عمل ئسے۔ و تنقید اسہ گل ئسے نا مخ ئنا ہڈ مریک۔ دا ہیت ئٹ ہچو شک ئس اف کہ تنقید نا جند اسہ بھلو سیاسی عمل ئسے، ہرانا وسیلہ ئٹ تنظیم آتا مست ئنا ردی یاکہ نزوری تے ہُریسہ مستی مہکمی و سوگوْی ہتنگ نا پن ءِ۔ نغد آن بیدس گل اسہ ہندنو سلوک ءُ دِیر ئسے نا وڑ جوڑ مریک ہرا کہ وہیپک، وختس کہ وہیپگ گڑا گند کیک و خراب مریک۔ اندا وڑا نغد اگاں مف گڑا گل کاری و تنظیمی کاریمک سلنگ نا گواچی مریسہ مریرہ و اندا سلوک آ دیر ئنا وڑ مرور۔ سنگت مستی پارے کہ ولے یات سلے کہ نغد اگہ اصلاح و گیشتر گچینی کن کننگ آ گڑا مون پہ مون ہمو گل و بندغ آتون مریک۔ اندانا سوب آن گل تینا کاریم تے جوانی نا نیمہ غا دننگ نا کوشست کیک۔ کل سنگت آک اُست جمی ئٹ تینا کل نغد آتے کریر و دا سرحال انداکان ایسر کننگا۔
مون مستی گل کاری نا ٹِک ئنا زی آ دیوان نا سنگتاک بروکا ہنکینی کاریم تا جوانی کن تینا سلاہ و مشورہ تے دیوان نا سنگت آت مون آ تخار۔ سنگت آک ہیت کریسہ پاریر کہ نن اسہ سیاسی گل ئسے نا حیثیت ئٹ تینا ہر کاریم و پرگرام ءِ اسہ خوانندہ گل ئسے نا خواست آتا بنیات آ مون آ دننگ نا کوشست کین۔ تانکہ ننے دا کروکا کاریم آک اسہ جوانو و سوگوْ رنگ ئسے ٹی مون آ بریر۔ نن مدام تینا ہندی خواست و بکار اتا بنیات آ تینا تنظیمی کاریم تے مون آ دننگ نا کوشست کین۔
دیوان ئٹ ساڑی بنجائی سنگتاک ہیت کریسہ پاریر کہ نال وڑو جاغہ سیٹی گل ئنا سر مننگ و کاریم کننگ نن کن یاکہ بلوچ خوانندہ تیکن اسہ بھاز جوانو موقع ئسے۔ ننے دا موقع سرپند مریسہ تینکن کاریم ئٹ ہتوئی ءِ۔ نال ئٹ جتا وخت آتیٹی جتا رنگ ئنا پروگرام مسونے، ولے ہرا وڑ ئٹ خوانندہ غاتا یاکہ مسڑتا اواری بکار مسونے او وڑ ئٹ ننتون افس۔ بحیثیت ءِ اسہ خوانندہ گل ئس ننے تینا ہر کاریم و پروگرام تیٹی بلوچ ورنا و خوانندہ آتے تینتون یاکہ تینا پروگرام تیتون اوار کروئی مسونے او وڑ ئٹ نن کننگ کتانن۔ ننے داسا تینا دا کاریم تا زی آ پام تریسہ تینا کاریم، پروگرام و فیسلہ تیٹی مٹی ہتیسہ جوانو و گچین ءُ پرگرام مون آ ہتوئی ءِ۔ ہراڑکن بھلا زمہ واری ہنکین نا کابینہ تون اوار کل سنگت آتا زی آ تمّک۔ سنگتاک ایسری ئٹ نال ہنکین ءِ گیشتر فعال کننگ نا زی آ پام تریسہ پاریر کہ نال ئتون اوار گریشہ و کوہ شاشان نا ہیب کھیب ئٹ ہر ہند و جاغہ آ خواننگی و علمی فکر و فلسفہ سر مرے کہ بلوچ خوانندہ غاک دا گل ئٹ اوار مریسہ خواننگ، علم و سیوری نا کاروان ءِ پین مہکمی کننگ نا کوشست کیر۔
سنگت آتا اُست جمی ئٹ کل ٹِک آتا زی آ ہیت و گپ آتیان پد گڈیکو ٹِک بروکا گامگیج ئس ہراٹی مسکوہی ہنکینی کابینہ ایسر کننگا و پوسکنا ہنکینی کابینہ کن سنگتاک گچین کنگار۔ ہنکینی کابینہ ٹی ہنکینی کارمستر اسلم عامر بلوچ، ہنکینی کمک کارمستر مالک بلوچ، کارگشاد ساحل بلوچ، کمک کار گشاد کامران بلوچ و ہنکینی حوالکار نورزیب بلوچ گچین کننگار۔
پوسکن گچین مروکا سنگت آتے بنجائی سنگت سوغند تس و دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
