نوشتکار: جعفر بلوچ
گرامشی پائک کہ ‘ہر انقلاب آن مہالو اسہ بھلو ادبی و ربیدہی ءُ ہلہلہی اس الم بریک۔’ یعنی ادب ئٹی تونگری بننگ و ادبی کاریم تیٹی ڈیہہ ئنا بابت پڑو و یاتی اسہ ڈیہہ اسیٹی آشوب ہتنگ نا کل آن بھلا سوب مریک۔ بندغی و جہانی دیہاڑ ئٹ پترینگ آن گڈ نن خنینہ کہ ادب نا کڑد جہان نا تیوہ غا گڑا تا کڑد آن گیشتر مسنے کہ ادب نا مننگ آن خدا نا کلہؤ و تران آک آسمانی کتاب آتا دروشم ئٹ بندغ آتسکان سر کننگانو ہراڑے جہس کسّہ گوئی ئٹ بندغ آک تینا دیہاڑ و تینتون مروکا کسّہ، تدینی، تادی یا شادکامی تے اسٹ ایلو اسکان سر کرینو۔ ہندا ڈول ہندا ادب مسنے کہ بے بہا انگا لوز آتے بکار کرسہ شاعر و نوشتکار آک تینا نزور و خُلوک آ مخلوق آتے دلیر جوڑ کرینو تاکہ تینا راج و راجی مڈی تون اوار تینا ڈیہہ ئنا رکھ ءِ کیر یا ادب ہمو ڈیہہ ئنا مخلوق نا فکر و فلسفہ ءِ مٹ کیک۔
دنکہ، عرب نا اسلامی دیہاڑ آن مست و گڈ نا دیہاڑ ءِ اگہ کس گیرام کپ تو عرب ئٹ ہمو سوگو انگا رسم و دود مذہب دین و دھرم آتے مٹ کروکا گِڑا بیرہ ہمو سوگو انگا ادب ئس ہرادے حضرت محمد (ص) ہیس کہ اسہ چنکا سورت “سورہ کوثر” عرب نوشتکار و شاعر آتا ادبی تخلیق آتیان سوگو مننگ نا سوب آن عرب شاعر نوشتکار فلاسفی و داڑے اسکان کہ حضرت عمر نا وڑ انگا ہستی تے ہم کاٹم شیفی آ بے وس کرے۔ ادب گڑا ہرا وڑ ئنا مرے، او تینٹی تینٹ اسہ بھاز بھلو طاغت تخوک و منتری ءُ گڑا ئسے کہ اونا مونا ہچو سوگو ءُ نظریہ اس مہکم سلنگ کپک۔ واہم بھاز جاگہ غا اسہ ادبی تخلیق ایلو تخلیق آن کہ گیشتر سوگو و زیات زیمی کروک مس گڑا مون ئنا ادب، نزور انگا ادب تون اوار ہمو مہالو آن تخنگوکا نظام ءِ پرغنگ و ایسر کننگ نا طاغت تخک۔ انتئے کہ ادب ہمو سلہہ ءِ کہ مزغ آتے قوضہ کرسا مزغ اتا زی آ بادشاہی کیک، سوچ و فکر آتے ہڑسیک و سوگو آتے نزور و نزور آتے سوگو کیک۔
ادب نا کڑد ءِ ہراتم نن جتا جتا انگا ریاست و دیہاڑی جاگہ آتیٹی ہرن گڑا خننگ ٹی بریک کہ جہان نا ہراڑے ہم چنکو بھلو مٹی و بدلی و انقلاب اس بسنے اونا کل آن بھلا سوب ہمو جاگہ نا ادب و ادبی تخلیق آک مسنو۔ یخینن راج اسیٹی شعور بیدار کننگ کن الّمی آ گڑا ادب و ادبی تخلیق ءِ کہ ہرا مخلوق ئٹ ہمو سوچ فکر ءِ ودی کننگ و ہمو راج ئنا باتی تے اڑزان بولی ئٹ پاننگ کیرہ کہ راج ئنا گواچن آ دیہاڑ انت مسنے، ساڑی آ وخت نا بے وسیک انت ءُ و دیر نا سوب آن ءُ۔
ادیب سوج ودی کیک و الس ہمو سوج آتا رند ئٹ گنوک آنبار بِڑینگ بٹیسہ مزل نا پارہ غا کائک۔ ادب اسہ راج ئسے نا باتی تا مونا دا سوج آتے تخک کہ نا گواچن انت ءِ؟ نی اراڑے سلوک اس؟ تینا جند ئنا مڈی و گلزمین آن انتئے بے درک کننگانس و نا کل ویل آتا ایسری کن راج اتون اوار اسہ فرد ئسے انت کڑد سر تروئی ءِ؟ یعنی دا وڑ ادب و قلم نا بولی اسہ بے وس ءُ راج اسیکن مزاحمت نا چیدہ مننگ کیک کہ ہرا زوراکی، جبر و تادی و پین کیہی سامراجی لٹ پل آتا برخلاف اسہ ایمنی ولے زیات زیمی کروک ءُ سلہہ ئسے۔ کماش اس راست پاریکہ کہ ہراڑے اسہ سلہہ بند بندغ ئسے نا سُم سر مننگ کپک ہموڑے ادیب ئسے نا لوز آک سر مرسا است جغر تے کپ کننگ، مزغ آتے بدل کننگ و سوچ آتے مٹ کننگ نا وس تخرہ۔ دنکہ گرامشی جہس پائک کہ “ادب و ادیب طبقاتی شعور نا جوڑشت ئٹی بھاز بھلو کڑد اس سر تننگ کیرہ انتئے کہ ادیب بیرہ فنکار اس مفک بلکن اسہ بھلو راجی ءُ راہشون اس ہم مریک۔”
ادب نا کڑد ئٹ کل آن ودیک دا کہ ادب اسہ راج ئسے نا راجی شناخت نا رکھ ءِ کروک کل گڑا تیان اسہ گچینو ازباب ئسے۔ غلام آ راج اگہ ادب نا وسیلہ ئٹ تینا راجی دود آتا رکھ ءِ کیک گڑا کالونائزر دود آتے ہندا ہی ادب نا وسیلہ ئٹ بھس کرسا کائک۔ دنکہ اینو بلوچ چاگڑد نا مثیل ءِ ہلین گڑا نن خنینہ کہ مسکوہی کرن آتیٹی بلوچستان آ قوضہ کرسا دانا دیہاڑ، ادب بولی و ایلو کل گواچن آتے ابہ کننگ کن ادب بکار مسنے دنکہ بلوچستان نا دیہاڑ نا زی آ انگریز سامراج رابرٹ سنڈیمن، کیپٹن لیچ، ہینری پوٹینگر، فریڈرک و دائے بلوچستان ئٹ برسا تینا قوضہ گیریت و نوآبادیاتی مسخت آتے پورو کننگ کن بلوچستان نا دیہاڑ ءِ چپی راستی کرسا نوشتہ کریر۔ ہندا سوب ءِ کہ اینو ہم بلوچ نا گیشتر نوشتکار آک ہبکہ ءُ کہ ننا گواچن انت ءِ و ننا گواچنی دیہاڑ امر و اراتم بنا مسنے! ولے سامراج نا برخلاف بلوچستان ئٹ ساڑی ادب نزور مسنے و تینا آشوبی کڑد ءِ گچینی ئٹ سر تتنے کہ اینو بلوچ راج اسہ وار پدی زمزیر تیٹی خُلّوک ءِ۔ ایلو پارہ غا انت ادب نا آشوبی کڑد آن نمن مننگ مریک؟ دنکہ کینیا نا اسہ دانشور نگوگی پائک کہ “نوآبادیاتی مزاحمت ٹی لمئی بولی و ادب نا اسہ بنداوی کڑد اس مریک۔” یات سلہِ کہ اینو نا ادبی تخلیق آک اینو کن آخہ بلکن پگہ کن نوشتہ مننگ ءُ کہ اسہ راج و ڈیہہ ئسے نا باتی تے سما مرے کہ اوفتا راج ارا تدینی، زوراکی و حالیت آتیان گدرینگانے۔ اگہ ڈیہہ ئٹ ساڑی کل شاعر، ادیب و نوشتکار آک تینا محبوبہ نا زلف، کلک، دیدار و خن تے نازیفنگ بنا کریر گڑا ہمو ڈیہہ ئنا بروک آ پدریچ تینا بُنی کماش آتا زی ص ٹک خلسا دا سوچ خلور کہ ڈیہہ ئٹی محبوبہ تیان بیدس ہچو دنو گڑاس اہمیت تخوک متنے ہرانا زی آ قلم کاری مروسُس۔ یعنی ڈیہہ ئنا غلامی، بےوسی، ویل و ڈکھ آک اودیم مرور۔ پاننگ نا مسخت دادے کہ گوچن آ قلم ارفنگ و گواچن ءِ پاش کننگ سد سال اکن تینا ڈیہہ ئنا دیہاڑ و حالیت آتے رکھنگ نا بھلو وسیلہ ئسے۔ سد سال بھلو مد ئسے کہ لوز آک زندہ سلیرہ۔
ہندن مستی ہرن گڑا ادب اسہ فکر و نظریہ ئسے تالان کننگ نا ہم طاغت تخک و تیوہ غا راج ءِ اسہ نظریہ و فکر ئسے آ اسہ جاہ کننگ کیک۔ دن چاہ کہ راج آتا اواری نا اسہ بھلو سوب اس ادب و ادبی تخلیق ءِ۔ دنکہ فینن جہس پائک کہ “ادب کیہی پدریچ آتے مذاحمت نا شعور تننگ کیک و نوآبادیاتی ذہنیت نا برخلاف اسہ سوگو ءُ جہد ئسے نا بنیات ہم مریک.” ادب تینا وخت ئنا طاغت ور انگا ازباب مریک کہ ہرا زوراک نا برخلاف زیمی کروک ءُ سم اس مریک و بے وس مظلوم آتا سوگو انگا توار ہم مننگ کیک۔ ادبی تخلیق اسہ دڑد خور و مظلوم ئسے نا ہمو توار مریک ہرا مَش جبل پٹ میدان تیٹی پنیسہ اسٹ آن ہفت و ہفت آن ہفتاد جوڑ مرسا ہر خف اسکان سر مریک۔ ہنڈا ڈول ئٹ ادب بیانیہ تالان کننگ ئٹ چٹ بھلو کڑد اس سر ایتک کہ وخت اس سامراج تینا بولی نا کمک ئٹ مظلوم انگا راج آتا زی آ ہندن کانڈہ مریک کہ ہمو راج تینا جند ئنا بوکی ٹی تران و نوشتہ کننگ ءِ میاری ءُ گڑاس تکّک۔ یا وخت اس قوضہ مروکا راج آک تینا حالیت آتے بدل کننگ کن تینا بیانیہ ءِ مونا دننگ ئٹ سرسہب مریرہ ولے داڑکن بے وس آ راج ئنا ادب ءِ گیشتر مہکم و سوگو مننگ نا گرج مریک نہ تو گڑا پد تا ہندن مرو کہ قوضہ مروک شار آتا باتیک تینا گواچن آن کَر کور و بدبیسہ مرور۔
دا وڑ ادب اسہ راج ئسے نا گواچن ءِ پاش کرسا ہمو راج نا باتی تے ٹوہیسہ، ہکل تریسہ اوفتا زی آ زوراکی و تادی تا پڑو ایتک و اوفتے بش کننگ نا ہندنو جہد اس کیک کہ او راج ئنا باتیک تینا زی آ مروکا ہر تادی نا زی آ عمل نا سیم و حد آتسکان سر مریرہ و تینا ڈیہہ ئٹ لگوک خاخر تے کسفنگ نا کوشست کیرہ۔ ہندن اگہ نن بلوچستان ئٹ ساڑی بھلا بولی بلوچی و براہوئی نا کڑد آ نظر اس شاغن تو نن خنینہ کہ داڑے دا بولیک تینا کڑد ءِ ہمو وڑ سر تننگ ئٹ سرسہب متنو ہمر کہ تروئی ئسک تا۔ دنکہ نن خنینہ کہ داکان مسکوہی کرن آتیٹی زرمیہ شاعری تا وسیلہ ئٹ رند و لاشار، جدگال و کلمتی و ایلو بلوچ قبیلہ غاتا جنگول مننگ نا حالیت آتے ننے اسکان سر کروکا بلوچی و مچٹ بھاز براہوئی ادب مسنے۔ یا مہر مابت نا کسہ و داستان آتے شاعری نا دروشم ئٹ مست توکلی، جام درک شہہ مرید و دائے ننے اسکان سر کرینو و ہمو شاعری و نوشتہ غاتیٹی بلوچ مخلوق نا دیہاڑ، رسم و دود آک پاش مریرہ و نن گڑا ہموفتے خواننگ و خف تورنگ آن گڈ ادب نا اہمیت آن واخب مرینہ۔
دنکہ مالؤ یاتی کریٹ کہ ادب اسہ ڈیہہ ئنا گواچن، راستکی و ساڑی حالیت آتے پاش کننگ ٹی چٹ بھلو کڑد اس سر ایتک ولے نن ہرن کہ ساڑی آ وخت ئٹی براہوئی و بلوچی بولیک بلوچ راج ئنا ساڑی آ حالیت، زوراکی، بیگواہی، تادی و بے وسی تا زی آ چٹ چپ ءُ۔ باور بفروک ہیت دادے کہ اینو بلوچی و براہوئی ادب نوشت آک چندی صنف آتے اسکان محدود کننگانو کہ بلوچستان نا کنڈ کنڈ آ ننے شاعر آک ملیرہ ولے نثری صنف آ نوشت ہچو حساب اسیٹی اف۔ گواچن دادے کہ بلوچستان نا حالیت ننا افسانہ غاتیٹی خننگپک، بلوچ راج ئنا بےوسی ننا کسہ غاتیان اودیم ءِ و ناول ئٹ ننا ادب ہچبر کڑد سر تفک و ہندن شاعری نا جہان بیرہ زلف کلک دیدار و جوڑ تے نازیفنگ اسکان محدود ءِ کہ پیشن نا کسس اگہ بلوچی براہوئی ادب ءِ خوانِہ تو اودے ہندن گمان مرو کہ بلوچستان ئٹ محبوبہ تیکن گنوک عاشق و مہر مابت ئٹی ڈب ہلوک بندغ ارے ولے بزّہ، غلام و ڈکھ آن پر بندغ ہچبر اف!
باور کیس براہوئی بلوچی ادب دائسکان ہمو جاہ ءِ سر مننگ ئٹی سرسہب متنے کہ بلوچستان نا گواچن حالیت آتے پاش کیر و پیشن نا مخلوق ءِ بے وس کیر کہ ننا ادب ءِ خوانر و ننا گواچن حالیت آن واخب مریر۔ مسکوہی سال ئٹ براہوئی بلوچی نا شینک مروکا کتاب آتیا نظر شاغن گڑا سما تمک کہ ننا ادیب دائسکان تینا اُرائی آ جیڑہ غاتیٹی پسینگوک ءِ، سما تمک کہ ننا ادیب دائسکان تینا محبوب نا زلف آتا سیخا غان است ارفنگ کننگ اف و ننا ادیب ڈیہہ ئنا شیشپہ مننگ و راج ئنا بےوسی آن سفا ناواقف ءِ۔ ہندن کہ زی آ نن زکر کرین کہ ادب ہمو ازباب ءِ ہرا اسہ راج ئنا باتی تے سوچ خلنگ آ بے وس کیک، راج ئنا راجی شناخت نا رکھ ءِ کیک و ادب اسہ راج ئنا ضرورت نا وڑ ہمو راج ئٹی سوگؤ ءُ فکر اس ہم تالان کننگ کیک۔ یا برٹولٹ بریچ نا ہمو ہیت ءِ ہرن کہ پائک “ادب بیرہ گڑاتا عکس کشی ءِ کپک بلکن راج اسیٹی مٹی بدلی و انقلاب اس ہتنگ نا ازباب اس ہم مریک”. گڑا سوج ودی مریک کہ براہوئی و بلوچی ادب مگہ ننا راج ئٹی ہندا کل کاریم تے کننگ ءِ؟ انت ننا ادب ننا راج ئنا حالیت آتے بدل کننگ نا طاغت و سوگوی تخک؟ انت ننا ادب سامراج نا ادب آن ترند و زور ءِ کہ ننا مخلوق ءِ خواننگ آ بے وس کے؟
ویل دادے کہ ننا ادیب سختی سوری نا وخت آ کاٹم ءِ شیف کرسا کنڈ اس ہلیک و تینے پغٹ آنبار مِش ئٹی کھڈ کیک کہ کسس اودے خنپ، بنپ و خوانب۔ بلکن دن پار کہ سخت انگا حالیت ئٹی ننا ادیب تینے راج آن چٹ لاتعلق کیک ولے فرانس نا اسہ فلاسفر و ادیب جین پاؤل اسٹارٹ نوشتہ کیک کہ “گواچن آ نوشتکار راج آن اسل لاتعلق مننگ کپک”۔ راست دا کہ ادیب تینا ڈیہہ و مخلوق تون گنڈوک مریک و اونا قلم آجو مفک بلکن ڈیہہ ئنا ایلو باتی تتون اواری نا کوک خلسا کیک۔
یات سلے کہ ڈیہہ ئٹی ایلو کل کڑد آک اسہ ساعت کن چپ کننگ کیرہ ولے ادیب نا ہندنو کڑد ئسے کہ اونا اسہ ساعت ئسے نا چپی راج ءِ ڈنگ خلیک۔ ادیب نا کاریم ءِ ازل آن ابد اسکان برجا مروئی ءِ تاکہ کالونائزیشن، ڈی کالونائزیشن و پوسٹ کالونائزیشن نا تیوہ غا دور آتے قلم بند کننگ کے۔ واہم ادیب و ادب نا کل آن زیات ضرورت ہموتم مریک کہ ڈیہہ ئٹ دیک سخت مریر و راج آک بھیم ئنا گواچی مریر گڑا ہموتم راج ءِ ادیب نا لوز آک ہمت جیرت حوصلہ بشخنگ کیرہ و راج ءِ کلہو تننگ کیرہ کہ ہر سختی آن پد اڑزانی ارے۔ ولے بلوچستان نا ادیب کاٹم ءِ لس الس آنبار ہموتم جِک کیک و قلم آن سیاہی وہیفک ہراتم کہ مخلوق ءِ اوفتا ضرورت محسوس مفک۔ سما اف بلوچ راج ئنا ادیب آک انتئے اینو دن بے سما و لغور جوڑ مسنو کہ اینو ساڑی آ حالیت ئٹ بلوچ زالبول آک کہ ہرا بلوچ راج ئٹی بھلو شرف اس کڑزرہ ہم بیگواہی نا آماچ مرسا ءُ ولے کنا ادیب ءِ بوڈ کنپک۔ داکان دا ہیت پک مریک کہ بلوچستان ئٹ براہوئی بلوچی ادب نا کڑد دائسکان پین سوگوی و مٹی خوائک تاکہ بلوچستان نا ادب بلوچستان نا حالیت آتے پاش کے و بلوچستان نا ادب ئٹ جہانی پڑ آ مٹی برسا داٹی سائنس، ٹیکنالوجی جہانی آشوبی تحریک آتون اوار تینا جند ئنا گواچن حالیت آتے پاش کے و گچینو کڑد اس سر ایتے۔ یات سلے کہ ہراتم بلوچستان نا ادب سامراج نا ادب آن گیشتر ترند مس کہ سامراجی طاغت تون اوار تیبہ جہان ننا ادب آن تینکن دننگ نا کوشست بنا کرے گڑا ہموتم ننا رژنا غا دیک الّم بنا کرور۔
