بلوچ اسٹوڈنٹس ایکشن کمیٹی خضدار ہنکین ءِ لس دیوان اڈ دیگ بیتگ۔ مبارک بلوچ ہنکینی کارمستر ءُ شیرباز بلوچ کارگشاد گچین کنگ بوتگ اَنت۔
“نودربراں وتی وانگ، گور ءُ پِگر ءُ زانشتی چاگرد ءِ سر ءَ گیش دلگوشی دیگ ءَ ہوار چہ ہمک ڈولیں تاواندہیں گڑ ءُ منجیاں وت ءَ رکینگی اِنت۔”
بنجاہی کماش اُزیر بلوچ
بلوچ اسٹوڈنٹس ایکشن کمیٹی خضدار ہنکین ءِ لس دیوان گوستگیں ہنکینی کارمستر رِھمان بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بنجاہی کماش اُزیر بلوچ بوتگ۔
ہنکینی لس دیوان ءَ بنجاہی سرکیولر، ھنکینی اھوال ، نگدی بھر، گلکاری، ھندی ءُ میانی استمانی سیاسی جاورھال ءِ بنگپانی سر ءَ تران ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں کابینہ ءِ ھاتر ءَ سنگت گیچین کنگ بوت اَنت۔
دیوان ءَ بنجاہی سرکیولر پیش کنگ بوت کہ آئی ءِ تہ ءَ بنجاہی لس مجلس ءِ سرجمیں اہوال ہوار اِت اَنت۔ ہنکینی اہوال ءِ بنگپ ءَ ہنکین ءَ وتی گوستگیں کارانی اہوال پیش کُت اَنت ءُ آہانی سر ءَ دلجمی ءَ جائزہ زُرت۔ نگدی نشست ءَ باسکاں ہنکینی نِزوری ءُ کوتاہیانی سر ءَ وتی نگد ایر کُت اَنت ءُ آہانی گِشینگ ءَ پہ شور ءُ سلاہ دات۔ ہمے وڈ دیوان ءِ گَلکاری بنگپ ءَ باسکاں گَلکاری ءِ سر ءَ گپ ءُ باوست کت ءُ دیمی کارانی ہاتر ءَ شور ءُ سلاہ اِش دات۔
لس دیوان ءَ بنجاہی کماش ءَ تران کنان ءِ گوشتگ کہ ہستیں دور ءِ بلوچ ورنا سکیں اہدسازیں زمانگے ءَ زِند گوازینگ ءَ اَنت۔ اے دور ءَ کہ بلوچ راجمان جتائیں گپچلانی آماچ اِنت، وانگی ادارہاں بہ گِر داں ایدگہ راجمانی ادارہ دُرست پروشت ءُ پروش ءِ آماچ اَنت، مہلوک ءُ ورنایانی تہ ءَ تاواندہیں گڑ ءُمنجی یے آرگ بیتگ ءُ تچکیں گپ ءُ عمل ءِ سر ءَ بندش اِنت، سیاست ءُ وانگ ءِ عمل یک بیمناکی یے زانگ بیت، پمیشکا اے دور ءَ بلوچ ورنا ءُ نودربرانی عمل ءُ ھمت باز مانا دار ایت۔ ہما دور ءَ کہ گرانی گیشتر بنت آ دور ءَ اِشانی دیمپان بیگ ءُ اوشتگ اژدری بیت پمیشکا بلوچ ورنا ناں تہنا اے دور ءِ ارزشت ءَ بہ زان اَنت بلکیں وتی جِند ءِ ارزشت ءَ ہم بہ پہم اَنت ءُ وتی وہد ءَ جانداریں عملے ءِ کنگ ءَ پہ بہ دیے اَنت۔ اے ہاتر ءَ ورنایاں گیش وانگ، گور ءُ پِگر کنگ ءَ ہوار عملی دروشم ءَ وتی کِردے پیلو کنگی اِنت۔ وانگ ءَ چہ ما ہمک ڈولیں تاواندہیں گڑءُ منجیاں پلگار بیں ءُ وتی زہنی ردوم ءَ گیش مہکم کُت کنیں دانکہ ما وتی راجی جیڑہاں نہ تہنا بہ پہم ایں بلکیں آہانی توجیل سازگ ءَ ہم گہتریں کارے کُت کنیں۔
دیمتر ءَ کماش ءَ گپ کنان ءَ گوْشت کہ بساک ہستیں دور ءِ نودربر سیاست ءِ ہما مِنُک اِنت کہ آ بلوچ راجمان ءِ ہمک زانشتی تکاں جہد کنگ ءَ اِنت، بلوچ راج ءِ زُبان، دود ءُ ربیدگ، وانگ، سائنسی تک ءَ ہوار ایدگہ راجمانی تکانی پہازگ ءِ جہد ءَ عملی گامگیج زیرگ ءَ اِنت۔ زہگانی وانینگ، ورنایانی وانگی جیڑہانی توجیل کنگ، راجمان ءَ کتاب چاگرد ودی کنگ، آہاں چہ ہمک ڈولیں راجمانی سِلکاریاں پہریزگ ادارہ ءِ اولی گامگیج ءُ پالیسیانی بھر اَنت۔ بلے ما ہمنچو جہد بہ کنیں بگندے کم بہ بنت پمیشکا ورنایاں ادارہ ءِ ہمک فیصلہ ءُ پالیسی چو اژدری ئیں زمہ واری ءِ ھساب ءَ زیرگی اِنت ءُ دل ءُ جان ءَ گوں بلوچ مہلوک ءَ سر کنگی اِنت، دانکہ ما آہاں زانت ءُ زانشت ءِ نیمگ ءَ آرگ ءُ ہستیں دور ءَ تاواندہی ءِ نیمگ ءَ روگ ءَ داشت بہ کنیں ءُ وتی راجمان ءِ ہستانکی دروشم ءَ پہریز ایت بہ کنیں۔ مئے کسانیں کوتاہی ءُ نزوری یے ہم پہ باندات ءَ مزنیں تاوانے بیت ءُ کئیت۔ بلوچ ورنایاں وتی جِند ءِ ھمت ءِ سر ءَ بیسہ دارگی اِنت ءُ ادارہ ءِ کار ءُ لیکہ ءَ گوں وڑے نہ وڑے ءَ ہمگرنچ بیان ءَ راجی زمہ واری پیلو کنگی اَنت۔
دیوان ءِ کُلیں بنگپانی سر ءَ دلجمی ءَ تران کنان ءَ پد آؤکیں گامگیج ءَ گوستگیں کابینہ ھلاس کنگ بیتگ ءُ نوکیں ہنکینی کابینہ گچین کنگ بیتگ کہ آئی ءِ تہ ءَ ہنکینی کارمستر مبارک بلوچ، کمک کارمستر وسیم بلوچ ، کارگشاد شیرباز بلوچ، کمک کار گشاد صفیہ بلوچ ءُ ھالرسانی کارگشاد نصرت بلوچ گچین کنگ بیتگ اَنت۔ نوک گچین بوتگیں سنگت بنجاہی کماش ءَ سوگند داتگ اَنت ءُ دیوان ءِ آسری ءِ جار پرینگ بوتگ۔
بنجاہی جارکش: بلوچ اسٹوڈنٹس ایکشن کمیٹی
