بلوچ اسٹوڈنٹس ایکشن کمیٹی شال ہنکین ءِ لس دیوان برجم دارگ بوتگ۔
اعجاز بلوچ ہنکینی کارمستر ءُ راشد بلوچ ہنکینی کارگشاد گچین کنگ بوتگ اَنت۔
“بساک بلوچ نودربرانی کوپگ اِنت، ورنا ناں تہنا ادارہ ءِ ارزشت ءَ بہ زان اَنت بلکیں آئی ءِ رندگیری ءَ کنان ءَ پہ وتی جیڑہانی توجیل سازی ءَ جہد بہ کن اَنت۔”
چئیرمین ازیر بلوچ
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی شال ہنکین ءِ لس دیوان ہنکینی کارمستر ولید بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بنجاہی کماش اُزیر بلوچ، مزن کارگشاد پیرجان بلوچ ءُ بنجاہی کمیٹی ءِ باسک سہیل بلوچ ہوار بوتگ اَنت۔
ہنکینی لس دیوان ءَ بنجاہی سرکیولر، ھنکینی اھوال، نگدی بنگپ، گلکاری بھر، ھندی ءُ میانی استمانی سیاسی جاورھال ءِ بنگپانی سر ءَ دلجمی ءَ تران ءَ پد آؤکیں گامگیج ءَجتائیں فیصلہ زورگ بوت اَنت، گوستگیں کابینہ ھلاس کنگ بوت ءُ نوکیں کابینہ ءِ ھاتر ءَ سنگت گیچین کنگ بوت اَنت۔
دیوان ءَ بنجاہی سرکیولر پیش کنگ بوت کہ آئی ءِ تہ ءَ بنجاہی کمیٹی دیوان ءِ سرجمیں اہوال ءُ تران ہوار اِت اَنت۔ ہنکینی اہوال ءِ بنگپ ءَ ہنکین ءَ وتی گوستگیں کارانی اہوال پیش کُت اَنت ءُ آہانی سر ءَ دلجمی ءَ جائزہ زُرت۔ نگدی نشست ءَ باسکاں ہنکینی نِزوری ءُ کوتاہیانی سر ءَ وتی نگد ایر کُت اَنت ءُ آہانی گِشینگ ءَ پہ نوکیں شور ءُ سلاہ دات۔ ہمے پیم دیوان ءِ گَلکاری بنگپ ءَ باسکاں گَلکاری ءِ سر ءَ گپ ءُ باوست کت ءُ دیمی کارانی ہاتر ءَ شور ءُ سلاہ اِش دات۔
دیوان ءَ بنجاہی کماش ءَ تران کنان ءَ گوشت کہ دنیا ءِ تہ ءَ ہمک زِندگیں راجانی نشانی ایش اِنت کہ آہانی ہمک تبک ءَ ہوار ورنائیں تبک پہ وتی راجمانی گہتری ءُ زانشتی پِڑاں مدام جہد کنان ءَ دیم ءَ جُنزگ ءِ سر ءَ سِتک دار اَنت۔ ہر ہما راج کہ آہانی ورنا راجمانی جیڑہانی سر ءَ اولی سرپ ءَ اوشتوک بہ بنت داں آ راج نہ تہنا تہاریاں درتک کنت بلکیں دیمروئی کنان ءَ وت ءَ ہستیں دور ءِ گاماں گوں ہمگام کت کنت۔ ہمے پیم بلوچ ورنا ہم مرچی زانت ءُ زانشت ءِ پِڑاں جہد کنان ءَ دیم ءَ جُنزگ ءِ سر ءَ ناں تہنا باور کن اَنت بلکیں جہد ہم کنگ ءَ اَنت۔ بلوچیں ورنائیں نودربرے کہ ودی بیت آ جتائیں جیڑہاں گوں دُچار اِنت کہ آہانی تہ ءَ وانگی جیڑہ آہانی مستریں اڈانداں چہ یکے، مئے وانگی ادارہانی زوالی ءِ سبب ءَ نودربرانی وانگی ءُ زانشتی ردوم باز سانمند اِنت ہمے اڈاندانی توجیل کنگ ءَ ما جہد کنگ ءَ ایں گڑا مارا پہمگی ایں کہ اے مزنیں زمہ واری یے ءُ ایشی ءِ پیلو کنگ ءَ مارا وتی علمی ءُ عملی جہد ہمنچو گیش کنگی ایں کہ اے جیڑہاں ناں تہنا بہ درنگازیں بلکیں آہاں سائنسی تک ءَ توجیل بہ کنیں۔ اے ہوالہ ءَ بساک مدام وتی راج ءِ نودربرانی کوپگ اِنت ءُ آہاں رہشونی کنان ءَ دیم ءَ جُنزان اِنت، پمیشکا بلوچ نودربراں وتی راجی ادارہانی ناں تہنا بستار ءُ ارزشت زانگی اِنت بلکیں آہانی مکسد ءُ عمل ءِ رندگیری کنان ءَ دیم ءَ جُنزگی اِنت۔ اے نازرکیں جاوراں باسکاں ہوار لس ورنا ءُ نودربراں سک شیوار بیگی اِنت ءُ وتی ہمک کرتناں گوں اگل ءُ ہوش ءَ چارگ ءُ ٹپاسگی اِنت کہ چوشیں نزوری ءُ جان بڈی یے مہ بیت کہ آئی ءِ سبب ءَ مئے سرجمیں پدریچ تاوانبار بہ بیت۔ من ءَ وتی ورنایانی سر ءَ باور اِنت کہ آ وت ءَ گیش باسما ءُ ہمک ہوالہ ءَ مہکم کنان ءَ گوں زانشتی سِنچ ءَ دیم ءَ جنز اَنت۔
سنگتاں دیمتر ءَ تران کنان ءَ گوْشت کہ نودربر گلے ءِ زمہ وار ءُ باسکے ءِ بستار ءَ مئے مدام جہد بیت کہ ما وتی چپ ءُ چاگرد ءَ باسما بہ کنیں، وتی ورنا ءُ زہگاں زانشتی پِڑاں بودناک کنگ ءِ جہد ءَ آہاں بہ وانین ایں، آہاں شر ءُ ھراب ءِ میان ءَ تپاوتانی بابتہ پوہ بہ کنیں ءُ آہاں چہ ہمک وڑیں نادراہی ءُ بے جوہریاں بہ کشیں۔ ادارہ ءِ ہمک پالیسی ءُ فیصلہ پہ ورنا ءُ نودربرانی گہتری ءُ آسراتیانی ہاتر ءَ اَنت پمیشکا اِشانی سر ءَ گیش ءَ چہ گیش عمل کنگ ءَ گوں ادارہ ءِ پالیسی ءُ فیصلہ ورنا ءُ مہلوک ءَ سر بنت کہ چہ ایشی ءَ نودربر بدیں عمل ءُ جیڑہاں درتک کن اَنت ءُ پہ وت ءَ رژنائیں چاگردے جوڑینگ ءَ سوبین بیت کن اَنت۔ ہمے پیم شال بلوچ نودربر سیاست ءِ مزنیں بنجلے کہ اد ءَ جتائیں ھند ءُ دمگانی نودربر ءُ ورنا پہ وانگ ءَ رہادگ بنت بلے چوشکہ مئے راجمان جتائیں سِلکاریانی آماچ اِنت گڑا بازیں نودربرے چہ جتائیں جیڑہاں وتی زانشتی سپر ءَ اڈاندانی آماچ بنت کہ آہانی تہ ءَ راجمانی سلکاری، وانگی جیڑہ، نفسیاتی جیڑہ ءَ ہوار ایدگہ ہوار اَنت۔ مرچی اے تیزگامیں دور ءَ ہمک چیز مٹ بیان اِنت، اگاں ما وتی ورنا چہ بدیاں رکینت نہ کت اَنت ءُ ورنائیں تبک بودناک نہ کت داں مئے زوالیں پدریچے ودی بیت کہ آہی ءِ شر کنگ سک گران بیت۔ پمیشکا مارا وتی نودربر گوں وت زیرگی اَنت ءُ آہاں ہمک وڑیں اڈانداں چہ رکینگ ءُ زانشت ءِ نیمگ ءَ آرگ ءِ سر ءَ جہد کنگی ایں دانکہ ما یک گہتریں زانشتی چاگردے ودی کنگ ءَ سوبمند بہ بیں۔
دیوان ءِ کُلیں بنگپ بنجاہی سرکیولر، ھنکینی گوستگیں اھوال، نگدی بھر، گل کاری، ھندی ءُ میان اُستمانی سیاسی جاورہالانی سر ءَ دلجمی ءَ تران ءُ باوست ءَ پد گُڈی بنگپ آؤکیں گامگیج ءَ پہ دیمتری ہنکینی کارانی ہاتر ءَ بنجاہی فیصلہانی سر ءَ کار کنگ ءِ شوربندی ٹہینگ بوت ءُ ہنکینی کاراں مہکم ءُ گیش کنان ءَ جتائیں دگہ فیصلہ زیرگ بوت اَنت کہ آہانی تہ ءَ گل کاری ءِ سر ءَ کار کنگ، وانگی ادارہانی تہ ءَ نودربرانی وانگی جیڑہانی سر ءَ گامگیج زیرگ، جتائیں وانگی ءُ زانشتی مراگش اڈ دیگ، لس ورنایاں زانشتی سرپدی دیگ، ورنایانی بودشتانی سر ءَ کار کنگ، تب ءِ پِڑ ءَ سرپدی سیشن اڈ دیگ ءَ ہوار ایدگہ فیصلہ ہوار اَنت۔ اے فیصلہاں پد دیوان ءَ گوستگیں کابینہ ہلاس کنگ بوت ءُ پہ نوکیں کابینہ ءِ ہاتر ءَ سنگت گچین کنگ بوت اَنت کہ آہانی تہ ءَ ھنکینی کارمستر اعجاز بلوچ، کمک کارمستر ھانل بلوچ، کارگشاد راشد بلوچ، کمک کارگشاد پکیر بلوچ ءُ ھالرسانی کارگشاد حفیظ بلوچ گچین کنگ بوت اَنت۔
دیوان ءِ سرجمیں بھرانی دلجمی ءَ سرجم کنگ ءَ پد بنجاہی سنگتاں نوک گچین بیتگیں سنگت سوگند دات اَنت ءُ دیوان آسر کنگ بوت۔
بنجاہی جارکش: بلوچ اسٹوڈنٹس ایکشن کمیٹی
