چہ بلوچ اسٹوڈنٹس ایکشن کمیٹی ءِ نیمگ ءَ ائید مراگاہ ءِ رد ءَ جتائیں مراگش برجم دارگ بوتگ اَنت۔
بلوچ اسٹوڈنٹس ایکشن کمیٹی
ائید مراگاہ ءِ رِد ءَ دو دیوان برجم دارگ بوتگ، یک مزنیں زانشتی مراگشے گریشگ، ءُ یک ہیلکاری دیوانے نمیرانیں پروفیسر غمخوار حیات ءِ زند ءِ سر ءَ برجم دارگ بوتگ۔
اے رد ءَ اولی مزنیں مراگش گریشگ ءَ برجم دارگ بوتگ، دیوان ءَ بنجاہی کمیٹی ءِ سنگت نادر بلوچ، نگرہ بلوچ ءُ رحمان بلوچ ساڈی بوتگ اَنت۔ مراگش ءَ استاد ءُ نودربراں ہوار ایندگہ پڑ ءِ زالبول ءُ مردیناں مزنیں کچے ءَ بہر زُرتگ۔ دیوان جتائیں بہرانی تہ ءَ بوتگ، کہ آوانی تہ ءَ تران، پینل ڈسکشن، ڈاکیومینٹری، ٹیبلو، گام کلاس، کتاب میڑہ، شئیر ءُ شائری، لئیب ءُ گوازی، دو چاپی ءَ ہوار ساز ءُ زیملی بھر ہوار بوتگ اَنت۔
مراگش ءِ بندات چہ راجی سوت ءَ کنگ بوتگ ءُ دیمتر ءَ مراگش ءِ بہر بندات کنگ بوتگ اَنت۔ اولی بہر ءَ کتابجاہ ءِ ارزشت ءِ سر ءَ ترانے بوتگ کہ گریشگ وڑیں ھلکے ءَ کتابجاہ ءِ بوگ پہ وانگ ءُ دربرگ ءَ چینکس الّم انت ءُ وانگی کچ (لٹریسی ریٹ) ءِ گہتر کنگ ءِ واستہ چینچو ارزشت داریت۔ دیمتر ءِ بہر گریشگ ءِ وانگی نظام ءِ سر ءَ ترانے بوتگ کہ ترانکار ءَ گریشگ ءِ وانگ ءِ سر ءَ گپ کنان ءَ گشتگ کہ اے ہند ءَ وانگ ءِ جوانیں نظامے نہ بوگ ءِ سوب ءَ اے دمگ ءِ زھگ چہ وانگ ءُ زانگ ءَ زبہر اَنت، ھمیشی سوب ءَ اے ہند ءِ وانگی کچ کم بوان انت۔ پمیشکہ مارا لوٹیت کہ گریشگ ءِ وانگی نظام ءِ گہتر کنگ ءِ ھاتر ءَ عملی گامگیج ءِ سر ءَ دلگوشی بہ دیے ایں۔
مراگش ءِ دیمتری بہر پینل ڈسکشن ءِ بوتگ کہ آئی ءِ سرھال چاگرد، چاگردی جیڑہ ءُ آئی ڈی بی ایس (بزانکہ انٹیلیکچول ڈیبیٹ آن بلوچ سوسائٹی) ءِ کرد بوتگ۔ ایشی پینلسٹ بنجائی کمیٹی ءِ سنگت بوتگ اَنت ءُ مہماندار ہنکینی کارگشاد بوتگ۔ سنگتاں چاگرد ءِ تہ ءَ سر چست کتگیں بازیں سلکاری ءُ چاگردی نادراہیانی سر ءَ تران کرتگ ءُ گشتگ کہ چے پیم ءَ مئے چاگرد تباہی ءُ زوالی ءِ نیمگ ءَ گام جنان انت۔ پہ درور مئے مردم جتائیں نشہ ءُ ایندگہ سلکاریانی آماچ اَنت آوانی تہ ءَ طے جوہری، بے ایمانی، غیر سنجیدگی، کوچرائی ءُ مورل کرپشن ہوار اَنت۔
سنگتاں گشتگ کہ اے جیڑہ ناں تہنا پہمگی اَنت بلکیں ایشانی ھوالہ ءَ مارا گیش دلگوشی دیگی ایں ءُ ایشانی دارگ ءِ واستہ عملی جہد ءِ نیمگ ءَ گام جنگی ایں۔ اے ھوالہ ءَ گل ءِ نیمگ ءَ زرتگیں مزنیں کیمپئین آئی ڈی بی ایس ءِ سر ءَ چہ گیش ءَ گیش کار کنگ ءُ ایشی ءِ وسیلہ ءَ ما ھر ھما سلکاری ءَ داشت کنیں کہ آ مئے چاگردی جوڑشت ءَ تاوانبار کنگ ءَ اَنت۔ دیمتری بہر بلوچی چاپ بوتگ کہ سنگتاں گوں وتی ربیدگی چاپ ءَ دیوان زیبدار کتگ۔ بلوچی چاپ ءَ رند بلوچ ءِ لئیب ءُ گوازی ءِ سر ءَ کسانیں پجارے دئیگ بوتگ ءُ گونڈلاں ھمے لئیب ءُ گوازی ءِ تہ ءَ بہر زرتگ، اے بہر ءَ پد دگہ ترانے بوتگ کہ ایشی سرھال وانگ ءِ ارزشت ءُ زالبولانی وانگ ءِ ارزشت بوتگ کہ ایشی سر ءَ بنجائی کمیٹی ءِ سنگت نگرہ بلوچ ءَ تران کتگ ءُ گشتگ کہ وانگ ءِ چشکہ ارزانیں لبزاں گوں بزانت دربرگ ءُ پہمگ اِنت، بلے مئے گورا بازیں ہنداں زالبولانی وانگ ءِ یکے وا رواج بگندے کم انت دومی ھما بنکی وسیلہ ءُ آسراتی ہم دیگ نہ بوگ ءَ انت، مئے مردماں وتی زالبولانی وانگ ءِ سر ءَ انگت ءَ آ کچ ءَ دلگوشی نہ داتگ، بگندے مارا آسراتی نہ رس ایت بلے مارا وتی سر ءَ وت مچانکی دروشم ءَ کار کنگی ایں۔ دیمتری بہر گام کلاس ءِ بوتگ کہ زھگاں گام تاک ءِ یک درونتے ءِ سر ءَ کلاس ءِ اڈ داتگ ءُ پیش کتگ۔ ھمے پیم ءَ دیوان ءَ دیم ءَ بران ءَ دیمتری بہر ٹیبلو بوتگ کہ سنگتاں یک ٹیبلو ءِ پیش کتگ۔
دیوان ءَ برجاہ داران ءَ دیمتری بہر دگہ ترانے بوتگ کہ آئی ءِ سرھال سیاست، نودربر سیاست ءُ بلوچ راجمان ءُ سیاست ءَ بساک ءِ کار ءُ کرد بوتگ۔ ایشی ءِ سر ءَ تران کنوک بنجائی کمیٹی ءِ سنگت نادر بلوچ بوتگ کہ آئی ءَ نودربر سیاست ءُ بساک ءِ سر ءَ نِشتگیں مردم سرپدی دات اَنت۔ ھمے وڑ ءَ گڈی بہر نشہ ءِ سر ءَ یک ڈاکیموینٹری یے بوتگ کہ دیوان ءَ پیشدارگ بوتگ۔ دیوان ءِ گڈی بہر ساز ءُ زیملی بہر بندات کنگ بوتگ کہ دیوان ءِ تہ ءَ گشندہاں گوں وتی توار ءَ دیوان ءَ سوت الہان کتگ۔ اے ائید مراگاہ ءَ بلوچستان کتاب کاروان ءِ نام ءَ یک کتاب میڑہے ہم برجم دارگ بوتگ۔
ائید مراگاہ ءِ دومی دیوان مستونگ ءَ برجم دارگ بوتگ۔ مستونگ ہنکین ءِ نیمگ ءَ ائید مراگاہ ءِ ھوالہ ءَ نمیرانیں پروفیسر غمخوار حیات ءِ زند ءُ ازم ءِ سر ءَ زانشتی دیوانے برجم داشتگ کہ اے دیوان ءَ جتائیں مردماں بہر زرتگ۔
بنجاہی جارکش: بلوچ اسٹوڈنٹس ایکشن کمیٹی
