بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ھب ہنکین ءِہنکینی لس مجلس برجم دارگ بوتگ، کمبر بلوچ ہنکینی کارمستر ءُ شیراز بلوچ ہنکینی کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ھب ہنکین ءِ ہنکینی لس دیوان گوستگیں کُمک کارمستر مزار بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بُنجاہی کُمک کارگُشاد تنویر بلوچ بوتگ۔
دیوان ءِ بُنگپ بُنجاہی سرکیولر، گوستگیں ہنکینی اھوال، نگدکاری، گلکاری، ھندی ءُ میاں استمانی سیاسی جاور ھال ءُ آوکیں گامگیج بوتگ اَنت کہ آھانی سرءَ دلجمیں رنگے ءَ گپ ءُ ھبر کنگ بوتگ۔ کُلیں بُنگپانی سرءَ دلجمیں باوستی ءَ پد آؤکیں گامگیج ءَ گوستگیں کابینہ ھلاس ءُ پہ نوکیں کابینہ ءَ سنگت گچین کنگ بوت اَنت۔
نگدی بُنگپ ءَ سنگتاں تران کنان ءَ گُشتگ، سیاسی ادارہانی تہ ءَ نگد تہنا پارمیلٹی ءَ ناں بلکیں سائنسی رھبندانی بنیات ءَ پہ ہک ءُ دل اداراتی دیمروئی ءُ عملانی گھتری ءَ کنگ بہ بیت۔ نگد ہما سائنسی ءُ تکنیکی کاریچ اِنت کہ ادارہ ءُ نپرانی گروتھ ءُ دیمروئی ءِ مستریں مانزمان زانگ بیت۔ نگد کنگ ءَ پیش مارا آئی اساسیت ہم زانگ لوٹیت پرچاکہ وھدے نگد ردیں رھبند ءُ ڈول ءَ کنگ بہ بیت گُڑا آ دیمروئی ءُ توانائی ءِ بدل ءَ ادارہ ءَ گیش گپچلانی آماچ کنت کہ اے پہ یک سیاسی ادارہے ءَ مرگ ءِ نشانی اِنت۔ وھدے ما جہان ءَ وتی چماں شانک دئیں گُڑا ارچ ہما نپر یا ادارہ کہ نامدار اَنت، آئی نامدار ءُ تاکتور بوگ ءِ مستریں سبب نگد اِنت۔
سنگتاں گیش ھبر کنان ءَ گُشتگ؛ چوشکہ ما ادارہ ءِ بہر اِیں ءُ ادارہ ءِ استانکی ءَ ھوار دیمروئی ءُ پدروئی ہم گوں مارا بندوک اِنت۔ نودربر سیاسی ادارہے ءِ باسکی ءِ بستار ءَ مارا وتی ہمُک کار ءُ عمل نگدی کاریچ ءَ گوازینگی اَنت، پرچاکہ اگاں ما وتی ہمُک عمل نگدی کالب ءَ نہ چکاست گُڑا دیمروئی تہنا وابے بیت ءُ پشت کپیت۔ اے راستی ءِ کہ بیدے علمی، سائنسی ءُ تاکتوریں نگد ءَ ھچ ادارہ، نپر ءُ پروگرام دیمروئی نہ کنت۔ ہمے ھاترا مارا وتی سیاسی گردانک ءِ تہ ءَ نگد ءِ ساچستی عمل سائنسی دروشم ءَ جاہ دیگی اِنت۔ دیمترا سنگتاں گُشتگ، پہ اداراتی دیمروئی ءَ یک چِیزے کہ باز ارزشت داریت آ سیاسی چاگرد (Political Environment) اِنت۔ پرچاکہ باسک ءُ سنگتانی تربیت ءُ گروتھ ءَ سیاسی چاگرد بلاھیں کِردے پیلو کنت۔ ادارہ بیدے تاکتور ءُ مُھکمیں سیاسی چاگرد ءَ دیمروئی کُت نہ کن اَنت۔ ءُ مارا سما بیت کہ مئے ہنکینانی تہ ءَ ہم ما مُھکمیں سیاسی ءُ وانگی چاگرد ءِ جوڈ کنگ ءَ بے سوب بوتگیں۔
گلکاری ءَ سنگتاں گُشتگ؛ نودربر کہ ہمُک راج ءِ باندات ءُ چاگردانی سرین ءِ ھڈ زانگ بنت، راجمانی دیمروئی ءَ مزنیں کِردے ءِ واھند اَنت۔ بلے وھدے ما وتی چاگرد ءَ چاریں گُڑا گندگ ءَ کئیت مئے راج ءِ باندات (ورنا) جُتائیں چاگردی سِلکاریانی نہ تہنا آماچ اَنت بلکیں آھاں زانتی یا نہ زانتی ءَ گیش شنگ ءُ تالان کنگ اَنت۔ اے چاگردی سِلکاریانی تہ ءَ مجگی کرپشن، وانگ ءُ زمہ واریاں چہ تچگ، نشہ، آوارہ گردی ءُ ایندگہ پدمنتگیں روشت ءُ سان ھوار اَنت۔ اے کُل مئے راجمانی استانکی ءَ چو رمیز ءَ وران ءُ ھلاس کنان اَنت۔ سنگتاں گیش تران کُت کہ سرپدیں ءُ سیاسی سنگتی ءِ بستار ءَ وھدے ما چاگرد ءِ تہ ءَ است ایں گُڑا اے ڈبہ مئے کوپگان اِنت کہ ما بلوچ راج ءِ باندات ءُ آؤکیں پدریچاں اے نادراہیانی بابت ءَ نہ تہنا سرپد بہ کنیں بلکیں آھاں سرجم ءَ چہ ھُنڈالاں ولگوج بہ کنیں۔
چوشکہ پدمنتگیں ءُ گُپتمانانی آماچیں چاگرداں بازیں جنجال ءُ جیڑہ وجود دار اَنت، آ توری جسدی بہ بنت یاکہ ھیالی۔ ہمے داب ءَ وھدے ما بلوچستان ءُ ھاس ھب ءِ نیم ءَ وتی ھیالاں گور کنیں گُڑا ادا ہم جاور ہمے داب ءَ اَنت کہ آ چہ ما مزنیں دلگوشی ءِ لوٹ ءَ کن اَنت۔ اے میان ءَ سما بیت کہ بلوچ ورنا گوں بازیں پندلاں چہ ازگاریں الم ءُ زانشت ءَ پہ زانت دور دارگ بوگ ءَ اَنت کہ آئی سوب ءَ ماں بلوچ راجمان ءَ وانگی کچ ءِ تہ ءَ مزنیں پدروئی ءِ گندگ ءَ پیداک اِنت۔ ما کہ اے چِزاں سما کنگیں گُڑا اے مئے راجی ءُ اخلاقی زمہ واری اِنت کہ ما ایشانی دیم ءِ دارگ ءُ بلوچ ورنا ءُ نودربراں گیشی وانگ ءِ ھاترا سکین دیان ءَ آھانی رھشونی ءَ بہ کنیں۔ اشاں ابید بلوچ راجمان ءِ تہ ءَ دری مردمانی آیگ ءَ بلوچ ءِ زُبان، دود، ربیدگ ءُ گوستانک سانمند بوگ ءَ اَنت کہ ایشی ءِ اسیلیں درور مئے گور ءَ ھب اِنت۔ مارا لوٹیت کہ پہ اشانی دیم ءِ دارگ ءُ چاگردی استانکی ءِ پہریزگ ءَ وتی راج ءِ ہمُک ورنا ءَ چہ الم ءُ زانت ءِ جُہلیں زِر ءَ آشنا بہ کنیں دانکیں مئے راجمانی استانکی بہ رَک ایت۔
دیوان ءِ کُلیں بُنگپانی سرءَ گپ ءُ باوست ءَ پد آوکیں گامگیج ءَ گوستگیں کابینہ ھلاس کنگ ءُ پہ نوکیں کابینہ ءَ کمبر بلوچ کارمستر، حک نواز بلوچ کُمک کارمستر، شیراز بلوچ کارگُشاد، مزار بلوچ کُمک کارگُشاد ءُ ھانی بلوچ ھالرسانی کارگُشاد گچین کنگ بوتگ اَنت۔ بُنجاہی سنگت ءَ نوک گچین بیتگیں سنگتاں سوگند دات ءُ دیوان آسر کنگ بوتگ۔
بنجاہی جارکش: بلوچ اسٹوڈنٹس ایکشن کمیٹی
