سارتیں شپاں کسھانی رَمے ءُ بی ایم سی اِنت۔
نبشتہ کار : وھاب بلوچ
اولی بھر
چوناھا اگاں گَپ بلوچستان ءِ وانگی اداراھانی سرا کئیت گڈا استان ءَ مدام چہ بلوچ نودربراں ءُ چہ بلوچستان ءِ وانگی اداراھاں تُرس بوتگ ۔ توری آ بلوچ ءِ اسکول بوتگ اَنت ، شاھدربرجاہ یا مزن شاھدربرجاہ ، ایشاں چہ اِستان ءَ مدامی تُرس بوتگ ءُ اے تُرس ءِ آسر ءَ کہ بلوچستان ءِ وانگی ادارہاں گوں چی کنگ بیتگ ءُ بیگ ءَ اِنت اے درستانی دیم ءَ پدر ااِنت ۔ یک ریپورٹ ئے ء، رد ءَ بلوچستان ءِتہنا دو دمگانی تہ ءَ 76 اسکول بند کنگ بوتگ اَنت ءُ پدا ھمے جاہ ءَ پاکستانی آرمی ءَ وتی بنجل جوڈ کتگ اَنت ۔ 13 اسکول مشکے ءَ ، ءُ 63 اسکول آواران ءَ بند کنگ ءُاود ءَ استانی لشکر نشتگ ءُ اے جاھاں کسانیں چُکّانی زندچو سنگ ءِ زمانگ ءَ گوزگ ءَ اِنت۔ چوناہ ءَ اے استان ءِ لوٹ ھمیش اِنت کہ بلوچ ئیں نودربر ھچ مہ وان ایت ءُ اگاں بہ وان اِیت ھم گڑا ایمنی مہ وان ایت ءُآہی ءِ جی جی کنوک بہ بیت۔
ایشیءَ ابید کالجانی ھاسٹلانی بند کنگ اے استان ءِ مدامی ایں روزگارے جوڈ بوتگ ، پیسرا عطا شاد کالج ءِ ھاسٹل لھتیں بھانایانی پُشت ءَ چاپہ جنگ ءُ بند کنگ بوت ءُ انوں پدا چندے بے بُنیں بھانایانی وسیلہ ءَ سرجمیں وانگی اداراھانی ھاسٹلاں بند کنگ ءَ اِنت ۔اے گَپ مئے کِرّا چو روچ ءَ پَدّر اِنت کہ ھاسٹل نودربرانی دومی لوگ اَنت ۔ ایشانی بند بوگ پہ بلوچ ءَ چنچو نُکس ءُ تاوان ءُ پہ اِستان ءَ پائدگ اِنت ۔
ھمے وڈا مئے چمّانی دیم ءَ بی ایم سی ءِ تہ ءَکسانیں جیڈھے چست کنگ بوت ءُ ھمے جیڈھے بنیاد ءَ کالج ءَ چہ نودربر لَٹ دیگ بوت اَنت ءُ ھاسٹل بنت کنگ بوت اَنت۔بلے گھگیری بلوچ ءِھوناں ھوار اِنت ،ھمے عمل ءِ بگیری ءَ روچ ءِمرچی داں نودربرانی نندانک شال ءِ اے ھون بادینوکیں سارتی ءَ بی ایم سی کالج ءِ تہ ءَ برجاہ اِنت ۔
بی ایم سی نہ تھنا پہ ڈاکٹراں یک کمکے بوتگ بلکیں دراھیں شال ءِ نودربرانی واستہ یک بلاھیں کُمّکے بوتگ۔ بولان میڈیکل کالج بلوچ سیاست ءِ بنجاھاں چہ زانگ بیت ۔ اے ھمے جاھ اِنت کہ چدا چہ بلوچ ءِ بازیں راھشون در اتکگ اَنت ءُ مرچی بلوچ راج ءِراھشونی ءَکنگ ءَ اَنت ۔
ما بی ایم سی ءَ درگاہ گُش ایں ، چوناھا مئے کِرّءَ درگاہ ھما جاھاں گُشگ بیت کہ ھما جاھ پیگمبرانی نندگ ءُپادایگ ءِجاھ بہ بیت ۔بی ایم سی بلوچ ءِ سیاسی پیگمبرانی نندگ ءُ پادایگ ءِ جاھ بوتگ ءُ ہست اِنت۔
بیا بی ایم سی ءِ بند بوگ ءِ کسّھےکارایں ۔۔
11روچ نومبر 2024 اَت ، روچ نوکی جھل روگ ءَ اَت ۔۔۔ ما مدامی ئیں ھساب ءَ ناکو سبزل ءِ میس ءَ نشتگ اَت ایں ءُ اھمد ءِ گرمیں چاہ ءَ ورگ ءَاَت ایں ۔۔۔ھنچو ھال بوت کہ بی ایم سی کمپلیکس ءَ بلوچ ءُ پٹھانانی میان ءَ کسانیں جیڈھے بوتگ، شما بیا اِت ھمود ءَ ۔۔۔مارا سنگتے ءَ فون کتگ اَت ءُ ہال داتگ اَت۔ ماانچو چاہ ءِگُٹے گَپتگ اَت کہ پاد اتک ءُرھادگ بوت ایں ، کالج ءِ مین گیٹ بند اَنت ما پُشت ءِ راہ ءَ چہ دیم پہ کالج ءَ روگ ءَلَگت ایں ۔۔۔ انچو کہ ما جھلگ ءَ ایر اتک ایں ، سنگتانی جکّگ ءُ کوکار بندات بوت اَنت ، چمّاں سُچَگ ئے زُرت ، ارس ءُ لمپ دارگ ءِھَدّا چہ گوْستگ اَت اَنت ۔ پولیس ءَ سرجمیں جھلگ ءَ ارس کَشّیں گیس جتگ اَت ، دراھیں سنگت جَکّاں ،تچاں ءُ تُساں ماں کالج ءِ پُشتی نیمگ ءَ سر بوت اَنت ، داں کوکار اِنت ،ما جیڈگ ءَ اَت ایں کہ پولیس گیس چیا جنگ ءَ اِنت ؟
جیڈہ وَ کسان بوتگ ،سنگت سرجمیں جیڈہ ءِ گیش ءُ گیوار کنگ ءَ اتکگ اَ نت بلے پولیس ءَ سرجمیں کالج ءِ توک گیس جتگ ، ساھتےءَ پد ما کالج ءِ گراؤنڈ ءَ سر بوت ایں داں گراؤنڈ ءِ چاریں نیمگ ءَگیس اِنت، سنگت گیس ءَ بیوار کتگ اَت اَنت ، چاریں نیمگءَ جَکُّوکائی اَت ، نو روچ سک جھل شتگ اَت ، تھاری آستو آستو ماں شال ءُ کالج ءَ سیاہ کنگ ءَ اَت ۔۔۔ پولیس گوں بازیں گاڈی ءُ لَٹّاں جریدگ اَت ، ھنچو کوکار بوت کہ سنگتاں پولیس جنگ ءَ اِنت ءُ برگ ءَ اِنت ، پولیس نہ سَر چارگ ءَ اَت نہ کہ دپ ءُ دیم بس لَٹ جنگ ءَ اَت ،لَٹ ھم لَٹ نہ اَت اَنت ،لھتین ءَ بیٹ گوں ءُ لھتین ءَ بلاھں زنڈیں دار ،بس جنگ ءَ اَت اَنت ، دراہیں سنگتاناں گاڈی ءِ تہ ءَ بند کنگ بوت، سنگتاں گُشت بیا اِت مین گیٹ ءَ بند کنیں دانکہ سنگتاں ڈَنّ ءَ بُرت مہ کنت ۔
ساھتے پد ما مین گیٹ ءَ نشتگ اَت ایں ، ساھت ساھت ءِ سرا یک یک سنگتے چہ کالج ءِ گیٹ درآھگ ءَ اَت ءُ لھتین ئے ءِ پاد ٹپّی اَت ھون رچگ ءَ اَت لھتین ئے سر ءَ چہ ھون رچگ ءَ اَت ، دُرستیں سنگت ھون ءَ ھونریچ اَت اَنت۔ اے ساھت ءَ کَسّ ءَ اوں لَگگ ءَ نہ اَت کہ اِےسنگت کالجءِ تہ ءَ چہ پیداک اَنت ،انچو سما بیگ ءَ اَت کہ اے دراہ چہ جنگجاہ ئے ءَ پیداک اَنت ، ما دراہ ھمے امیت ءَ نشتگ اَت ایں کہ سنگتاں کَش ایت گڈاں ما پاد کائیں بلے اِستان بے رھم اِنت ءُ چو گُژنگیں رسترءِ وڈا اِنت ، کَس نہ گند ایت نا مردیں نہ زالبول ءُ نہ کسانیں چُک ۔۔
یک رندے پدا گیس جنگ بندات بوت ، پدا جَکّوکائی ، ارسانی بے ھد بوگ ، تچگ ،کوکار،یکبرے پدا لَٹ جنگ ءُ برگ پولیس ءَ بندات کُتءُ اے بری کَس نہ چارِت ئے سنگتاں داں کلو میٹرے راہ ءَ تاچینتے ءُ پدا پُشت ءَ گیس جنان کُت، اے دراہ کالجءِ دیم ءَ تالان اَت اَنت انچو گندگ بوگ ءَ اَت کہ پورا شوانگے وتی پَسّاں لَٹ دیان ءَ دیم پہ لوگانی نیمگ ءَ برگ ءَ اَت ۔۔۔
بولان میڈیکل کالج شاھد اِنت کہ ھمے کالج ءِ دیمءَ بلوچ زالبول دور دیگ بوت اَنت،آ شال ءِ ھون بدینوکیں سارتی ءَ دگانی سر ءَ کشان ءُ گرِان کنگ بیت اَنت ءُ گونڈوانی سر ءِ گُشان دور کنگ بوت اَنت ءُ آکم شِرپ کنگ بت اَنت ، آہانی سر ءَ تشدد کنگ بیت ءُ کُکار ءُ چیھانٹانی توار پورا ارش ءَ کُدینگ ءَ اَت ۔ ہمد ءَ گونڈوئیں جنکوئے اوشتاتگ اَت ءُ وتی بیل ءُ ہمبلانی واستہ گھگیری کنگ ءَ اَت، پولیس آفیسر ہمے جنکو ءَ چم سُر دیگ ءَ اَت ءُ کُکار کنگ ءَ اَت کہ راہ ءَ پچ کن ، بلے بلوچ ایں جنکو چو کوہ ءِ البُرز ءَ مِک اوشتاتگ اَت ءُ بدواہ ءِ چماں چم پیش دارگ ءَ اَت ، آئی ءِسُھر سُھریں چم گوشے گشگ ءَ اِنت کہ اے مئے زمین اِنت ءُ اے زمین ءِ اوبادگ اَنت کہ تو برگ ءَ ئے، اشانی ہاتر ءَ من وتیی گُڈٰ زور ءَ گوں تئی دیم ءَ اوشتاں۔ انگت یک آفیسر ئے ءَ ہمے جنکو ءِ سرءَ لٹے جت ءُ مزنیں تیلانکے داتےکہ گونڈو دگ ءَ چہ دیر کُنڈے ءَ کپت ۔اے دراہ کالج ءِ دیم ءَ بوگ ءَ اَت اَنت ۔کمے سہت ءَ پدد سما کُت داں شالءِ کشکانی چاریں نیمگءَ بس گیس اَت اَنت کہ بال اَت اَنت۔۔
لہتے روچ ءَ پد وانگی ادارھانی تہ ءَ لشکر ءِ آرگ ءُ نودربراں لَٹ کُٹ کنگ ءِ بگیری ءَ یک نندانکی کیمپے ءِ جار جنگ بوت ءُ 27 نومبر نندانکی کیمپ ءِ اولی روچ اَت ۔۔۔بیگاہ اَت ءُ سنگت نوکی کیمپ ءِ ترتیب ءَ گیشینگ ءَ اَت اَنت ءُ سنگت یجاہ بیان اِت اَنت۔
اے اولی شَپ اَت بلے سک سارت اَت ، سارتی پورا جان ءَ دِرّگ ءَ اَت ۔۔۔ بی ایم سی ءِ تہ ءَ سنگت نشتگ اَت اَنت ، اولی شَپ اَت پدا سک سارت اَت ، آسے روک کنگی اَت پمشکہ سنگت تَچ ءُ تاگ ءَ اَتاں کہ کجا ھُشکیں دارے بہ رَس ایت کہ ماوتا کمّو آس ءَ گرم بہ کنیں۔۔ بازیں تَچ ءُ تاگ ءَ پد لھتُکیں دار سنگتاں یکجاہ کُت ءُ پِر کُت۔۔ ایشیءَ پد آسءِ دیمءَ سیاسی ڈسکشن اَت کہ جنزان اَت،برے یک سرھالے آسے چاریں نیماں شنگ اَنت ۔ برے بلوچ ءِ راھشونانی ءُ بامردانی سر ءَ ڈبیٹ اَت ،برے بلوچ جنز ءِ سرءَ سنگت تران ءَ اَت اَنت ءُ برے بلوچستان ءِ ہما نہ گشتگیں کسہانی کسہاں آرگ ءَ اِت اَنت کہ مئے چمانی دیم ءَ گوستگ ءُ ما شموشتگ اَنت۔ برے نوکیں کسہ ءُ سرہالے اَت کہ شپ ءِ سارتیں دیوانانی برا ہ اَت ۔۔برے چیکوف ءِ آزمانکانی کسہ اَت ءُ برے نثار احمد ءُ ھنیپ شریپ ءِ آزمانکانی سر ءَ گپ ءُ تران اَت، برے گندے دو سنگت یک سرہالےءِ سر ء اڈیتگ انت ءُ دومی سنگتے ءِِ بچکندگ ءَ اِنت۔ شپ اَت ءُ نندانک اَت ، ھنچو شَپ گوازینگی اَت ۔۔ داں کہ روچ ءَ ٹِک دات ، نوں سارتی گیش تورینگ ءَ اَت ۔۔ دار ھلاس اَت اَنت، سَرتکگیں اشکر نو ںکمّ کمّ ءَ مرگ ءَ اَت اَنت ، گیشیں سارتی ءَ مئے گَپ درایگ ءَ نہ اَت اَنت ۔۔ روچ ءِ برانز لَگگ ءَ پد منی ساہ ءَ را ساھے مان بوت ۔۔۔
اے ننداکی کیمپ ءِ اولی شَپ اَت باریں چوں ءُ چے پیم سارتی ءَ گوں ڈسکشناں چہ گوْست ۔۔
بلے اے اولی شَپ اَت ،کس زانگ ءَ نہ اَت کہ چُشیں باریں دگہ چنچو شپ سگّگی اِنت ۔۔۔ دوھمی روچ ءَ ننداک ھنچو برجاہ اَت ، روچ وَش اَت ،ھر وھد ءَ سنگتانی تران اَت۔ برے یک سرھالے ءِ سرا تران بوگ ءَ اَت ۔یک نیمگے سنگت کتاب وانگ اَت اَنت، دراھیں سنگت گوں یک یک کتابے ءَ دلگوش اَت اَنت، روچ ءَ بلوچی ءُ براہوئی کلاس برجاہ اِت اَنت ۔دومی شَپ پیداک اَت روزرد اَت ، سارتی ءَ شپ بوگ ءَ پیسر مارا ھال دات کہ من شَپ ءَ کایاں پہ شمے امبازگ ءَ ، شَپ بوت دار یکجاھ کنگ بندات بوت ، بی ایم سی ءِ ایڈمین ءِ چاریں نیمگ ءَ آس روک اَت ۔۔
اے شَپ چہ پیسری گیں شَپ ءَ گیش سارت نہ اَت ءُ دومی شَپ ڈسکشن ءُ تراناں گوْازینت ۔ اے شَپ سک زوت ھلاس بوت ۔۔۔
مرچی ننداکی کیمپ ءِ بیست ءُ سیمی روچ اِنت کہ برجاہ اِنت ءُ اے نبشتانک ھم برجاہ اِنت ، دیم ءِ کسہاں پدا کاراں۔۔۔
بلوچ اسٹوڈنٹس ایکشن کمیٹی
