بلوچستان کتاب کاروان: زانتءُ زانشت ءِ چیدگ
نبشتہ کار: سنجاب بلوچ
کتاب ءُ بنی آدم ءِ میان ءَ سیادی سک باز کُوھن اِنت ۔ کتاب بنی آدم ءَ را زند گوْازینگ ءِ راستیں راہ ءُراھبند پیشدار اِیت ۔ کتاب وانگ ءَ چہ بنی آدم ءِ ھیال پراہ ءُ شاھیگان بنتءُ آئی ءِ پگر اں بانزل پِر بیت ۔ مروچی اے کتاب ءِ برورد اِنت کہ بنی آدم چہ جَھلیں زمین ءَدُور آزمان ءِ شاھیگانی ءَ بال اِنت ۔ بنی آدم ھُدا ءِ ایندگہ مھلوک ءَ چہ پمیشکا شرتر ءُ مستر زانگ بیت کہ ھُدا ءَ بنی آدم ءَ را اَگل ءُ ھوش داتگ ۔ پمیشکہ بنی آدم یَکیں جاہ ءَ نہ اُوشتاتگ بلکیں ھرچ دور ءُ باریگ ءَ آئی ءَ وتی زند ءِ زرورتانی بُنیاد ءَ روچ پہ روچ نوکیں راہ ءُ در شوھازتگ ءُ نوکتریں چِیزءُ ہیال دیم ءَ آؤرتگ۔ ھمے پیم مروچی بنیادم سِنگ ءُ ڈوک ءِ زمانگ ءَ دَراتکگ ءُ زانت ءُزانشت ءِ زمانگ ءَ سپر کنان ءَ دیم ءَ جنزان اِنت ۔وھدیکہ اِنسان ءَ وانگ ءُ زانگ ءِ وڈیں جُھلگیں پڑے ءَ وتی گام اِیر کُتگ اَنت داں اے تک ءَ اِنسان ءَ باز دیمروئی کُتگ ۔ مروچی اے ہمے کتاباں چہ زانت ءُ زانشت ءِ دربرگ ءِ برورد اِنت کہ بنی آدم ءَ وتی گام ماہ ءِ سرا اِیر کتگ ءُ دست جہان ءِ آدگہ زمین ءُ سیارہاں سک اَنت۔
کتاب نوکیں دنیا ءَ گوں ھمگام بوگ ءِ مستریں وسیلہ اَنت ۔ کتاب ءِ وانگ ءَ چہ تو یک شریں ساچشتکارے جوڈ بئے ، شریں نودربر جوڈ بیگ ءَ ہوار یک شریں رھدربرے جوڈ بئے ۔ وھدے تو یک شریں رھشون ءُ رھدربرے جوڈ بئے تو وتی راج ءُ چاگرد ءِ تھاریں زند ءَ یک رُژنائیں زندے ءِ توک ءَ مٹ کُت کنے ءُ راج ءُ چاگرد ءَ دیمروئی دات کنے ۔ کتاب ءِ وانگ ءَ چہ بنی آدم وتی زند ءُ چاگردءِ ھرچ وڈیں اَڈ ءُ جنجالاں ارزانی ءَ گیش ءُ گیوار کُت کنت چیاکہ کتاب ترا دنیا ءِ تہ ءَ نوکیں راہ ءُ دَر پیشدار اِیت ۔ پمیشکہ یک بنی آدمے ءِ واستہ کتاب وانگ باز الّمی اِنت ۔
نوں ما بلوچستان ءِ تہ ءَ کتاب وانگ ءِ ارزشت ءِ سرا گپ کنیں کہ بلوچ راج ءِ واستہ کتاب وانگ پرچا الّمی اِنت ءُ بلوچ ءَ را چونیں کتاب وانگ لوٹیت ۔انچوشکہ بلوچستان یک ایردستیں زمینے ءُ جتائیں زوراکیانی آماچ اِنت ۔ یک اِیر دستیں راجے وتی زمین ءَ ھما وھد ءَ رکّینت کنت کہ آراج چہ علم ءُ زانت ءَ چہ سریچ بہ بیت ۔ اے یک مَن اِتگیں گپّے کہ علم ءُ زانت ءَ سرّیچیں راج بیھ دژمن ءِ دست ءَ تاوان بار نہ بنت ، دژمن ءِ رپک ءُ ھنر اں چہ مُدام با سما بنت ءُ دژ من ءِ ساز تگیں پندل آ راجانی زمین ءِ سرا ھچبر سوبین نہ بنت ۔ ءُ اے علم ءُ زانت بنی آدم ءَ را چہ کتاباں دست کپنت۔ پمیشکہ بلوچ راج ءِ واستہ الّمی اِنت کہ کتاب بہ وانیت ءُ وتی چاگرد ءِ تہ ءَ کتاب وانگ ءِ دود ءَ زندگ بہ داریت ۔ شریں کتاب ترا شریں راہ پیشدار اَنت ، ءُ وھدے تو ھمے راھاں سپر کنے گڑاں الّم شرّیں منزلے ءَ سر بئے ۔
دنیا ءِ راجدپتر ءَ چُشیں بازیں ایر دستیں راجانی درور رس اَنت کہ آہاں گلامی ءِ سانکل پروش داتگ اَنت ءُ وتی آجوئیءِ گِرگ ءَ سوبین بوتگ اَنت ۔ مروچی آ راج دیمروئی کُتگیں راجانی لڑ ءَ ھوار اَنت ءُ نوکیں دنیا ءَ گوں ھمگام اَنت ۔ اِیشانی تہ ءَ مستریں درورکیوبا، چین ، ویتنام ءُ افریقہ بازیں راجاں ہوار اِیندگہ راج ہوار اَنت ۔ اے راجانی سوبین بوگ ءِ مستریں سوْب ھمیش اِنت کہ اے راجاں چہ علم ءُ زانت ءَ سپر کتگ ءُ وتی جہد ءَ سوبین بیگ ءَ پد مرچی ہما راج کہ سوبین اَنت آ چہ زانت ءُ زانشت ءَ سریچ بوتگ اَنت ۔ ھمے علم ءُ زانت ءِ برورد ءَ اے راجانی تہ ءَ شرّیں رھشون ودی بوتگ ۔ ایشاں وتی علم ءُ زانت عملی دروشم ءَ کارمرز کُتگ اَنت ءُ ایر دستی ءَ چہ رکّگ ءِ توجیل ساز اِتگ ۔
مروچی اگاں بلوچ راج وتی چاگرد ءِ تہ ءَ کتاب وانگ ءِ دود ءَ برجاه بہ دار ایت ءُ اوشتءِ آماچ مہ کنت گڑا الّم ءَ بلوچ راج دیمروئی ءِ نیمگ ءَ شُت کنت ءُ بلوچ راج ءِ تہ ءَ شرءَ چہ شرتریں راجی رھشون ءُ جُھدکار پیداگ بنت کہ وتی راج ءَ منزلے ءِ سر کُت کن اَنت ۔انچوشکہ بلوچستان اِستانی ایردستی ءِ آماچ اِنت ، اِستان ءَ بلوچ زمین ءِ ایر دست کنگ ءَ وڑ وڑیں پندل ساز اِتگ ءُ ھمیشانی تہ ءَ یکّے بنکنگ ایجوکیشن سسٹم اِنت کہ اے وانگی نظام بلوچ ءَ را ھچ پائدگ دیگ ءَ نہ اِنت ۔ بنکنگ وانگی رھبند ءِ وسیلہ ءَ اِستان بلوچ نودربراں چہ آھانی اسل راجی ءُ چاگردی جیڑھاں دور دارگ لوٹیت پمیشکہ آئی ءَ یک انچیں وانگی نظامے آورتگ کہ آ ہی ءَ گوں بلوچ ءَ ھچ سیادی نیست، بلکیں اِیشی ءِ سرجمیں پائدگ تھنا پہ زوراور ءَ اَنت ۔ پمیشکہ بلوچ نودربراں وتی راجی ءُ چاگردی جیڑھانی نیمگ ءَ دلگوش دیگ لوٹیت ، وتی پجار رکینگ لوٹیت ، ءُ ھما کتاب ءُ لٹریچر وانگ لوٹنت کہ بلوچ راج ءَ را نپے دات کت بہ کن اَنت ۔
دربرجاھانی کورس ءِ کتاباں ابید دگہ بازیں کتاب اَست اَنت بزاں کہ مارکیٹ ءَ ھرچ رنگیں کتاب دست کپی ۔ چُشکہ آزمانکی ،شئیری ، راجدپتری ، نیکراھی ، آشوبی، راجدوستی،قدبی، فلاسفی، سائنسی ءُ کاروباری ءِ سرا نبشتہ بوتگیں کتاباں ، نوں بلوچ راج ءَ وتی کتاب وت پجّاہ آرگی اَنت ءُ ھما کتاب وانگی اَنت ۔
اے درگت ءَ بلوچ اِسٹوڈنٹس ایکشن کمیٹی ” بلوچستان کتاب کاروان “ ءِ نام ءَ ھمک سال ءِ بندات ءَ بلوچستان ءِ جُتا جُتائیں ھند ءُ دمگاں کتاب میڑہ برجم داریت ۔ ھمے پیم نوکیں سال 2025ءَھم بلوچستان گوں کتاب میڑھاں وش آتک کنگ بیتگ ۔ ” بلوچستان کتاب کاروان “ گَل ءِ کار ءُ پروگرامانی یک بھرے ، ایشی ءِ مکسد ھمُک سال پہ بلوچ وانندگ ءُ نودربراں نوک نوکیں گچینی اِیں کتاب ءُ لٹریچر دیم ءَ آرگ اِنت کہ اے پہ راج ءُ نودربراں باز سیت مند انت ۔ ھما بلوچ نودربر کہ وانگجاھانی تہ ءَ اِستان ءِ جوڈ کُتگیں نصاب ءَ رٹّا جنگ ءُ وانگ ءَ اَنت کہ اے نصابی کتاباں چہ نودربر اں راستیں پجار ، راجی ءُ چاگردی جیڑہ ءُ جنجالاں چہ بے سما کنگ بوگ ءَ اَنت ۔ اے پہ بلوچ راج ءَ باز تاوان اِنت ۔ اے کتاب میڑھانی سرءَ بلوچ نودربر ءُ ایدگہ ورناھاں اَنچیں کتاب دست کَپنت کہ آ ھکیگیں زانت ءُ زانشت ءَ پدیانک ءَ چہ انسان ءَ گوازین اَنت ءُ باسائیں انسان ودی کن اَنت ۔
مروچی ما اے گَپ ءَ پہ پھر گُشت کنیں کہ بلوچستان کتاب کاروان ءِ نام ءَ کہ کتاب میڑہ برجم دارگ بیتگ اَنت اِیشاں چہ پد ما گِندگ ءَ اِیں کہ بلوچ ورنا ءُ نودربرانی تہ ءَ شرّیں وانگی چاگردے جوڑ بوگ ءَ اِنت ءُورنا گیش کتاب وانگ ءِ نیمگ ءَ دلگوش گوْر کنگ ءَ اَنت ۔
بلوچستان کتاب کاروان ءِ مستریں شرّی ایش اِنت کہ بلوچستان کتاب کاروان ءِ کتاب میڑہانی سرا ھما کتاب ءُ لٹریچر دست کپ اَنت کہ آھانی سرجمیں سِیت ءُ نپ پہ بلوچ راج ءِ واستہ اِنت ۔ نوں اے کتابانی وانگ پہ بلوچ راج ءِ نودربر ءُ ورناھاں باز پائدگ اِنت کہ اِیشاں چہ نودربر زوراور ءِ دروگیں لٹریچر ءُ کتاباں چہ رکّ اِت کن اَنت ءُ وتی راجی ءُ چاگردی اڈ ءُ جنجالانی بنیات ءَ کتاب وانان ءَ راج ءُ چاگرد ءَ چہ باسماء بہ بنت ، اے پہ بلوچ راج ءَ نیکیں پالے ۔
