بلوچ نودربر سیاست ءُ ہستیں دور
نبشتہ کار: مھمد بلوچ (بُنجاھی کُمک کارگُشاد بساک)
نودربر سیاست ھُمک نودربر ءِ بُنکی ھک اِنت۔ سرجمیں دنیا ءَ نودربراں اے ھک ھست اِنت کہ آ نودبر سیاست بہ کن اَنت ءُ ھُمک سرکار ءُ ھکومت نودربراں اے ھک ءَ کانودی بستار دنت۔ بلوچ نودربراں چہ اے بُنکی ھک مُدام پچگرگ بوتگ ءُ پچگرگ بوگ ءَ اِنت۔ چوناھا بلوچ راج ھمک انسانی بنیادی ھکاں چہ زبہر اِنت بلے بلوچ ھِجبر دنیا ءِ چماں پاد نئیت۔
اے کسانیں نبشتانک ءِ تہ ءَ ما جہد کن ایں کہ نودربر سیاست ءُ بلوچ نودربر سیاست ءَ بہ گیشین ایں۔ نودربر سیاست، آئی ءِ ارزشت ءُ دنیا ءَ آ چون بوتگ ءُ بوگ ءَ اِنت؟ ھاس ھما ایردست ءُ لگتمالیں راجانی میان ءَ نودربر سیاست ءِ بستار چی بوتگ ءُ ھست اِنت؟ راجی جوڑشت ءِ میان ءَ آ چنچوکیں کِردے پیلو کُرت کنت؟ اشاں ھوار بلوچستان ءَ بلوچ نودربر سیاست ءِ سر ءَ چمشانک دیگ ءِ جہد کنیں کہ ھستیں وھد ءَ سرکار بلوچ نودربر سیاست ءَ بندش جنگ ءِ کانودی ءُ انتظامی ترز ءَ ھوار جتائیں دروشم ءَ ولگوج کنگ ءُ ھلاس کنگ ءِ جہد ءَ اِنت۔
سیاست، نودربرسیاست ءُ آئی ءِ ارزشت
ھُمک انسان ءِ سر ءَ لازم اِنت کہ آ سیاست ءِ بھر بہ بیت، وتی سیاسی چست ءُ ایراں سرپد بہ بیت ءُ سیاست ءِ سر ءَ بنیادی ءُ مُہکمیں گرفت ءُ سرپدی یے بہ داریت، چیاکہ ھما راج وت سیاست نہ کنت ءُ وتی چاگردی ءُ سیاسی چست ءُ ایراں سرپد نہ بیت گڑا ھما راج ءِ سر ءَ دومی راج ءُ تاکت سیاست کن اَنت، آھانی سیاسی ءُ چاگردی جیڑھاں گیشین اَنت ءُ ھما غیر سیاسی راجاں ایردست کن اَنت ءُ وتی نپ ءُ سیتانی ھاتر ءَ دومی راج ءِ سیاسی، معاشی، دود ءُ ربیدگی ءُ آدگہ راجی مڈیاں پچگر اَنت ءُ پہ وت کارمرز اَنت۔
سیاست وتی شر ءُ ھراب ءِ گچین کنگ ءُ وتی راست ءُ رد ءَ وت ٹہینگ ءِ نام اِنت۔ بلے مئے گور ءَ سیاست ءِ سر ءَ سرکار ءَ انچیں گپتمان جوڑ کُتگ دانکہ مہلوک چہ سیاست ءَ بُگز بہ داریت ءُ دور بہ بیت۔
چہ سرکار ءِ گپتماناں ابید سیاست ءِ ارزشت ءَ باز وھد ءَ مردم انچوش سرپد بنت کہ سیاسیات ءِ وانگ، سرکل کنگ، روانک کشگ، اگدہانی سر ءَ بوگ، تچ ءُ تاگ کنگ بگندئے سیاست ءِ ارزشت اِنت۔ بلے سیاست ءِ ارزشت اے مانا ءَ چہ گیش بستار ءُ مکامے ءِ واھند اِنت۔ سیاست سرجمیں راجمانءِ زند ءِ وانگ، رد ءُ بند دیگ، جیڑہانی گیش ءُ گیوار کنگ بزانکہ راجمان ءَ پہ جتائیں پڑانی بودناکیانی در آرگ اے کلیں کار ءُ کرد سیاست ءِ ارزشت ءَ پدر کن اَنت۔
نودربر سیاست نودربرانی ھما بنیادی سیاسی تربیت ءَ کنت کہ آ ھُمک پڑ ءِ نودربر ءِ ھاتر ءَ اژدری اِنت، آ سیاسی پڑ ءِ نودربر بیت، معاشی، لبزانکی، ٹیکنالوجی ءِ یا آدگہ ڈیپارٹمنٹ ءِ نودربرے۔ نودربر سیاست نہ ایوک ءَ نودربرانی بنیادی سیاسی تربیت ءَ کنت بگندئے ھُمک نودربر ءِ بودناکیانی تراشگ ءُ ودینگ ءِ کار ءَ کنت ءُ ھمک نودربر ءَ یک مھکم ، کامل ءُ آجوئیں انسانے جوڑ کنگ ءَ پہ کُمک کنت۔ چہ اشاں ابید نودربر ءِ فیصلہ سازی ءِ بودشت، وانگجاہ ءُ وانگی جیڑہانی گیشوار کنگ ءَ ھوار چاگردی کسان مزنیں جیڑھانی گیش ءُ گیوار کنگ ءِ موہ ءَ دنت ءُ ھمے ھاسیت ءَ ھم ودین ایت۔ نودربر سیاست نودربراں چاگردی گہتری ءُ دیمروی ءِ ھاتر ءَ پہ مادنیں ءُ گہتریں راھانی گچین کنگ ءَ کُمک کنت ءُ ھمے درگت ءَ آھانی بودناکیاں ودین ایت۔
ایردستی ءُ نودربر سیاست
نودربر سیاست دنیا ءِ ھمک ڈیھ ءَ یک اژدری ئیں سبجیکٹ یے کہ نودربرانی دربرگ ءِ پشدر ءَ آھاں گیش کُمک کنت۔ بلے پہ ایردستیں راجاں نودربر سیاست دو ھمنچو اژدری اِنت۔ ایردست ءِ ھاتر ءَ جیڑہ سک باز بنت ءُ آھانی سرجمیں جیڑہ سیاسی اَنت، آوانی ایردستی ءِ مستریں سوباں چہ یکے آھانی غیر سیاسی بوگ اِنت ءُ چہ سیاست ءَ دور دارگ بوگ اِنت۔ ایردستیں راجانی گور ءَ پہ نودربراں یکے وَ وانگجاہ گچینی اَنت ءُ ھسابی اَنت۔ دومی، ھمے کہ وانگجاہ جوڑ اَنت آھانی تہ ءَ وانگی رھبند ءُ نساب انچوش کرپٹ اِنت کہ بہ گُپت ءِ استاد سباء دشتیاری ءِ “ورناھاں زہنی ھساب ءَ نامرد جوڑ کنت۔” ایردستیں راجانی تہ ءَ نودربر سک باز جیڑہانی دیمپان بنت ءُ بازیں چاگردی جیڑہ ءُ جنجال ھم ھست بنت کہ ھمے سوب ءَ نودربر سیاسی گلانی سر ءَ گیشیں زمہ واری کاینت کہ آھانی تہ ءَ زنڈیں جیڑھاں چہ وانگجاہانی غیر فعالی، وانگی نظام ءُ نساب ءِ کرپٹ بوگ، راستیں لبزانک ءُ لٹریچر نہ بوگ ءَ ھوار نودربراں چہ ایردست ءِ نیمگ ءَ زہنی ءُ جسمانی تشدد ءُ ترس ءُ بیم ءَ ھوار آدگہ بازیں سیاسی ءُ چاگردی جیڑھانی ھم گیشواری ءِ زمہ نودربرانی کوپگاں کاینت۔
ایردستیں راجانی گوستانک ءَ اگاں ما چمشانک بہ دئیں گڑا بنگلہ دیش ءِ راجی آجوئی جُنز ءِ تہ ءَ نودربراں وتی بے مٹیں کِردے پیلو کُتگ ءُ بنگالی پہ وتی راجی آجوئی ءَ سوبمند کُت اَنت، داں ھستیں وھد ءَ بنگالی راج ءِ دیمروی ءُ پہ وشھالیں باندات ءَ نودربر وتی جہد ءَ کنگ ءَ اَنت۔ ھمے رنگ ءَ ایندگہ ملکاں ریفارم ءُ کُوہ ءِ آرگ ءِ ھاتر ءَ نودربرانی مزنیں کردے بوتگ ۔ چُشکہ ھندوستان ءِ تہ ءَ ۱۹۷۵-۷۷ ءِ جیافرکاش ناراین جُنز ءَ ایندرا گاندھی ھکومت ءِ دور دیگ ءَ نودربرانی سک مزنیں کِردے بوتگ۔ ھمے پئیم ویتنام جنگ ءِ وھد ءَ امریکہ ءِ تہ ءَ نودربرانی زہراشانی بہ بنت۔ تُرکی، تائیلینڈ ءُ مسر ءِ کُوہ ءِ آرگ ءَ پہ نودربرانی کرد بہ بیت۔ ھمے ڈول ءَ چین ءُ آدگہ جہانی جنز اَنت کہ اُود ءَ نودربر جنزانی بُنکی تبک بوتگ اَنت۔
ھمے ڈول ءَ دنیا ءِ بازیں ملکانی ھکومتاں نودربر سیاست جتائیں دروشماں پروش دیگ ءِ جہد کُتگ اَنت وھدیکہ نودبراں دیمروی ءُ گہتری ءِ گپ جتگ ءُ جُنز جُنزینتگ اَنت۔ چُشکہ بنگلادیش ءِ تہ ءَ نودربرانی یونیورسٹی ءُ ھاسٹلانی تہ ءَ بازیں کچے ءَ کُشگ ءُ چگل دیگ مستریں درورے۔
دگنیا ءِ کُجام ھم کُنڈ ءَ دیمروی ءُ گہتری یے اگاں اتکگ گڑا آئی ءِ تہ ءَ مستریں کرداں چہ یکے نودربرانی اِنت۔ نودربر زانتکارتریں تبک اِنت کہ آ چاگردی، سیاسی معاشی ءُ لبزانکی یاکہ آدگہ پڑاں چہ سماج ءِ ایندگہ تبکاں گیش مھکم، سرپد ءُ اساس تر اِنت۔ نودربر ھما تبک اِنت کہ آ سرجمیں سماج ءَ مٹ کنگ ءِ واک داریت اگاں شریں دروشمے ءَ یکجاہ ءُ آرگنائز بہ بیت۔
بلوچ نودربرسیاست
بلوچ نودربر سیاست کہ 1967 ءَ بندات بیت گڑا آئی ءِ مول ءُ مُراد ھمے بنت کہ درستیں بلوچ نودربر یک پترے ءِ سر ءَ مُچ کنگ بہ بنت ءُ بلوچ ءُ بلوچستان ءِ رکینگ ءُ گہتری ءُ دیمروی ءِ ھاتر ءَ وتی کِرد ءَ پیلو بہ کن اَنت۔ بلوچ نودربر گل ءَ جتائیں وھداں جتائیں پڑاں وتی کِرد پیلو کُتگ ءُ کنان ءُ پیداک اِنت۔ بلوچ جُنز ءِ تہ ءَ کیڈرسازی ءِ عمل بہ بیت، بلوچ سیاست ءِ تچکیں ڈائریکشن بہ بیت یاکہ سماجی، سیاسی، لبزانکی ءُ آدگہ پڑ، بلوچ نودربر سیاست مُدام اولی سْرپ ءَ اوشتوک گندگ ءَ کیت۔
کساس یک دَھکے ءَ چہ گیش بوتگ کہ بلوچ نودربر سیاست ءِ سرءَ بندش جَنگ بوتگ، نودربر رھشون شہید کنگ ءُ زندانی کنگ بوت اَنت ءُ بلوچ نودربر گل ءِ سر ءَ بندش جنگ بوت۔ ھمے میان ءَ بلوچ نودربر سیاست نزور کنگ بوت بلے تاں دیر ءَ آ اوشت آماچ نہ بوت ھردے آھاں وت ءَ مھکم کُرت پدا جہد بنا کُت۔ 2018 ءَ چہ رند پدا نودربر سیاست گام جنان بیت ءُ بلوچ سیاست ءِ تہ ءَ وتی کِرد ءَ پیلو کنت۔
مروچی بلوچ نودربر سیاست پدا وتی پادانی سر ءَ اوشتوک اِنت ءُ ھدے ءَ بلوچ نودربراں یک پترے ءِ سرءَ یکجاہ کنگ ءَ سوبمند اِنت۔ جتائیں پڑانی تہ ءَ وتی کِرد ءَ پیلو کنان اِنت ءُ جُنزان اِنت۔ بلے سرکار ءَ یکرندے پدا وتی شوربندی ٹہینتگ اَنت ءُ بلوچ نودربر سیاست ءَ ولگوج کنگ ءُ پروش دیگ ءُ بندش جنگ ءِ جہد ءَ اِنت۔
بلوچ نودربرسیاست ءُ ہستیں دور
پہ بلوچ ءَ اے زمین مدام تنک کنگ بوتگ ءُ ایردستی ءِ سیمسر روچ پہ روچ ودان اَنت۔ چُشکہ بلوچ ءِ جیڑہ سیاسی اِنت گڑا بلوچ راج چہ سیاست ءَ گستہ بوت کُت نہ کنت۔ چیاکہ بلوچ ءِ غیر سیاسی بوگ پہ ایردست ءَ نپ اِنت پمشکہ زورگیر مُدام جہد کنت کہ بلوچ راج ھجبر سیاسی بوگ ءَ نیلگی اِنت۔ ھمے پئیم بلوچ ءَ چہ وتی ھساب ءَ زندگی کنگ ءِ ھک پچگرگ بوتگ۔ پمیشکہ بلوچستان ءَ بلوچ سیاست ءِ ھچ گنجائش نیست چیاکہ سیاست وتی ھساب ءَ زندگی کنگ ءُ وتی فیصلہ وت کنگ ءِ نام اِنت۔
چشکہ بلوچ ءَ سیاست کنگ ءِ سر ءَ پابندی اِنت پمیشکہ بلوچ نودربر ءَ نودربر سیاست ءِ ھم گنجائش نیست۔ جتائیں وھداں جتائیں رنگاں سرکار ءَ بلوچ نودربر سیاست ءِ سرءَ بندش جتگ۔ ھما پالیسی جتائیں دروشُم ءَ مرچی ھم ھست اَنت ءُ نودربر سیاست ءِ نزور کنگ ءُ بندش جنگ ءِ جتائیں شوربندی ءُ سرکاری گپتمان ءُ پالیسی جوڑ اَنت۔ چہ نوکتریں شوربندیاں چہ یکے عدالتی ءُ کانودی نوٹیفیکیشن جاری کنگ ءُ وانگجاہانی تہ ءَ سیاسی چست ءُ ایرانی سر ءَ بندش جنگ اِنت۔ شال ءِ تہ ءَ وانگجاھانی ھاسٹلانی بند کنگ نودربراں پہ زور کشّگ، وانگجاہانی تہ ءَ نودربرانی بیگواہ کنگ، نودبر گلانی زہرشانیانی سر ءَبندش پولیس ءِ لاٹی چارج ءُ نودربرانی جیل کنگ، نودربرانی ایف آئی آر کنگ ءُ کیس جنگ۔ وانگجاھانی تہ ءَ نودربرانی ھراس کنگ، ایڈمشن نہ دیگ، ڈراپ آؤٹ کنگ، کلاسانی تہ ءَ نودربراں کم شرپ کنگ، سرکل ءُ دیوان ءَ یکجاہ نندگ ءَ پابندی جنگ، ایڈمشن کمپین ءِ سر ءَ پابندی جنگ۔ ھمے ھساب ءَ گوادر ءَ بلوچستان کتاب کاروان ءِ بُک اسٹال ءِ سر ءَ اُرش کنگ ءُ کتاب ءُ بساک ءِ سنگتاں زوراں سری جیل ءَ بندیگ کنگ زورگیر ءِ پندل اَنت دانکہ بلوچ مہلوک چہ سیاست ءَ گستہ دارگ بہ بیت ءُ آ وتی راست ءُ رد ءَ پجا میار اِیت۔
نودربر سیاست ءِ دُرستاں چہ مستریں کار ءُ پروگراماں یکے وانگ ءُ زانگ ءَ گوں بندوک اِنت بزاں وتی وانگی راھبند ءِ جوڑ کنگ اِنت۔ ھمے وڈ وتی لٹریچر خاکہ جوڈ کنگ ءُ وھدءِ لوٹ ءِ ھساب ءَ کتاب ءُ لٹریچر ءِ سر کنگ ءُ پروموٹ کنگ، بزاں نودربراں ری ایجوکیٹ کنگ ءُ آھاں جوانیں لٹریچر دیگ اِنت۔ ھمے ھساب ءَ کتاب اسٹال ءِ جنگ بُنکی کارے زانگ بیت بلے کتاب اسٹالانی سر ءَ یکوئی پولیس ءِ سنگتانی ھراس کنگ، آھاں تانہ ءَ برگ، برے انتظامی ءُ برے دومی ادارہانی نیمگ ءَ سنگتاں فون کنگ بیہار دیگ اے کُل نودربر سیاست ءِ کاؤنٹر کنگ ءِ جہد اِنت۔
ھستیں وھد ءَ سرکار ءِ مستریں پالیسیاں چہ یکے نودربراں جتائیں سرکاری ادارھانی نیمگ ءَ چہ فون کنگ، دَمکی دیگ ءُ ترسینگ ءَ ھوار آھانی لوگ ءَ بار بار فون کنگ ھراس کنگ تْرسینگ ءُ چہ لوگ ءَ نودربراں پہ نودربر سیاست ءَ نئیلگ ءُ دارگ اِنت۔
ھمے پئیم سرکار ءَ بلوچ نودربر سیاست ءَ نزور کنگ ءُ بندش جنگ ءِ ھاتر ءَ جتائیں گپتمان ءُ بیانیہ ھم ٹہینتگ اَنت۔ پہ درور سیاست دروگ بندگ ءُ رپینگ ءِ نام اِنت۔ سیاست مردماں چہ وانگءَ دور کنت ءُ اکیڈمک وانگ ءَ ھراب کنت۔ سیاست مردماں کوشارینیت۔ سیاست کنوک گیشتر ہما اَنت کہ وتی نصابی وانگ ءُ زانگءَ چہ دور اَنت۔ سیاست کنوک تہنا بٹاک جن اَنت، گپ ءُ گشتانک دینت بلے عمل نامیں چیز نیست۔ نودربر سیاست بس ادارہانی بلیک میلنگ ٹولی یے، مردمانی وھد ءِ زوالی یے۔ اے درست ریاست ءِ جوڑ کتگیں بیانیہ اِنت کہ بلوچ نودربراں چہ نودربر سیاست ءَ دور بہ داریت ءُ نزور بہ ترینیت دانکہ بلوچ نودربرانی تاکت کم بہ بیت ءُ آسانی ءَ بندش جنگ بہ بیت۔
بلوچ نودربر سیاست بلوچ راجی دیمروئی ءُ راجی جوڑشت ءِ تہ ءَ مھکمیں باسک ءِ بستار ءَ وتی کرد ءَ پیلو کنگ ءَ اِنت پمیشکہ سرکار ءِ چماں کُنٹگ اِنت۔ نوکتریں بازیں شوربندی ءُ ترزکار بلوچ نودربر سیاست ءِ کاؤنٹر کنگ ءَ پہ ٹہینگ بوتگ اَنت۔ اے سرجمیں پالیسی ءُ شوربندیانی پروش دیگ ءُ بلوچ نودربر سیاست ءَ رکینگ ءِ یکیں توجیل ھمیش بیت کہ بلوچ نودربر نودربرگلانی ارزشت ءَ بزانت، گیش ءَ چہ گیش نودربر گلاں ھوار بہ بنت، وت ءَ مھکم تر بہ کن اَنت دانکہ گل گیش مہکم بہ بیت۔سرکار ءِ شوربندیاں سرپد بہ بنت ءُ آھانی دیم ءَ بوشت اَنت۔ بلوچ راج ءِ ھمک پڑ ءَ گوں بندوکیں مھلوک، گوں بلوچ نودربر گلاں ھمکوپگ بہ بنت ءُ وتی زہگانی بنیادی ھک ءَ پچ گرگ ءُ رکینگ ءَ نودربر گلاں کُمک بہ کنت۔ سیاسی، سماجی، شاعر، ادیب، وکیل، ٹیچر ءُ اُستاد ءُ آدگہ پڑاں سیادی داروکیں مھلوک وتی کِرد ءَ پیلو بہ کن اَنت۔ وانگجاہ ءُ آدگہ جتائیں گل ءُ ادارہ وتی کِرد ءَ پیلو بہ کن اَنت ءُ بلوچ نودربر سیاست ءَ رکینگ ءَ پہ کُمک بہ کن اَنت ءُ نودربر گَلاں گوں ھمکوپگ بہ بنت۔
یکمُشتی ءُ تپاکی، مستقل مزاجی، نہ تُرسی ءُ مسلسل جدوجہد بلوچ ءِ ھمک جیڑہ ءِ توجیل اِنت۔ بلوچ نودربر سیاست جُنزان اَت، جُنزان اِنت ءُ گیش مھکمی ءَ گوں جُنزاِیت۔
ھلاس
