بلوچستان کتاب کاروان ءُ زندانیگیں کتاب
نبشتہ کار: ارشد دوست
بلوچستان کتاب کاروان کہ بلوچ اسٹوڈنٹس ایکشن کمیٹی ءِ پروگرامانی تہ ءَ پہ زانشتی چاگردے ءِ دیمروئی ءَ یک ھاسیں پروگرامے کہ آ سال 2017 ءَ جوڑ کنگ بیت ءُ بلوچستان ءَ کتاب مراگاھانی بندات ءَ کنت ءُ دانکہ روچ ءِ مروچی ءَ جنزگ ءَ اِنت۔ اے پروگرام بساک ءِ پالیسیانی تہ ءَ یک پر ارزشتیں کمپیئنے کہ بلوچ راج ءِ نودربرانی تہ ءَ وانگی سما ءُ سِنچ ءَ ودی کنگ ءَ اِنت۔
چوناھا اگاں ما بلوچستان ءِ تہ ءَ وانگی سنچ ءُ بود ءِ سر ءَ چمشانکے بندی ایں گڑا ما اے آسر ءَ سر بیں کہ بلوچ چہ بندات ءَ یک وانوکیں راجے ءِ بستار ءَ وجود داریت۔ کہ اِیشی ءِ درور ءَ من گوست ءِ کتابانی سر ءَ بندش ءِ عمل ءَ چہ زیراں۔ کساس 2013 ءِ زمانگ ءَ وھدیکہ بلوچستان ءَ نیشنل پارٹی ءِ حکومتی بیت ءُ آئی ءِ سرکماش ڈاکٹر مالک بلوچستان ءِ مزن وزیر بیت کہ اے زمانگ ءَ بلوچستان ءَ کتاب ءِ وانگ ءُ آئی ءِ سرا گَپ ءُ تران کنگ یک مزیں جرمے لیکَگ بیت اِنت۔ اگاں کُجام ھم بلوچ نودربرے ءِ ھاسٹل ءُ لوگے ءَ اگاں بلوچی یاکہ سیاسی کِتابے دست کپتگ گُڑا آئی ءَ را 3 ماہ ءَ بندیگ کنگ بوتگ۔ ءُ ھمے اَمل ءَ را برجم دارگ ءِ واستہ ریاست بلوچ ءِ وانگجاھیں ھاسٹلانی سرا ھم ارش کنت ءُ ھرچ کہ کتابے دست کپیت آھاں سوچیت ءُ بلوچ چاگرد ءِ تہ ءَ یک تہاری یے ودی کنت ءُ بلوچ ءِ بازیں وانگی ادارہ ءُ آئی ءِ ھاسٹل ھمے کتاب ءِ درچ ءَ بند کنگ بنت پہ درور عطاء شاد ڈگری کالج ءِ ھاسٹل بِہ بیت یا کہ سائنس کالج ءُ بیوٹمز ءِ ھاسٹل بِہ بنت۔ گُڑا ھمے تہاری ءِ ترس کہ روچ پہ روچ ودّان کنت ءُ بلوچ چاگرد ءِ تہ ءَ یک ھاموشی یے کاریت کہ اے میان ءَ بازیں نودربر چہ وانگی اَمل ءَ گِستا بنت ءُ بازیں سلکاریانی آماچ بہ وان بنت۔ چندے وھد ءِ گوزگ ءَ پد بلوچ اسٹوڈنٹس ایکشن کمیٹی دیم ءَ کئیت ءُ بلوچ چاگرد ءِ تہ ءَ ترس ءِ مانشانتگیں تہاری ءَ را کَم کنگ ءِ ھاتر ءَ وتی سیاسی چست ءُ اِیراں بنا کنت۔ ءُ (بلوچستان کتاب کاروان) بِساک ءِ ھمے سیاسی چست اِیرانی درچے کہ یکشلی ءَ جنزگ ءَ اِنت۔
چوناھا دگنیا ءِ تہ ءَ کجام کہ ادارہ بوتگاں یاکہ ھستاں آھانی کرا وتی راج ءِ دیمروی ءِ واستہ جتا جتائیں دلیل ءُ منانک بوتگاں بلے بلوچ اسٹوڈنٹس ایکشن کمیٹی ءِ کر ءَ بلوچ راج ءِ دیمروی ءِ دلیل اِلم ءُ زانت اِنت کہ آ ھمیشی ءِ وسیلہ ءَ وتی راج ءَ ایجوکیٹ کنگ لوٹیت پمشکا بِساک اے گَپ ءَ ماریت کہ دیمروی ءِ اولی پدیانک اِلم ءُ زانت اِنت۔ مرچی بساک ءُ ایدگہ اِلم بھر کنوکیں مردمانی جھد ءِ بدولت اِنت کہ بلوچ اے دَمگ ءِ باشعوریں راجے لیکگ بیت کہ آئی ءِ سیادی گوں زانت ءُ زانشت ءَ بندوک اِنت۔ کہ ایشی ءِ درور ءَ ما کیچ ءَ عطاء شاد لٹریری فیسٹول ءَ زُرت کُت کن ایں کہ اودا 35 لکھ ءِ کتاب ءِ بہا بوگ اے گپ ءِ دلیل ءَ دنت کہ بلوچ یک باشعور ءُ باسمائیں راجےکہ آئی ءَ را اِلم ءُ زانت ءَ گوں مزنیں ھُب ءُ واھگے ھست۔ ءُ بلوچستان ءِ تہ ءَ اے کتاب دوستی ءُ کتاب ءِ وانگ وسریں املے نہ اِنت بلکیں بلوچانی تہ ءَ اے کتاب دوستی گوست ءُ ھست ئے ادارھانی بدولت اِنت۔ ھاس کر( بلوچستان کتاب کاروان) ءِ ھپت سالی کمپیئن ئے جھد ءِ سوب ءَ کوہ ،کوچگ ، میدان ءُ شہرانی تہ ءَ ھمے سنگتانی کتاب اسٹالانی یاکہ مھنتانی برورد اِنت۔
بساک ءِ اے کمپیئن کہ بلوچستان ءِ تہ ءَ وانگی چاگردے جوڑ کنگ ءُ بلوچ راج ءِ نودربراں دگنیا ءِ ایدگہ راجانی گوما یک ہمدپ کنگءَ یک راجے ءِ بستار ءَ آرگ ءُ دگنیا ءِ تہ ءَ مقابلہ کنگ اِنت۔ بلوچ نودربراں راجے ءِ بستار ءَ زانشتی پِڑا مھکم کنگ بِساک ءِ بنداتی مول ءُ مراد اِنت۔ اے درگت ءَ بِساک ءَ وتی سرجمیں تاکت گوں زانشت ءَ داتگ کہ ابید ءِ اِلم ءَ ھچ راج ءَ دیمروئی نہ کُتگ ءُ ناکہ کسے اے گَپ ءَ منّیت کہ راج ابید ءِ چہ الم ءُ زانت ءَ دیمروری کُت کناں۔ مرچی بیست ءُ یکمی کرن ءَ دگنیا ءِ تہ ءَ اِلم ءُ زانت ءَ راج تاکتے ءِ بستار ءَ دگنیا ءِ تہ ءَ منّارینتگاں پہ درور مئے کرا اسرائیل ھست کہ ٹیکنالوجی ءِ پِڑا مرچی اسرائیل ءَ سرجمیں دگنیا یک کِر کُتگ ءُ وتی جُتائیں بستارے داشتگ۔ گڑا بساک ءِ اے لوٹ ءُ پروگرام وت راستی ءَ پدر کنت کہ اے ٹیکنالوجی ءِ دگنیا ءِ تہ ءَ راج پہ گوست ئے داوہ ءُ ھست ئے روایتی چست ءُ اِیراں گوں دیمروی نہ کناں بلکیں گوں اِلم ئے کُل٘یں تک ءُ پہناتانی وانگ ءُ پہمگ ءَ دیمروی کناں ۔ پمشکا بِساک ءِ اے جنز ( بلوچستان کتاب کاروان) ءِ نام ءَ ھمک سال ءِ وڑا اے سال ءَ ھم بلوچستان ءِ سرجمیں ھند ءُ دمگاں جنزینگ بوھگ اِنت۔ ھمے ھاترا کہ راج زانشت ءِ پڑ ءَ آرگی اِنت راج ءَ اے دور ءِ چیلنجانی دیمپان بوھگ ئے ءُ راجی باندات ءِ رکینگ ئے ھاتر ءَ زانت ءِ گُڈی سیمسراں سر کنگ ءِ واستہ وتی راجی پجار ءُ دودمان ءِ رکینگ ءَ بساک اے عمل ءَ تاں سوبمندی ءَ جنزینیت۔
کتاب ماں زندان ءَ
ماں بلوچستان ءَ وھدیکہ گوست ءَ وان ئے یا کہ ھست ئے سرا نگاھے ایر کن ئے گڑا ترا دو مزنیں واقع گندگ ءَ کئیت کہ آ ھمیش اَنت کہ آیانی سرا تران بوگ ءَ اِنت یک٘ے دوھزار سینزدہ ءِ وھد ءَ ڈاکٹر مالک ئے سروکی بیت کہ آ زمانگ ءَ کتابانی سرا بندش بیت ءُ ھچ کَس ءَ را اے ھک٘ نہ بیت کہ آ یک کتابے وتی دست ءَ کُت بہ کنت ءُ بہ وانیت۔ اشاں ابید دانکہ ھاسٹلانی سرا چھاپہ جنگ بیت ءُ کتاب زورگ ءُ سوچگ بنت۔ بلے مارا اے سما نہ بوتگ کہ کتاب پرچی ءَ سوچگ بوھگ ءَ اَنت ما وتی زانشت ءِ وسیلہ ءَ اے ھبر ءَ پوہ بوتگیں کہ کتاب یک انسانے ءَ چہ درستیں سِلکاری ءُ نادرائی آں رک٘ین ایت ءُ یک شریں انسانے جوڑ کنت۔
بلے اشی ءِ ھرابی چی اِنت؟ کہ استان چہ کتاب ءَ بیم آماچ ءُ لپرزگ اِنت ھمے کتاباں کہ(بلوچستان کتاب کاروان) ءِ ھمبل کہ سرجمیں بلوچستان ءِ چوکءُ چار راھانی سرا نشتگ ءُ بھا کنگ ءَ اَنت ۔اے درستیں کتاب چہ لاھور ءُ اسلام آباد ءِ کتاب پبلیشرانی نیمگ ءَ چہ آرگ بوتگاں، اے سک٘یں اَجبیں ھبرے! اگاں کتابانی سرا بندش ھست گڑا تو درستاں پیسر برو ھما کتاب بھا کنوکیں مردماں بیھار بدئے کہ کتاب ءِ بھا کنگ ءِ بندش اِنت۔ یک استانے کہ آئی ءِ بنھشت ھمنچو نزور اِنت کہ پہ یک کتابی اسٹالے ءَ آئی ءِ مشینری ھرکت ءَ کئیت۔ بلے مئے نازاکیں ورنا کہ نشہ ءِ وڑیں ازابے ءِ آماچ اَنت بلے ھمے نشہ بھا کنوک سرعام بازارانی تھا نشتگاں شیشہ ءُ کرسٹال بھا کنگ ءَ اَنت اود ءَ اِستان ءِ انتظامیہ ءَ وتی چم بند کتگاں وھدے کہ ورنایے زانشتی چاگردے ءِ جوڑ کنگ ئے ھاترا اِلم ءُ زانت ءَ دیمروی دئیگ ءَ انت آ’’ ایپ آئی آر‘‘ کنگ بیت۔
مئے راجدپتر ءِ دومی وئیل گْوادر ءَ بلوچستان کتاب کاروان ءِ سنگت کہ یک بُک اسٹالے جنگ ءَ بنت ھما گْوادرءَ کہ اود ءَ اِلمی چاگرد سرجم ءَ چیر ترینگ بوتگ ءُ منشیات پروش ءُ ایدگہ سلکاریانی چاگردے ودی کنگ ءُ مہکم کنگ بوتگ گْوادر ءِ ھردمک ءُ چارراھے ءِ سرا منشیات بھا کنوک گندگ ءَ کائینت۔ نشہ ھمنچو سرعام کنگ بوتگ کہ اودئے ورنا سرعام اے زھر یں کشندہ ءِ ارجان اَنت۔ ھمے گْوادر ءِ تہ ءَ انچو سلکاری ءَ ابید چار ورنا پاد کئیت کتاب بھا کنت ، بوت کنت اے کتاباں کس ھم بھا مہ زوریت بلے استان ءَ اوپار نہ روت وتی درستیں چاپلوس ءُ نوکراں ھگم دنت کہ اے ورناھاں دزگیر بہ کن اَنت کہ اے پہ باندات ءَ جھد کنگ ءَ اَنت۔ پہ بانداتءِ شری ءِ ھاترا جیڑگ ءَ اَنت وتی چاگرد ءَ سما ءُ شعور دئیگ ءِ ھاتر ءَ زانت ءُ زانشت ءَ دیمروی دئیگ ءَ اَنت۔ استان ءِ درائیں مشینری ھرکت ءَ کئیت ءُ اے ورناھاں کتابانی ھمرائی ءَ دزگیر کنت ءُ سانکلانی پُشت ءَ دور دنت۔ ھمیش اِنت اے استان ءِ اسلی دروشم ءُ رنگ کہ گْوادر ءِ تہ ءَ درا بوھگ ءَ اِنت گْوادر ءِ زمینی جاورھال مرچی اے گَپ ءِ گواھاں کہ گْوادر ءَ چنچو دیمروئی کُتگ دگنیا ءِ آ دگہ راجانی کرا دیمروئی ءِ اولی پدیانک زانت ءُ زانشت اِنت کہ چریشی ءَ ابید ھچ راج دیمروئی ءُ ردوم زرت نہ کنت گڑا استان مارا کجام دیمروئی ءَ دئیگ ءَ اِنت۔
مئے دیمروئی ءِ بنزہ گوں زانشت ءَ بندوک اِنت کہ بلوچستان کتاب کاروان ءِ سنگتانی کوپگ ءَ اِنت دمک پہ دمک، میتگ پہ میتگ اِلم ءُ زانشت ئے دیمروی دئیگ ءَ سرگردان اَنت۔ کہ مئے باندات ئے سمبھینوک ھمے کتاب اَنت کہ استان ءَ را چہ اِشاں ترس اِنت، بلے اے دگنیا ءِ راستی ھمیش اِنت کہ ھمک نوآبادکار کہ بوتگاں آھانی مستریں ترس ایردستیں راج ءِ زانت ءُ شعور بوتگ آئی ءَ وتی درستیں تاکت گوں ھمے شعور ءِ دارگ ءَ داتگ بلے بلوچ یک زندگیں راجے ءِ بستار ءَ وتی زانشتی عمل ءَ برجاہ بِہ داریت۔ پرچہ کہ اے استان ءِ ھرچ پندل آئی ءِ جندئے گُٹ ءَ لوپ بیت گْوادر ءِ ورناھانی ءُ کتابانی بندیگ کنگ ءَ گوں استان ءِ جند ءَ بلوچستان کتاب کاروان ءَ را سرجمیں بلوچستان ءَ تالان کُت۔ استان ءَ وت اے گَپ ءِ دلیل دات کہ اے ورنا پہ باندات ءِ سمبھینگ ءَ چوک ءُ چارراھانی سرا سارتی ءُ گرمی برداشت ءَ کنگ ءَ پد ھم وتی راج ءِ ورناھاں زانشت ءِ نیمگ ءَ آرگ ءَ اَنت ھما ورنا کہ آئی ءَ روڈانی سرا نشتگ بلوچستان کتاب کاروان ءِ نام ءَ کتاب بھا کرتگ مرچی ال٘م آئی ءَ را اے گُمان بوھگ ءَ اِنت آئی ءَ وتی وھد یک بے اَملیں کارے ءِ ھاترا زوال نہ کُتگ بلکیں یک ھنچیں کارے ءِ ھاترا اے چارراھانی سرا اوشتوک بوتگ کہ اے اَمل پہ باندات ءَ یک دیمروی یے ءُ پہ بلوچ راج ءَ یک زانشتی درچے کہ جنزگ ءَ اِنت۔ ورناھاںی اے ھمت ءُ ھوسلہ پہ زانشتی چاگردے ءِ جوڑ کنگ ءَ ھرچ وڑیں سکیانی دیم ءَ اوشتگ ءُ استان ءِ درستیں بدیں پندلاں چیلنج کنگ ال٘م پہ رژنائیں بانداتے ءَ نوکیں کشکے ءِ شون ءَ دنت ،امیت اِنت کہ اے کاروان ھمے وڑ جنزان کنت۔
