بلوچ ورنایانی مستریں سوگات: کتاب
پکیر بلوچ
بے وسیں بلوچستان ءُ گُژنگیں بلوچ دنیا وتئی ملک ءُ راج ءِ دیمروی دیگ واستا مزن مزنیں وانگجاہ ءُ کتاب جاہ جوڑ کنت کہ مئے مھلوک بہ وان انت دیمروی بہ کن انت ءُ آیوکیں وھد ءَ دنیا ءِ ھچ وڑیں تاگتےءِ دیمءَ سر جھل مہ کن انت یک پٹ ءُ پولی ءِ رِد ءَ اسرائیل ءِ لس مھلوک سالے ءِ تہ ءَ 40 ءَ گیش کتاب وان انت گڑا مرچی ما کتاب ءِ تاگت ءَ گندگ ءَ ایں یک اسرائیل ئے گوں سرجمیں دگنیا ءَ دیمپانی کنگءَ انت ءُ دگنیا آئیءِ دیم ءَ لاچار انت ءُ دومی نیمگ ءَ 40 اسلامی ملک ھُدا ءِ بروسہ ءَ نشتگ ءُ وت ءَ رد دیگ انت۔
چوناہ ءَ کتاب ءِ ارزشت ھمنچو باز انت بگندے من سرجم ءَ گشینت مہ کناں پرچہ کہ کتابانی شعور انچو باز انت کہ مرچی مئے دین یاکہ دنیائی رھبندانی ھساب ءِ ھر کسان ءُ مزنیں چیز کتابانی تہ ءَ نبشتہ انت۔ پہ دینی مردماں آیانی کلمہ ءُ سیاسی مردماں سیاسی لبزانک ءُ دبستان۔ کتاب ھما ارزشت داریں آدینک انت کہ ترا گوست ءَ ھم پیش دار ایت ءُچہ ھست ءُ باندات ءَ ھم آژنا کنت۔ کتاب ھما ارشت داریں چیز انت کہ ترا سما دنت تو انسان یِے ،کتاب ھما ارزشت داریں چیز انت ترا گوش ایت کہ تئی زندگی ءِ من ءُ مُراد چی اَنت۔
چوش کہ دگنیا ھر چیزاں گوں پٹاسک ءُ دگہ زشاتکامی چیزاں وش اتک کنت یاکہ گوں پٹاسکاں ھما روچانی وشیاں دار ایت، وھدے کہ نوکیں سال ءِ بنداتی شپ بیت انت گڑا دگنیا مزن مزنیں پروگرام ٹھین ایت، آزمان ءَ رنگ رنگ کنت ءُ مردم شاتکامی کن انت بلے اولی برءَ من بلوچستانءِ تہءَ دیستگ کہ سال ءِ بندات گوں کتاب ءِ مراگشاں کنگ بیت انت، اد ءَ چہ اے گپ پدر بیت کہ پہ بلوچ نودربر ءُ ورنایاں ارزشت دار تریں سوگات کتاب انت۔
وھد یکہ دگنیا 2025 وش اتکی ءَ وتئی ملکاں رنگ رنگ ءُ وڑ وڑیں سنگارگاں گوں دلگوش بیت انت ھمے دمان ءَ بلوچ اسٹوڈنٹس ایکشن کمیٹی (بساک )ءِ نیمگ ءَ چہ جارے پرینگ بیت انت کہ نوک آیوکیں سال ءِ وش اتکی ءَ سرجمیں بلوچستان ءَ کتاب ءِ مراگش اڈ دیگ بیت انت، بہ بگندے باز مردماں پہ اے انچیں لس جار ے بلے پہ راج ءَ سان دیوکیں عملے ءُ اشیءِ سان ہستیں ءُ آیوکیں وھد ءَ الم گندگ بنت۔
چوش کہ نوکیں سال بندات بیت بلوچستان ءِ بازیں دمگاں کتاب ءِ مراگش اڈ دئیگ بندات بیت پہ درور شال ،بولان ،نصیر آباد، خضدار، کراچی، نوشکی، خاران، پنجگور، تربت، گوادر، ڈی جی خان، تونسہ، چاغی، ڈالبندین، حب، مستونگ، قلات، منگچر، سوراب، کشمور ءَ ہور ایدگہ دمگ۔ بلے لہتے روچ ءَ پد رسانکدر(سوشل میڈیا) ءَ ھالے کئیت کہ نصیر آباد ءَ بساک ءِ نیمگ ءَ چہ اڈ داتگیں مراگش ءَ پُلیس اڑ ءُ جنجال پیداگ کنگ ءَ انت، سنگتاں مراگش اڈ دئیگ ءِ موکل دیگ نہ بیت انت، ھمے روچانی تہ ءَ باز جاہ ءَ سنگتاں جنجالانی دیمپان کپ اَنت، سنگت گوں کتاباں بندیگ کنگ بنت بلے سنگت وتئی ھمت ءُ جوزگ برجم دار انت ءُ جُنزان بنت، جُنزان جُنزا داں مرچیگیں روچ ءَ گوادر ءَ ھم ھمئے وڑیں اڑ ءُ جنجال دیمپان کنگ ءُ سنگتانی ھمرائی ءَ کتابانی دزگیر ءُ بندیگ کنگ یک اجبیں ءُ نوکیں زوراکی ءِ کسہ ئے کہ بلوچستانءِ تہ ءَ من اِش کتگ۔ دگنیا ءِ تہ بنی آدم مُجرم بنت بلے اول برءَ من بلوچستانءِ تہ دیستگ کہ کتاب مُجرم انت، کتابی جُرم چی بیت کنت؟ کتاب اِنچو لبزاں ابید ھم اے ملکءِ تہ ءَ وتی بے میاری ءَ دیما آورت کنگ ءَ نہ انت، ھما کتاب کہ دگنیا آزمان سرءَ بُرتگ، ھما کتاب ھم مرچی بندیگ انت مرچی کلم پہ وتئی مھروانیں کتاب ءَ ھم چیزے نبشتہ کنگ ءَ نہ انت، ادءَ سرجمیں چیز بندیگ انت، مردم بندیگ، زمین بندیگ، آزمان بندیگ، لبز بندیگ ،کلم بندیگ ءُ کتاب بندیگ بگندے بندیگیں کتاب پہ وت ءَ ھچ کُت مہ کنت، بلے ہمائی ءَ کہ اے کتابانی زانت ءُ زانشت گون اِنت، آ الم چیزے کنت ءُ یکروچے درستاں چہ بندیگجاہاں آجو کنت۔
