نوآبادیات و نوآبادیاتی نفسیات
نوشتہ کار: زبیر بلوچ
نوآبادیاتی نظام سامراج نا جوڑشت ئسے، ہرا وخت کہ جہان نا تہٹی سامراجیت وجود ٹی بس گڑا اوفتے تینا قوضہ ءِ سوگو کننگ کن تجارتی منڈی، خام مال، اڑزان مزوری، وسائل، و آبات آ ڈغار آتا خواست مس۔ اوفک جہان نا تہٹی بھاز آ راج، ڈیہہ، خطہ، و ریاست آتا زی آ لشکر کشی بنا کننگ تون طاغت نا بنیات آ قوضہ کریر و تینا کروکا قوضہ آن مالی، اقتصادی، تجارتی، و فوجی سواد ارفیر۔ سامراج سرمایہ داری نظام نا کل آن پوسکن و ظالمانہ دروشم ئسے، دا نظام ٹی جہان نا بھلا بھلا سرمایہ دار آ ریاست آک جہان نا راج آتا ڈیہہ ءِ قوضہ کننگ کن اوفتے سیوت نا درکار مریک۔ او ڈیہہ آن اڑزانی ئٹ لٹ و پل کننگ مرے و بھلا سرمایہ دار طبقہ نا سیوت ءِ ہم سامراج پارہ۔ قوضہ مروکا ڈیہہ تا زی آ سرمایہ کاری نا ذریعت ئٹ تینا حکومت کاری ءِ برجا تخرہ۔ جہان نا تہٹی قوضہ گیریت نا دا نظام پانزدہ میکو صدی ٹی مونا بس، ہرا وخت کہ یورپین ڈیہک قوضہ نا نیت ئٹ افریقی ڈیہہ تا زی آ حکومت جوڑ کریر۔ دا عمل ءِ سرپند مننگ کن ننتون ساڑی آ قوضہ گیر (نوآبادکار)، ایلو بلوچستان و بلوچ راج اسہ پاش ءُ مثال ئسے۔
واجہ فرانز فینن تینا کتاب (The Wretched of the Earth) ٹی پائک کہ دا نظام نا جند تینٹ تینے ظالم، جابر، و پر تشدد نظام ئس تصور کیک، مستی پائک مظلوم و محکوم آ راج آتا آجوئی، عزت ننگ و لج، و خودمختاری ءِ پدا دوئی کننگ ئٹ مدام مزاحمت و تشدد نا کمک اوار مسنے۔ داڑے فینن تشدد ءِ جوانو گڑاس سرپند مفک بلکن گواچنی نا دروشم ءِ پاش کریسہ پائک کہ قوضہ گیر و نوآبادیاتی حکمران مدام تشدد و طاغت نا بولی ءِ سرپند مریک، مستی پائک انقلاب، جہد، و مزاحمت نا کمک ئٹ مظلوم و محکوم آ راج آک تینا پجار، ننگ و شرف، بولی، دود و ربیدگ، ڈیہہ و ڈغار نا آجوئی و خود مختاری الکنو۔
جہان نا بھاز آ راج، ڈیہہ و ریاست آتا زی آ قوضہ کننگ، و ہمو جاگہ نا ہندی آ اُلس ءِ تینا غلام جوڑنگ، مال و مڈی نا لٹ و پل کننگ و دا بے بندغی، غیر فطری عمل ءِ نوآبادیاتی نظام کالونائزیشن (Colonization) یاکہ (Colonialism) پارہ، اگہ نن دانا درستی راستی ءِ دن کین ہم رد مفرون۔
ہرا کہ ہندی آ راج و اُلس آ قوضہ مریک اوفتے ہندی بندغ یاکہ کالونائزڈ (Colonized)، و (Colony) پارہ انتئے کہ او مظلوم و محکوم آ ڈیہہ ڈغار و راج اقتصادی، چاگڑدی، معاشی پڑا بھاز نزور و پدماندہ مریرہ، اندا سوب آن او قوضہ مریرہ۔
قوضہ گیر ءِ نوآبادکار یاکہ کالونائزر (Colonizer) پارہ، انتئے کہ او ہمو نہار آ ریاست و ٹولیک مریرہ، ہرا نزور آ راج نا پدماندئی تیان فائدہ ارفیسہ اونا پیداوار، جاگیر، و مڈی تا زی آ قوضہ کیرہ۔
ہراڑے کہ نوآبادیاتی نظام و اونا طاغت جوڑ مس گڑا اوڑے ہندی آ مخلوق نا طب، سوچ، و نفسیات بھلو کچ اسیٹی مٹ مس۔ ہرادے نوآبادیاتی نفسیات پاننگ مریک ہرانا بھاز آ تجزیہ کار، ماہر نفسیات، و ڈاکٹر آک خوڑتی ئٹ جاچ ءِ الکر۔ اوفتے ٹی اسہ ماہر نفسیات ڈاکٹر فرانز فینن ( Frantz Fanon) اوار ءِ۔ فینن اسہ سیاہ فام ماہر نفسیات اس ئسک ہرا 1925 ٹی کارائب ٹی ودی مس و او وخت اوفک فرانس نا قوضہ ٹی ئسر۔ فرانز فینن تینا وخت ئٹ کل آن بھاز زیم شاغوک نوآبادیاتی مخالف نوشتہ کار (Anti Colonial Writer) نا ردئٹ چاننگاکہ، او اسہ ماہر نفسیات، سیاسی بندغ، و چاگڑدی فلاسفر، مارکسسٹ، قوضہ گیریت و نوآبادیاتی نظام نا برخلاف اسہ عملی جہدکار اس ئسک۔ اونا دانشورانہ نوشت آک، کتاب، تھیوریز، نوآبادیاتی مطالعہ، (Decolonisation Theories), (Critical Theories), ( Black Existentialism)، مارکسزم نا خڑک آ بھاز زیم شاغوک پاش مسونو ہرا کہ مظلوم، لاچار آ و قوضہ مروکا راج آتیکن راہشون ہم پاش مسونو۔
تدوکا دہ دہائی آن زیات وخت مریک کہ واجہ فینن نا دانشورانہ نوشت آک، سوچ، و نظریہ آزادی نا تحریک آتے زیمی کرینے ہراٹی فلسطین، تامل، کرد، بلوچستان، سندھ، بنگلہ دیش، و افریقی تحریک آک اوار ءُ۔ فینن طب نا تعلیم فرانس آن پورو کننگ تون پدا روزگار نا خواست ئٹ الجزائر نا ہسپتال ئسے آ مون کرے۔ او وخت الجزائر فرانس نا قوضہ ٹی ئس و الجزائر ٹی راجی آجوئی نا تحریک برجاء ئس۔
فینن الجزائر نا ڈغار آ رہینگسہ راجی جہد ءِ پہہ مریسہ تجزیہ کرے، اوڑان بیدس ہم جنگی حالیت آتا سوب آن اوڑا بھاز آ نفسیاتی ناجوڑی نا گواچی بندغ آک بسرہ، او اوفتا نفسیاتی جانجوڑی نا خوڑتی ئٹ جاچ الیسہ اوفتا سوب آتے پہہ مس۔ واجہ فینن اوفتے تینا آزموندہ و پٹ و پول نا بنیات آ نوآبادیاتی نفسیات، نوآبادیاتی نظام، تشدد و جوابی تشدد نا زی آ تھیوریز مونا ایس ہرا کہ کتاب (Black Skin and White Mask) و (The Wretched of the Earth) ٹی قلم بند مسونو۔ واجہ فینن پائک کہ ہرا وخت اسہ قوضہ گیر اس پین اسٹ نا ڈغار آ بریک قوضہ کیک گڑا او ہند ئنا مخلوق ءِ ذہنی، و نفسیاتی ردئٹ احساس کمتری نا گواچی کریسہ اوفتے دا باور کرفک کہ ہندی بندغ آک جاہل، نہار، جنگلی، غیر مہذب، دیمروی کپروک و پیشن آن بروک آ بندغ مہذب، تہذیب یافتہ، دیمروی کروک و اوفک ہندی بندغ آتے ترقی تننگ کہ بسونو۔ قوضہ گیر مدام ہندی آ مخلوق نا زی آ تینا قوضہ ءِ برجا تخنگ کن بے کچ بیدادی نا کمک الیک تاکہ ہندی بندغ آک خلیس نا گواچی مریر و اڑزانی ئٹ اوفتا زی آ تینا اجارہ داری ءِ برجا تخنگ کے، تاکہ خام مال، مڈی تا لٹ و پل کننگ مرے، او نوآبادیاتی ءِ تجارتی منڈی نا ردئٹ کاریم ئٹ ہتیک۔ قوضہ گیر ہندی بندغ آتے دا باور کرفنگ نا کوشست کیک کہ او دماغی حوالہ ئٹ بھاز نزور، ذہانت و لائخی نا حوالہ ئٹ پدی ءُ۔ او اندنو آزموندہ و مشاہدہ مونا اتیرہ، ہرا پاش کیک کہ پیشن ملکی تا ذہانت و لائخی الجزائر نا ہندی بندغ آتیان بھاز زیات ءِ۔ انتئے کہ دا کل لائخیک یورپین آتیتون ءُ۔
نوآبادکار مدام ہندی آ راج ئنا دیہاڑ، پجار، زبان، دود و بیدگ و تہذیب ءِ لتاڑیک و جہان نا مونا رد ءُ بیانیہ ئسے نا کمک الیسہ رد پیش کیک، و ہندی بندغ آتے دا باور کرفک کہ او ہزار سال آن بے قانود، وڑ و ڈول، و علم آن زند گدریفنگ ءِ و اوفتے دا احساس کمتری نا ٹیکی ءِ ایتک و پائک کہ دیہاڑ، علم، تہذیب، دود و ربیدگ، زبان، دیمروی، سرسہبی، قانود پیشن آن بروک نا دوٹی ءِ، اگہ ہندی بندغ آتے سرسہب مروئی و دیمروی کروئی ءِ گڑا ہر حال ئٹ اوفتے قوضہ گیر نا دود ءِ تینا کروئی تمک۔ نوآبادکار ہندی آ مخلوق تون مدام نہار آنبار پیش بریک، اوفتے ہچ بندغ نا ہند ہم تفک، اونا خڑک آ بندغ ہمودے ہرا اونا غلامی نا منوک مرے۔
نوآبادکار ہندی آ مخلوق ءِ ذہنی و دماغی حوالہ غا اندن کُنٹ کیک کہ او مدام اندا ذہنیت و سوچ نا گواچی مریرہ کہ اگہ ہرا وخت قوضہ گیر دو کشا گڑا نن دا نزور آ راج تینے و تینا ڈیہہ ءِ امر چلیفون۔ اونا اننگ آن گڈ نن جہالت و پدماندہ زند اس گدریفون۔ ہندی آ مخلوق مدام اندا ذہنیت نا گواچی مریک کہ نوآبادکار حکومت کننگ کن جوڑ مسونے انتئے کہ اوڑتو دا لائخی پیدائشی ارے، و ہندی بندغ آک تنیا غلامی و محکومی کن جوڑ مسونو۔ نوآبادیاتی زوراکی و بیدادی آن گڈ ہر ہندی بندغ ہچو ردعمل اس تفک مثیل ئسے نا بھلا شار و قبائلی علاقہ آتا بندغ آک جتا جتا ردعمل ایترہ۔ شار آتا تہٹی تولوک آ پوریائی بندغ آک، روزگار کروک آ مخلوق، ڈرائیور آک ہرا قوضہ گیر آن فائدہ نا سوچ تخرہ، او ہچ اونا برخلاف مزاحمت کپسہ بلکہ اونا غلامی ءِ منیرہ انتئے کہ اوفتا مفاد آک قوضہ گیر تون تفوک مریرہ۔ فینن سرکاری دانشور تپہ نا زی آ ہم تینا ہیت و گپ آتے تخسہ پائک کہ اوفک امر قوضہ گیر نا زبان ئٹ ہیت کیرہ ہرا وخت کہ اوفتا مفاد و مسخت آک تینا ایسری ءِ سر متنو۔ قبائلی علاقہ یا خلق آتا تہٹی ہمو بندغ آک ہرا میر، معتبر، زمیندار، و جاگیر دار آک مریرہ او ہم قوضہ گیر تون خوش مریسہ اونا قوضہ گیریت ءِ منیرہ انتئے کہ اوفتے مدام تینا زات، مال و مڈی، و نسخان نا خلیس مریک۔ قوضہ گیر نا بیدادی نا سیخا ٹی گیشتر بزغر و مزور تپہ مریک انتئے کہ سامراج نا بنیات ہر وخت اوفتا خواری و مزوری نا زی آ مریک۔ دا تپہ ہرا وخت ریاستی ظلم و بیدادی نا گواچی مریک تو اوفتیٹی مدام ریاست نا برخلاف سوختئی و جوش مریک ولے او تینا سوختئی ءِ قوضہ گیر نا جاگہ غا تینا ہندی مخلوق آ کشیرہ۔ قوضہ گیر دا تپہ ءِ تین پہ تین جنگ ایتنگ کن ہڑدے ئی زند گدریفنگ نا گڑاتے اندن کہ خوراک، کننگ و بیننگ، نُت دال برنج ٹی کمبوتی کیک تاکہ دا لائن آتا تہٹی دوئی مفروک آ گڑا ءِ دوئی کننگ کن تین پہ تین جنگ کیر، بیروزگاری ہم نوآبادکار نا پیدوار ئسے ہراڑان چاگڑد ٹی بے جاراتی اس ودی مریک، و نوآبادکار نا خار ءِ اسٹ ایلو آ کشیرہ، گڑا قوضہ گیر اوفتے دا باور کرفک اُربو خنبو نم اخہ در نہار، جنگجو، و بے سگ اُرے۔
نوآبادکار ہندی مخلوق ءِ جنگ تننگ کن اوفتا کچک آنبار ارغ نا ٹکر خسک، و سیاہ فام آک لنگڑی و بینگنی نا سوب آن ہڑکی مریرہ و اسٹ ایلو تون جنگ کریسہ تینا پڈ ءِ پُر کننگ کن داڑے اسکان کہ تین پہ تین نا ساہ ءِ ہم ہلیرہ، نوآبادکار دافتا زی آ اندنو وخت اس چَٹی کیک کہ ہندی مخلوق مدام سرپند مریک کہ دا اوفتا قسمت نا بشخ ءُ حالانکہ گواچن ئٹ دن اف۔ نوآبادکار مدام اندا خواہک کہ ہندی آ مخلوق نا ڈکھ و خار تین پہ تینی نا زی آ جنگ و جدل، خون و غارتگری، و مقدر ڈوہدار پاننگ مرے، او دا دود ءِ زندہ و برجا تخنگ کن تینا ہر وڑ ئنا وس و واک ءِ خلیک، تاکہ ہندی بندغ نا خار اونا جند کن بنا مف، قوضہ گیر ہندی مخلوق ءِ ہر چم و اٹکل ئٹ پرغنگ نا کوشست کیک، اندن کہ رنگ، نسل، زات و قبیلہ، زبان و علاقہ، مذہب و فرقہ نا بنیات ئٹ اوفتا تہٹی فرخ و خار ودی کیک انتئے کہ ہندی بندغ آک اخس بشخ و پنور اموخس نزور مرور، و قوضہ گیر نا حکومت اموخس در سوگو و طاغتور مرو۔ قوضہ گیر ہندی آ مخلوق نا زی آ انداخس ظلم و تادی کیک کہ ہندی بندغ آک تینا تیوہ پجار ءِ گیرام کیرہ، و تیوہ پیشن آن بروک آ قوضہ گیر نا ہر اسہ گڑا مثیال کہ زبان، تہذیب، پچ و دود، اسکان دوئی کیرہ، بس اوفتے کہنگ نا خلیس پلویڑ کیک و او قوضہ گیر آنبار جوڑ مننگ نا مدام کوشست کیرہ، و تینا زبان، پجار، دود، دیہاڑ، رسم و رواج آتے گیرام کننگ کن ہم تیار مریرہ، واجہ فینن اوفتے نوآبادی نا لقب اس ایتک، و پائک اوفتا نفسیات ءِ نوآبادیاتی نفسیات پارہ۔ نوآبادیاتی نفسیات و ذہنیت نا گواچی مروک آ بندغ تینا مخلوق ءِ ہمو ہی نظر ٹی اُرک ہرا ٹی کہ قوضہ گیر اُرک، او ہم تینا بندغ آتے نہار، جاہل، بے خوانندہ، بدتہذیب، سرپند مریک، قوضہ گیر ہندی مخلوق ءِ اندنو نفسیاتی ڈول اسیٹ شکست ایتک کہ او مدام بھاز آ ذہنی و دماغی ناجوڑی تا گواچی مریرہ، مثیل ئسے نا اسہ حبشی سیاہ فام بندغ اس تغ ٹی خنک کہ او پیہن مسونے، انتئے کہ او یورپین بندغ آتا نیام ٹی زند گدریفنگ مریک، و او تینے ساہدار اس تصور کیک گڑا ہڑدے اندا خیال و سوچ ٹی مریک کہ ای ہرا وخت دا ڈول آن پیشتموٹ و اسہ بندغ اس جوڑ مروٹ۔
نوآبادکار نا بیدادی آن ہرا بندغ ذہنی (نفسیاتی) ناجوڑ مریک گڑا اوڑکن کلینک آتا تہٹی دارو درمان بے فائدہ مریک انتئے کہ ہمو ہی کلینک نا مونا یا پیشن مدام ہمو تشدد زدہ ماحول مریک ہراڑان کہ دا نفسیاتی ناجوڑی ودی مسونے۔ دا ناجوڑی تے و خاص وڑئٹ نفسیاتی ناجوڑی ءِ ایسر کننگ کن المی ءِ کہ قوضہ گیر نا وجود ایسر کننگ مرے ہراڑان دن انگا ناجوڑیک ودی مریرہ۔ ہرا وخت کہ ہندی بندغ آک تینے داڑان کشنگ کن بیدادی نا ورندی ءِ بیدادی ئٹ ایترہ گڑا اوفتیٹی اسہ پرجوش حوصلہ و ہمت اس ودی مریک گڑا دا سرپند مریرہ کہ آخر قوضہ گیر نا وجود ہم بندغی تون تفوک ءِ نہ کہ آسمانی مخلوق تون، اوفتے وحشی سرپند مننگ اوفتا زوراکی تے ایسر کننگ اسہ بھلو سوب اس جوڑ مریک۔ واجہ فینن ءِ تینا آزموندہ و مشاہدہ آتیان معلوم داری مریک کہ 1952 ٹی ہرا وخت سلہہ بند جہد ئٹی سوگو ترندی اس بریک، گڑا او وخت الجزائر ٹی خون و غارتگری، چاگڑدی جنگ آک، تین پہ تین آن خار نا اسہ ساہت اس، زات و پات نا فرخ، نسلی ٹولی و فرخ مدا مدا نزور و ایسری نا کنڈا کائک، و مست بندغ آک تین پہ تین جنگ و جدل کریرہ پدا او مدا مدا قوضہ گیر نا برخلاف جنگ بنا کیرہ۔ واجہ فینن چاگڑدی و چاگڑدی سیالی تے مٹ و بدل مننگ آ خنک، احساس کمتری و آئری گری نا احساس آک، ہرافتا دارو درمان ماہر نفسیات کن بھاز کبین و سخت مریک ولے دا ناجوڑیک ہمو سلہہ بند جہد نا سوب آن تینٹ ایسر مریسہ کیرہ۔ دا جہد ہندی بندغ آتے بے خلیس و دلیر جوڑ کیک و اوفتے تینے آ باور کننگ ہیل ایتک۔ واجہ فینن پائک مدام نفسیاتی ناجوڑی تا درمان ءِ انقلابی جہد ئٹ تصور و محسوس کبو، دا ہمو جہد مریک ہرا تیوہ چاگڑد ئٹ مٹی و بدلی اتیک، ہراٹی اسہ پاش ءُ مثیل اس خننگ مریک مالو نیاڑی و زالبول تنیا تینا خلق و حویلی نا چار دیوالی اسکان مریک ولے ہمو ہی زالبول جہد ئٹی اسہ بشخ اس جوڑ مریسہ باوری ئٹ جہد ئٹی ایلم کن ایلم اس، باوہ کن مار اس، لمہ کن نرینہ اس، سیاسی و جہد کار سنگت آتیکن، تونگر و سوگو ءُ کوپہ اس جوڑ مریک، زالبول نا جہد ئٹی بشخ النگ چاگڑد ئٹ مٹی و بدلی نا اسہ بھلو سوب اس جوڑ مریک۔
ہرا وخت کہ انقلابی تحریک و سلہہ بند جہد ئٹ ترندی اس بریک گڑا قوضہ گیر نزور مریسہ ہندی انقلابی لیڈر آتون تولک سَلاہ کریسہ اوفتے آزادی نا موارک بادی ایتک۔ ولے واجہ فینن پائک دا آزادی نا مطلب یورپین قوضہ گیر نا جاگہ غا ہندی سیاہ فام حکمران آتا بننگ ءِ، نظام نا جند ہمو ہی نوآبادیاتی نظام مریک بس حکمران آتا مٹی و بدلی مریک، ظلم و تادی، زوراکی و بیدادیک برجا مریرہ، واجہ فرانز فینن دا دروشم و عمل ءِ بیرہ پِن ئنا و ہندی سیاہ فام حکمران آتے ہندی و دیسی کالونائزر (قوضہ گیر) نا پن ایتک۔ فینن پائک اگہ مسٹمیکو جہان نا بندغ و ریاست آتے آزادی دوئی کروئی ءِ گڑا قوضہ گیر ءِ نہ تنیا تینا علاقہ و ڈیہہ آن کشیر بلکن اونا مچا سیاسی، چاگڑدی، معاشی، حکومتی، ریاستی، و نوآبادیاتی نظام ءِ ایسر کیر، نہ گڑا ہندی بندغ آک آجو مفرور و اوفتیکن نوآبادکار و ظلم و زوراکی کروک نا بیرہ دروشم بدل مریسہ کرو۔
