ماتی مھناز ءُ ایردستی ءِ سانکل
آزمانک
نبشتہ کار : سنجاب بلوچ
مهناز وتی همروچیگیں کار ءُ چُلوپاں دزگٹ اَت ۔ آئی ءِ کستریں بَچّ میران ءَ وتی وانگجاہ ءِ کتاب دست ءَ اِت اَنتءُ چہ دروازگ ءَ دراَتک دیم پہ وانگجاہ ءَ روگ ءَ لگ اِت۔ مھناز کہ کنورجاہ ءِ دیم ءَ مُچّیں رزاناں مُشگ ءَ اَت، گوں دروازگ ءِ توار ءَ سر ءِ چِست کُت ءُ دروازگ ءَ چارگ ءَ لگ اِت، ھمینچُک ءَ میران چہ دروازگ ءَ اندیم بوت، ھمے سھت ءَ آئی ءَ وتی مستریں بَچّ مُرید گیر اتک کہ شھدربرجاہ ءَ آئی آر ءِ نودربرے اَت کہ موکلانی وھد ءَ گِس ءَ پیداک اَت راہ ءِ نیم ءَاستان ءِ چند دبوکہی مردماں چہ بس ءَ ایرگیتک ءُ گوں وت بُرت۔ ماھے کَپّے ءَ پد آئی ءِ تیر سُپتگیں ژانگولیں جون کئورے ءِ لَمب ءَ دست کپت۔
نوں ھر وھدے کہ میران سر گیپت اِنت دیم پہ وانگجاہ ءِ روگ ءَ مھناز ءَ اَنچو یک تُرسے مان روپ اِیت ءُ آ نگیگ بیت، برے برے آئی ءِ دل ءَ ھمے ھیال کئیت کہ میران ءَ چہ وانگ ءَ کَشّاں چو مہ بیت اے زالم میران ءَ ھم چہ من پچ بہ گِر اَنت۔۔۔
میران ھشتمی تبک ءِ نودربرے ءُ آئی ءِ پت وتی چُک ءِ شھیدی ءَ پد ھمائیں شُومّک ءِ نادراهی ءِ آماچ اِنت ءُ سرکاری نادراہجاہاں روگ ءَ آئی ءَ وتی وسّ کُتگ بلئے ھچ پرک ءُ پِیر نیست ءُ شرّیں نادراہ جاہانی روگ ءَ زرّ لوٹ اِیت زرّ ءِ ھستی ءَ آ شُشتگ ءُ سَپا اِنت، ءُ مھناز کہ دست ءُ مشینی گُد دوچ اِیت ءُ لاپ وارت۔ پمیشکہ مَرچی مھناز ءَ لوٹ اِت کہ بُرواں مِیر گُھرام ءِ گوْر ءَ بگندے من ءَ اے جَاوراں کُمک بہ کنت، واجہ ھر وھد ءَ میران ءِ پت ءِ گوْر ءَ اَتکگ میران ءِ پت ءَ واجہ ءِ ھرچ کار کُتگ بِیھ ھُشک ءَ راہ نہ داتگ، کارے کہ آئی ءِ دست ءَ بوتگ آئی ءَ کُتگ پہ واجہ ءَ چوکہ بانی بندگے، باگی کار ءُ مچّانی گُنش ءُ روپگ، دگہ روزینی کار، ءُ مئے وھد ءُ کَدیماں چہ پِیریناں بِگر دانکہ انّوں دراھیں مردماں ووٹ ھم میر ءَ را داتگ اَنت ۔ مَھناز ءَ لوگ ءِ کار ءُ چُلوپگ ھلاس کُت اَنت ءُ ھمے اُمیت ءَ سر گیپت ۔
مِیر گُھرام ءِ گِس باز دور نہ اَت نیم کلاک ءِ راہ بوتگ اَت۔ نیم کلاک ءَ پَد مہناز سَر بوت۔ مھناز ءَ دَر ٹُک اِت۔ بُنژلُک اِیں جَنکُّوے ءَ دَر پَچ کُت (زانگ بوت کہ واجہ ءِ کاردارے ءِ چُکّ اِنت) ۔
مھناز تہ ءَ پُترت۔ برانڈہ ءِ دیم ءَ تَھتے جَتگ اَت، مِیر ءُ آئی ءِ لوگبانُک تھت ءِ سر ءَ نشتگ اِت اَنت۔ میر ءِ چمّ کہ مھناز ءَ کَپت اَنت انچو درّائینت ئے ” زِلیکہ اِیش اِنت منی سنگت ءِ لوگ بانُکیں پیداگ اِنت “
زِلیکہ ءَ چَکّ ترّاِینت مھناز ءِ نیمگ ءَ کمّیں بچکند اِت۔ ءُ مھناز ءَ ھم مُرتگیں بچکندے وتی لُنٹانی سر ءَ نادلکشی تالان کُت ۔
سلام ءُ درْوت ءَ پد زِلیکہ ءَ کنورجاہ ءَ شُت پہ مھناز ءَ سُلیمانی چاہے ءُگلاسے آپ آؤرت۔
مِیر ءَ دیم گوں مھناز ءَ کُت ءُ کمرزانی کمّیں تُرْند تَر بست، مھناز منی گُھار تو ھالاں بدئے، مرچی پہ ھئیری اِینگو۔۔۔؟
مھناز : ھو واجہ ! پہ ھیری اَتکگ آں ۔
مِیر : ھاں۔۔۔، باریں ھالاں بِدئے چُکانی پِت چونیں؟ نادراہءَ چہ چون اِنت ؟
مھناز : واجہ ھُدا ءِ شُگر اِنت ، بلئے گھتری اِش نیست روچ پہ روچ ناجوڑ بوہان اِنت۔ مھناز ءَ گوں پُرشتگیں گالوارے گُشت۔
مِیر: ھَو ھَو ، ھاں ۔۔۔ گُڑا شُما چی اِرادہ کُتگ ؟ زرُّک مرُّک ءِ چِتگ ءُ اِیر کُتگ پہ اِلاج ءَ ؟
مھناز : اللّہ ءِ شُگر اِنت واجہ مئے ھال ءَ تو وت سرپدئے شپ کئیت ءُ شام نہ ئیت ۔ میران کسان اِنت کارے کُت نہ کنت ۔ دگہ چُک اللہّ ءِ شُگر اِنت ( گوں ھمے گپّ ءَ مھناز ءِ چمّانی تہ ءَ اَرس تِرْپگ ءَ لگّ اِت اَنت، مھناز ءَ مُرید گِیر اَتک )۔
مِیر: ھو امّاں ۔۔ اللّہ وَت ھئیر بِہ کنت مَرچاں دگہ شُومّکے مُلک ءَ کپتگ ۔ ھرکس ءَ اللّہ وت بہ پَھریز اِیت ۔
مھناز : ھو واجہ ! مئے وڈیں ھمشامیں مَردُمے وتی دو وھد ءِ نان ءَ دَر جت نہ کنت نوں کُجا چُشیں مزنیں بیماریانی اِلاج ءَ کُت کنت۔۔۔
(مھناز ءَ کمّیں گُشان شر کُت، ءُ نزانگ ءَ اَت کہ چون میر ءَ وتی آھگ ءِ سوَبّ ءَ بُگُش آں۔ پدا دل ئے ڈڈّ کُت ءُ گپّ ءِ بُنگیج کُت )
مھناز : واجہ! من تئی نیمگ ءَ اَتکگ آں ، من ءَ دگہ کسّے نیست ءُ میران ءِ پِت ءَ ھم دگہ مَردمے نیست ، نوں مئے چمّ اے وھد ءَ ترا سکّ اَنت ، تئی دست ءَ اگاں چیزّے بوت کنت واجہ پمّا بکن ، چہ اللّہ ءِ دَر ءَ بے سواب نہ بئے۔
مِیر : ھو مھناز ! منی دست ءَ اگاں چیزے بیت من الّم کناں ، اے ساھت ءَ اللّہ ءِ شُگر اِنت منی دست ءَ زرنیست۔ منی زر پَچ بنت من وت کایاں۔ تو بے پگر بُو۔
مھناز : شرّیں واجہ ! اللّہ ترا سبز ءُ آبات بہ کنت۔ من رواں گُڈا لوگ یَلہ اِنت ءُ شھداد ھم ۔۔
مِیر : شرّیں امّاں ، اللّہ میران ءِ پِت ءَ زُوت وش بہ کنت ، مئے دُوا مُدام گون اَنت ۔
(مھناز پاد اَتک ءُ مِیر ءَ ھم کمرزانی بوتک ءُ اُوشتات، مھناز دیم پہ مزنیں دروازگ ءَ راہ گیپت ۔۔۔)
مروچی آدینگ ءِ روچ اَت پمیشکہ میران چہ وانگجاه ءَ مھلہ گِس ءَ اَتکگ اَت ۔ میران کہ گِس ءَ اَتک مات ئے نہ دیست گُڈاں کمّیں پریشان بیت ، گِس ءِ یکّ یک ئے کُت ءُ بیماریں پت ئے ھم جُست کُت، ءُ کنورجاہ ءَ ھم چار اِت ئے بلئے مات ءِ نہ دیست، سَھتے ءَ پَد دروازگ ءَ توار کُت۔ میران ءَ سر چِست کُت داں مات اِنت دروازگ ءَ پُتِرت۔ آ کہ رَست میران ءَ انچو پُرس اِت۔
میران: ماتی کُجا بیتگے ؟ کئی لوگ ءَ ؟
مھناز : ابُّل من اِینگو میر ءِ لوگ ءَ شُتگاں ۔
میران : میر گُھْرام ؟ چی ءَ زاناں میر لوگ ءَ شُتگ ئے؟
مھناز : ھمے ہاتر ءَ کہ بلکیں میر پہ تئی پِت ءِ اِلاج ءَ چیزُکے زرّ بہ دنت ۔
میران : امّاں گُڈاں زَر دات ئے؟
مھناز : اِنّاں گُشی انّوں منی گوْر ءَ نیست، بیت گُڈا دیم دیاں۔
میران : ( دستاں سَر ءَ جنت ) اُپّڑےےے، امّاں میر ءِ گوْر ءَ کدی زَر مہ بیت ۔۔۔ اے سکّیں دروگ بند اَنت ماتی۔۔۔ اِیشانی کِرّ ءَ زَر اَست بلے مئے وڈیناں ندی اَنت ۔۔ انّوں منی سَنگتے ءِ مات ءَ میر ءِ گوْر ءَ کمّیں زَر لوٹ اِتگ کہ کراچی ءَ رواں چمّانی اِلاج ءَ آئی ءَ را اوں ھمے جواب اِش داتگ۔۔۔
مھناز : شرّیں منی چُک ، من وَ بس وتی گپّ جَت نوں دیگ ءُ نہ دیگ ھمائی ءِ دست ءَ اِنت۔۔ تئی پِت ءَ وَ باید کُمکّ بہ کنت کہ تئی پِت ءَ پہ میر ءَ کُجام کار نہ کُتگ !
میران : امّاں اے ھُشک ءَ مردماں کار گِر اَنت، اے کُمک ءِ باریگ ءَ گون نہ اَنت۔۔۔
اچانگے میران ءِ دِل ءَ اَتک کہ منی ھمکتب ھَیدر کہ آئی ءِ پِت ءَ تِیل ءِ گاڑی یے اَست ھمے بلکن وتی گاڑی ءَ منا دار اِیت ، اِد ءَ زرّ ھم ٹئیٹ رَس اِیت ۔ ھمے ھیال ءِ آھگ ءَ گوں میران گُشئے گَل ءَ بال بُوت، تچان ءَ کنورجاہ ءَ مات ءِ کِرّا شُت )
میران : ماتی ماتی ! ترا گُشاں ۔۔
مھناز : جی واجُل ! چِے گپّے ؟
میران: امّاں اِد ءَ پہ پت ءِ اِلاج ءَ کس نوکی مارا زَر نہ دنت۔ من ھمے جیڑ اِتگ مئے ھمساھگ ھیدر ءِ پِت ءَ زَمبادے اَست ھمشی ءِ گاڑی ءَ رواں گوں منا بلکیں دار اِیت من دو ماہ ءِ تہ ءَ چیزُکے زرّ درگیجاں داں پت ءَ ڈاکٹرے ءَ پیش بدار اِیں ۔
مھناز : بلے منی چُک تو وَ اینچو مزن نہ ئے تو کُجا زمباداں کار کُت کن ئے، جِند ءَ نُکسانے دئے ۔۔
میران : اِنّاں امّاں منی کدّیں چُک باز ھمے گاڑی آں گون اِنت آھاں ھِچ نہ بیت۔ منا ھم ھچ نہ بیت۔ من رواں ۔
مھناز : تئی وانگ ھراب بیت، وانگ ءَ نہ روئے زاناں ؟
میران : اِنّاں ماتی وانگ چہ ابّا ءَ شتر نہ اِنت من دو ماہ ءَ نہ رواں چیزُکے زرّ یکجاہ کناں، ءُ نوں وت چکّاس بہ ینت، چکّاساں رَند پدا داکِلہ زیراں ۔ وانگ پدا بیت بلے یکبرے ابّا وش بہ بیت ۔
مات ءِ چمّانی ارس شیپ گیپت اَنت آئی ءَ میران وتی امبازاں زُرت۔
مھناز : شرّیں ابُّل تو یکبرے لھتیں روچ ءَ سَبر کن بلکیں میر زرّاں راہ دنت ، اگاں میر ءَ زرّ نہ دات گُڑاں تو بُرو گوں۔
ھمے پئیم روچ گوْزان اِت اَنت۔ میران ءُ آئی ءِ مات ءَ داں شش روچ ودار کُت بلے مِیر ءَ زرّ دیم نہ دات ۔ مھناز ءَ جیڑ اِت کہ بِہ گندئے میر شمُشتگ۔ یکبرے دل ءَ لوٹ اِت ئے کہ میر ءِ نیمگ ءَ پدا بُرواں بلے وھدے کہ میر ءَ گُشتگ اَت زرّاں من وت کاراں گُڈاں مھناز ءَ وتی پاد داشت اَنت۔ ھمے پئیم دگہ دو روچ گوْست۔ مھناز ءَ چار اِت میر ھچ گُشگ ءَ نہ اِنت بِلّے میران روت ھال ءِ گِپت اگاں زرّ ءِ نہ دات گُڑاں دگہ ھچ راہ نیست، بِلّے میران زمباد ءَ روت گوں۔ یک شمبے ءِ روچ اَت میران ءِ وانگجاہ ءَ موکل اَت ۔ مھناز ءَ میران سُھب ءَ مھلہ راہ دات ۔
مات: میران ابّا تو بُرو میر ءِ ھالے گِر باریں زَرّ ءِ انگت دیم نداتگ اَنت۔
میران : امّاں من ترا گُشت اے زرّ نہ دنت بلے تو سرپد نہ بئے ۔ میران راہ گیپت۔
نیم کلاک ءَ پد میران میر ءِ لوگ ءَ سر بیت ۔ میر ھما روچیگیں جاہ ءَ تھت ءِ سر ءَ نشتگ اَت ۔ سِیگریٹے روک ءِ کُتگ اَت ۔ شیری چاہ ءِ کوپے دست ءَ اِت ئے ۔
میران تَچک ءَ میر ءِ گوْر ءَ شُت۔ گوں اُوشتاتگیں پاداں تَچک ءَ میر ءَ جُست ئے کُت ۔
میران : واجہ منی مات گُشی تو زرّاں کدی دیم دئے؟
بندات ءَ میر ءَ میران جاہ نیاؤرت جُست ءِ کُت۔
مِیر : تو کئے گوْنڈل ؟ نا سلام ءُ اَلیکے تَچک ءَ زرّ لوٹگ ءَ ئے !؟
میران : واجہ من شَھداد ءِ چُکّاں، مات ءَ منا دیم داتگ ۔
میر : ھاں ۔۔ بلئے بلئے تو شھداد ءِ چُکّ ئے ۔
میران : ھو واجہ ۔۔
میر : مات ءَ بُگش تو اَنگت دو سئے روچ ودار کن اِنشااللہ نوں زر کاینت ۔۔
میران ءَ کہ اے گپ اِش کُت اَنت انچو گوں ھاموشی ءَ راہ گیپت ۔
وھدے میران لوگ ءَ سر بوت گُڈا آئی ءَ گوں پُرشتگیں دلے مات ھال دات۔ گُڈّی ءَ مات ءَ میران ءِ گپّ زُرت ءُ میران گوں ھیدر ءِ پِت ءَ زمباد ءَ گون کُت ۔
میران ءِ مات هچ دلجم نہ اَت کہ میران تیل ءِ گاڑی آں گون بہ بیت ۔ چیاکہ اِد ءَ ھرّوچ گاڑی آنی یکدومی ءَ گوں ڈیکّ ورگ ءُ آس لگگ ، دومی نیمگ ءَ کوسٹ گارڈ ءِ نیمگ ءَ چہ تیر گواری ءَ ورناھانی شھید بوھگ ءِ ھال میتگ ءَ شِنگ اِت اَنت ۔ بلئے مھناز لاچاراَت پمیشکہ سِنگے دل ءِ سربُر ءَ اِیر ئے کُت ءُ ھاموش بوت ۔
میران ھپتگ ءِ سرا یک روچے اَتک مات ءَ را چیزُکے زرّ ئے دات ءُ پدا واتر شُت ۔
ھمے پئیم ءَ روچ گوْزان اِت اَنت کہ یک نیمگے میران ءِ پِت ءِ نگیگیں جاور ءُ دومی نیمگ ءَ میران ءِ تُرس ۔
یک شپے مھناز ءَ سَر نوکی واب ءَ داتگ اَت کہ آئی ءِ ھمساھگ تچان ءَ اَتک مھناز ءِ دروازگ ءِ ٹُک اِت ۔ مھناز گوں گُشادی ءَ پاد اَتک ، پہ تُرس ءُ لرز دروازگ ءِ نیمگ ءَ شُت ۔ مھناز ءَ دَر پَچ کُت داں ھیدر ءِ مات اِنت ۔ ھیدر ءِ مات گُشے ساہ ءَ یل داتگ اَت ، سبز تَر اِتگ اَت ، گپّ ءِ دَر نیاھگ ءَ اِت اَنت، ارس ءِ اُولمب اِت اَنت ۔۔ توار ءِ مُکّگ ءَ اَت ءُ گُشت ئے ; )
ھیدر ءِ مات : مھ ۔۔۔ مھھ ۔ ناز ، منی گُھ۔۔ ھار ، ۔۔ ( دیمترا گپّ ءِ در نیاتک اَنت)
مھناز : بُگش ، نازی چی بیتگ ۔۔؟ ھئیر اِنت ؟ ( مھناز ءَ نازی کمّیں امبازاں زُرت ۔ نازی ءَ دراجیں مُدّتے ءَ پَد گپّ پدا بُنگیج کُت )
نازی : ( ارس رچان اِت اَنت گُشت ئے) مھناز ھئیر نہ اِنت ۔ ھیدر ءِ پِت ءِ گاڑی ءِ سرا کوز گاٹ (کوسٹ گارڈ ) ءَ تیر گواری کُتگ ، ایشاں گاڑی تیز کُتگ دگہ گاڑی یے دیم ءَ پیداگ ءَ بوتگ لگّ اِتگ اَنت، گاڑی ءَ آس لگ اِتگ۔
(نازی چمّاں گوں گُشان ءَ لگاشگ ءَ اَت ، یک نیمے گریوگ ءَ اَت یک نیمے گپّ ءَ اَت۔)
مھناز : ( گُشئے مھناز ءَ ھچ باور نہ بوھگ ءَ اَت ) ابُّڑےےے ۔۔ گُڈا منی میران ۔۔ میران ءِ ھال نیست ؟
نازی : می۔۔ میی ۔۔ راان ۔ ھم آس ءَ گیپتگ ۔ بلئے اِیشانی لاش سک سُتکگ اَنت۔ منا بچک ءَ انچو گُشت ۔۔
مھناز : بچک ءَ ؟ کئے اِنت بچک ؟ الّےےےے منی چُکّ ءَ ھچ مبات ۔ ( مھناز گریوگ ءَ لَگ اِت ۔ )
نازی : نزاناں مئے بازار ءِ مردمے نہ اِنت ۔ ھمانگو ھِسپیتال ءَ چہ اَتکگ ۔ گُش اِیت کہ ھمانگو مردے لاشانی ھمبراہ بوتگ ، زاناں مئے میتگ ءِ مردمے بوتگ ہمائی ءَ پجّاہ آؤرتگ اَنت ۔ ھیسپتال ءَ اوں ھما گون اِنت گوں ۔ نوں اے بچک مئے رندا اَتکگ ۔
مھناز : ( گریوگ مھناز ءِ دل ءَ بند اَت بس ارس کتار اِت اَنت ءُ ڈکّ ڈکّ ءَ ساہ زیرگ ءَ اَت۔ ساہ پُر نہ بوھگ ءِ سوْب ءَ مھناز زمین سرا نشت ) اللہ من زاناں منی میران ءَ ھچ نہ اِنت ، اے دِگرے بِیت ۔
نازی : ( مھناز ءَ امباز کنت تسلّہ دنت ) زوت کن گُڈا بچک مارا بارت گوں ، اللہ ھئیرے بیار اِیت ۔
(مھناز ءُ نازی گُشاد گُشاد ءَ نازی ءِ لوگ ءِ دپ ءَ رست اَنت گاڑی ءَ سوار بوت اَنت ، گاڑی راہ گیپت ۔ )
دو کلاک ءَ پد گاڑی نادراھجاہ ءَ سر بُوت ۔ مھناز ءُ نازی گُشاد گُشاد ءَ ایر کپت اَنت۔ نادراھجاہ ءِ گیٹ ءِ دپ ءَ یک مزنیں جان ءَ پُرّیں مردے اُوشتاتگ اَت ۔ اے سیٹھ کمالان اَت ۔ ھیدر ءِ پِت ءَ ھمشی ءِ زمباد نیم پہ نیم گون اَت ۔ سیٹھ ءَ دوئیں زال توک ءَ بُرت اَنت ، سوجئےکُت اَنت کہ دیم ءِ وارڈ ءَ برو اِت ۔ مھناز ءُ نازی وارڈ ءَ پُترت اَنت ، اولی تھت ءِ سرا کسانیں شانزدہ سالی زھگے ءِ سُتکگیں لاش اِیر اَت ، دومی تھت ءِ سرا مزنیں مردمے ءِ لاش اَت ءُ دگہ دو تھت ءِ سرا ھم مزنیں مردمانی لاش اِت اَنت ، زانگ بیت کہ آ ھم ھمے یکّیں وئیل ءَ سُتکگ اِت اَنت ۔
ھیدر ءِ پِت ءِ بابت ءَ ڈاکٹر ءَ گُشت کہ ایشی ءِ سرا مارا شکّ اَست کہ تہ ءَ سلامت اِنت ، ما زُوت چاران ئے بلئے ایدگہ سے ئیں مردم ھلاس بوتگ اَنت ۔
مھناز ءِ ھاٹیگ ءَ جواب دات ھمودا تھت ءِ کش ءَ کپت ۔ پدا داں سئے شپ ءُ سئے روچ ءَ مھناز نادراھجاہ ءَ داکِل بوت۔ ایندگہ روچ ءَ ڈاکٹر ءَ مھناز رزا دات ءُ لوگ ءَ برگ بوت، تا ھودا شھداد ءَ ھم وتی کار ھیر کُتگ اَت۔۔۔۔
