روزیگی ھمسنتی ءِ بُنکی لیکہ ءُ بْریکس
(Basic Concept of Economical Alliance in perspective of BRICS)
موسیٰ بلوچ
دنیا بدل بوتگ، جنگانی ترز بدل اَنت، زی دیم پہ دیمی توپ ءُ بمبانی جنگ ات اَنت مرچگیں مستریں جنگ روزیگی بنیاد ءَ بوگ ءَ اَنت۔ مارا ھمے مٹ بوتگیں رھبند ءُ ترزکار پہمگ لوٹ اَنت۔ پمیشکہ اے سرھال ءِ سرا من جُہد کناں کہ وانوکاں روزیگی ھمسنتی ءِ بُنکی لیکہ ءِ بابت ءَ سرپدی بہ دیاں۔ اگاں ما روزیگی ھمسنتی ءِ گپ ءَ کناں گڑا مارا “بّرکس” دابیں ھمسنتی گندگ ءَ کاینت کہ آ سرجمیں دگنیا ءِ نظام ءَ مٹ کنگ ءِ یک شوربندیے زانگ بیت۔
دگنیا ءِ اے روزیگی گر ءُ چیلانی پہمگ ءِ ھاترا مارا دنیا ءِ سیاست سرپد بُوّهگ لوٹیت کہ درستیں چیز گوں سیاست ءَ بندوک اَنت۔ دنیا ءِ سیاست ءِ سرپد بوهگ ءِ ھاترا مارا دنیا ءِ تاکتوریں مُلک زانگی انت ءُ آ ملکانی سیت (انٹرسٹ) زانگی اَنت۔ دنیا ءِ ملکانی ھمسنتی (اتحاد) سرپد بُوهگ لوٹیت ءُ تاکت ءِ جند ءِ بزانت سرپد بُوگ لوٹیت۔ اے سرجمیں چیزانی سرپد بُوّهگ ءَ رند ،نوں ما دنیا ءِ سیاست ءَ سرپد بوت کنیں۔
مروچی دنیا ءِ تاکتوریں مُلکاں بگر دانکہ نزوریں مُلک کہ است اَنت آ لوٹ اَنت کہ ما دنیا ءِ تہہ ءَ ایدگہ ملکاں گوں ھمسنتی یے جوڈ بکنیں ءُ وتارا دنیا ءِ دیم ءَ تاکتور بہ کنیں۔ مروچی ھما سیئمی دنیا ءِ اِستان کہ اَست اَنت آ ھم لوٹگ اَنت کہ ما دنیا ءِ دیم تاکتور زانگ بہ بئیں۔ گڑا پمیشکہ آ یک دومی ملکاں گوں ھمسنتی جوڈ کن اَنت ءُ پمیشکہ آہاں جتائیں ھمسنتی ادارگ جوڈ کنگ کپگ ءَ اَنت، جوڈ کُتگ انت یاکہ روچ پہ روچ نوکیں ادارہ دیم ءَ پیداک اَنت۔
روزیگی ھمسنتی ءِ گوستانکی دیمروی: (History and development of economic Alliance)
روزیگی ھمسنتی (معاشی اتحاد) ءِ تصور سکّیں دیریگیں زمانگی تصورے کہ ہمسائگیں ملکانی یک دومیگ ءِ وت ما وتی نپ (میوچول بینیفٹ) ءِ ھاتار بوتگ اَنت ءُ ھمے وت ما وتی نپ ءُ سیتانی گرگ ءِ ھاترا کار ءُ بار ءِ رھبند ءُ راہ ءُ در جوڈ کنگ بوتگ اَنت۔ چوشکہ نوکیں روزیگی ھمسنتی (معاشی اتحاد) ءِ بُنھشت دومی جھانی جنگ ءَ پد دیم ءَ آرگ بیت۔ یورپی کوئلہ ءُ اسٹیل کمیونٹی ءَ جوڈ کُتگ کہ آئی ءِ من ءُ مراد وتی باسکاں یک همسنتی بازارے ءِ جوڈ کنگ بوتگ۔ ھمے ھمسنتی ءِ دیم ءَ برگ ءِ ھاترا 1957 ءَ یورپی یونین جوڈ کنگ بوت کہ ایشی ءِ تہہ ءَ 27 باسکیں ملک ھوار بوتگ اَنت۔ گوستگیں سالاں یورپ ءَ چہ دریں ملکاں ھم روزیگی ھمسنتی جوڈ کنگ بوتگ اَنت۔ پہ درور کینیڈا میکسیکو ءُ نارتھ امریکن فری ٹریڈ ایگریمنٹ ءُ “ٹرانس فیسیفک پارٹنرشِپ” انت کہ آئی ءِ تہہ ءَ فیسیفک رِم ءِ مُلک ھوار اَنت، اے معاہدہ ءِ مول ءُ مراد گَٹّ (ٹیرف) ءِ کم کنگ ءُ راجانی نیام ءَ کار ءُ بار ءِ گیش کنگ اِنت۔
روزیگی ھمسنتی ءِ جتائیں بہر ءُ تہر: (Types of economical Alliance)
-آجوئیں کارءُباری منگ نامگ: (free trade agreements)
روزیگی ھمسنتی ءِ بازیں بہر ءُ تہر ءُ وڈ ءُ پیم اَست اَنت۔ مروچیگیں دنیا ءِ تہا یکے پری ٹریڈ ایگریمنٹ اِنت۔ اے ھما ایگریمنٹ اِنت کہ دو ملک یاکہ دو ملکاں چہ گیش تجارتی سرمایہ کاری ءِ راه ءَ اڈانداں دور کنگ ءِ ھاترا یک معاہدہ اِنت۔ ایف ٹی اے ءِ مول ءُ مراد کاروباری گَٹّ (کمرشل ٹیرف) ءِ کم کنگ ءُ کاروبار ءِ رفتار ءَ تْرند کنگ اِنت ایشی ءَ چہ میاں اُستمانی کاروبار ءَ را دیمروئی دیگ بیت۔
-کسٹم یونین: (custom union)
اے ھما مُلکانی یک گل ئے کہ آیاں یکے دومی ءِ سامانانی سرا وتی ٹیرف کم کنگ ءِ ھاترا جوڈ کُتگ ءُ ھمے وھد ءَ جتا جتائیں کسٹم پالیسی ءِ برجاه دارگ ءِ سرا تپاک کُتگ۔ کسٹم یونین ءَ چوناہا سئے یا سئے ءَ گیش مُلک ھوار بنت ءُ آیانی مول ءُ مراد یونین ءِ تہہ ءَ سامانانی یکیں مارکیٹ ءِ جوڈ کنگ اِنت ءُ دگہ ملکانی نیام ءَ اسٹریٹیجک پارٹنرشپ اَست اِنت۔ پہ درور یو ایس ءُ جاپان ءِ اے دوئیں مُلکانی نیام ءَ تجارتی معاہدہ اَست اِنت کہ ایشی ءِ مول ءُ مراد دوئیں ملکانی نیام ءَ پائدگ ءِ گیش کنگ اِنت ءُ ھمے وھد ءَ ڈیجیٹل ٹریڈ، پروپرٹی رائیٹس، لیبر اسٹینڈرڈ ءُ ٹریڈ ءِ اے چاریں جیڑہانی گیشوار کنگ هم است انت۔
سوبمندیں اکنامک الائنس ءِ درور:(Example of Successful Economical Alliances
نورتھ امریکہ پری ٹریڈ ایگریمنٹ یک درورے کہ آ یک سوبمندیں معاشی اتحادے۔ سئے ملکانی نیامءَ میکسیکو،کینڈا ءُ یونائیٹد اسٹیٹ اے معاہدہ ءَ سئیں مُلکانی نیام ءَ سامانانی سرا گیشتریں ٹیرف ھلاس کُتگ ءُ یکے دومی ءِ معیشیت ءِ تہا سرمایہ کاری گیش کُتگ۔
دگہ یک درورے یورپی یونین اِنت کہ آئی ءَ شوکیں سروس ءِ ھاترا سنگل مارکیٹے جوڈ کُتگ یورپی یونین ءَ یک مشترکہ کرنسی یورو ءِ ھم جوڈ کُتگ کہ چریشی ءَ چہ اے دمگ آں تجارت ءِ آسراتی گیش بیت۔
جاپان ءُ امریکہ ءِ نیام ءَ تجارتی معاہدہ یک سوبمندیں اتحاد ئے۔ اے معاہدہ ءَ چہ امریکہ ءَ جاپانی درآمدت ءِ سرا ٹیرف کم کنگ بوتگ ءُ جاپانی چیزانی امریکی مارکیٹ ءَ دزرس ءَ را گیش کنگ بوتگ۔ اے سرجمیں دروراں چہ اے چیز پدّر بیت کہ معیشیت ءِ دیمروئی ءِ تہہ ءَ گیشی اَتک کنت وھدیکہ سوبمندیں رنگے ءَ ایشی ءِ سرا کار کنگ بہ بیت۔
* سیت ءُ تاکت:(Interest And Power)
اگاں انٹرسٹ ءُ تاکت ءِ گپ ءَ بہ کنیں گڈاں دنیا ءِ ملک ھمے دوئیں گالبندانی بنیاد ءَ جُنزگ ءَ اَنت آ لوٹاں کہ ما وتی انٹرسٹاں دومی مُلکانی ھمسنتی چہ بگ اَنت ءُ دنیا ءِ دیم ءَ یک تاکتوریں مُلکے زانگ بہ بنت۔اگاں مروچی ما چین امریکہ روس انڈیا یاکہ کُجام ھم سیمی دنیا ءِ اِستان است اَنت آیاں وتی سیادی انچوں شنگ ءُ تالان کُتگ ءُ دومی مُلکانی گوما اتحاد جوڈ کتگ۔ پہ درور مروچی چین اِنت کہ آ مروچی معیشیت ءِ نام ءِ سرا جتائیں مُلکانی گوما اتحاد جوڈ کنگ ءَ اِنت۔ روس اِنت کہ ھمے وڈ اِنت آ امریکہ ءِ مزنیں اتحادی اِنت یاکہ سیمی دنیا اِستان بہ بنت آ “برکس” ءِ نام ءِ سرا اتحاد جوڈ کنگ ءَ اَنت۔G20 ءِ نام ءِ سرا اتحاد جوڈ کنگ ءَ اَنت دانکہ آ وتی سیادیاں گیش کُت بہ کناں ءُ وتی زوریگی ھساب ءَ سیت ءُ نپاں سرجم کُت بکناں۔
اگاں تاکت ءِ گپ بیت گڑا تاکت مارا سئے چیزانی تہا گندگ ءَ کئیت، آرڈ پاور، سوفٹ پاور ءُ سمارٹ پاور ءِ اے سئیں تاکت ءِ بہر اَنت ہارڈ پاور ھما پاور اِنت کہ آ توپک ءِ جنگ گُشگ بیت ءُ جونانی دور دئیگ ءَ بیت۔ پہ دورو مروچی ھمے ہارڈ پاور ءِ زور ءَ اسرائیل ءَ پلستین ءِ تہا تبائی کُت اُودے مردم جت اَنت مردم کُشت اَنت کسان کسانیں ورناہانی جون دور دات اَنت۔ اگاں دگہ درورے بزیریں مروچی پاکستان ھم ھمے وڈا اِنت ہارڈ پاورے زور ءَ بلوچ ءَ جَنَگ ءَ اِنت بلوچ ءَ کُشگ ءَ اِنت بلوچانی جون آں دور دیگ ءَ اِنت۔
سافٹ پاور ھما پاور اِنت کہ آ سافٹ ایں طریقہ ءَ بیت پہ درور بیانیہ ءِ جوڈ کنگ سافٹ پاور انت۔معیشیت ءِ اتحاد جوڈ کنگ انسٹی ٹیوٹ اَنی جوڈ کنگ اے سرجمیں چیز سافٹ ایں گامگیج انت۔ اگاں ما سافٹ پاورے درورے بہ زوریں چوشیں بازیں مُلکانی درور مارا گندگ ءَ کاینت مروچی چین گیشر سافٹ پاور ءَ کارمرز کنگ ءَ اِنت آ معیشیت ءِ نام ءِ سرا ملکانی گوما اتحاد جوڈ کنگ ءَ اِنت اگاں ما چین ءُ سری لنکا ءِ درور ءَ بہ زوریں چین رؤوت سری لنکا ءَ وام دنت وھدیکہ آئیءِ پدکردءَ چین سری لنکا ءِ کِرّا وامانی پچ گرگ ءَ رؤوت گڑا اے وھد ءَ امریکہ ءِ کِرّا اِنچو زر نہ بیت کہ سری لنکا ءِ واماں دات بہ کنت گڑا ھمے وھد ءَ چین سری لنکا ءِ پورٹ ءَ وتی قبضہ ءَ کنت۔ دومی نیمگ ءَ چین مروچاں کنپیشنز انسٹی ٹیوٹ پچ کنگ ءَ اِنت۔ وتی بیانیہ ءَ دنیا ءِ تہا گیش کنگ ءَ اِنت۔ دگہ یک درورے مارا پاکستان ءُ بلوچ ءِ گندگ ءَ کئیت پاکستان وھدیکہ بلوچ ءِ چکچینی ءَ کنت مردماں گار ءُ بیگواہ کنت مردمانی لاشاں ویرانگاں دور دنت ءُ گوشیت کہ اے ایجنٹ بیتگ اَنت یاکہ اے مردم گار نہ اَنت، ایشاں لوگاں چہ زہر کُتگ شُتگ اَنت ڈنّی مُلکاں اے سرجمیں بیانیہ سافٹ ایں دروشُم ءَ بُوگ ءَ اَنت۔
سمارٹ پاور ھما پاور اِنت کہ آئی ءِ تہا ہارڈ پاور ءُ سافٹ پاور دوئیں ھوار کارمرز بنت پہ درور اگاں مُلکے ءَ سافٹ پاور کارمرز کنگی بوت سافٹ پاور ءَ کارمرز کنت اگاں مُلکے ءَ ہارڈ پاورءِ زلورت کپت گڑا ہارڈ پاور ءَ کارمرز کنت۔ ایشی ءِ درور ءَ ما امریکہ ءَ زوریں امریکہ ھما ملک اِنت کہ دوئیناں ھوار کارمرز کنگ ءَ اِنت۔
بْرکس:(BRICS)
اے سرجمیں چیزانی سرپد بُوگ ءَ رند نوں ما “بْرکس” ءَ پہمگ ءِ جہد کناں۔ “بْرکس” پنچ ملکانی یک ھمسنتی یے کہ آہانی تہ ءَ برازیل،روس، انڈیا، چائینہ ءُ ساؤتھ افریکہ ھوار اَنت۔ ایشانی لوٹ ھمیش اِنت کہ گلوبل جیوپولیٹکس آهوکیں وھد ءَ چوں دیما برگی اِنت، ٹریڈ چوں دیم ءَ برگی اِنت، انفراسٹریکچر ڈیولوپمنٹ ءَ چون بُوهگی اِنت۔ اے سرجمیں چیز اِیشانی بُنکی لوٹ اَنت۔ ایشانی بنداتی وھد ءَ انٹر نیشنل کانفرنس یے بیت ھمے انٹرنیشنل کانفرنس ءِ تہ ءَ 4 ملک ھوار بنت آیانی تہہ ءَ برازیل، انڈیا، چائینہ ءُ ساؤتھ افریکہ ھوار بنت۔ بلے روس ھوار نہ بیت روس اے سوب ءَ ھوار نہ بیت کہ اے وھد ءَ روس ءِ پریزیڈنٹ پوٹن آئی سی سی کیس ءِ سرا دزگیر کنگ ءِ بیھار دیگ بیت۔ اگاں پوٹن چہ وتی مُلک ءَ چہ در اَتک دگہ مُلکاں شت گڈاں آ گِرگ بیت ھمے ھاترا پوٹن اے کانفرنس ءَ ھوار نہ بیت۔
اے اتحاد ءِ بُنیاد 2009 ءَ ایر کنگ بیت۔ بنداتی وھد ءَ اے اتحاد ءِ نام بی آر آئی سی (برک)بیت ایشی ءِ تہ ءَ چار مُلک ھوار بنت آہانی تہہ ءَ برازیل، روس، انڈیا ءُ چائینہ ھوار بنت۔ پدا سکینڈ سمٹ ءَ بزانکہ 2010 ءَ ایشی ءِ تہا ساؤتھ افریکہ ھوار بیت۔ چوناها ایشی ءِ بنیاد ءَ روس ایر کنت روس اے سوب ءَ ایر کنت کہ ویسٹ ءِ دست دراجی دنیا ءِ تہا ھتم کنگ بہ بیت گڑا آ ھمے ھاترا اے اتحاد ءِ بنیاد ءَ ایر کننت۔ پدا سئیمی سَمٹ ءَ 10 مُلک ھوار بنت، مطلب 5 دگہ مُلک ھوار کنئگ بیت کہ آہانی تہہ ءَ ایجپٹ، اِیتوپیا، انڈونیشا، یواےای ءُ ایران۔ اے گش انت کہ ویسٹ ءِ ھما کہ ولڈ آرڈر اِنت ما پرچہ آئی ءَ پشت ءَ بہ رؤویں ما وتی ولڈ آرڈر ءَ زوریں ءُ جوڈ کنیں ءُ ما ویسٹ ءِ داتگیں ولڈ آرڈر ءَ نہ من ایں۔
آبادی: (Population)
اگاں ما “بْرکس” ءِ ملکانی آبادی ءَ چارگ ءِ جہد بکنیں داںگندگ بیت کہ انڈیا دنیا ءِ 18 درسد آبادی ءِ واھند اِنت۔ ایشی ءَ ابید برازیل 3 درسد، روس 2 درسد، ایتھوپیا 2 درسد، ایجپٹ 1 درسدے، ایران 1 درسدے ءُ ساؤتھ افریکہ 1 درسدے ءِ واھند اِنت۔ بلے پدا دومی نیمگ ءَ کہ یورپ ءَ چارے گڑا آئی ءِ آبادی 6 درسد اِنت ءُ امریکہ ءَ چارے امریکہ ءِ آبادی 4 درسد اِنت۔ اے دوئیں مُلکانی آبادی ءَ ھوار بک ئے بچارے کُل 10 درسد آبادی بُوهگ ءَ اَنت ءُ “بْرکس” ءِ ممبراں چارے آیانی آبادی کُل 36 درسد بُوهگ ءَ اِنت۔ ھمے ھاترا آبادی ءِ ھساب ءَ “بْرکس” ءِ سان گیشتر انت۔
* جی ڈی پی ءُ ایکسپورٹ:(GDP And Export)
اگاں جی ڈی پی ءُ ایکسپورٹ ءِ ھوالہ ءَ بچارے داں گندگ بیت کہ “بْرکس” جی ڈی پی ءِ ھوالہ ءَ دومی نمبر ءَ اِنت۔ ایکسپورٹ ءِ ھوالہ ءَ کہ چارئے گڑا ایکسپوڑٹ ءِ ھوالہ ءَ ھم یورپ یاکہ امریکہ دیم ءَ اَنت۔ ھمے ملک کہ “بْرکس” ءِ تہہ ءَ ایشانی ایکسورٹ چون اِنت۔ پہ درور انڈیا ءَ اگاں ایکسپورٹ ءِ ھوالہ ءَ چار ات آئی ءِ ایکسپورٹ 3 درسد اِنت۔ چائینہ ءِ 11 درسد اِنت، برازیل ءِ 1 درسدے ءُ روس ءِ 2 درسد اِنت۔بلے پدا دومی نیمگ ءَ یورپ ءُ امریکہ ءِ ایکسپورٹ ءَ چار ات داں گندگ بیت کہ یورپ ءُ امریکہ ءِ ایکسپورٹ ءِ دسد چہ برکس ءَ گیشتر انت۔ چوشکہ “بْرکس” ءَ یورپ ءِ جند تہنا کہ تہنا 31 درسد ایکسپورٹ کنگ ءَ اِنت دومی نیمگ ءَ امریکہ اِنت کہ آ 10 درسد ایکسپورٹ کنگ ءَ اِنت۔
نوں ادا چہ ما چاریں کہ ورلڈ آرڈر ءِ جند منگ بوهگ ءَ اِنت یا نا؟ اے ولڈ آرڈر ءِ جند چہ کُجا پیداک اِنت؟ چوناہا اے ورلڈ آرڈر ءِ جند مارا چہ یورپ ءَ گندگ بُوهگ ءَ اِنت۔ اے ورلڈ آرڈر ءِ جند مارا چہ امریکہ ءَ گندگ بُوهگ ءَ اِنت۔ اے یورپ ءُ امریکہ یکجاہ بوتگ اَنت ءُ گلوبل نورتھ جوڈ کُتگ ءُ آ دگہ مُلک گلوبل ساؤتھ ءِ مُلکاں گلوبل ساؤتھ ءِ مُلک غریب مُلک ءُ سئیمی دگنیا ءِ مُلک زانگ بنت۔ ھمے کہ گلوبل نورتھ اِنت ایشانی دنیا ءِ تہا آرڈر کارمرز بوهگ ءَ اِنت۔ ایشاں امریکہ ءُ یورپ لیڈ کنگ ءَ اَنت آ ہر چیزءَ هق ءُ راستی ءِ گپ ءَ کن اَنت۔ چوشکہ اقوام ءِ متحده ھماهانی دست ءَ اِنت۔ اگاں ما غزہ ءُ اسرائیل ءِ درور ءَ بہ زوریں غزہ ءُ اسرائیل جنگ ءِ تہہ ءَ مارا گندگ ءَ کئیت کہ امریکہ اسرائیل ءِ پُشت ءَ اُوشتاتگ ءُ اسرائیل اُودا تبائی کنئگ ءَ اِنت نوں “بْرکس” لوٹگ ءَ اِنت کہ سرجمیں دنیا ءِ ٹریڈ ڈالر ءِ تہہ ءَ بہ بیت۔ اے کہ ساؤتھ ءِ مُلک اَنت اے ھم “بْرکس” ءِ تہہ ءَ ھوار بُوگ ءَ اَنت ءُ روچ پہ روچ “بْرکس” وتارا شنگ ءُ تالان کنگ ءَ اِنت۔ اے سرجمیں چیز ویسٹ بگیر ءَ بُوهگ ءَ اَنت،چیاکہ ایشی ءِ تہہ ءَ روس ءُ چین ھوار اَنت ءُ آ ویسٹ ءِ ھلاپ اَنت ءُ ویسٹ ایشانی ھلاپ اِنت۔
اِدا چہ امریکہ ءِ رُول بیسڈ آرڈر چیلنج بُوهگ ءَ اِنت ءُ امریکہ چین ءُ روس ءِ دژمن اِنت۔ درستاں چہ گیش امریکہ ایشاں وتی زد ءَ کنگ ءِ کہ اے رول بیسڈ آرڈر ءَ منگ ءَ نہ اَنت۔ اگاں دومی نیمگ ءَ چین ءُ روس ءَ چارئے، اے ھمے گش اَنت کہ اے ویسٹ ءِ سسٹم اِنت ءُ دنیا ءَ پائدگ دئیگ ءَ نہ اِنت اے در انصافی آرڈرے۔ ھمے سوب ءَ چہ دنیا ءِ تہہ ءَ غریبی اِنت، گران نہادی اِنت، بے روزگاری ءُ نا برابری تالان اِنت۔ اے امریکہ ءُ ویسٹرن آرڈر ءِ سرا بہتام اَنت کہ “بْرکس” ءِ مُلک گوشگ ءَ اَنت نوں اے درستیں گپّاں ھما کہ سئیمی دنیا ءِ اِستان اَست اَنت آ گش انت کہ دنیا ءَ نوکیں ولڈ آرڈرے ءِ درکار اِنت۔ انچیں ولڈ آرڈر ءِ درکار اِنت کہ اُودا برابری بہ بیت، مال ءُ مڈیانی بہر ءُ بانگ بہ بیت۔ سیمی دنیا ءِ اِستان ھمے ھاترا ایشی ءَ ھوار بُوهگ ءَ اَنت کہ آ برابری ءِ سسٹم ءَ گندگ ءَ اَنت۔ “بْرکس” ءِ تہہ ءَ روس ھم ویسٹ ءِ ملکاں ھمے گشگ ءَ اِنت کہ شما من ءَ ھمنچو چیر ترین اِت گڑا من شُمئے ھلاپ ءَ یک برابریں نظامے ءِ بندات کناں۔ اے وھد ءَ روس ءُ چین ءَ ھوار ھمے کوشش کنگ ءَ اَنت کہ ملٹیلیٹرازم ءِ نیمگ ءَ روهگی اِنت۔ امریکہ ءُ ویسٹ ءِ دست ءَ چہ چیز کشّگ بہ بنت دانکہ مارا فائدگ بہ بیت۔
“بْرکس” ءِ 2024 ءِ باوست ءُ منگ نامگ: (Discussion and agreement in 2024 BRICS)
اے وھد ءَ “برکس” ءِ تہہ ءَ باوست ھمے بوتگ کہ لوکل کرنسی ءِ تہہ ءَ “برکس” ءِ ملک ٹریڈ بکن اَنت۔ ایشی ءَ چہ مراد وتی سسٹم ءَ دیم ءَ آرگ ءِ جُہد ءَ اَنت۔ اے گش اَنت کہ وتی سسٹم بئیت ءُ اگاں نوکیں ورلڈ آڈر ءِ گپ ءَ بہ کن ئے ایشانی تہہ ءَ مستریں شئے معیشیت اِنت کہ آئی ءِ باز ارزشت اَست۔ پرچہ کہ ھمے معیشیت اِنت کہ ویسٹ ٹارگٹے کنگ ءَ اِنت آ آئی ایم ایف ءِ دروشم ءَ مارا گندگ ءَ کئیت، یاکہ ویسٹرن پابندیانی دروشم ءَ مارا گندگ ءَ کئیت۔ پہ درور ایران ءِ سرا پابندی اَنت۔ ھمے ھاترا امریکہ پاکستان ءَ ھمے گوشیت کہ تو ایران ءِ گوما ٹریڈ کُت یاکہ اتحاد یا ھمسنتی جوڈ کُت من تئ سرا پابندی جنآں۔ اگاں نوکیں ورلڈ آڈر بہ بیت گڈا چہ پابندیاں اے مُلک رکّ ات کن اَنت۔ ابید ءِ تُرس ءَ ٹریڈ کُت کن اَنت۔ اے باوست ءِ جند 2023 ءَ ھمے اتحاد ءِ گوما بوتگ پدا 2024 ءَ مارچ ءِ ماه ءَ دوبر ایشی ءِ سرا گپ ءُ باوست بوتگ ءُ نوں ایشی ءَ دیم ءَ برّگ ءَ اَنت۔ اے لوٹگ ءَ انت کہ انوں مارا برابری یاکہ کرنسی سسٹم دیم ءَ آرگی اِنت دانکہ ڈالر ءَ چہ وت ءَ بہ رکّین اَنت۔
ھندوستان ءُ چائینہ ءِ میانی تْران: (India china Bilateral Talk)
اے دوئیں مُلکانی گپ ءُ ھبر دنیا ءِ دیم ءَ پدّر بوتگ اَنت۔ ایشی ءِ سوب ایش اِنت کہ “برکس” ءِ سَمٹ ءَ چہ پیسر اے دوئیں مُلکانی یک نیامی منگ نامگ (میوچول ایگریمنٹ) یے بیت۔ منگ نامگ چین ءُ کشمیر ءِ سرا بیت، پرچہ کہ ما سرپدیں کہ چین ءُ کشمیر 1960 ءِ دھک ءَ چہ جنگ کنگ ءَ اَنت۔ ھمے وھد ءَ چین ءِ فورس ایکچول لائن آف کنٹرول ءَ چہ دیم ءَ کئیت گڈا اے ھمے گش انت کہ لکیر ءَ چہ ڈن پد بہ کنز اِت۔ ھمے ڈنّ ءَ روّگ ءِ سوب اِنت کہ “برکس” ءِ ھمسنتی ءَ دوئیں مُلک نند انت ءُ وت ما وت ما وت منگ نامگے کن اَنت۔
اکنامک کورپوریشن ءِ بندات: (Economic Cooperation Initiative)
ایشی ءِ تہ ءَ گّلہ ءِ ردّ ءُ بدل (گرین ایکسچینج) ءِ گپ ءُ باوست بیت۔ اِدا “برکس” ءِ ھما کہ مُلک اَست اَنت پہ درور روس برازیل ساؤتھ افریکہ اے مُلک اَنت کہ دنیا ءِ پنچُمی نمبر ءَ ھوار اَنت کہ آ گلّہ پیداک کنگ ءَ اَنت کہ ایشانی ایگریکلچر زبردست اِنت ءُ دنیا ءِ لوٹاں پورا کنگ ءَ اَنت۔ اے ھمے گش اَنت کہ گلّہ ءِ ردّ ءُ بدل ءَ ما لوکل کرنسی ءِ تہ ءَ کناں مارا فائدگ رسیت۔پرچہ کہ زیادہ جنگ ءِ تہہ ءَ نپ بُوهگ ءَ اِنت۔ آ روس ءَ بُوهگ ءَ اِنت . اے ملکانی جند مجبور اَنت کہ روس ءِ سرا پابندی جن اَنت۔ ھمے ھاترا سیمی دنیا ءِ اِستان ھمے جنجالانی دیمپان انت۔ اگاں اے وتی جند ءِ گلّہ ءِ ردّ ءُ بدل ءِ نظام ءَ دیم ءَ بیار اَنت گڈاں فوڈ سیکورٹی اے ملکانی گیش بیت۔ اے تُرس بوتگ کہ امریکہ اے ملکانی زر دیگ ءِ سسٹم (پیمنٹ سسٹم) ءَ داریت یاکہ امریکہ ایشانی ھلاپ ءَ گامگیجے زورایت۔
سیمسراں آدست زرّی ترزکار: (Cross Boarder Financial Mechanism)
ایشی ءِ تہہ ءَ ھمے گپ ءُ باوست بیت کہ سیمسراں آدست زرّی ترزکار امریکن ترزکار اِنت ءُ ایشی ءَ چہ وتارا بہ کش اَنت ءُ وتی یک بینکنگ سسٹمے دیم ءَ بیار اَنت۔ ایشی ءِ تہہ ءَ “بْرکس” ءِ مُلک ٹریڈ کُت کن اَنت چاہے آ گلّہ بہ بیت یاکہ دگہ چیزے۔
برکس ءِ ویکسینی بُنجاہ:(BRICS Vaccine Center)
ایشی ءِ تہا ھمے گپ ءُ باوست بیت کہ مارا ویکسین ءِ بُنجاھے جوڈ کنگی اِنت، پرچہ کہ انگت ما ویسٹ ءَ گوں بندوک اِنت۔ مارا وتی یک ویکسین بُنجاھے جوڈ کنگی اِنت دانکہ ما ویسٹ ءَ گوں بندوک مہ بنت۔
آسر:
دنیا ابرم اِنت کہ یک تاکتوریں ملکے گوں دومی ملک ءَ وتی تاکت ءِ گیش کنگ یاکہ دومی تاکتا! چہ وت ءَ رکینگ ءِ ھاترا جنگ ءَ اِنت۔ بلے بیست ءُ یکمی کرن ءَ تاکت وت ءَ ما وت ءَ جتائیں دروشُم ءَ جنگ ءَ اَنت۔ زانتکارانی گُشگ اِنت کہ دنیا ءِ سئیمی جہانی جنگ روزیگی بنیاد ءَ بیت۔ گڑا مرچی ما گندگ ءَ اَنت کہ مزنیں تاکت گوں یک دومی چونیں روزیگی جنگے ءِ تہ ءَ کپتگ اَنت۔ ھمے روزیگی جنگ ءِ تہہ ءَ مارا جتائیں ملکانی وت ما وت ھمسنتی گندگ ءَ پیداک اِنت۔ یک نیمگے امریکہ ءُ ویسٹ ءُ گڑا دومی نیمگ “برکس” ءِ ھواریں ملک اَنت۔ برکس ءِ جوڈ کنگ ءِ مول ھمیش اِنت کہ آئی ہواری لوٹ اَنت کہ ما ویسٹ ءِ ایجمنی ءَ دنیا ءِ تہہ ءَ ھلاس بکن اَنت۔
بلوچ ورناہاں دنیا ءِ مٹ بوکیں ھالت وانگی ءُ پہمگی اَنت دانکہ ما بلوچ ءَ گوں دنیا ءَ ھمدپ کُت بکنیں ءُ دنیا مٹ بوکیں ترزداباں سرپد بہ باں ءُ وت ءَ مھکم کنگ ءِ جہد بکن اَنت۔
