بساک، زانت ءُ زانشت ءِ مہکمیں کاروان
سارہ بلوچ
بساک ہما وابانی دروشُم اِنت کہ ایردستی ءِ تھاری ءَ ھم آئی ءَ رژنائی شوھاز اِتگ۔ اے گل ایوک ءَ نودربرانی مچی یے نہ اِنت بلکیں یک لیکہ یے، یک پگری جُنزے کہ اودءَ ند سلاہ اِنت ءُ شعور گھگیری اِنت۔ بساک ءَ اے راج ءِ ورناھاں ھمے سرپدی داتگ کہ زانت ایوک ءَ وانگ نہ اِنت بگندے جیڑگ، جُست ءُ پُرس کنگ ءُ زوراکی ءِ ھلاپ ءَ اوشتگ ءِ پدیانک اِنت۔ اے ہما جُنز اِنت کہ آئی ءَ بے تواراں توارے داتگ، ترس آما چیں زھناں ہمت بکش اتگ ءُ گاریں واباں نوکیں بزانتے داتگ۔
بلوچستان ءِ سرزمین دائم پگری رژناھی ءُ شعور ءِ بُنجل بوتگ ءُ است اِنت۔ اے ہما مٹی اِنت کہ اود ءَ کوہ ءُ دریا، درچک ءُ دار، مور ءُ مُرگ ھم گھگیری ءِ کِسہاں گش اَنت۔ بلوچ راج ءِ ورنایاں ھر وھد ءَ زانت تاگت ءُ گھگیری وتی راجی ڈُبہ لیک اِتگ۔ آ گہگیری زانت ءِ دروشم ءَ مُدام زِندگ ءُ برجاہ بیتگ۔ بلوچستان ءِ گلزمین مدام چہ زانت ءُ شعور ءِ رُژن ءَ رژناہ بیتگ۔ بلوچ ورناہاں زانت ءَ نہ ایوک ءَ نصابی پڑ ءَ سر کتگ بگندے پگری سرپدی ءُ راجی ھزمت ءِ وسیلہ ھم جوڑ کتگ۔ بلوچ اسٹوڈنٹس ایکشن کمیٹی (بساک) ھمے پگری درچ ءِ نام اِنت کہ ورناھاں چہ بے حسی ءَ در کنت ءُُ شعور، ءُ باسمائی ءِ سفر ءِ نیمگ ءَ بارت ءُ سر کنت۔
بساک ءَ مُدام وتی مراگش، سیشن، وانگ ءُ زانگی چست ءُ ایرانی وسیلگ ءَ یک انچیں فکری چاگردے جوڑ کتگ کہ ایشی ءَ نہ ایوک ءَ وانگ ءُ زانگ ءِ ادارگانی سرءَ بلکیں کلیں بلوچ راج ءِ سرءَ جہلانکیں سان دور داتگ انت۔ ہمے کارانی تہ ءَ سائنسی مراگش، لبزانکی دیوان، تعلیمی ورکشاپ، ءُ پگری بحث ءُ تران ھوار اَنت کہ ورناھاں پہ زانت ءُ سرپدی ءِ نوکیں دروازگاں پچ کن اَنت۔
وانگ ءُ ہیلکاری ءِ سر ءَ جہد
بلوچ نودربرانی پگری ءُ اکلاکی تربیت بساک ءِ مستریں مول ءُ مراداں ہوار اِنت۔ گل ءَ پہ زھگاں لبزانکی کار بندات کتگ کہ اے رِد ءَ زھگانی لبزانک ءِ جوڑ کنگ، اکیڈمک ءُ کیرئیر کونسلنگ ءِ مراگشانی برجم دارگ ءُ پہ آھاں وانگ ءُ زانگ ءِ تچکیں مول ءُ مراد ءِ سرپد کنگ ھوار اَنت۔ ھمے سوب اِنت کہ مرچی بساک ءِ جُہد ءَ بلوچ زھگانی واستہ نہ ایوک ءَ وانگ ءُ زانگ ءِ ھُبناکی ودی کُتگ بگندے وتی زبان، دود ءُ ربیدگ، ءُ راجدپتر ءَ گوں ھمگرنچ بوھگ ءِ سنچ ودی کُتگ۔ بساک ءَ زھگانی لبزانک ءِ دیمروئی ءَ گوں راجی جوڈشت ءِ سپر ءَ پگری درچ ءِ بُن ھشت ءَ را مھکم کتگ۔
سائنسی سرپدی ءُ نوکیں پِگر
بساک بلوچ چاگرد ءِ تہ ءَ سائنسی مراگش اڈ دیگ ءَ اِنت۔ اے مراگش ایوک ءَ پیشدارگ ءِ نہ اَنت بگندے بلوچ راجمان ءَ نوکیں سائنسی زانشت ءِ درنگازی ءِ گام اَنت کہ اود ءَ ورناہاں پٹ ءُ پول، نوکیں چیز، ءُ نبشتہ کاری ءِ ھاترا سرپدی دیگ بیت دانکہ بلوچ ورنا سائنسی پِڑاں گوں زانت ءُ زانشت ءَ سپر ءَ گیش مہکمی ءَ رہادگ بہ بیت۔ بساک ءِ گمان اِنت کہ راجانی دیمروئی گوں سائنس ءُ پِگری سرپدی ءَ بندوک اِنت۔ پمیشکا گل ءَ وانگ ءُ زانگی ادارھانی تہ ءَ انچیں چاگردے دیم ءَ آؤرتگ کہ اود ءَ سائنسی زانشت گوں راجی جُنز ءَ ہمگرنچ بہ بیت۔ مرچی بساک ءِ سائنسی مراگش ورناھانی تہ ءَ پٹ ءُ پول ءُ پٹ ءُ پول ءِ جزبگ ءَ زندگ کنگ ءَ اِنت کہ بلوچستان ءِ باندات ءَ رژناہ بہ کنت۔
راجی بامرد ءُ میراثانی پہریزگ
بساک ءَ مدام بلوچ راجی بامرد، اُستاد، لبزانک کار، دانشور ءُ رھشون ساڈاتگ اَنت۔ گل ءِ چیر دستی ءَ برجم داشتگیں مراگش، سیمینار ءُ لبزانکی دیواناں نوکیں پدریچ وتی راجی بامردانی پگر ءُ لیکہاں گوں ہمگرنچ کتگ اَنت۔ بساک ءِ گمان اِنت کہ راج ھما وھد ءَ زندگ بنت کہ آ وتی بامرداں یات بہ کن اَنت۔ اے رد ءَ گل ءَمبارک قاضی، سید ظہور شاہ ہاشمی،عبدالعزیز کرد، عطا شاد، آزات جمالدینی، صبا دشتیاری ءُ دگہ ادیب ءُ زانتکار ءُ رژنا پگرانی سر ءَ مراگش ءُ سیشن برجم داشتگ اَنت دانکہ نودربر پگری گھگیری ءُ شعور ءِ رژنائی ءَ برجاہ دارگ ءِ رھبنداں بہ زان اَنت۔
بلوچ چاگرد ءَ بساک ءِ سان
بساک ءِ مراگش ءُ کاراں چاگرد ءِ تہ ءَ یک جوانیں سانے دور داتگ ءُ مٹی یے آورتگ۔ نودربراں وانگ ءُ زانگ ءِ نیمگ ءَ آرگ، وانگجاہانی وانگی رھبند ءِ مھکمی،شعوری ءُ نظریاتی ھوالہ ءَ نودربرانی تربیت بساک ءِ مستریں سوبمندی اِنت۔ اے ادارہ ورناھاں ایوک ءَ کتابی زانت نہ دنت بگندے آھاں راستی ءِ سرءَ جیڑگ، جُست گِرگ، گپ جنگ ءُ اوشتگ ءِ سکین ءَ ہم دنت۔ بساک تھنا نودربرانی گلے نہ اِنت بگندے یک پگری زْرمبشتے، وتی زات ءَ پوہ بوگ ءِ زرمبشتے۔ بساک ورناھاں دلجم کنت کہ وانگ ءُ زانگ ءُ وت ءَ پچارگ ورناہانی مھکمی ءِ مانزمان بیت ءُ وتی راجی کرد ءَ پیلو کنگ ءِ بنداتی پدیانک اِنت۔
بساک ءِ بنجاہی لس مجلس
مہکمیں ادارہانی لس مجلس تہنا رہشونانی مٹ بیگ ءُ روایتی دیوان ءِ نام نہ اِنت بلکہ اے ہما مجلس اِنت کہ آئی ءِ تہ ءَ گل ءَ ہوار سرجمیں بلوچ راجمان ءَ بندوکیں جیڑہانی سر ءَ پِگری تران ءُ باوست بیت ءُ آہانی توجیل سازگ ءَ پہ نوکیں پالیسی ٹہینگ بیت۔
بلوچ اسٹوڈنٹس ایکشن کمیٹی ءِ چارمی بنجاہی لس مجلس بلوچ ورنایاں پہ زانت ءُ زانشت ءِ سپر ءَ مہکمی ءَ رہادگ بیگ ءِ یک مہکمیں دیوانے پرچاکہ ادارہ ءِ شعوری سفر ھمے گپ ءِ گواہ اِنت کہ علم اگاں گوں شعور ءَ ھوار بہ بیت راجانی آکبت ءَ بدل کنت۔ اے تلو ھما پگری کاروان اِنت کہ بلوچستان ءِ تہاری ءَ گوں زانت ءُ زانشت ءِ رژنا ءَ ہلاس کنگ ءَ اِنت، ءُ اے سفر دیم ءَ روان کنت داں بلوچ ورنا پہ وتی پجار ءُ ہستانک ءِ رکینگ ءِ سپر ءَ سوبین بہ بنت۔
