بساک رژنائیں باندات ءِ امیت
سابرہ بلوچ
وھد یکہ من بساک ءِ نام ءَ اِشکُناں ءُ آئی ءِ کاراں گنداں گڑا من ءَ امیت ءِ یک رُژنائیں بامے گندگ ءَ کیئت کہ اود ءَ دربرگ ءِ امیت ،سکگ ءِ امیت، عمل کنگ ءِ امیت ءُ درستاں مستریں امیت ھمیش انت کہ راج زانشتی پِڑ ءَ یک منزلے ءَ سر کنگ بہ بیت۔ اے ھما امیت انت کہ من گوْشاں من ءُ منی وڑیں نازانتیں نودربرے ءَ ھم دربرگ ءِ سنچ دئینت۔ من برے برے سما کناں کہ منی جند بساک ءِ لائک نہ اِنت ،بساک من ءَ چہ گیش شوکتر ءُ زانتکاریں سنگت کرزیت بلے چوشکہ من گوْشت کہ بساک امیت ءِ نام اِنت، ھمے امیت کہ من ءَ بساک ءِ تہ ءَ جاگہے داتگ ءُ منی زمیر ءَ گوْش ایت کہ تو اگاں بساک ءَ ھوار نہ بئے گڑا کجا روئے، آ کجام جاہ اِنت کہ ترا سوج بہ دنت ءُ بہ گوْش ایت کہ جھد بہ کن، ھرچ چیز پہ جھد ءَ رند رسیت، جھد بہ کن ءُ گوں امیت ءَ جھد بہ کن، گوں مخلصی ءَ جھد بہ کن کہ ترا جنزگی اِنت ترا دیم ءَ روگی اِنت، پہ ورناھاں جھد بہ کن، پہ زھگاں جھد بہ کن ،پہ زالبولاں جھد بہ کن پہ پیر ءُ عاجزاں جھد بہ کن، پہ راج ءَ جھد بہ کن ءُ پہ وتی باندات ءَ جہد بہ کن۔ اگاں درستیں جُستانی جواب ءَ لوٹ ئے گڑا آ پتر(پلیٹفارم) بساک اِنت کہ منی وڈیں نودربرے ءَ اے چیزاں سوج دنت ءُ مدام ہر کشک ءُ در ءَ آئی ءِ رہشونیءَ کنت۔
من نزانا کہ کجا ءُ چتور وتی گپاں درشان بہ کناں،وھدے من بساک ءِ بابت ءَ نبشتہ کنگ لوٹاں، جیڑاں داں آئیءَ من ھمینچو بہ گیشیناں کم اِنت بساک یک چراگے، یک باندات ءِ رژن اِنت، یک آشوبے، یک ایمانے ،یک مھِرے ءُ یک ھمت ءُ ھوسلہ یے کہ آ بلوچ ورناہاں راستیں راہ ءَ سوج دنت، ورناہانی رھشونی ءَ کنت ءُ وتی راجمان ءَ دیمروئی دیگ ءِ جہد ءَ بہر بوگ ھاٹیگ ءُ سکین ءَ دنت۔
منی جند یک نودربرے ءِ بستار ءَ اے چیزاں نبیسگ ءَ اِنت۔ من نزاناں کہ پہ وتی گل ءَ چی نبشتہ بہ کناں؟ گل ءِ واستہ آب ھمینکہ باز اَنت کہ من نزانا چوں ایشاں بہ کمایاں ۔ اگاں من بساک ءِ کرد ءَ وتی زند ءِ تہءَ بہ گوْشاں گڑا سک بلاھیں کردے پیلو کتگ ءُ کنگ ءَ اِنت۔ من بنداتی تبک ءَ بہ گر داں 8 تبک ءَ وتی اسکول ءَ یک نالائکیں نودربرے لیکگ بوتگ آں، من 8 کلاس ءَ چہ بساک ءَ ھوار بوتگ آں ءُ کتاب ءِ وانگ بندات کتگ وھدے کہ من چہ وتی استاداں سوال کنگ بندات کتگ گڑا من نالائق ءَ ھوار بد اخلاق ھم گوشگ بوتگ آں، من ھردیں وتی مات ءَ جست کتگ کہ من نالائک ءُ بداخلاقے آں؟ گڑا منی مات ءِ پسو بوتگ،” انا منی چُک ،تو شرّ یں چُکے یے، نالائک ءُ بد اخلاقے نہ یے۔” گڑا من ھیران بوتگاں ءُ جیڑاتگ کہ یکے گوْش ایت بد اخلاق یکے گوْش ایت شر گڑا من چوناں؟ وھدے من ھاموش بوگ بندات کتگ ، گڑا من ءَ کس ءَ بداخلاق ءُ نالائک نہ گوشتگ۔ نوں من سرپد بوتگاں کہ چاگرد راست گوش داشت نہ کنت، چاگرد ھرچ گپ ءِ منگ ءَ تیار بوت نہ کنت۔ اے درستیں چیز من چہ بساک، بساک ءِ سنگت ءُ بساک ءِ داتگیں لبزانک ءِ وانگ ءَ پد در برتگ اَنت، من ءَ یک جاھے یک مردمے ءَ چو ناوشی ءَ جست کرت ” تو بساک ءِ سیاست ءَ ھوار ئے؟ “من پسو دات” جی ھو، من اینکس نزاناں بلے دربرگ ءَ رواں ءُ ھمے جھد ءَ کنگءَ آں کہ چیزے بہ زاناں ءُ در بہ براں۔” گڑا من ءَ گوْش ایت “اشاں بِل تو وتی کلاس ءَ گوں دلگوش ی بہ دے، سیاست ترا وانگ ءَ چہ دیر کنت۔” من اول ءَ جیڑ اِت کہ بگندے راست گوش ایت من بواناں، سیاست مہ کناں، یک شپے من دلجمی ءَ جیڑگ بندات کُت گڑا من جیڑاِت کہ اگاں من گوْشاں کہ من بواناں گڑا انوں ھم من وانگ ءَ آں، کتاب ءَ چہ دربرگ ءَ آں گڑا وانگ ءَ دگہ چے دُمبے پر اِنت؟ ءُ منی ادارہ ءِ ہواری ءَ چہ منی وانگ گیش شرتر بوگ ءَ اِنت۔ من کہ ھشت سال اسکول ءَ نالائک گوشگ بوتگاں ھچ در نہ برت بلے لہتیں ماہ بوگ ءَ اِنت من ھرچی واناں، آ من ءَ یات اَنت ءُ من زانگ ءَ آں کہ چون ءُ چتور اے چیز بوگءَ اِنت۔ ھمے میان ءَ گیش جیڑگ ءَ پد من واب کپتاں روچ بوت اے روچ ءَ چوناھا دیوان اَت گڑا دیوان ءَ پد بساک ءِ بنجاہی سنگتےءَ گپ گپ ءَ گوشت “تو وتی اکیڈمی ءِ وانگ ءَ ھم ھمے رنگ ءَوہد بہ دے ءُ بوان کہ تو ھمے رنگ ءَ ایدگہ کتاباں وانے۔” گڑا ھمدءَ من جیڑ اِت کہ من ءَ بساک کدی ہم اکیڈمی ءَ چہ دور کنگ ءِ گپ ءَ نہ کنت گڑا پرچہ ردیں گپ پہ بساک ءَ کنگ بیت؟ اے درستیں گپاں دو سال سرجم بوت ۔ھمے میان ءَ من یک وھدے سیاسی اسپیکڑم ونت اَنت گڑا من سرپد بوتاں کہ ھما مردم ءَ منی دیم ءَ اے گپ جتگ اَنت آ مردم ءِ جند ءَ وتی لیکہ نیست، کسے گوْش ایت ھمے رنگ ءَ اِنت آ گوْش ایت ھو ھمے رنگ اِنت۔ اے مردم تہنا وتیدل ءِ وشی ءُ نہ وشیاں لوٹ اَنت ءُ ابیدء دور چارگ ءَ وتی گپاں انچو پہ دیم گوش اَنت۔ ھمے رنگیں بازیں مردم بازیں گپ بساک ءِ سرءَ جن اَنت، اسل ءَ گپ اش اِنت کہ لس مہلوک یک گلے ءِ رھبند ءِ پابند بوت نہ کنت گڑآ وتی جند ءِ تسلی ءِ ہاتر ءَ آ تہنا جواز جوڑ کنت۔ یک برے پدا من گوْشاں کہ بساک ھما امیت اِنت کہ تہار ءُ کوراسیں مولماں رژا کنگ ءَ پہ جہد ءَ اِنت ءُ شعور ءُ زانت ءِ بنیاد ءَ پیسلہ زوریت۔ بساک ءِ لوگو اے چیز ءِ درور اِنت کہ بساک مردین ءُ زالبولاں ہواری ءَ جھد کنگ ءِ سکین دنت۔ وتی باندات ءَ چہ وتی زانت ءُ زانشت ءِ بنیاد ءَ رژنا کنگ ءِ سکین ءَ دنت۔ گڈسر ءَ گوْشگ لوٹاں کہ بساک ھست زانت ھست اِنت، بساک ھست پہ جُنزگ ءَ امیت ھست اِنت، بساک ھست رژنائیں بانداتءِ واب زندگ اِنت ءُ بساک وشیں باندات ءِ واب ءَ سرجم کنگ ءِ ہوست اَنت۔
ھمے وڑکہ بساک ءِ دو سالی مراگش کہ بنجاہی لس مجلس ءِ نام ءَ زانگ بیت، آئیءِ مدت سرجم اِنتءُ گل نوں وتی اے مراگش ءِ نیمگ ءَ روگ ءَ اِنت۔ بنجاہی لس مجلس یک بلاھیں ارزشتے داریت کہ بساک دیمتر ءِ دو سالانی واستہ پیسلہ زوریت، چوشکہ شرّی ءِ گُنجائش ھرچ گل ءُ تنظیمانی تہءَ است گڑا بساک ءِ تہءَ ھم است۔ من بساک ءَ امیت ءِ نام داتگ گڑا منا ھم امیت اِنت کہ بساک پہ وتی نودربر ، وتی ورنا ءُ زالبُول ءُ وتی لس مہلوک ءِ باندات ءِ واستہ شوک ءَ چہ شوکتریں فیصلہ زوریت۔ من ءَ امیت اِنت کہ بساک وت ءَ گراونڈ ءِ تہءَ گیش جاگہ دنت ءُ منارینگ ءِ جھد ءَ کنت ءُ وتی نودربراں گیش ھکم ءُ توانگر بوگ ءِ سکین دنت۔ من ءَ اے ھم امیت اِنت کہ بساک وتی وابانی سرجم کنگ ءَ الم سوبمند بیت۔
