نوشتہ کار: مدثر بلوچ
اگہ نن جہانی دیہاڑ ءِ شِنن و خُوڑتی ئٹ جاچ ءِ تا ہلین گڑا نن سرپند مرینہ کہ جہان ئٹ کتاب نا بھاز بھلو ارزشت ئس مسونے و دا ارزشت ءِ بیرہ ہمو راج آک پُوہ متنو ہراکہ غلامی ٹی زند تدیفینو بلکہ ہمو راج آک ہم کتاب تون سنگتی کرینو ہراکہ مُستی جہان ئٹ گام خلیسہ اینو رژنا مسنو و جہان نا تلہ غا اسہ پِن ئس کٹانو۔ ہندا وڑ ئٹ غلام آ راج آک ہم مدام کتاب آتیتون اوار مریسہ و دانا سنگتی ءِ دوئی کرسہ جہد کرینو۔ اینو ہمو راج آک اسہ پن ئس اریر دانا بھاز بھلو مثیل ئس ننتون امریکہ نا ارے ہراکہ یک سد و ہفتاد شش (۱۷۶) سال برطانیہ نا غلام مننگ آن پد ہم اینو جہان نا زی آ راج کننگ ءِ۔ اینو امریکہ ءِ دا جاگہ اسکان سر کننگ ئٹ غٹ آن بھلا کمک ادب دنچا کتاب نا مسونے۔ ہندا ڈول پین بھاز انگا استان آک ہم غلامی نا زند گداریفینو ولے اینو جہان ئٹ تینا اسہ پِن ئسے آن چاننگ مریرہ گُڑا ننے خننگ ئٹ بریک کہ کتاب اسہ بھاز بھلو کسرشون ئس مریک۔
تینے جہان ئٹ زندہ تخنگ نا، تہاری تیٹی رُوشنائی بشخنگ نا و تینے منفنگ نا کسر شون!
ہندا ڈول نن بلوچستان نا حالیت آتے ہرن گڑا نن خنینہ کہ ننے بھاز آ ویل آتا گواچی کننگانے۔ اسہ کنڈان جہان اینو سرسہبی نا نیمہ غا ہننگ ءِ ولے بلوچستان نا مخلوک ءِ کتاب آن مُر کریسہ چاگڑدی گندئی تا نیمہ غا دننگ مننگ ءِ ہندا گڑا ءِ سرپند مریسہ بلوچ اسٹوڈنٹس ایکشن کمیٹی 2017 ئٹ اسہ بھلو فیصلہ ئس ہرفک کہ نن بلوچستان کتاب کاروان نا پِن ئٹ کتاب مچی اڈ ہیتنہ گڑا دا اسہ بختاوری نا فیصلہ ئس مریک۔
ہندُن برجاء غا سال ئٹی دا کاروان نا بناء کتاب مچی سریاب شال آن کننگا۔ ہرانا ارزشت ءِ سرپند مریسہ بلوچ مخلوق دا فیصلہ ءِ تینائی کرے و دا فیصلہ ءِ بھاز شرف بشخا و ہندا ارفوکا گام ءِ بلوچ اسٹوڈنٹس ایکشن کمیٹی تینکن اسہ راجی زمہ واری ئس تکیسہ دا کتاب مُچی تے ہر ہمو جاگہ ئسکان سر کننگ نا سوغند ارفے کہ ہراڑے بلوچ جہی ءِ و اندا لڑ ئٹی ۲۰۱۷ آن الیس اینو ۲۰۲۶ اسکان دا کتاب مچی اڈ تننگ نا ہمو دود برجاء ءِ و اینو بلوچ اسٹوڈنٹس ایکشن کمیٹی بلوچستان نا ہر ہمو جاگہ اسکان سر مننگ ئٹ سرسہب مسونے ہراڑے بلوچ راج جہی ءِ و اندا ڈول بلوچ لس مخلوق و خوانندہ غاک دا کتاب مچی تیٹ بشخ ہلنگ ءِ اسہ راجی زمہ واری ئس سرپند مریسہ دافتیٹ بشخ ہلک و کاروان ءِ سرسہبی نا نیمہ غا درے۔ ہندا ڈول اسہ نیمہ غان بلوچ مخلوق نا کتاب تون مہر و ارٹمی نیمہ غان دا کتاب مُچی تے تورنگ کن استان نا ودی کروکا اڑاند آک ہم خننگ ئٹ بسور انتئے کہ اسہ استان ئس ہچ دا خواپک کہ بزگ آ راج خوانے و سرپند مرے۔
ہندا ڈول ۲۰۲۵ ئٹ ننے خننگ آ بس کہ کتاب مچی تیا جلہو کننگ خننگا، ہراڑے نئے تنیا گوادر ئٹ اڈ تروکا کتاب مُچی زوراکی ئٹ ایسر کننگا بلکن سنگت آتیون اوار کتاب آک ہم دزگیر کننگار و زندان تا گواچی مسور۔ گُڑا اسہ کتاب نا برخلاف اندا زوراکی ئس و ارٹمیکو نیمہ غان بساک نا ہمو پروگرام ئس کہ ہرادے او تینا راج ئکن ہرفیس ئس گڑا دا اڑاند آتیان پد ہم بلوچستان نا جتا جتا غا خلق، کوچہ و شار آتیٹ کتاب مُچی اڈ تننگا۔
بساک نا نیمہ غان دا گچین آ کاروان نا اگہ نن سرسہبی نا گپ ءِ کین و دا نیمہ غا ہُرن گُڑا ننے دانا سرسہبی تا کسہ غاتہ اسہ بھلو لڑ ئس دُوئی مریک۔ ہرا کہ مچ آ بلوچستان ئٹ تہاری تے گڈیسہ اسہ امیت نا روشنائی ئس تالان کریسہ مُستی روان ءِ ہندا ڈول بلوچستان کتاب کاروان نا پن ئٹ بساک بلوچستان نا ہر ہمو جاگہ اسکان کتاب مچی اڈ تسونے ہراڑے داکان مالو دُن اڑزانی ئٹ کتاب دوئی متوکہ و خوانوکاتے کتاب دُوئی کننگ کن خلق آتیان پیشن شار تیا مون کروئی مسکہ گُڑا بساک اوفتا دا کاریم ءِ اڑزان کریسہ خلق خلق ئٹ کتاب مُچی اڈ تننگ نا دود ءِ بناء کرے و اندا لڑ ئنا رِد ئٹ شال آن الیس نصیرآباد و ٹیپُل اسکان و مکران آن الیس کوہ سلیمان اسکان دا کتاب مُچیک اڈ تننگ مننگ ءُ۔
ہندُن تدوکا سال ئٹ اڈ تننگوکا کتاب مُچی تا جاچ ئس الین گُڑا ننا خننگ ئٹ بریک کہ دا کاروان بلوچستان نا جتا جتا غا جاگہ تیا سر مننگ ئٹ سرسہب مسونے و ہمو جاگہ تیا کتاب خواننگ نا اسہ دود ئس ودی کرینے ہراڑے داکان مالو کتاب سر مننگ اڑزان الوکا و ہمو لٹریچر ءِ سر کرینے۔ دانا ننتو بھاز مثیل اریرک دُنکہ بھاگ ناڑی، ڈھاڈر، مچھ، و خغدار ہراڑے خوانوکاتا بھلو کچ ئس ارے ولے اوفتے کتاب دوئی متوکہ گُڑا دا کتاب مچی تیان اوفتے جوانو لٹریچر دوئی مس ہرافتیٹی تینا جند ئنا و جہان نا جتا غا پِڑ تیا لٹریچر آک اوار ئسر۔ اوکان ننے خننگ ئٹ بس کہ بلوچ کتاب تون مہر کروک ءُ راج ئسے ولے بے مڈی تا سوب آن اوفتے خواننگ کن کتاب دُوئی متوکہ و ہندُن بھاز انگا ہند آتیٹی زوراک نا نیمہ غان جوڈ جروک آ چم آک ہم ئسرہ کہ اوڑے کتاب خواننگ و کتابجاہ تیا رکھ خلنگاسس و مخلوک ءِ بھیم ئنا گواچی کننگاسس۔
دا کتاب مچی تا اڈ تننگ آن پد استان نا اڈ تروکا ہمو گپ رد مس ہراڑے او پاریکہ بلوچ اسہ بے خوانندہ ءُ راج ئسے ولے بساک نا ارفوکا دا گام دا گپ ءِ رد کریسہ پوسکنو دود ئس ودی کننگ ئٹ سرسہب مس و دا سرسہبی تنیا بساک نا سرسہبی اف بلکن تیوہ غا بلوچ راج ئنا سرسہبی ءِ۔
مُستی کن ہم اُمیت ہندادے کہ دا رُژن بشخوکا چراغ گیشتر سوگوْی ئٹ بلوچ ڈیہہ ئنا ہر اسہ خلق و گدان اسکان تینا روشنائی آن تہاری تے ایسر کرو و بلوچ اُلس ءِ تینا مزل آ سر مننگ ئٹ جوانو کُمک ئس ایتو۔
