نوشتکار: جعفر قمبرانی
کمیشن آسودگی و ‘میرٹ’ آ نوکری بشخوکو ادارہ اس اف بلکن نوآبادیاتی نظام ئٹ ورنا تے مشغول کروک، تینتو تینٹ آختہ کروک و سیاسی فکر و سوچ آن مر کروک ءُ اسہ ‘ٹول’ اسہ۔ عقلی بنیات آ کمیشن و کمیشن نا ٹرینڈ ئنا جاچ الین تو نن خنینہ کہ بلوچستان ئٹ ورنا تے غیر سیاسی کننگ و بلوچ راجی فکر آن مر کننگ کن نسبتاً دہ ہزار سیٹ بیرہ دہ (10) بندغ کن اعلان کننگرہ و ہر اسہ خالی آ نوکری کن کم و ود ہزار ورنا (مار مسڑ) کاغد جمع کریسہ تیاری ٹی لگیرہ و مقابلہ کن تینا پاچہ غاتے لانچرہ۔
دافتیان نو سد و نوّد و نہہ ءِ الّم وے سہب مروئی و تینا واری نا ودار کریسہ پنچ، ہشت یا دہ سال ئسکان ہندا کمیشنی ٹرینڈ ئنا بشخ مروئی تمک۔
یانی کہ دہ سال اسہ ورنا اس اسہ نوکری ئسے نا رند ئٹ تینا اُرا، خاحوت، آلم دشتار و تیوہ غا گڑاتے یلہ کرسہ اسہ ہندنو کسر ئسے نا گواچی مریک ہرادے نئے لخ و نئے لٹک ءِ، نئے و مون و نئے کہ پد ارے!
دا نیام ئٹ ہندا نوآبادیاتی نظام نا گواچی مروک آ بلوچ ورناک راج و راجی ویل آتیان خف کرٔ مریرہ و ظلم و زوراکی نا طوفان آتے خننگ کن اوفتیتون خن مفک۔ داڑسکان کہ ہندا ورناک تینا جند ءِ اسہ آجو ءُ بندغ اس جوڑ کننگ کن کاروبار اس کننگ نا ہم سوچ ءِ خلنگ نا لائخی تخپسہ۔ دا گواچن ئٹ ہمو ورنا کو ہرا نوآبادکار نا مشینری آن سائیکالوجیکلی ہنداخس زیمی مسنو کہ دا تینا گواچن ءِ گیرام کرینو۔ دا ورنا تیکن شناخت نا ویل ہچو ویل اس افک و بولی تا رکھ ئنا ہیت شغل ئسے۔ دا ورنا تا ملیک نوآبادکار نا تروک آ پاشی آ پروٹوکول آن ہندن بھاز زیم ارفینو کہ دافتے ہمو پروٹوکول نا تہٹی بےشرفی و کاٹم شیفی نا سما ہم تمپک۔ دنچا کہ دافتے پھل آتا نیام ئٹ پِت آتا درک لگپک و دا بے دھڑک ہمو پھل آتا نیام ئٹ تینا نازُرک آ دُو تے دننگ نا کوشست کیرہ۔
باور کیس دا ہمو پھل ءِ ہرانا تہٹی زیل ءِ سُو آن کشکوک آ پت آک اوار ءُ ہرافتا درک دو دننگ آن پد لگک۔ بلوچ راج تیوہ غا بزّگ ءُ راج ئسے ولے کوزہ مروک شار تیٹ راج ئنا دا کمیشن زدہ غا بشخ کل آن بزّہ و ‘قابلِ رحم’ مریک۔ ایہن ارس تو تیوہ غا بلوچ راج اسہ فکر ئسے تون گنڈوک ءِ، اسہ دڑد ئنا سنگت ءِ و اسہ سِیخ آ خُلوک ءِ کہ تونسہ غان بندر عباس ئسکان کل ئنا دڑد و خواریک اسٹ ءُ۔ ولے ہراتم نن راج ئنا جاچ ءِ خوڑتی ئٹ ہلین گڑا نن خنینہ کہ راج فکر ئٹ اسٹ کڑد ئٹ مسہ جاگہ غا بشخوک ءِ۔ اولیکو ہمو ازگار آک کہ سیال ئنا تالی تے چٹیسہ دے پہ دے ازگار مریسہ ہننگ ئٹی ءُ۔ او گڑا پارلیمنٹ نا تہٹی تولوک بندغ آک مریر یا پارلیمنٹ ئٹ تولوک آتا پازوار آتے چھپی راستی کروک آ افسر و نوکر آک۔ دا کسر خننگ ئٹ پھل آتا کسر ءِ ولے بےشون و شرفی نا کل آن بھلا کسر گواچن ئٹ ہندادے۔ داٹی زر، لاری بنگلو و وڈّائی بھاز ءِ ولے خواجہی شان و شرف اسل اف آن حساب۔
ارٹمیکو ہمو راج دوست و سیاسی آ بندغ آک کہ تینا راج ئنا خاطران تینا اُرا خلق خاہوت آتا ہم چڑت ءِ خلپسہ و بلوچ راج ئنا شونداری کن گام گیچ، رمب و دانگ اینگ دودینگ ئٹی ءُ۔ دا سیاسی آ کسر بیرہ بھلا است جغر والا تا کسر ءِ۔ دا ہمو کہ ہرا تینا سہب و شام تے ڈیہہ و راج ئنا پن آ ندر کرینو۔ ہمو ہرا زر و مال ئکن سلوک افس، و اوفتیکن بیرہ راج معنہ تخک۔مسٹکیمو ہمو کہ ہرافتا کسر ئٹ نئے کہ پھل و نئے پت ءُ۔ پٹ میدان ئٹ نت شپاد بے مزل آن ہنوکا بندغ آک ہرافتے تینا مزل نا ہچ درک اف، ہرافتا زند بیرہ ودار و بے مسختی نا گواچی ءِ۔ دا ہمو ورناکو ہرا کمیشن زدہ ءُ کہ دہ سال کمیشن نا اسہ چنکو نوکری ئسے کن تولوک تینا خدائی تخلیق کاری، بندغی حق و راجی زمواری تے پدی بٹینو۔ دنچا تینا راجی گواچن، بندغی گواچن و خدائی تخلیق کاری نا داد آتے گیرام کرینو۔ گواچنی ارس تو دا ہمو بندغ آکو ہرافتے دو ئٹ آختہ کننگانے کہ بریر و تینا سِر و ساہ، گواچن ءِ گیرام کیر۔
ہندن کہ مالؤ پارین کہ کمیشن پین آخہ بیرہ آختہ (Engage) کننگ نا اسہ چم ئسے۔ گڑا بلوچستان ئٹ ننا خننگ ئٹ بریک کہ ساڑی وخت ئٹ بلوچستان حکومت سرکاری نوکر آتے تینا تنخواہ نا ودوکی نا خواست کننگ کن اسیکہ کسر آتے ئسکان سر کرے و پدی لٹ کٹ کرسہ زندان تا گواچی کرے۔ ارٹمیکو نیمہ غا ورنا تے آختہ کننگ کن بیست و پنچ ہزار نوکری تننگ نا پڑؤ ہم تس۔ سوج دادے کہ مست ئنا نوکر تے تننگ کن ہچس افک و بلوچستان یونیورسٹی نا پروفیسر آک بِین آن کہنگ ئٹی ءُ گڑا دا پوسکنا ورنا تے داخس نوکری و تنخوا کن زر ہراکان بسر؟ عقلی و سائنسی بنیات آ دا ہیت سرپدی آن پیشن مریک و ہندن لگک کہ حکومت بلوچ ورنا تے جاچ النگ و پہہ مننگ نا ہم لائخ سمجھپک و تینا حکومتی مشینری نو ڈھانچہ ءِ سوگؤ کننگ کن بھاز ترندی ئٹ جہد کریسہ ءِ۔
