نوشتکار : بامساؔر بلوچ
بلوچ اسٹوڈنٹس ایکشن کمیٹی نا بنداوی مسخت بلوچ ورنا تیٹی علم و چائنداری نا فکر ئس ودی کننگ۔ اینو نا جدید دور ئنا رد ئٹ کتاب آتون بھاز کم بندغ آتا خُڑکی مریک۔ ہندا سوب آن بساک نا پُروگرام آتیٹی کُل آن بھلا پُروگرام “بلوچستان کتاب کاروان” ءِ۔ دا کاروان نا بنا سال ۲۰۱۷ ٹی مس و اولیکو کتاب مُچی ۱۸ فروری ۲۰۱۷ ٹی لمئی بولی نا دے ئنا ردئٹ سریاب مِل شال ئٹ اڈ تننگا۔ مُستی مستونگ، خاران، بیسمہ، نوشکے، چاغئے و خضدار ئٹ کتاب مُچیک اڈ تننگار۔ دا کاروان اندن ترندی و مہکمی ئٹ گام خلیسہ اینو بلوچستان نا کُنڈ کُنڈ آ سر مسونے۔
دنکہ تنظیم تینا مسخت ءِ واضح کیک کہ دا کتاب مچی تا مسخت مالی سواد اف بلکن تینا مخلوق و خواندہ غا ورناتے ئسکان کتاب آتے سر کننگ ءِ تو سنگت آک ساندہ اندا کوشست کیرہ کہ کتاب آتے نیم نہاد آ بہا کیر و بھاز وخت سنگت آک تینا پارہ غان خرچہ کیرہ و جُہد ءِ برجاہ تخانو کہ کتاب آتے بلوچستان نا کوچہ کوچہ غا سر کننگو۔
کتاب و ورنا تا دا خُڑکی کن تنظیم نا سنگت آک بلوچستان نا ہر ہند و جاگہ غا سفر کیرہ و ہر خواری و ڈکھ آن پد ہم سنگت آک مہکم ئٹی کاریم برجا تخانو۔ دا سفر و خید خواری تیان زیات فریشان کروک حکومت نا کُنڈان ورنا تا زی آ مروک آ کریک ڈاؤن آکو کہ ہراتم پولیس بریک و ورناتے لٹ و کُٹ کیک و سنکت آتا پُروفائلنگ مریک۔ دنکہ تدوکا سال ۲۰۲۵ ئٹ گوادر ئٹی ورنا تون اوار کتاب آک ہم بندی کننگار۔ دا کُل زوراکی تیان پد ہم گَل ئنا سنگت آک تینا جُہد آن دمدر افس کہ دا سال پدی ہمو ہمت و جوزہ تون کتاب مچی تے برجاء تخار و تینا شعور و چاہنداری کن گَل ئنا باسک آک ہر خواری ءِ کریسہ ءُ۔ اگہ نن اینو ہم حالیت آتے ارن تو بلوچستان ئٹی کتاب خواننگ و کتاب آتون سنگتی زند و مرگ ئنا نیام آ سلنگ نا وڑ ءِ کہ اینو ہم بلوچستان ئٹی خواندہ غاک زندان تیٹی بند کننگرہ و کتاب آک ہم زندان تا گواچی کننگرہ۔ ہندن لگک کس پائے کتاب خواننگ و بہا کننگ اسہ بھلو گناہ ئسے۔
دا کُل آن پد اینو ہم گَل ئنا باسک آک کتاب دوستی نا ہمو جوزہ ءِ تخیرہ و کتاب نا دود ءِ مون آ دننگ و کتاب نا روشنائی ءِ تینا تہار آ خلق آتے سرکننگ ءُ۔ دا بلوچستان کتاب کاروان نا غُٹ آن بھلا سرسُہبی ءِ کہ حکومت نا پارہ غان داخس رکاوٹ و جنجال آن پد ہم سنگتاک تینا مزل کن روان ءُ و راجی فکر ءِ خلقی آ گِدان ئٹ ہم ودی کرینو۔ داسہ بلوچ ورنا وے کتاب اف و بلوچ ورنا سوج کیک و راستکی و دُروغ نا فرخ ءِ ہم پوہ مریک۔ اینو تعلیمی ادارہ غاتیٹی ہر وخت نا زی آ کتاب مُچی اڈ تننگک و داڑتون اوار داسہ ہر سال ئنا بناء مننگ تون کتاب مچی تا اسہ لڑ ئس بلوچستان نا کُنڈ کُنڈ آ اڈ تننگرہ۔ دا کاروان نا سوب آن کتاب آک بلوچ خوانندہ غاتے سر مریرہ و بلوچ ورناک خواننگ نا عادتی جوڑ مننگ ءُ و کتاب نا ارزشت و بکار آتے سرپد مننگ ءُ۔
کتاب نا ارزشت آ ہیت مرے گڑا نن خنینہ کہ کتاب آتا سوب آن بندغ تینا تدوکا دور ءِ ہم خنک و بروکا پگہ کن ہم تیاری کیک۔ کتاب سنگتی نا سوب آن بندغ تینا راجی و چاگڑدی زمہ واری تے سرپد مریک و اُوفتے قیسر کننگ کن کوشست کیک۔ کتاب ہمو آدینک ءِ کہ بندغ ءِ بندغی نا لیک ءِ نشان ایتک۔ کتاب تون خُڑکی قوم آتا سرسُہبی نا کُلہو ءِ قوم آتا شونداری نا راز ءِ۔
