تحریر: انور ساجدی
مٹ: جعفر قمبرانی
ریکستان نا نرمزار
تحریر: انور ساجدی
مٹ: جعفر قمبرانی
“سیوَت، صحیح وخت ئنا گچین کاری و گچین انگا حکمت عملی آن بیدس آجوئی نا جنگ ئنا سرسہب مننگ ممکن اف۔”
مصطفی عکاظ 1970 و 1980 نا دہ سال ئٹی لیبیا نا تائب انقلاب نا سروک کرنل معمر قذافی نا کمک ئٹ اِرا پنی ءُ فلم ہالی ووڈ ئٹی جوڑ کرے۔ اونا اولیکو فلم “مسیج” ئسک ہرادے گیشتر اسلامی ملک آک نمائش نا اجازت تتور انتئے کہ فلم ئنا سرحال بھاز نازُرک ئسک و داڑان لس مسلمان تیٹی اسہ بے جاراتی ئس ودی مننگ نا خُلیس ئسک۔ وا ہم تیوہ غا جہان ئٹ فلم تا شونق تخوک آ مسلمان آک دا فلم ءِ ویڈیو کیسٹ آتا وسیلہ ئٹ اُرار۔ دا اسہ گچینو زیم تخوکو فلم اس ئسک ہرانا بنداوی کڑد ءِ انتھونی کوئن سر تسک۔
حضرت حمزہ نا دروشم ئٹ او کڑد ءِ گواچنی ءُ رنگ اس تسک۔
مصطفی عکاظ ڈغار نا زی آ مروک کل آن بھلا آشوب ءِ دا سوب آن ہمو وڑٹ گچین مون آ اتنگ کتؤ کہ اونا بے وسیک بھاز زیات ئسر۔ عکاظ تینٹ سنی مسلمان اس ئسک ولے اسلام نا بنداتی زمانہ نا دا کسہ ءِ مون آ اتنگ نا وخت او کل گواچن تے مون آ ہیس و ہندا سوب آن عربستان نا ملک آک تینا عقائد آتا بنیات آ جوان سرپد متور کہ دا فلم ءِ جہان ئٹ ہُننگے۔
مصطفی عکاظ نا ارٹمیکو فلم “عمر مختار” ئسک۔ مسیج فلم نا وڑ داڑے اونا ہچو بے وسی اس الّع ہندا خاطران او دا فلم نا سرحال تون پبّی انصاف کرے۔ دا فلم ہرانا پن “شیرِ صحرا” تخنگا اٹلی نا برخلاف لیبیا نا آجوئی نا بابت ئٹ ئسک۔ ہالی ووڈ اداکار اینتھونی کوئن بےمثیل اداکاری نا ہندنو دُر نشان تس کہ جہان ہبکہ و حیران مس۔ فلم اُروک آک بنا آن ایسر ئسکان دا گیرام کریرہ کہ او اسہ فلم اس ارنگو۔ دا فلم آن مالو جہان ئٹ بندغ آک لیبیا نا آجوئی نا جنگ و عمر مختار نا جدوجہد آن واخب الّوسُر۔
ہراتم عمر مختار ہراکہ اسہ اسکول ماشٹر اس ئسک پیشن نا کوزہ گیر آتا برخلاف جنگ ئنا بنا ءِ کرے اونا سن پنجا (50) سال ئسک و اوڑتون اوار پنجا پین گوریلہ تا اِرا دستہ ئسرہ۔ اونا خاحوت بناء غان اونا برخلاف ہنا و پارے کہ آمر مسولینی نا مقابلہ ٹی عمر نا حیثیت مورینک و اِیڷ ئنا وڑ ءِ ہندا سوب آن دا جنگ اس اف ‘خودکشی’ ئسے۔ ولے عمر مختار تینا ارادہ تیان پد ہنتو ہراتم جنگ گیشتر مس گڑا مسولینی اسہ ساڑی وخت ئنا جرنیل ئسے بھلو کچ ئسے ٹی ٹینک، بکتر بند لاری و جدید انگا سلہہ تیان شپ کریسہ ٹریپولی آ رادہ کرے۔ فلم ئٹی اٹلی نا دا جرنیل نا کڑد ءِ پنی آ اداکار اولیورریڈ سر تسونے۔ جنگ ئٹی ترندی آن پد حکومت نا پاننگ آ قبائلی سڑدار آتا اسہ ٹولی اس عمر مختار تون اوڑدہی کریر توسر و اودے پاریر کہ مسولینی تیوہ غا افریکہ ءِ بُھس کرینے و جوان مرو کہ نی ہم سلہہ بِٹ۔ دا ٹولی نا سروک عمر مختار نا اِلا ئسک ہرانا عمر 80 سال ئسک ولے عمر مختار نمن مریسہ پارے کہ
“کنا مون آ اِرا کسر ءُ ‘مرگ یا کٹّینگ’ ای سلہہ بٹپرہ”
او مستی پارے کہ نن حق آٹن و اسہ پیشن نا زورآوار اس زوراکی ئٹ ننا ملک آ کوزہ کرینے او بائدے لیبیا ءِ یلہ کے کائے۔
جرگہ پدی ہنا و جنرل اولیورریڈ تون اوڑدہی کریسہ اودے عمر مختار نا ارادہ غاتا پاریر۔ اٹلی نا دا جرنیل چسپان روم اکن رادہ الک ہراڑے مسولینی کل جنگی کابینہ ءِ مجلس کن خوائفیسس و ہندا دیوان ئٹی ڈغار نا زی آ کل آن شوم انگا آمر ترندی ئٹ پارے کہ اودے ہر حالیت ئٹ عمر مختار نا کاٹم بکار ءِ۔ جنگ ئنا دوران او تینا فطری تب ئٹ خار ئٹ ہنیسہ بش مس و تینا جرنیل ءِ لغت و مچ خلیسہ کرے۔ اوکان پد او تینا کوٹ انگا کاٹم و مون ئٹی شامات کاری کرے۔
دا مجلس آن پد اٹلی نا فوجی جرنیل آک انگریز آتا چم آتے تینائی کریر۔ لیبیا نا قبائلی ٹوخر آتے بہاٹ الیسہ کریر۔ اوفتے روم آ دریر و کچ آن بڑزا مراعات و ہمو جاگہ نا شاری مننگ نا لالچ تسر گڑا اوفتا دا چمبازیک سرسہب مسر۔ عمر مختار نا تینا خاحوت ہم بہا مس۔
اونا ہشتاد سال سن ئنا اِلّا اٹلی نا جاسوس جوڑ مس۔ اونا ایڑھ ایلم تا چناک، اِلّامارک و ایلو کل سیال آک ہمو جاگہ نا نشادہی ءِ کریر ہراڑے عمر مختار ہندی ئسک۔ طرابلس نا سیاسی مخلوق ہڑدے عمر مختار نا سنگت آتا سلہہ بٹنگ نا ڈرامک بازی ءِ کریرہ تانکہ مخلوق آ نفسیاتی زیم شاغنگ مرے۔ ایسر قبائلی مخبر آتا دو آن عمر مختار دسگیر مس۔اٹلی نا فوجی افسر آک لس مخلوک نا مون آ اونا بے شرفی ءِ کریر۔ اونا ٹوپ ءِ لغت خلیسہ کشار بٹیر۔ اودے لٹ کُٹ کریسہ زمزیر تیٹی تفیر و طرابلس نا کیز خانہ تیٹی دننگا۔ ولدا عمر مختار نا حامی و لس اولس آ پبی بمباری کننگا۔ دا کل آن پد ہم گوریلہ جلہؤ آک ایسر متوس تو اوفک اسہ پن ئنا عدالت ئس جوڑ کریر ہراٹی عمر مختار نا زی آ غداری نا کیس و مقدمہ غاک بناء کننگ مسر۔
عمر مختار تینا پنی آ بیان ئٹی پارے کہ “کنا ڈیہہ لیبیا ءِ ای دانا وفادار اُٹ، کنے آ اسہ پیشن نا کوزہ گیر ءُ طاغت اٹلی نا وفادار مننگ لازم افک.”
گڑا کینگرو کورٹ عمر مختار ءِ سریام پاہو تننگ نا سزا بنیفے۔ نوزدہ سد و سی (1930) ئٹی طرابلس نا مین اسکوائر نا زی آ ہزار آ بندغ آتا نیام ئٹ دا مڑد آ سرمچار ءِ پاہو تننگا۔
جیو ٹی وی تینا پروگرام تیٹی دا فلم ئنا خاص انگا جاگہ تے شان تس و دافتا زی آ جاچ النگ کن علامہ اقبال نا نواسہ میاں یوسف صلاح الدین ءِ خوائفنگاسس۔ میاں صاحب ہراکہ لاہور نا پنی ءُ بندغ ئسے و اوفتا حویلی پنجاپی ثقافت نا گڑھ ءِ، پارے کہ عمر مختار اونا دوست انگا فلم ءِ۔ او فلم نا گڈیکو ‘سِین’ ءِ تینا دوست انگا سِین پارے کہ ہراٹی:
“پاہو آن مالو عمر مختار تینا خن تیان چشمک آتے کشیسہ بھازی مچی ٹی اسہ چنکو چنا سے ایتک مسخت دا کہ او تینا جدوجہد، سیاسی بصیرت، تینا وراثت و چاہنداری ءِ پوسکنا نسل ءِ تریسہ تینٹ گل بالی ئٹ پاہو نا پاٹ آ سوار مریک۔”
فلم نا رد ئٹ مسولینی نا زوال آن پد اٹلی بے وس مریک کہ لیںیا ءِ آجو کیک و دا وڑٹ عمر مختار نا جنگ سرسہب مس۔
ہمو قبائلی وڈیرہ، ٹُوخر و عمر مختار نا سیال آک کہ ہرا مراعات کن اٹلی نا جاسوس و تالی چٹ جوڑ مسوسر اوفتا پِنک ہنار ایسر مسر۔ ولے ہرا آزاتی رسینگا او ہموفتا ہم بشخ ئٹ تما۔
لیبیا نا عمر مختار مرے یا الجزائر نا بن بیلا، چے گویرا یا کہ مہاتما گاندھی۔ او اسل ‘سمجھوتہ’ کتؤر و نئے کہ سلہہ بٹیر۔ دا کل راہشون آک آزاتی نا جنگ اکن گچینو وخت ئسے گچین کریر و کل آن مست تینا مخلوق ءِ اسہ جاہ و اوار کریر۔ سیوت، صحیح وخت ئنا گچین کاری و گچین انگا حکمت عملی آن بیدس آجوئی نا جنگ ئنا سرسہب مننگ ممکن اف۔
