کتاب نام: زامُر
ایڈیٹر؛ مھتاپ جھکرانی
چمشانک: سمو بلوچ
بلوچ اسٹوڈنٹس ایکشن کمیٹی
اے کتاب شہ شہ مرید اکیڈمی سیوی ءَ شنگ کھنغ بیسہ۔کتاب ءِ 64 تھاخ انت ءُ کتاب ءِ دو بھر انت۔ اولی بھر نبشتابک، افسانہ گیزی کھسو ءُ کتاوانی پچار ھوار اَنت۔ کتاوءِ نیامءَ ھزور بشک جتوئی(کھنیں دورءِ شائر ے بیتگ زیادہ تر شائری اسلام سرا اِنت) کلام جوانسال بگٹی (جوانسال بگٹی کہ بگٹی کبیلہ شہ سیادی داروخ ءِ بیسہ ایشی شائری ءِ بلوچانی کھنیں شائری نیامءَ مزیں کرد ۓ) ءُ سخی نوزبندگ (نوزبندگ میر چاکر رند ءِ گہاڑزاتک ءُ شیھک رند ءِ چھغزاتک بیسہ۔ایشی ءَ ایشی سخاوت ءِ وستہ زرزوال نام دئیگ بیسہ۔ بیورغ مست توکلی جوانسال بگٹی ۓ شئیرانی نیامہ ایشیے زکر است اِنت) ڈئولیں کھنیں مڑدانی کھسو دہ آوار اَنت کہ آھاں پہ بلوچ ءُ بلوچی ءَ مزیں کارے کھسہ۔ تھاخ نمبر 23 ءَ پناہ بلوچ ءَ یک آرٹیکل ءِ روش درختغیں بلوچستان ءَ بلوچی لوزانک نام سرا نوشتہ کسہ۔ اے نوشتانک تھوخا پناہ بلوچ روش دراتکی بلوچستان بلوچی شائری ءِ بنیاد گُشتہ۔ اے ھند کوھنیں اَھدی شائری ءِ ھند گشغ بیث۔ گشغ بیث کہ رندانی اھد بلوچانی شائریءِ اولی اھد ءَ ۔اے اھد ءَ جنگ باز بیسغ اَنت گڑا زیادہ تر شائری جنگ ءُ مھری کھسوانی سرا بیسہ۔ نوشتانک تھوخا کھنیں روشدراتکی بلوچستان ءِ شائرانی پچار کسہ۔ پھزا نیغیں دورے شائرانی پچار کھسہ ءُ بلوچی
لوزانک ءِ دیمروئ ۓ پچار کسہ۔اشی ءَ ابید روش دراتکی بلوچستان ءِ نامداریں نوشتہ کارانی زکر دہ کھسہ۔ تاھخ نمبر 28 سرا عزیز بگٹی ءَ پھث ے الاج نام سرا یک افسانوی تھریر ءِ لکسہ کہ آنھیہ چھے اے پیشدارگ بی کہ بلوچ ڈیہہ ھسپتال نویغے سوب ءَ بلوچاں چہ دیر الکہاں پندھ جنغی شھراں الاج ءَ پہ مناغی۔ایزا دہ آھاں بازیں ڈکھانی سامنڑا کفی۔بازیں وخت زر نویغے سوب ءَ نادراہیں مڑد ۓ الاج نوی ءُ آں ساہ داث۔ تھاخ نمبر 31 سرا یاکو مرگ ۓ خائت نام سرا مست توکلی ئے لکھسغیں یک کھسوے یاکو مرگ گشاں کہ یک بے پھریں مرگ ۓ ءُ شفاں کھئے پراتاں جنتیں۔ادب نیاما اے مرگ ۓ نام بازیں دروشماں لکھغ بی۔کھسئے پہ دل دوستانی زہیر ءُ دڑدانی مارغ ءَ کھسے پہ ھک ءَ کھسے پہ بے ھند بیئغ ءَ بزاں کہ وسی ھنداں چھے کھشغ بیسغاں اے مرگ نام گراں ۔یاکو مرگ ۓ کھسو چونیں کہ یک شوانکے یاکو نامیں یک مڑدے گرا شوانکی ءَ کھنغا ۔سال سرا مالدار ءَ یاکو ءَ آنھہی تنخوا دئیغ ءَ چہ جواو داثہ گڑا یاکو بیرو کسو اوزا چہ شتہ۔ گشنت کہ پھزا مالدارے کل مال گار بیسو شتہ۔ گڑا آھیے دل سینغ ءَ شہ درکپتو یاکو پھولغا مرگ بیسو بال دئیغ ءَ شرو بیسہ ءُ ڈیھاں یاکو پھولغا درکپتہ۔بازیں مڑد گشاں کہ یاکو مرگ ھزرت یاکوب ڈئولا ناریت ءُ پریات کنت۔ بل اے ٹوک راست نہ اِنت۔ تھاخ نمبر 34 سرا وخت نام ءِ تھریر ءِ کہ مھتاب جھکرانی ءَ لکسہ۔اے تھریر نیاما یک مڑدے زیند ءِ گوازینگ واستہ چھے چھے کنت لکھسغیں۔تھاخ نمبر 40 سرا یک گیزی کھسوے کہ مست توکلی ءَ لکسہ بل اے مست توکلی ءِ وسی لکسغیں کھسوے نئیں مست توکلی ءَ چہ تھی مڑدے سُری مڑزو نامین ءِ ءَ چہ اشکسہ۔اے کھسو نیاما یک مڑدے کھسویں کہ مالدار اث یک روشے آنھی وھاو ءَ پھیریں مڑدے کھئے آھیہ گشی شوے سرا ڈکھے آوخیں شوا تھاں جھان آں ڈکھ زیرغ لوٹیں۔ سئے چھیار روشا آں پھیر مڑد وھاو ءَ آتکہ ھمے ٹوک کسئی۔گڑا مڑد ءَ گشتہ ما دیمی جھان ءَ ڈکھ زیرغ ءَ تیاروں۔ پھزا مڑدے مال مری مڑدے زال دوزغ بی مڑد ءَ وسی چھک کئور دیما بستگاں گار باں۔ وسار دہ پور باڑتھی وسار رنگے بچائنی درکفی چھے آف ءَ رو ۔یک ھندے رو اوزا ایشیا بادشاہ کھناں۔ کور دیما چے ایشی چھک یک زالے ءَ بڑتغاں پالسو مزن کسغ تی گڑا چھک درکفتغاں گشتئیش ما وثی پوریھائے کھنوں ۔پھرانا چھرانا کھاں بادشاہ شہر ءَ درکفاں۔بادشاہ ایشانی ابا ات بل ایشاں اے ٹوکے سما نیست اث۔اے بادشاہ گرا شتغاں کہ مار پوریھا ۓ چیے پھول دئے۔مزیں وختے رندا ھماں مڑد ءَ کہ بادشاہ زال بوڑتہ آسکو ھمے شھر گرا آتکو نشتہ۔آں مڑد سوزا گرے ءَ ۔بادشاہ گرا شتہ ھال داسئی کہ من تی شھر نزی آسکو نشتغاں مناں مزیں مڈی ۓ گونیں مئیں دو زالاں بل مناں روغی پھزی ڈیھاں مئیں وامے سر آتکہ۔من ءَ دو مڑد گرزیں کہ مئیں گیر موجودگی ءَ مئیں لوغا داراں۔بادشاہ آں دوئیں چھورو لوٹائنتگاں کہ سوزاگر لوغا کار کھنغی اِنت۔ چھورو کار وستہ رازی بیسغاں بانگہا سوزاگر لوغا شتغاں کہ ما کار کنوں۔ سوزا گر شتا۔ شف ءَ دوئیں براث وثی کسانی کسو ءَ کھنغساں کہ ایشانی ماث ءَ کھسو اشکسہ ءُ کل کفتی کہ اے مئیں چھکاں۔کھسو آخر ءَ بادشاہ وثی چھکاں ءُ وسی زال پجھا کاری وسی پھجھیا باڑتھیں۔سوزاگر ءَ شزا دئیغ بی ۔بادشاہ گوں وسی زال چھکاں جوائیں زیندے گزاری۔تھاخ نمبر 49 سرا میکسم گورکی ءِ یک تھریرے کہ بلوچی نیاما رجانک کھسو روش نیرموش نام سرا جمیل بزدار ءَ لکسہ۔اے تھریر نیاما روش نیرموش ءَ دو مڑد زِر ۓ کندھی ءَ نشتغاں ءُ ماھیغاں گرغاں۔اے مڑدانی نیاما یکے پھیریں مڑدے ءُ یکے جوانیں سوزا رنگیں مڑدے۔ دوئیں وسار گوں پچاراں دہ کھنغاںءُ روشئے شوخیں نازاں دہ نازینغاں۔ دوئیں مڑد پجھیا سگار ءَ دہ کشگاں۔ آخر ءَ سوزیں ورنائیں مڑد ڈیھی ءِ جنت ءُ روش ءِ تاریف کنت۔ اے تھریر نیاما یک لائن ے باز وھش مان آختہ کہ گشی “روش واکی گوں زمین ءَ باز مھر داری”۔تھاخ نمبر 54 سرا یک تھی گیزی کھسوے کہ مھتاب جکھرانی ءَ لکسہ ءُ کھسوا نام داسئی جھری جھانجھری کھلی کھوپری۔یک بزے چھیار شنک تی جھری جھانجھری کھلی ءُ کھوپری ۔اے وسی شنکاں پجھیا باز وشیں زیند ءِ گوازنغیں۔تولغ ایشاں وشیغا گندی خوش نہ بی گڑا یک یک کھاں بزے کلیں شنکاں واڑ ۔گڑا بزا گشی تھرا دہ کھڑدے روشا پھزا وراں۔ بز تولغ ءَ گوں مڑی ءُ تولغ کُشی۔بزا وسی چھکانی بیر گپتہ۔اے کھسو دیری مئے مڑدماں وسی چھکاں کث۔ اے کھسو چھکاں باز دوست بی۔Man In The Sun کتاو کہ فلستین ءِ نامداریں نبشتہکار گسان کنافائی ءَ لکسہ آھی پچار دہ ادنان بلوچ ءَ جوانیں ڈئولے ءَ اے کتاوے تھاخ نمبر 56 سرا کسہ۔ اے کتاو سئے فلستینی مڑدانی سرا اِنت کہ آں چہ ڈیھا جلا وتن کھنغ بیسغاں۔اے سئیں مڑد تھی مڑدے گوں ڈیل کھناں ءُ آں مڑد ایشاں اراک ءَ شہ کوویت ءَ برغ ءَ رازی بی۔آں ھمے سئیں مڑداں ٹرکے ءِ ٹینکی ءَ مان کنت۔ سرھدی چوکی سرا ٹرک دارغ بی ءُ گرم وجہ ءَ اے سئیں مڑد ٹینکی نیاما ساہ دیاں۔ ایشیا رندا ادنان بلوچ ءَ گسان کنافائی ءِ پچار کسہ کہ گسان کنافائی فلستین ءَ پیدا بیسہ۔1948 ءَ گسانی کنافئی ورنا بی۔ وسی اولی سبک اے چہ مشینری اسکولے ءَ پھیلو کنت۔ یونیورسٹی لیول ءَ ا سٹوڈنٹ پولٹکس ءَ بھر زیری۔ رندا کہ 1965 ءَ فلستین ءِ مسلح جدوجھد ءِ بندات بیث گسان کنافانی مسلح جدوجھد ءَ اوار بیث۔گسان کنافانی ءَ 18کتاو نوشتہ کسہ۔پلستین دوزوربیدگ ءُ سیاست ءِ سرا ھزاریں نوشتہ ءُ کالم لکھسغاں۔تھاخ نمبر 58 شہ دومی بھر بندات بی کہ شائری سرا اِنت۔دومی بھر ءَ بلوچ راجءِ نامداریں شائرانی شئیر لکھسغاں۔ اے شائرانی نیامءَ الی بشک جکھرانی، اللہ بشک بزدار، ھمید لیغاری، سئید مزاری، اسمائیل انجم مغیری زوراخ بزدار، مھتاب جھکرانی ڈولیں شوخ لکھوخیں شائر موجود اَنت۔ کتاوے سری بھر تھوخا بازیں شھانی باروا لکھسغیں۔ کتاوے نیامغی ھنداں کھنیں شائرانی لھتے شئیر لکھسغیں۔ اے شائرانی نیاما بھرام جھکرانی جمل جئیند بیورغ رند مست توکلی جام درک شہ مرید مھناز اوار اَنت۔ تھاخ نمبر 63_64 داں شہ مرید اکیڈمی سیوی ءِ کسانیں پچار ۓ کھسغئیں۔ شہ مرید اکیڈمی بندات شہ 2019 ءَ بیسہ۔ پھیشا اے اکیڈمی نام “بلوچی لبزانکی دیوان سیوی ” بیسہ۔ پھزا ایشی نام بدل کسو شہ مرید اکیڈمی سیوی ایر کسہ۔ زامر اے اکیڈمی ءِ مزیں پروجیکٹ ۓ بیسہ۔ روشدرآختغیں بلوچستان ءَ لبزانکے ءِ دیمروی جھد باز کھمینیں۔شہ مرید اکیڈمی کوشش ھمیشیں کہ اے ھنداں بلوچی ادب ءُ شائری ءِ دیمرویءَ یک گامے زیری۔
ھمیزءَ اے کتاب ھلاس بیت۔ اے کتاو ءَ دراہ سنگت زرور وانیں۔ اے کتاو ءَ شہ مڑدم بلوچی وانگ ءُ نویسگ سکی ءُ بلوچی ادب ءِ پھلوا انٹرسٹ گیشتر بی۔ مئے فرز اِنت کہ ما وتی زوان ءَ زانوں ۔کبزہ گیر ءِ ھر وخت کوشش بی کہ نزوریں کوم ءَ چہ آنھیے زوان ءَ دیر داراں چھیا کہ زوان ءِ یک کومے شناخت دارگ نیاما مزیں کرد ءِ است اِنت۔ بلوچ کوم بائد اِنت وتی زوان ءِ تہا کتاواں,نوشتاں ءُ آرٹیکل وانی ءُ وسی زوان دارگ ءِ نیاما وسی کرد ءَ ادا کنت۔زوان دیمروی واستہ الم انت کہ ما ورنا وتی کرد ءَ ادا کنوں۔
زوان دیمروی راج ءِ دیمروی اِنت۔
