کتاب: بلوچ ریاست کی تشکیل
نبشتہ کار: ڈاکٹر شاہ مھمد مری
چمشانک: نگینہ بلوچ
ڈاکٹر شاہ مهمد مری ءِ اے کتاب ءِ تہ ءَ بلوچ اِستان ءِ تشکیل ءَ ڈنّی اُرشکاراں چہ بگر دانکہ نوک راجی ریاست ءِ جوڈ بوگ ءَ درائیں چِست ءُ ایر سرجمی ءَ نویسگ بوتگ اَنت۔
اے کتاب ءِ بندات یک ہزار سال پیش مسیح ءِ ھما اُرشکاراں چہ کنگ بوتگ کہ آ میزان میزان ءَ بلوچستان ءِ سرءَ اُرش کن اَنت۔ آیاں چہ لھتے پُروش ور اَنت پدا واتر بنت ءُ لھتے بلوچستان ءِ سرءَ کبزہ کن اَنت ءُ هُکومتی کن اَنت۔
انچو کہ نبشتہ کار وتی کتاب ءِ تہءَ گشیت” مرچی ءَ چہ یک ھزار سال پیش ایران ءِ تہ ءَ میدانی بادشاھی بوتگ ، آ فارس ءِ سرءَکبزہ کن اَنت ءُ آیانی بادشاھی ءَ ھتم کن اَنت ءُ وت ھکمرانی کن اَنت۔ اے ہما وھد اِنت کہ کُردءُ بلوچ یک بیتگ اَنت ءُ آ آس ءِ منوگر بوتگ اَنت۔
انچوش کہ شش سد سال پیسر وھدے فاتح سائرس گوں وتی لشکر ءِ ھمراھی ءَ بلوچستان ءِ سرءَ اُرش کنگ لوٹیت، گُڑا بلوچ گوں آئی ءِ لشکر ءَ جنگ کن اَنت ءُ آیاں پروش دینت، سائرس ءِ لشکر بلوچستان ءَ یلہ کنت ءُ تچ ایت ، پد ا دیمءَ دگہ جنگے ءَ جنَگ بیت۔ انچوش گُشنت وھدے کہ آئی ءَ کُش انت گڑا آئی ءِ سرگ ءَ ھون ءَ چہ پُرّیں گونی ءِ تہ ءَ کن اَنت ءُ گُشنت ” نوں همنچو ھون وارت کن ئے بُوَر”۔
اِشی ءَ چہ ابید اے کتاب ءِ تہ ءَ ڈنّی تاکتانی یک مزنیں لڑے مارا دست کپیت کہ آیاں وتی کبزہ گیری ءَ گیش ءَ چہ گیش مُھکم کنگ ءِ ھاترءَبلوچ ءِ سرزمین ءِ سرءَکبزہ کنگ لوٹ اِتگ۔ آیاں چہ یکے یونان ءِ سکندر اعظم بوتگ کہ آ گوں وتی مزنیں لشکرے ءَ دریائے سندھ ءَ چہ بلوچستان ءِ سرءَ اُرش کنت داں ھمے وڑءَ ایران ءَ روت ءُ ایران ءِ سرءَ ھم اُرش کنت ءُ رندا ھمودءَ مِر ایت۔ اِشاں چہ رند ءِ دپتراں اگاں ما بچارایں گڑا ھمک رندءَ بلوچ ءُ بلوچ ءِ سرزمین ءِ سرءَ یک ڈنّی تاکتے اتکگ ءُ آئی ءِ سرءَکبزہ کتگ، ھمے وڑءَ وھدے کہ مزدَک ءِدورءُ باریگ ءَ بلوچاں یک تحریکے جنزینت کہ اِشی ءِ نابود کنگ ءَ ھزاراں بلوچانی ھون رِیچیت۔
اِشی ءَ چہ پد ششمی کرن ءَ بِزاں کہ حضرت عیسیٰ ءَ رند حضرت اُمرءِ زمانگ ءَ اَرَباں وتی معیشت ءِ مُھکم کنگ ءِ ھاترءَ بلوچستان ءِ سرءَ کبزہ کت، چہ اِشی ءَ پد ہشتمی کرن ءَ مھمد بن قاسم کئیت مکران ءِ سرءَ کبزہ کنت ءُ چریشی ءَ پد دیبل ( کراچی)ءِ سرءَگبزہ کنت۔
سائرس ءَ بگر داں ارَب ءَ بلوچستان ءِ سرءَ مدام یک نہ یک زورگرے اتکگ ءُ کبزہ کتگ۔
اے کتاب ءِ دومی بھر ءَ بلوچ کلاسیکی اھد ءِ تہ ءَ نبشتہ کار گُشیت، کہ بلوچ ءَ وتی بُن دپتر یک ھزار سال پیش مسیحءَ چہ پِردوسی شائری ءِ تہ ءَ شوھاز اِتگ، پِردوسی شائری ءِ تہ ءَ بلوچ ءِ راج دپتر ءُ آئی ءِ جنگانی ویل شوکیں وڑے ءَ درشان کنگ بیتگ اَنت ۔ 1530 ءَ وھدے اَرگون هاندان کلات ءِ سرءَ هکمرانی کنگ ءَ بیت گڑامرزا کامران آئی ءَ پروش دنت، همے وڑءَ سردار اُمر هان میرواڑی ھم کلات ءَ هکمرانی کنگ ءَ بیت بلے لَھتے وھدءَ پد رِند ءُ لاشار ءِ جنگ بیت گڑا چِداں چہ سردار اُمر هان میرواڑی ءَ پروش دئے اَنت ءُ میر مَندو رِند ءَ کلات ءِ خان جوڈ کن اَنت۔
پدا میر اُمر ءِ زال گوں وتی چکّ ءَ روت مستونگ ءَ، بلے رندا بجّار وتی پت ءِ بیر ءِ گرگ ءِ ھاترا پدا کلات ءَ روت ءُ میر مَندو رِند ءَ کُش ایت پدا کلات ءُ کلات ءِ کش ءُ کِرّ ءِ ھندانی سرءَ کبزہ داریت ءُ ھمودءَ هکمرانی کنت۔ بلے رندا بجّار وتی سرداری ءَ یلہ کنت گڑا آ وھدءَ کلات ءِ سرءَ مرزا کامران مغل کبزہ ءَ داریت ءُ گوں مھلوک ءَ وپاداری ءِ دروگیں کول کنت بلے وھدے کہ مھلوک چہ اشی ءَ بیزار بنت گڑا مرزا کامران ءِ هکومتی ءَ ہلاس کن اَنت ءُ آئی ءَ پد احمد زئی هاندان کلات ءِ سرءَ هکمرانی کن اَنت ءُ میر احمد هان ءَ کلات ءِ خان کن اَنت۔
اِشی ءَ چہ اَبید اگاں ما پانزدہمی کرن ءِ گپّءَ بہ جنیں گڑا بلوچ چاگرد ءِ تہءَ آ کہ لس بلوچ بوتگ اَنت آیاں گیشتر کِشت ءُ کشاری کتگ یا کہ پس چارینتگ ءُ آ کہ مستریں تبکہ ءِ مردم بوتگ اَنت آہاں زند گوں شائری، ناچ، سوت، شکار ءُ جنگانی تہ ءَ گوازینتگ۔ اشی ءَ چہ پد رِند ءُ لاشار ءِ جنگ ءِ نوبت کئیت اِنت، وھدے کہ تُرک لارڈ هسین کئیت گڑا آ درستاں چہ پیسر لاشار ءِ (foundation) ءَ تباہ کنت ءُ ھمے پیما رِندانی زمیناں گیپت ءُ رِنداں درانڑیھ کنت۔
ھمے وھدا رند ءُ لاشار ءِ میان ءَ 30 سالی جنگ بیت بلے اے جنگ ءِ تہ ءَ ایوک ءَ لس بلوچ کُشگ بنت۔ ھمے پیمءَ چاکر ھم بلوچستان ءَ یلہ کنت ءُ ملتان ءَ روت گڑا اودءَ سلطان شاہ مهمود چاکر ءَ بازیں زمینانی واھُند کنت ءُ آئی ءَ دگہ بازیں کمک ھم کنت، بلے وھدے کہ آ مِریت گڑا آئی ءَ پد آئی ءِ نام ھم گار بیت۔
گڈی بھر ءَ نبشتہ کار بلوچ اِستان ءُ آئی ءِ بُنھِشت ءَ شوکیں وڑے ءَ درشان کنت۔ میر ابداللہ هانءَ بگر داں نوری نصیرهان ءُ میر اهمد یار هان ءَ چہ درائیں جنگانی کِسہ نبشتہ کتگ اَنت۔
اے کتاب ءِ بندات ءَ بگر داں گُڈ سرءَ وانگ ءَ پد همے پدّر بیت کہ بلوچ ءِ سرءَ مدام زوراکی کنگ بوتگ، بلوچ راج انچو کہ گھتری ءِ نیمگ ءَ روَگ ءَ بوتگ گڑا یک نہ یک ڈنّی زورگرے اتکگ ءُ بلوچ ءُ بلوچ ءِ زمین ءِ سرءَ کبزہ کتگ بلے بلوچ ءَ مدام وتی زمین ءِ رکّینگ ءِ ھاترءَ جنگ کتگ ءُ وتی ھون داتگ۔
بلوچ اسٹوڈنٹس ایکشن کمیٹی
