بلوچ آریائی تعلقات
نبشتہ کار: ڈاکٹر فاروق بلوچ
چمشانک: شمس بلوچ
بلوچ آریائی تعلقات ڈاکٹر فاروق بلوچ ءِ کتاب اِنت کہ 2023 ءَ چاپ ءُ شنگ بوتگ۔ ڈاکٹر فاروق بلوچ منی ھیال ءَ کسی توسیپ ءِ مھتاج نہ اِنت، ڈاکٹر ھما راجدپتر نویساں چہ یکے کہ مدام راجدپتر ءَ راستی ءَ گوں نبشتہ کنت، آ بلوچ ءِ راجدپتر ءِ تہ ءَ پٹ ءُ پول ءُ گوں منانک ءَ نبشتہ کنت ءُ آ ھما وتگڑیں راجدپتر نویس ءُ استان ءِ بیانہءَ رد کنت ءُ راستی ءَ پدر کنت ، ڈاکٹرءِ کُلیں گپ راستی ءُ سائنسی پٹ ءُ پولاں گوں بندوک اَنت۔ اے 240 تاک ءِ کتابے کہ ایشیءِ تہءَ ھما راستی مان اَنت کہ ھما کوھنیں راجدپتر نویسانی کتاباں مان بوتگ اَنت بلے بیھ مارا پیشدارگ نہ بوتگ اَنت۔ اے کتاب ءِ شش در اَنت ۔
اولی در : بلوچ ءِ کوھنیں وتن
دومی در : آرینانی کوھنیں وتن
سئمی در : آرین ءِ آھگ ءَ ساری دمگ ءِ ھکمرانیں تمن
چارمی در :آرینانی آھگ ءُ آباد بوھگ ءَ رند دمگ ءِ سیاسی جاور ھال دانکہ اربانی اُرش ءَ
پنچمی در : بلوچ ءُ ایرانیانی سیادی ءُ نزیکی
ششمی در : یک شریں زلورت
اے کتاب ءِ اولی در ءِ تہ ءَ بلوچانی پیش ءِ وتن ءَ گیشین ایت کہ بلوچانی بنکی وتن کجا بوتگ نبشتہ اِنت کہ اگاں یونانی راجدپتر نویس بابا ء ِراجدپتر نویس ھیروڈوٹس بہ چار یا ابوالقاسم فردوستی ءِ شاہنامہ ءَ کہ آواں بلوچانی ھند ءُ دمگ ھمے گوشتگ ءُ نبشتہ کتگ اَنت کہ روچ مروچی بلوچ ھمے دمگاں آبات اَنت بلے رند ءَ لھتیں انگریزاں بلوچ درامد نبشتہ کتگ کہ آ برتانیہ چاریگ بوتگ اَنت پدا مئے بلوچ نبشتہ کاراں ھمے رجانک کتگ اَنت ءُ بے پٹ ءُ پول ءَ ھما گپ دیمءَ برتگ اَنت اگاں ما بہ چار ایں زوراک وھدے ترا ایردست کنت آ ترا ھمے گوش ایت کہ تو اے زمین ءِ سر ءَ درآمدیے۔ دیمتر ءَ نبشتہ اِنت کہ لھتیں ایرانی گوستانک نویساں مدام ھما بلوچ ھکمران بوتگ اَنت آھان ءَ آرین نبشتہ کتگ بلے چش نہ اِنت ،اگاں ما وھدیگیں کتاباں بہ چار ایں گڑاں راستی وت پدر بیت کہ آ کتابانی تہءَ ھمے نبشتہ اِنت کہ اے انوگیں بازیں دمگ کہ ایران ءِ بھر اَنت اود ءَ بلوچانی ھاکمی بوتگ ۔
دوھمی در ءِ تہ ءَ آرینانی وتن گیشینگ بیت کہ آرین چوں اے دمگ ءَ اتکگ اَنتءُ اے کُجیگ اَنت ؟ نبشتہ اِنت کہ آرین لڈ ءُ باری ٹولی یے بوتگ کہ آھانی کر ءَ پس ءُ مال بوتگ ۔لبز آرین متلب انگہ نہ گیش اِتگ لھتیں نبشتہ کار گوش ایت اے لبز آرین ھمے واستہ کارمز بوتگ کہ لبز آریہ متلب در آمد، چہ ڈن ءَ اَتکگیں۔ دیمتر ءَ نبشتہ اِنت کہ آرینانی وتن انگہ نہ گیش اِتگ کہ ایشانانی بنکی وتن کجام بوتگ، اے باز وھد بیت کہ اے ٹولی ھندوستان ءُ پارس ءُ دیم پہ یورپ ءِ نیمگ ءِ دمگاں گرداں بنت باز وھدگوز ایت اے وتی بنکی وتن ءَ بے ھال کن اَنت لھتیں ایشاں وست ایشیا ءُ روس ءِ نیمگ ءِ جھمنند گوش ایت آھان ءَ آپ ءُ کہچر ءِ زلورت بیت آ اوگانستان ھندوستان ایران ءُ یورپ ءِ نیمگ لڈ ءُ بار کن اَنت آریائی جنگول ءُ اسپ سوار بوتگ اَنت ھر کجا شتگ لٹ ءُ پُل کوتگ ۔
سیئمی در ءِ تہ ءَ آریائی آھگ ءَ ساری دمگ ءِ ھکمرانیں تمنانی بارو ءَ نبشتہ اِنت کہ آرینانی آھگءَ پیسر اے دمگ ءَ البرز ءُ زاگروس ءِ کردانی ھکومتی بوتگ۔(کرد آ وھد ءَ بلوچانی قبائلے بوتگ) اے ھکومت پیش دادی ءِ نام ءَ زانگ بیت بلے آ وھد ءَ ھاسیں نامے نہ بیت پمیشکا ھر تمن ھکومتی ءَ کیت وتی تمن ءِ نام ءَ ایر کنت۔ پیش دادی ھکومت 2100 پیش مسیح ءَ بندات بیت کہ کیومرس نامیں مردے بیت پیش دادی ھکومت ءِ بنیاد ءَ ایر کنت لھتیں نبشتہ کار پیش دادی ءَ آرین گوش ایت، بلے فاروق اشی ءَ رد کنت پرچاکہ آرین 1600 پیش مسیح ءَ اتکگ اَنتءُ پیشدادی پیسریگیں اَنت۔
پیش دادی بادشاھانی تہ ءَ زھاک نامیں بادشاہے سک نامدار اِنت گوں وتی زلم ءُ زوراکیاں آئی ءِ ھلاپ ءَ کاوہ آھن گر آشوبے کار ایت زھاک ءَ پروش دنت پریدون نامیں مردے را بادشاہ کنت رند ءَ پیشدادی نزور بنت ھکومت پیشدادی ءَ چہ میدانی نیمگ ءَ روت۔ مید بلوچانی نامداریں تمنے اے وھدءَ آرین پارس ءِ تہ ءَ آباد بنت اے سیئے تمن بنت ھکامنشی(ہخامنشی)،ماسپی ءُ ماراسپی ءِ نام ءَ زانگ بنت بلے اے بنیاد ءَ یک نامے ءَ توار کنگ بنت “بازارگد” پدا ھمے لبز پسارگر، پساگرد ، پارسگرد ءُ پدا پارس جوڑ بیت اے دمگ پارس ھمے تمن ءِ نام ءِ سبب ءَ پارس گوشگ بوتگ۔
مید تمن وھدے ھکمرانی ءَ کیت گڑاں آئی ءِ اولی ھکمران کباد بیت، کباد ءَ چہ پد آئی ءِ زھگ کاؤس ھکمران بیت آ کیکاؤس ءِ نام ءَ نامدار بیت آ 633 تا 655 پیش مسیح ءَ ھکومت کنت ، کیکاؤس ءَ چہ پد کسرو ھکمرانی ءَ کیت ھمے وڑءَ مید تمن اے دمگ ءَ مادستان ءِ نام ءَ دنت میدانی ھکومتی 550 پیش مسیح ءَ ھلاس بیت ءُ ھکامنشی ءِ سردار سائر میداں پروش دنتءُ ھکومتی ءَ وتی دست کنت۔
چارمی در ءِ تہ آرین ءِ آھگ ءُ آباد بوھگ ءَ رند دمگ ءِ سیاسی جاور ھال ءَ گیشین ایت دانکہ ارب ارشکاراں انچوکہ کہ ساری گوشت کہ پیشدادی ھکومت ءِ وھد ءَ آریائی کاینتءُ پارس ءَ آباد بنت پدا میدانی ھکومت ءِ وھد ءَ گوں ملکی سیاست ءَ اوار بوھگ بندات کن اَنت گڈا ھکامنشی ھکمران سائرس گڈی مید ھکمران ءُ وتی پیروک آستاگس ءِ ھکومتی ءَ ھلاس کنت ءُ آریائی ھکومت ءِ بنھشت ءَ ایر کنت۔ بیست سال ھکومت کنت انچو لھتیں گوش اَنت کہ سائرس یک ھزار راجانی سر ءَ ھکومتی کنت ءُ سائرس ءَ چہ پد آئی ءِ زھگ کمبی سس 530 پیش مسیح ءَ ھکومتی ءَ کیت ۔ ایشیءَ رند دار اول کئیت ءُ اے گوں بلوچاں جنگ کنتءُ مکران ءَ ایردست کنت دار اول 30 سال ھکومتی کنت ، ایشیءَ پد زرکسیز کئیت۔ ایران ءِ راج آرا کشارشیا گوش ایت اے بازیں دمگاں کبزہ کنت ، یونان ءُ یورپ ءَ گوں جنگ کنت گڑا یونانی ایشی ءَ پروش دینت گڑا زرکسیز واتر پارس ءَ کیت۔ 466 پیش مسیح ءَ آئی ءِ جند ءِ سپاھی آہی ءَرا کُش ایت، ھمے وڑءَ ھکامنشی ھکومتی روان بیت گڈی ءَ ارد شیر سئمی بادشاہ بیت کہ آئی ءِ اسل نام کدمان بیت ایشی ءَ پد سکندر آزم 331 پیش مسیح ءَ پارس ءِ سر ءَ اُرش کنت ءُ ھکامنشی ءِ ھکومتی ءَ پروش دنت ۔ دیمتر ءَ سکندر آزم ءِ بابت ءَ نبشتہ اِنت کہ آ مکدونیہ ءِ بادشاہ پلیکوس (Philip فلپ) ءِ زھگ بیت وھدے سکندر مزن بیت گڑاں آئی ءَ را ارستو وانین ایت ءُ راجکاری ءُ ملکاری ءِ پڑ ءَ سرپدی دنت۔ وھدے سکندر پارس ءِ سر ءَاُرش کنت گڑاں آ اے دراھیں دمگاں دانکہ پنجاپ ءِ بیاس کور ءَ وتی دست ءِ چیرءَ کنت۔ اے وھد ءَ آئی ءَ را یازدہ سال بیت کہ چہ یونان ءَ درکپگ ءَبیت گڑا آئیءِ لشکر دیم ءَ روگ ءَ نہ من ایت گڑا واتر بوھگ ءِ ارادہ کنت ۔ واتر بوھگ ءَ بیت گڑا آ وتی لشکر ءَ سئے بھر ءِ تہ ءَ کنت یکے درہ بولان ءَ یکے زِرءِ تہ سپر کنت یکے کمان ءَ سکندر وت کنت آ زر ءِ کش ءِ دمگاں سپر کنت۔ بلوچستان ءِ تہءَ سپر کنگ ءَ آ مزنیں جیڑھانی دیمپان بیت۔ اے وھد ءَ آئی ءِ بازیں سپاھیگے گژن ءُ تن ءَ مِر ایت دانکہ آ ایران سر بیت ۔ کمو جلگ ءَ پد دیم پہ یونان ءَ روگ ءَ بیت وھدے آ بابل ءَ سر بیت 323 پیش مسیح ءَ آئی ءَ نمونیا ءِ نادارھی گیپت ءُ آ 33 سالءِ امبر ءَ بیران بیت۔ چہ سکندر ءَ پد آئی ءِ پوج ءِ جنرل آئی ءِ دمگاں بھر ءُ بانگ کن اَنت وت زور اَنت۔
سکندر ءَ چہ پد بلوچستان ءِ ھندی موریا ءِ کھول کیت لھتیں سال ھکومتی کنت پدا ساکا تمن روبرکتی بلوچستان ءُ ایدگہ دمگاں ھکومتی کنت پدا اے تمن بلوچ ءُ پشتونانی تہ ءَ ہوار بیت۔ ایشی پد اشکانی تمن ءِ ھکومتی بیت کہ بازیں مدتے پد ھلاس بیت ہمے پیم ساسانی ھکومتی بندات بیت ھمے ساسانی بادشاھاں چہ یکے انوشیروان بیت کہ آ بلوچ بگیری ءَ لشکر کشی کنتءُ بلوچ ءِ چکچینی ءِ جار ءَ جنت ءُ بازیں بلوچے کُش ایت، کوہ ءُ کوچگ ڈنگر ءُ بوچ بلوچ ءِ جوناں چہ پُر بنت، ھمد ءَ ساسانی ءُ بلوچانی نیام ءَ دوری بندات بیت ءُ وھدے عرب کا ئینت ایران ءَ کبزہ کن اَنت گڑابلوچ عربانی نیمگ ءَ بنت۔
پنچمی در ءِ تہ ءَ بلوچ ءُ ایرانیانی سیادی ءُ نزیکی ءَ گیشین ایت ءُ گوش ایت بلوچ چہ کرناں سندھ کور ءَ بہ گر دانکہ روبرکت ءَ انوگیں ایران ءِ ھند نیام گوریچانی روبرکت ءَ ایران ءِ کوہی دمگ کوہ البرز ءُ زاگروس ءَ داں بلوچ آباد بوتگ اَنت ھمے وڑءَ ایران ءِ رو ایرکپتی دمگ کرمان ءِ شھراں بلوچ آباد بوتگ اَنت، گوریچانی روبرکت ءَ ءَ بلوچانی نامیں تمن کرُد آبات بوتگ اَنت، اے درست ھما کوھنیں کتاباں نبشتہ اَنت ۔ آ وھد ءَ آرین تمن اے تمنانی دیم ءَ باز نزور بوتگ اَنت، آرین کائنت یک کنڈے ءَ آباد بنت۔ ھیروڈوٹس نبشتہ کنت کہ آرین سئے تمن بوتگ اَنت آدگہ در آرین بوتگ اَنت آ ھمے ھند ءِ بنکی جھمند بوتگ اَنت۔ وھدے میدانی ھکمرانی بیت گڑاں ھما وھد ءَ آرین وتی جتائیں نشان ءُ جتایں تاکت ءِ جھد ءَ کن اَنت بلے کوھنیں کتاباں نبشتہ اِنت کہ آرین ءَ میداں سَنگ (ٹیکس) داتگ۔ گُڈی مید سردار ھکامنشی ءِ سردار کمبوجیہءَ وتی زامات کنت، ھمے سبب ءَ آرین ءُ بلوچانی نزیکی بیت بلکہ ایدگہ تمناں گوں سانگبندی ءُ نزیکی بوتگ۔ بلے کوھنیں کتاباں بس میندانے ءُ کمبوجیہ آروس نبشتہ اِنت، مید ھکومت ءِ وھد ءَ آرین ءِ مردم لشکر ءَ ءُ ھکومتی ءَ اوار بوتگ اَنت بلے ایدگہ تمنانی کچ ءَ کم بوتگ اَنت۔ راجدپتری کتاباں اے زانَگ بیت کہ بلوچاں کدی وت ءَ آرین نہ کتگ بلکہ آرین ءَ ھر وھد ءَ بلوچاں گوں نزیکی ءِ جھد کتگ بلوچ تمناں مدام پارس ءِ رکینگ ءَ وتی کرد پیلو کتگ مزنیں اُگدھانی سر ءَ بلوچ بوتگ اَنت پرچہ بلوچ ھمد ءِ بنکی جھمنند بوتگ اَنت ھر دری اُرش کنوکے اتک ءَ آ یکمشت بوتگ ءُ جنگ کُت ءَ بلے پدا آرین وھدے تاکت ءَ اتکگ اَنت گڑاں ھر وھد ءَ بلوچ ءِ نسل کشی کُت ءَ انوشیروان ءِ اُرش ءَ پد بلوچ گوں آرین ءَ سیادی ھراب بیت چمدا بلوچ ءِ ایرنیانی دژمنی بندات بیت پدا پارس ءِ نام ایران ھمے واست ءَ کتگ کہ اے ھما آرین ءِ سبب ما گندیں بلوچ ءِ ءُ ایران دژمنی روچ مروچی بر جاہ اِنت
ششمی در ءَ انوگیں بلوچ ءِ لوٹانی زلورت ءِ بارو ءَ نبشتہ اِنت کہ بلوچ ءَ را یکمشت بوھگ لوٹ ایت ءُ وتی سر ڈگار ءُ پجار رکینگ لوٹ ایت کہ انوں ایران بلوچ ءِ نسل کُشی ءَ کنگ ءَ اِنت، بلوچ مھلوک ءَ را وتی نام ءِ دیم ءَ بلوچ نبشتہ کنگ ءَ نیلگ ءَ اِنت اے کتاب ءِ تہءَ درست پدر اَنت ءُ شریں وڑے گیشینتگ اَنت،
