نوجوانوں کا گیت
چمشانکار: تنویر بلوچ
کتاب “نوجوانوں کا گیت” یانگ مو ءَ نبشتہ کُتگ کہ آ 1958 ءَ چاپ ءُ شنگ بوتگ۔ یانگ مو یک چائنیز نبشتہ کارے بیتگ ءُ آ چین ءِ تہءَ جاپان ءِ ھلاپ ءَ جُنز ءِ بھرے بیتگ۔ آھی ءَ کمیونسٹ پارٹی ءِ دزچیری ءَ پہ وتی بزگ ءُ ایردستیں راج ءَ جُہد کُتگ ءُ جُتا جُتائیں فرنٹاں سنگراں کار کُتگ۔
اے کتاب ءِ جِند جاپان ءِ ھلاپ ءَ چائنیز نوردبرانی گَل ءُ آھانی کِردءِ سرءَ اِنت، کہ نودربراں جاپان ءِ ایردستی ءِ بیگری ءَ کُجام داب ءَ گھگیری کُتگ۔ آ توری رونک، گُشتانک، لٹریچر، موبلائزیشن ءِ درُشم ءَ بہ بیت یاکہ پہ تُپنگ ءِ زور ءَ جاپانی سامراج ءِ ھلاپ ءَ اوشتگ بہ بیت۔
کتاب ءِ بنجاہی کردار یک جنکے کہ آھیءِ نام “تاؤ چینگ” اِنت۔ آ یک سرمایہ داریں پِت ءُ یک بزگریں ماتےءِ چُک بیت۔ آھیءِ مات سرمایہ دار ءِ زمینانی سرءَوتی پِت ءَ ھوار کارکنگ ءَ بیت کہ آھی ءَ تاؤچینگ ءِ مات دوست بیت ءُ آھی ءَ پہ زور گوں وت بارت۔ وھدے تاؤ چینگ ودی بیت گُڑا آ دوبر آھی ءَ وتی ھلک ءَ دیم دات۔ چوشکہ سرمایہ دار ءَ آ وھد ءَ چُک نہ بیت گُڑاتاؤچینگ ءَ وتی گور ءَ دار ایت۔
بندات ءَ سرمایہ دار ءُ آھیءِ لوگ بانُک چُک نہ بیگءِ سبب ءَ تاؤچینگ ءَ سک دوست دار اَنت بلے وھدءِ گوزگ ءَ گوں آھانی لوگ ءَ بچکیں چُکے ودی بیت گُڑا آھانی مھر پہ تاؤچینگ ءَ روچ پہ روچ کم تران بنت۔ وھدے آھیءِ ماتو ءُ پِت اے داب ءَ گوں آھی ءَ پیش کاینت گُڑا آ اشاں چہ بے زاریگ بیت ءُ دیر نہ بیت کہ تاؤچینگ اسکول ءَ وانگءَ بیت گُڑ ا آ وتی ماتءِراستی ءَ سرپد بیت پدا آ لوگ ءَ یلہ کنگ ءِ پیسلہ کنت ءُ دور یک تیاب دپی دمگے ءَ روت۔ لوگ ءِ یلہ دیگ ءَ گوں آھیءِ دل ءَ پہ سرمایہ دار ءُ بورژوا تبکہ ءِ ھاتر ءَ یک عجبیں زِدءُ کُنتے ودی بیت۔
آ ھما کوچگ ءَ روگ ءَبیت گُڑا آ جیڑ ایت کہ آ وتی دزگہُار ءِ گور ءَ اسکول ءَ وانین ایت ءُ وتی زندءَ گوازین ایت۔ آ کہ انچو اودءَ سر بیت ءُ کوچگ ءِ ریل اسٹیشن ءَ چہ کُھلی ءِ آھی ءَ اسکول ءَ برگ بیت گُڑا راہ ءَ آھیءِ چم ماں نیل بومیں زِر ءَ کپ اَنت ،آھی ءِ دل ءَ یک ارمانے ودی بیت ءُ آ کُھلی ءَ گُش ایت، شُما چنچو وش بھت اِت کہ ھدا ءَ شُمارا چوشیں شوکیں زِرے داتگ۔ کُھلی گوں گیمرتگیں گالوارے ءَ دارئین ایت، ما ھما وھد ءَ وش بھت بیتگ اَت ایں وھدے ما وتی جِندءِ زِر ءَ کسی جُست ءَ ابید ماھیگ گِپت بہ کُتیں۔ کُھلیءِ اے پسّو جاپان ءِ زوروکی ءُ چائنیز راج ءِ ایردستی ءِ اسلیں درُشم ءِ پدرائی ءَ کنت کہ اودءَ آھاں وتی زِر ءَ روگ ءُ ماھیگ گرگ ءِ رزا نہ بیتگ۔
تاؤچینگ ھمے اسکول ءَ وانینگ ءَ بیت کہ جاپان چین ءِ رودرآتکی ءُ گوریچانی بازیں دمگاں کَبزہ کَنت۔ اشی ءَ چہ سرجمیں چین ءِ تہءَ جاپان ءِ ھلاپ ءَ گھگیری ءِ یک جُنزے چست بیت ءُ ارکُجا پیر، کماش، ورناہ ءُ زھگ ھمے سرھال ءِ سرءَ باوست کن اَنت ءُ تاؤچینگ جاپان ءِ ھلاپ ءَ گھگیری ءِ ھاتر ءَ اسکول ءَ زھگانی تربیت کنگ بِنا کنت۔ ہمے میان ءَ ہمے کوچگ ءِ ورناہے، آ شاہ دربرجاہ ءَ وانگ ءَ بیت ءُ کمیونسٹ پارٹی ءِ باسکے بیت، کیت ءُ تاؤچینگ ءَ گوں چینی مھلوک ءِ بزگی، جاپان ءِ زُلم ءُ آھانی جُنز ءِ بابت ءَ باوست کنت۔ اے میان ءَ ھمک چینی ءِ دل ءَ پہ جاپانی سامراج ءُ آھانی داشتگیں دلارانی ھلاپ ءَ مزنیں زِد ءُ کنتےودی بیت۔ جاپان ءِ زُلم ءُ زوراکیانی سبب بیت کہ بازیں ورناہے گوں جُنز ءَ ھوار بیت ءُ ہمشانی سبب بیت کہ تاؤچینگ وڈیں یک تچکیں جَنکے زوراک ءِ ھلاپ ءَ اوشتگ ءِ پیسلہ کنت۔
دیر نہ بیت کہ تاؤچینگ آ کوچگ ءَ چہ درکیت ءُ شھر ءَ کیت ءُ پارٹی ءَ گوں بندوکیں ورناھانی سرکل ءُ دیواناں ھوار بیت۔ آھانی گپ ءُ باوست، پہ زمین ءَ کُربانی ءِ جزبگ تاؤچینگ ءَ پہ جُہد ءَ گیش سکین دینت ءُ ھما ورناہ، کہ آ کوچگ ءَ گوں تاؤچینگ ءَ دوچار کپتگ اَت، تاؤچینگ ءَ لھتے کتاب پہ وانگ ءَ دنت۔ تاؤچینگ انچو گوں جُنز ءُ جُہد ءَ ھدوک بیت کہ آ اے کتاباں لہتے روچ ءِ تہءَ وان ایت ءُ ھلاس کنت۔ ھمے پارٹی ءَ گوں بندوکیں سنگت تاؤچینگ ءَ گوں پارٹی کاراں ھوار کن اَنت۔ ھمے کارانی سبب ءَ آ برے تاؤچینگ ءَ یک کوچگے ءَ دیم دینت ءُ برے دومی ھند ءُ دمگاں۔
چین ءِ مزن مزنیں شھرانی تہ ءَ نودربر یکجاہ بنت ءُ جاپان ءِ ھلاپ ءَ رونک ءُ زہرشانی کش اَنت ءُ تاؤچینگ ہم ہمشانی بھرے بیت۔ شھرانی تہءَ جُتائیں شاہ دربرجاہانی نودربرانی یونین بنت ءُ آ بازیں وھد ءَ کلاس ءُ ایندگہ شئے آں ہم بائیکاٹ کن اَنت۔ اے چست ءُ ایراں گوں بندوک بیگ ءِ سبب ءَ تاؤچینگ ہزار جیڑہءُ جنجالانی دیمپان بیت ءُ آ وتی سرجمیں زِند ءَ پہ جُنز ءَ ندر کنت۔ آ جُنز ءُ راجی آجوئی ءِ ھاتر ءَ ارچ وڈیں کَھرانی دیمپانی ءَ جاڈیگ بیت۔ جاپان ءِ زوراکی روچ پہ روچ ودان بنت ءُ آ چین ءِ گیشیں ھند ءُ دمگاں کَبزہ کنان کنت۔ ہمے زُلم ءُ زوراکیانی میان ءَ پارٹی ءِ دوزواہ ءُ باسک گرگ ءُ بندیگ کنگ بنت کہ آھانی تہءَ تاؤچینگ ہم ھوار بیت۔
زندان ءِ تہءَ تاؤچینگ ءَ ھوار دگہ سک باز زالبول بندیگ بیت۔ ہما کوٹی ءَ کہ تاؤچینگ بندیگ کنگ بیت اودءَ پیسرءَچہ یک زالبولے بیت کہ آ ہم پارٹی ءِ باسکے بیت۔ ہما تاؤچینگ ءَ گوں گپ ءُ باوست کنان ءَ گُش ایت کہ اے جیل ءِ تہاریں کوٹی کمیونسٹ پارٹی ءِ درسگاہے ءُ ادءَشعوری ھوالہ ءَ باسکانی تربیت کنگ بیت۔ آ مُدام تاؤچینگ ءُ آھی دگہ یک جَنکیں ھمراہے ءَ پہ جُہد ءَ سکین دات، آھاں اسل کُربانی ءِ درُشم ءَ سرپد کنت۔ ہمے میان ءَ ہما زال تاؤچینگ ءَ یک جُستے کنت، کہ آیا آ کمیونسٹ پارٹی ءِ باسکے بیگ لوٹ ایت، تاؤچینگ پہ پھر گوں دلیریں گالوارے ءَ گُش ایت، “ھووو۔۔۔ اگاں منی زِندءَمنءَ باسکی دیگ مہ بیت گُڑا الم منی مرگ ءَ پد منءَ پارٹی ءِ باسکی دیگ بہ بیت۔” تاؤچینگ ءِ اے پسّو پدر کنت کہ آ پہ جُنز ءُ پارٹی ءَ چنکدر ھُدوناک بیتگ۔
کمے وھدءِ گوزگ ءَ پد تاؤچینگ یلہ کنگ بیت ءُ آھی ءَ زوت پارٹی ءِ باسکی ہم دیگ بیت۔ باسکی رسگ ءَ گوں ھوار آھی ءَ اے زمہ واری ہم دیگ بیت کہ آ شاہ دربرجاہانی تہءَ جاپان ءِ زوراکیانی سبب ءَ ھاموش بیتگیں نودربرانی یونین ءُ کمیٹیاں دوبر فعال بہ کنت۔ تاؤچینگ ہمے ٹاسک ءَ سرجم کنگ ءِ ھاتر ءَ شاہ دربرجاہ ءَ پارٹی ءِ باسک ءُ لس نودربراں گوں نزیکی کنت ءُ آھاں دوبر پاد آیگ ءِ سکین ءَ دنت۔ اے میان ءَ تاؤچینگ بازیں اڑ ءُ جنجالانی دیمپان بیت بلے گُڈسر ءَ آ سوبمند بیت ءُ نودربر جاپانی سامراج ءِ ھلاپ ءَ پاد کاینت ءُ وتی زمین ءُ راج ءَ گوں مَھر ءِ درشان ءَ گوں وتی اوگاماں کن اَنت۔ تاؤچینگ ءُ شاہ دربرجاہاں وانوکیں پارٹی ءِ ایندگہ نودربر باسکانی برورد بیت کہ ھاموش بیتگیں نودربر دوبر پاد کاینت ءُ جاپان ءِ دیم ءُ چو کوہ ءَ اوشت اَنت۔
اے کتاب ءِ وانگ ءَ پد ما دیست کن ایں کہ چین ءِ آشوب ءِ تہءَ نودربرانی چنچوکیں مزنیں کِردے بیتگ۔ چین ءِ تہءَ ناں بلکہ دگنا ءِ ہمک جُنز ءُ آشوبانی تہءَ نودربرانی مزنیں کِردے گون بیتگ۔ اے کتاب پہ وتی راج ءُ بزگیں مھلوک ءَ گیش جُہد کنگ ءِ سکین ءَ دنت ءُ ما سرپد بیت کنیں کہ تچکیں آشوبی جُہدکار کُجام اَنت۔
